1-2. Eaa tei tupu ana ki te aronga ka papetitoia, e eaa taau ka akamanako?

 I KITE ana koe i tetai pupu aronga te ka papetitoia? Ka akarongo koe i to ratou reo papu i te pauanga i te nga uianga e rua i mua ake ka papetito ei. Ka kite koe e kua mataora te ngutuare tangata e te au taeake. Me tu mai te aronga papetitoia mei roto i te vai, ka akarongo koe i te rima pokarakara e ka kite atu i to ratou rekareka. I te epetoma e tauatini ua atu te rave ra i teia takainga, kia riro mai ei Au Kite akatapuia, papetitoia no te Atua ko Iehova.

² Akapeea koe? Me te manako ra koe kia papetitoia, e tangata puapinga koe i roto i teia ao kino tei “kimi i te Atua [ko Iehova].” (Sala. 14:1, 2) Kua tataia teia atikara no kotou, te aronga mapu e te aronga pakarikari. Ko tatou tei papetitoia ka inangaro rai tatou i te akaketaketa i to tatou maroiroi kia tavini mutu kore ia Iehova. No reira ka akamanako tatou e toru tumu ka tavini ei tatou ia Iehova.

3. Eaa ra te au tavini o Iehova i inangaro ei i te tuatua mou e te tuatua tika? (Salamo 119:128, 163)

³ Kua akaue a Iehova i tona iti tangata kia ‘inangaro i te tuatua mou.’ (Zeka. 8:19) Akamaroiroi a Iesu i tana au pipi kia kimi i te tuatua tika. (Mata. 5:6) Tera te aiteanga kia inangaro tikai tetai i te rave i te tika, te meitaki, e kia mā ki mua i te mata o te Atua. Te inangaro ra ainei koe i te tuatua mou e te tuatua tika? Papu ae. Kua rikarika koe i te pikikaa e te au mea tarevake e te kino. (E tatau ia Salamo 119:128, 163.) Akaari mai te pikikaa i te tu o Satani, te tutara o teianei ao. (Ioa. 8:44; 12:31) Tetai akakoroanga o Satani koia oki kia akakino i te ingoa tapu o te  Atua ko Iehova. Kua pikikaa a Satani no runga i to tatou Atua mei te taime mai o te meameaau anga i Edene. Kua akavare aia i tetai kia irinaki e e Tutara karapii e te pikikaa a Iehova tei tāpu i te meitaki mei te tangata ravarai. (Gene. 3:1, 4, 5) Kua riro ta Satani au pikikaa no runga ia Iehova ei akakino i te au manako e te ngakau o te tangata. Me iki te tangata kare e ‘inangaro i te tuatua mou,’ ka akakeu a Satani ia ratou kia rave i te au mea tau kore e te au mea viivii.​—Roma 1:25-31.

4. Akapeea a Iehova i te akaari mai iaia ei “Atua tuatua-mou”? (Akara katoa i te tutu.)

⁴ E “Atua tuatua-mou” a Iehova, e te apii maira aia i te tuatua mou ki te aronga tei inangaro iaia. (Sala. 31:5) Na roto i teia te tauturu ra a Iehova ia ratou kia akarangatiraia mei ta Satani au pikikaa. Te apii katoa maira a Iehova i tona au tavini kia tuatua e kia rave i te tika. Te ka tauturu ia ratou kia akaari i te tu ngateitei e te ’au. (Mase. 13:5, 6) Kua rave ainei aia i te reira kia koe, ia koe e apii ra i te Pipiria? Kua kite mai koe e e meitaki atu ta Iehova au ravenga no te tangata ravarai e noou katoa. (Sala. 77:13) No reira, ka inangaro koe i te rave i te tuatua tika. (Mata. 6:33) Ka paruru koe i te tuatua mou e te patoi anga i te tuatua akakino no runga i to tatou Atua ko Iehova. Akapeea koe me rave i te reira?

5. Akapeea koe me turuturu i te tuatua mou e te tuatua tika?

⁵ Ka akaari koe na roto i toou oraanga e: “Ka patoi au i ta Satani au pikikaa, e ka turuturu i te tuatua mou. Inangaro au ia Iehova ko toku Tutara Ngateitei, e ka inangaro au i te rave i tana i tuatua e tika.” Akapeea koe me iki i teia? E pure kia Iehova e te akatapu ia koe kiaia e oti ka akaari i teia ki te katoatoa na te papetitoanga. No te inangaro i te tuatua mou e te tuatua tika e tumu anga meitaki tikai kia papetitoia.

6. Ia Salamo 45:4 eaa te au tumu ka inangaro ei koe ia Iesu Karaiti?

⁶ Eaa koe ka inangaro ei ia Iesu Karaiti? Ko tetai au tumu, tei roto ia Salamo 45:4. (E tatau.) Inangaro a Iesu i te tuatua mou, te akaaka, e te tuatua tika. Me inangaro koe i te tuatua mou e te tuatua  tika, papu rai e ka inangaro koe ia Iesu Karaiti. Akamanako ana i to Iesu paruru ngakau toa anga i te tuatua mou e te tuatua tika. (Ioa. 18:37) Akapeea a Iesu i te akaari anga i te akaaka?

7. Eaa taau e mareka ra no te tu akaaka o Iesu?

⁷ Te akaari maira a Iesu i te tu akaaka na roto i tona akaraanga. Kua akakakā aia i tona Metua kare iaia uaorai. (Mare. 10:17, 18; Ioa. 5:19) Eaa toou manako no tona tu akaaka? Kare ainei e ka akakeu ia koe kia inangaro i te Tamaiti a te Atua e kia aru iaia? Ae. Eaa te tumu i akaari ei a Iesu i tu akaaka? No tona inangaro i te aru i tona Metua akaaka. (Sala. 18:35; Ebe. 1:3) Kare ainei e ka akavaitata koe kia Iesu, ko tei akaari meitaki mai i te au tu o Iehova?

8. Eaa tatou ka inangaro ei ia Iesu ei Ariki no tatou?

⁸ Ka inangaro tatou ia Iesu ei Ariki no tatou no te mea koia te Tutara tau. Na Iehova i tereni i tana Tamaiti e kua iki iaia kia tutara. (Isa. 50:4, 5) Akamanako katoa e kua aroa akaatinga mai a Iesu iaia. (Ioa. 13:1) Ei Ariki noou, kua tau rai tatou kia inangaro ia Iesu. Kua akamārama mai aia no te aronga inangaro iaia​—tana i kapiki ei au oa—​ka inangaro ratou iaia na te akarongo anga ki tana au akauenga. (Ioa. 14:15; 15:14, 15) E tikaanga manea i reira kia riro ei oa no te Tamaiti a Iehova!

9. Akapeea i aiteite ei te papetitoanga o te au Kerititiano ki to Karaiti?

⁹ Ko tetai akauenga a Iesu koia oki kia papetitoia tana au pipi. (Mata. 28:19, 20) Kua akaari mai aia i te akaraanga. I tetai tu, e tuke tona papetitoanga mei tei akonoia e tana au pipi. (Akara i te pia “ Papetitoanga o Iesu e te Papetitoanga o Tana Au Pipi​—Te Tukeanga.”) Inara i tetai tua, aiteite ua te reira. I te papetitoanga, kua oronga a Iesu iaia uaorai kia rave i te anoano o tona Metua. (Ebe. 10:7) Pera katoa, te au pipi a Karaiti ka papetitoia kia akaari ki te katoatoa e kua akatapu ratou ia ratou ki te Atua ko Iehova. Ka akono i te oraanga rave anga i to te Atua anoano. No reira te aru ra ratou i te akaraanga o te Pu.

10. No toou inangaro ia Iesu eaa tei akakeu ia koe kia papetitoia?

¹⁰ Kua āriki koe ia Iesu e ko te Tamaiti anau tai a Iehova e ko te Ariki tei ikiia kia tutara ia tatou. Kua kite koe ia Iesu e akaari maira i te tu tiama, akaaka o tona Metua. Kua apii mai koe e kua angai aia i te aronga matepongi, kua akapumaana i te aronga taitaia, e kua rapakau i te aronga maki. (Mata. 14:14-21) Kua kite ana koe iaia i te aratakianga i tana putuputuanga i teia tuatau. (Mata. 23:10) E kua kite koe e e maata atu tana ka rave a te tuatau ki mua ei Ariki no te Patireia o te Atua. Akapeea koe me akaari e te inangaro ra koe iaia? Na te aruanga i tona akaraanga. (Ioa. 14:21) Ka rauka ia koe te rave i te reira na te akatapuanga ia koe kia Iehova e kia papetitoia.

11. Eaa te tumu maata kia papetitoia koe, no teaa ra?

¹¹ Eaa te tumu maata kia papetitoia koe? Te akakite maira a Iesu i te akauenga maata a te Atua, i te na ko anga e: “E anoano atu koe i toou Atua ia Iehova ma to ngakau katoa, e ma to vaerua katoa, e ma to manako katoa, e ma to ririnui katoa.” (Mare. 12:30) Te akataka maira ainei te reira au tuatua i toou inangaro i te Atua?

12. Eaa koe i inangaro ei ia Iehova? (Akara katoa i te tutu.)

 ¹² E maata te au tumu i inangaroia ei a Iehova. Ei akaraanga, kua mārama koe e koia “te tumu o te ora” e koia Tei Oronga mai i “te au mea memeitaki i o maiia ra, e te au mea tika ravarai.” (Sala. 36:9; Iako. 1:17) No ko mai te au mea memeitaki ravarai i to tatou Atua aroa e te oronga ua.

13. Eaa te oko i riro ei e ko tetai apinga aroa meitaki tikai?

¹³ Te oko e apinga aroa meitaki tikai na Iehova i oronga mai kia tatou. Eaa ra tatou ka āriki i te reira? Akamanako ana i te pirianga mou i rotopu ia Iehova e tana Tamaiti. Karanga a Iesu: “Akaperepere mai ei taku Metua iaku” e “te anoano nei au i te Metua.” (Ioa. 10:17; 14:31) Kua tupu ketaketa to raua pirianga no tetai ua atu pirioni mataiti. (Mase. 8:22, 23, 30) Akamanako ana i teianei i to te Atua mamae ngakau no te tuku mai i tana Tamaiti kia takinga kinoia e kia mate. Kua akaperepere maata a Iehova i te au tangata ravarai​—e koe katoa—​e kua oronga puareinga ua mai aia i tana Tamaiti akaperepere ei atinga oko kia rauka ia koe e tetai ua atu te ora mutu kore. (Ioa. 3:16; Gala. 2:20) Ko teia te tumu maata kia akaperepere i te Atua.

14. Eaa te akakoroanga meitaki rava atu ka iki koe i roto i toou oraanga?

 ¹⁴ Kua tupu toou inangaro ia Iehova ia koe e apii ra no runga iaia. Papu ka inangaro koe i te akavaitata kiaia i teianei e tuatau ua atu. Ka rauka rai ia koe. Te akamaroiroi maira aia ia koe kia akarekareka i tona ngakau. (Mase. 23:15, 16) Ka rave koe i teia na roto i taau au tuatua e taau au angaanga. Ka akaari mai koe i roto i toou oraanga e te inangaro ra koe ia Iehova. (1 Ioa. 5:3) Ko te akakoroanga meitaki rava atu.

15. Akapeea koe me akaari i toou inangaro ia Iehova?

¹⁵ Akapeea koe me akaari i toou inangaro ia Iehova? Mea mua, ka pure koe kiaia ma te akatapu ia koe ki te Atua mou anake. (Sala. 40:8) Aru mai, ka akaari koe ki te katoatoa i toou akatapuanga na te papetitoanga. Mei ta tatou i uriuri i runga akenei, e atianga mataora tikai teia i roto i toou oraanga. Kua akamata koe i tetai oraanga ou ma Iehova. (Roma 14:8; 1 Pete. 4:1, 2) Penei e ākā takainga te reira ka rave koe. Inara, ka akatuera te reira i tetai oraanga meitaki rava atu kia koe. Akapeea?

16. Ia Salamo 41:12, akapeea a Iehova me tutaki i te aronga tei tavini pu iaia?

¹⁶ E tu oronga ua to Iehova. Noatu eaa taau ka oronga kiaia, e maata atu tana ka oronga mai kia koe. (Mare. 10:29, 30) Ka oronga mai aia i te oraanga mataora, puapinga, merengo tikai i teianei, noatu te kino. Ko te akamataanga te reira o toou tere mei toou papetitoanga kare e ope. Ka rauka ia koe i te tavini mutu kore i toou Metua akaperepere. Ka tupu ua atu toou inangaro i rotopu ia koe e toou Metua e ka ora ua atu koe iaia e ora ra e tuatau ua atu.​—E tatau ia Salamo 41:12.

17. Eaa taau ka oronga kia Iehova?

¹⁷ Me rave koe i te au takainga no te akatapuanga e te papetitoanga, tei ia koe te akameitakianga no te oronga i tetai apinga akaperepere ki toou Metua. Kua oronga mai aia i te au mea memeitaki, te  tuatau mataora taau e kite nei. No reira ka rauka ia koe i te oronga ki te Pu o te au rangi e te enua i tetai apinga koia oki​—ko toou inangaro i te tavini pu iaia. (Iobu 1:8; 41:11; Mase. 27:11) E ikianga meitaki tikai. Kare e ekoko, no toou inangaro ia Iehova i papetitoia ei koe.

18. Eaa te au uianga ka ui koe?

¹⁸ Akapeea koe me pau i teia uianga, Ka papetitoia koe? Naau rai e pau. Penei ka tauturu teia au uianga, ‘Eaa ka tiaki ei?’ (Anga. 8:36) Akamaara i te nga tumu e toru i uriuri ana tatou. Mea mua, inangaro koe i te tuatua mou e te tuatua tika. E ui, ‘Te inangaro ra ainei au i te kite i te rā e tuatua ai te katoatoa i te tuatua mou e te rave i te tika?’ Te rua, inangaro koe ia Iesu Karaiti. E ui, ‘Te inangaro ra ainei au i te Tamaiti a te Atua e ko toku Ariki, e kia aru i tona akaraanga?’ Te toru, te mea maata atu, inangaro koe ia Iehova. E ui, ‘Te inangaro ra ainei au i te akarekareka i to Iehova ngakau na te tavini anga iaia ei Atua noku?’ Me ae taau pauanga ki teia au uianga, eaa koe e kore ei e papetitoia? Eaa ka tiaki ei?​—Anga. 16:33.

19. Eaa tatou kare e emiemi kia papetitoia? Akatutu mai. (Ioane 4:34)

¹⁹ Me emiemi koe kia papetitoia, e akamanako i ta Iesu akatutuanga. (E tatau ia Ioane 4:34.) Kua akaaite a Iesu i te rave anga i te anoano o tona Metua ki te kai. No teaa ra? E meitaki te kai no tatou. Kua kite a Iesu i te au mea ta Iehova i pati mai ia tatou kia rave e mea meitaki. Kare a Iehova e inangaro ia tatou kia rave i tetai apinga te ka akatupu i te kino. Ko te anoano ainei o te Atua e kia papetitoia koe? Ae. (Anga. 2:38) Papu ia koe ka puapingaia koe me akono i te akaueanga kia papetitoia. Me kare koe e emiemi i te kai i te au kai memeitaki, eaa ra koe ka emiemi ei kia papetitoia?

20. Eaa ta tatou ka uriuri i te atikara ka aru mai?

²⁰ Eaa ka tiaki ei? Penei ka pau mai tetai pae, “Kare au i papa.” E tika, te ikianga kia akatapu ia koe uaorai kia Iehova e kia papetitoia ko tetai ikianga puapinga maata ka rave koe. No reira ka anoanoia te tuatau kia akamanako meitaki e kia akapapa. Inara me inangaro koe i teia takainga, eaa taau ka rave i teianei kia papa koe? Ka uriuri tatou i te pauanga i te atikara ka aru mai.