1. Eaa ta te aronga inangaro i umere me aere ratou ki te au uipaanga? (Akara katoa i te tutu.)

 AKAMANAKO ana i tetai tokorua i te aere anga no te taime mua ki te uipaanga i ko i te Are Uipaanga Patireia o te Au Kite o Iehova. Umere tikai raua i te tu oaoa, maanaana o te aronga i reira i te aroa ua mai ia raua i roto i te putuputuanga. I te oki anga raua ki te kainga, karanga mai te vaine ki tana tane, ‘Tukeia ra te Au Kite o Iehova.’

2. Eaa tetai i turori ei?

² Mea umere tikai te aroa e kiteaia ra i roto i te putuputuanga Kerititiano. Inara, kare te Au Kite o Iehova i te aronga tiama. (1 Ioa. 1:8) No reira te maata ia tatou i te kite i tetai pae o te putuputuanga, ka kite katoa rai tatou i to ratou tu paruparu. (Roma 3:23) Ma te mii kua akariro tetai pae i teia tu kia akaturori ia ratou.

3. Eaa te akakite maira i ta Iesu pipi mou? (Ioane 13:34, 35)

³ Akara akaou i te irava o teia atikara. (E tatau ia Ioane 13:34, 35.) Eaa te akairo e akakite maira i te au pipi mou a Karaiti? Ko te aroa. Kare a Iesu i karanga ana e: ‘Ko te mea teia e kite ei koe e e pipi kotou naku.’ Karanga ra aia: “Ko te mea teia e kite ei te tangata katoa e e pipi kotou naku.” Akakite maira a Iesu kare anake ka kiteaia teia tu i roto i tana au pipi pera katoa ka kite mai  te aronga i vao i te putuputuanga Kerititiano i te au pipi mou no to ratou aroa akaatinga uaorai i tetai e tetai.

4. Eaa ta tetai ka inangaro i te kite no te au Kerititiano mou?

⁴ Penei ka manako tetai aronga kare i te Au Kite o Iehova e: ‘Akapeea te aroa me akakite i ta Iesu pipi mou? Akapeea a Iesu i te aroa ua i tana au apotetoro? E akapeea me aru i to Iesu akaraanga i teia rā?’ Ka tau rai kia akamanako te Au Kite i te au pauanga ki teia au uianga. Te rave anga i teia, ka tauturu ia tatou kia akaari ua rai i te aroa, me tupu ake te tarevake i rotopu i tetai e tetai.​—Ephe. 5:2.

5. Akamārama mai i ta Iesu au tuatua ia Ioane 15:12, 13.

⁵ Akakite mai a Iesu na te aroa e akatakake i tana au pipi. (E tatau ia Ioane 15:12, 13.) Kua akaue a Iesu ia ratou: “Kia aroa kotou ia kotou uaorai, mei iaku i aroa ia kotou.” Eaa te aiteanga? Akamārama maira a Iesu i te tu aroa akaatinga uaorai​—te aroa ka akakeu i tetai Kerititiano kia mate no tona taeake. b

6. Akapeea te Tuatua a te Atua i te apiianga i te puapinga o te aroa?

⁶ Akaketaketa maata te Tuatua a te Atua i te puapinga o te aroa. Kua akaira te manganui i teia au irava Pipiria reka na ratou: “Ko te Atua oki te aroa.” (1 Ioa. 4:8) “E aroa atu koe i toou tangata tupu mei te aroa ia koe uaorai.” (Mata. 22:39) “Ka ngaro oki te apa e manganui i te aroa.” (1 Pete. 4:8) “Kare ua te aroa e kore.” (1 Kori. 13:8) Ko teia au irava e tetai atu, ka riro ei akakite ki  tetai i te puapinga kia tatanu e kia akaari ua rai i teia tu manea.

7. Eaa i kore ei e rauka ia Satani i te taokotai i te tangata ma te aroa?

⁷ Maata te tangata i ui e: ‘Akapeea koe me akataka i te akonoanga mou? Pouroa te au akonoanga te karanga ra e te apii ra i te tuatua mou, inara e tuke tuke ta ratou e apii ra no runga i te Atua.’ Kua rauka ia Satani i te akaoripu i te manako o te tangata kia akatupu i te au akaaereanga akonoanga pikikaa e manganui. Kare ra e rauka iaia i te akanoo i tetai taokotaianga taeake Kerititiano i teianei ao ma te aroa i tetai e tetai. Kua rauka anake ia Iehova. No te mea no ko mai ia Iehova te aroa mou​—kua rauka tona vaerua e tana akameitakianga ki runga i teia pupu aronga akamori. (1 Ioa. 4:7) No reira rai a Iesu i tuatua ai na te aroa e akataka i tana au pipi mou?

8-9. Akapeea te au tangata e manganui i te akakeuia anga e te aroa o te Au Kite o Iehova?

⁸ Mei ta Iesu i totou, e maata tei kite i tana pipi mou na roto i te aroa i rotopu ia ratou. Ei akaraanga, kua maara i tetai taeake ko Ian tana uruoaanga mua i aere atu, raveia i ko i tetai ngai tarekareka anga vaitata mai ki tona kainga. Kua aere ana a Ian ki reira i tetai marama i mua ana no tetai angaanga tarekareka. Karanga mai aia: “E tuke tikai teia uruoaanga. E manea tikai te Au Kite, to ratou kakau e to ratou tu, e pera katoa ta ratou tamariki.” I nana ei: “E te mea oki, me akara au i teia au tangata, e tu mataora tikai to ratou e te ‘au ua​​—ko taku i anoano tikai. Kare i maara iaku te au akoanga i tera rā, inara kua umere tikai au i te tu meitaki o te Au Kite.” c Na roto i te reira tu, te aroa mou no tetai e tetai. No to tatou inangaro i to tatou au taeake e te au tuaine, ka akono tatou ia ratou ma te takinga meitaki e te tu ngateitei.

⁹ Kua tupu teia ki tetai taeake ko John tona aere mua anga ki te uipaanga: “Umere tikai au i te tu oaoa . . . o te katoatoa i reira​​—akara anga e e iti tangata tapu ratou no te Atua. Kua akapapu mai to ratou aroa ngakau tae kiaku e kua kiteia e au te akonoanga mou tikai.” d I te au taime ravarai, kua riro te reira au tuatua i te akapapu e e Kerititiano mou te iti tangata o Iehova.

10. Eaa te taime kia akaari tatou i te aroa Kerititiano? (Akara katoa i te tataanga rikiriki.)

¹⁰ Mei tei akakiteia mai i mua ana, kare tetai au taeake i te aronga tiama. Tetai taime ka tuatua e ka rave ratou i tetai angaanga ka riri tatou. e (Iako. 3:2) Roto i teia au turanga, tei ia tatou te atianga kia akaari i te aroa Kerititiano na roto i to tatou tu. Eaa te apiianga ka kite tatou mei ia Iesu?​—Ioa. 13:15.

11. Eaa te tu kino ta Iakobo e Ioane i akaari? (Akara katoa i te tutu.)

¹¹ Kare a Iesu i tapapa mai ana i te tu tiama mei tana au pipi. Mari ra, kua tauturu aia ia ratou na roto i te aroa kia akatanotano i to ratou au tu tau kore kia  mareka a Iehova ia ratou. I tetai atianga kua na roto te nga apotetoro ko Iakobo e Ioane i to raua mama i te pati kia Iesu no tetai taoonga maata i te Patireia. (Mata. 20:20, 21) Akaari atura a Iakobo e Ioane i te tu parau e te noinoi.​—Mase. 16:18.

12. Ko Iakobo e Ioane anake ua tei akaari i te tu kino? Akamārama mai.

¹² Kare anake e ko Iakobo e Ioane tei akaari i teia tu kino i te reira atianga. Akara mai i te manako o te au apotetoro: “E kite akera te tino ngauru ra, ki akera ïa i te riri i aua puke taeake ra.” (Mata. 20:24) Ka rauka ua ia tatou te akamanako i te au tuatua riri i rotopu ia Iakobo, Ioane e tetai mai au apotetoro. Penei kua tuatua mai tetai pae: ‘Koai korua i manako ei ka pati i tetai turanga teitei i te Patireia? Kare e ko korua anake te angaanga maroiroi nei i te pae ia Iesu. Kua tau rai matou i teia tikaanga manea!’ Noatu eaa te turanga, kua akariro te au apotetoro i teia tu kia tamanata i to ratou aroa i tetai e tetai.

13. Eaa to Iesu tu no te tu apa o tana au apotetoro? (Mataio 20:25-28)

¹³ Eaa ta Iesu i rave no teia tu? Kare aia i riri ana. Kare i karanga e ka kimi aia i tetai au apotetoro meitaki atu, e tu akaaka e ka aroa ua atu i tetai. Mari ra, kua akamārama a Iesu i te tumu ma te marie  ki teia nga tane ngakau tae. (E tatau ia Mataio 20:25-28.) Kua akono ua atu aia ia ratou ma te aroa, noatu e kare teia e ko te mea mua e te openga i tauta ei te au apotetoro i te akateitei i tetai mei tetai.​—Mare. 9:34; Luka 22:24.

14. Mei teaa te peu oraanga o te au apotetoro a Iesu?

¹⁴ Kare e ekoko kua akamanako a Iesu i te oraanga o tana apotetoro. (Ioa. 2:24, 25) Kua tupu mai ratou i roto i tetai peu oraanga tei apiiia e te au arataki akonoanga e e puapinga maata te taoonga e te turanga teitei. (Mata. 23:6) Kua manako te au arataki akonoanga ngati Iuda e e tu tika to ratou. f (Luka 18:9-12) Kua mārama a Iesu e ka akakeu teia manako i te au apotetoro e ta ratou akono anga i tetai. (Mase. 19:11) Kua tapapa a Iesu e ka tupu teia tu ki tana au pipi e kare i riri ia ratou. Kite aia e ngakau meitaki to ratou, no reira kua tauturu marie a Iesu ia ratou kia akaruke i te manako parau e te noinoi e kia akaari ua rai i te aroa.

15. Eaa ta tatou ka kite mai mei te oraanga o Iakobo e Ioane?

¹⁵ E maata ta tatou ka kite mai mei tei tupu kia Iakobo e Ioane. Kua tarevake raua i te pati i tetai turanga teitei i te Patireia. Kua tarevake katoa te au apotetoro i te akariro i te reira turanga ei tamanata i to ratou tu taokotai. Noatu te reira kua akono a Iesu ma te takinga meitaki e te maru i tana 12 apotetoro. Te apiianga? Ko te mea maata kare e eaa ta tetai aronga i rave mari ra ko to tatou tu me rave ratou i te tarevake e no te tu apa ua. Eaa te ka tauturu ia tatou? Me riri tatou i to tatou taeake, ka ui i teia au uianga: ‘Eaa i riro ei tana i rave ei akariri mai iaku? Te akaari maira ainei te reira i tetai tu tau kore ka anoanoia au kia akatikatika? Penei kua tupu tetai apinga ki te taeake tei akariri mai iaku? Noatu me kua manako au kua tika rai taku, ka rauka ainei iaku i te aroa ua atu ma te akakore i tana ara?’ Te maata ia tatou i te akono ua atu i tetai ma te aroa, te maata atu ia tatou i te akapapu e e pipi mou tatou na Iesu.

16. Eaa atu tetai ka tamou mai tatou mei te akaraanga o Iesu?

¹⁶ Apii katoa maira to Iesu akaraanga ia tatou kia tauta i te kite meitaki i to tatou au taeake. (Mase. 20:5) Ae ka rauka ia Iesu te tatau i te ngakau. Kare ra e rauka ia tatou. Kia āriki ua tatou i te tu apa o to tatou au taeake e te au tuaine. (Ephe. 4:1, 2; 1 Pete. 3:8) Ka māmā te reira me kite mai tatou i to ratou oraanga. Akamanako ana i teia akaraanga.

17. Akapeea tetai akaaere tutaka i puapingaia ai mei te kite meitaki anga i tetai taeake?

¹⁷ Maara i tetai akaaere tutaka i Aperika Itinga no tetai taeake e tu akakino tona. Akapeea te akaaere kotinga i te ariu anga atu? Karanga mai aia: “Kare au e kopae i te taeake, kua iki au i te kite meitaki iaia.” Tona rave anga i teia kua  kite mai te akaaere kotinga mei te oraanga o te reira taeake i tona tu. I na te akaaere kotinga ei: “I toku kite mai anga e kua tauta pakari teia taeake i te taui i tona turanga e kua tauta i te akatikatika i tona tu, mareka au iaia. Kua riro mai maua ei nga oa meitaki.” Me tauta tatou i te kite meitaki i to tatou au taeake e te au tuaine, ka māmā ua ia tatou i te aroa ia ratou.

18. Eaa te au uianga ka ui tatou me kua akaririia tatou e tetai taeake? (Maseli 26:20)

¹⁸ Penei i tetai taime ka anoanoia tatou kia aravei i tetai taeake tei akariri mai ia tatou. Mea mua ra, ka meitaki tatou kia ui i teia au uianga: ‘Kua kite ainei au i te au tika ravarai?’ (Mase. 18:13) ‘Penei ake kare teia i te mea akakoro?’ (Kohe. 7:20) ‘Ka rave ana ainei au i teia tu tau kore?’ (Kohe. 7:21, 22) ‘Na te aravei anga i te taeake, ka akamaata ainei au i te manamanata i taku e tauta nei i te akatikatika?’ (E tatau ia Maseli 26:20.) Me akamanako meitaki tatou i teia au uianga, penei ka tuku tatou i te aroa no te taeake kia akakore i tana ara.

19. Eaa ta tatou ka tauta kia rave?

¹⁹ Ei pupu, kua akaari mai te Au Kite o Iehova ia ratou ei pipi mou na Iesu. Kua akapapu tatou tataki tai e e pipi mou tikai na Iesu na te aroa ua anga i to tatou au taeake e te au tuaine noatu to ratou tu apa ua. Na roto i teia, penei ka tauturu tatou i tetai pae kia kite i te akonoanga mou e kia piri mai kia tatou i te akamorianga ia Iehova, te Atua aroa. Kia tauta ua atu tatou i te akaari ua rai i te aroa tei akariro ia tatou ei au Kerititiano mou.