1. Eaa ta te au metua i inangaro no ta ratou tamariki?

 E TE au metua, kua kite matou te inangaro ra kotou i te tauturu i ta kotou tamariki kia kite e kia akaperepere ia Iehova. Inara, e Atua kitea koreia aia. Akapeea koe me tauturu i taau tamariki kia kite tikai Iaia e kia akavaitata atu kiaia?​—Iako. 4:8.

2. Akapeea te au metua me apii i to Iehova au tu ki ta ratou tamariki?

² Ko tetai mataara puapinga ei tauturu i taau tamariki kia akavaitata kia Iehova na te apiianga i te Pipiria kia ratou. (2 Timo. 3:14-17) Inara te akaari maira te Pipiria i tetai ravenga ke kia kite te au tamariki ia Iehova. I roto i te puka o Maseli, kua akamaara mai tetai metua tane ki tana tamaiti auraka e ngaropoina i to Iehova au tu, te kiteaia ra i roto i te au mea angaia. (Mase. 3:19-21) Ka uriuri tatou i tetai au mataara ka apii te au metua i to Iehova au tu ki ta ratou tamariki na roto i te au mea angaia.

3. Eaa te tauturu ta te au metua ka oronga ki ta ratou tamariki?

³ Te akakite ra te Pipiria i “te au mea oki [o te Atua] tei kore e tau kia akara ra, tei kitea puia nei ïa, i te au mea katoa i angaia nei, mei te maani anga mai i teianei ao.” (Roma 1:20) E te au metua, papu e reka ana kotou i te akapou i to kotou taime i vao i te are ma ta kotou tamariki. E akariro i tera tuatau ei apii i taau tamariki kia kite i te “au  mea katoa i angaia” e te au tu manea o Iehova. I teianei ka akara tatou i ta te au metua ka apii mai mei te akaraanga o Iesu.

4. Akapeea a Iesu i te apiianga i tana au pipi no runga i te au mea angaia? (Luka 12:24, 27-30)

⁴ Akara mai akapeea a Iesu i te apiianga na roto i te au mea angaia. I tetai atianga, kua pati aia ki tana au pipi kia akara i te au kotaa e te au lili. (E tatau ia Luka 12:24, 27-30.) Ka rauka ua ia Iesu te taiku i tetai ua atu animara me kore rakau, inara kua iki aia i te manu e te tiare ta te au pipi i mātau. Penei kua kite ana te au pipi i te au kotaa e rere ra e te au tiare e puera ra. Te kite ra ainei koe ia Iesu e tou ra ki teia au mea iaia e tuatua ra? Eaa tana i rave i muri mai i te taiku anga i teia akatutuanga? Kua akakite aia i te apiianga puapinga ki tana au pipi no te tu oronga ua e te takinga meitaki o to ratou Metua i te rangi: Ka angai e ka akakakau a Iehova i tona au tavini tiratiratu mei te au kotaa e te au tiare.

5. Eaa te au akaraanga mei te au mea angaia ta te au metua ka apii no runga ia Iehova ki ta ratou tamariki?

⁵ E te au metua, ka aru ainei kotou i to Iesu akaraanga no te apii? Penei ka akakite koe ki taau tamaiti i te tu o te au mea angaia taau e reka ana, mei te animara e te rakau. Ia koe e rave ra i teia, e akamārama i te apiianga no runga ia Iehova. E oti ka ui koe ki taau tamaiti eaa te manu me kore te rakau te reka ra aia. Me apii koe na roto i te au mea i angaia te reka ra aia, penei ka akakeuia aia kia akamanako i to Iehova au tu.

6. Eaa ta tatou ka apii mai mei te akaraanga o te mami o Christopher?

⁶ Ka akapou ainei te au metua i te tuatau kia kimi i te apiianga no runga i tetai manu e tetai rakau i mua ake ka uriuri ei i te reira no runga ia Iehova kia ratou? Kare. Kare a Iesu i oronga mai ana i te apiianga maata no te kai a te kotaa me kore te tu o te lili. Penei ka mataora taau tamaiti i te uriuri i te au apiianga pakari no te au mea natura, inara ka rava ua te apiianga māmā me kore te uianga. Kua maara i te taeake ko Christopher i teia mei tona tamariki anga: “Māmā tikai ta mami apiianga no te au mea angaia kia matou. Ei akaraanga, ia matou i te pae i te au maunga, ka karanga mai aia: ‘Maatamaata tikai e te manea i te au maunga! Umere tikai a Iehova, kare ainei?’ Me kore ia matou i te pae taatai, ka karanga mai aia: ‘Ririnui ia ra te au ngaru! Kare ainei e ririnui atu te Atua?’” Karanga mai a Christopher: “Kua riro te reira au apiianga māmā ei akakeu ia matou.”

7. Akapeea koe me tereni i taau tamariki kia akamanako i te au mea anga?

⁷ I ta kotou tamariki e maata maira, e tereni ia ratou kia akamanako meitaki i te au mea angaia e kia apii katoa i to Iehova au tu. Ka iki koe i tetai o te au mea anga a te Atua e ka ui ki taau tamariki, “Eaa ta teia e apii maira kiaku no runga ia Iehova?” Penei ka umere koe i ta ratou e manako ra.​—Mata. 21:16.

8. Eaa ta te au metua o Iseraela ka rave ia ratou e aaere ra “na te arataa”?

⁸ Kua akaueia te au metua o Iseraela kia apii i ta Iehova au tuatua me aaere ratou “na te arataa” ma ta ratou tamariki. (Deu. 11:19) Ka na roto te au mataara i te au ngai ravarai o Iseraela. Ka kitea te au animara tukeke, te au manu, e te au tiare. I  te ngutuare tangata e aere ra na te arataa, ka rauka i te nga metua i te tuatua ki ta ratou tamariki no runga i ta Iehova au mea angaia. Penei kua rauka katoa ia kotou e te au metua teia kia apii ki ta kotou tamariki. Akara ana akapeea tetai au metua te rave anga i teia.

9. Eaa taau i kite mai mei ia Punitha e Katya?

⁹ Karanga mai tetai mama ko Punitha, e noo ra ki tetai oire maatamaata i Initia, e: “Me atoro matou i te au ngutuare tangata i vao ake i te oire, ka akapou maua i teia tuatau no te apii ia Iehova ki ta maua tamariki na roto i te au mea angaia. Kite mai au e ka mārama ta maua tamariki i te apiianga mei te au mea angaia me kare ratou e noo ana i te oire e maata te tangata.” E te au metua, kare e ngaropoina i ta kotou tamariki te tuatau i akapae ei kotou no ratou i tetai ngai manea. Karanga mai a Katya, e tuaine no Moldova, e: “Te maara nei iaku i te au tuatau i aere ei matou ko toku nga metua ki vao ake i te oire. Kua mareka rava au e kua apii mai raua iaku mei toku ou anga kia tāpu e kia akamanako i te au apiianga no Iehova mei tana au mea i anga.”

10. Eaa ta te au metua ka rave me kare e rauka ia ratou i te aere ki vao ake i te oire? (Akara i te pia “ Tauturu no te Au Metua.”)

¹⁰ Akapeea me kare e rauka ia koe i te aere ki vao ake i te oire? Karanga mai a Amol, e noo ana aia ki Initia, e: “Toku ngai noo anga, ka angaanga te au metua no tetai tuatau roa, e e āka moni i te aere ki te au ngai i vao ake i te oire. Inara, ka riro tetai park meangiti me kore tetai ngai i runga i te are ei ngai tau no te apii e te akamanako i te au mea angaia e te uriuri no runga i to Iehova au tu.” Me akara koe, ka kitea e koe i toou kainga i te au mea i angaia ka rauka ia koe i te akaari ki taau tamariki. (Sala. 104:24) Ka kite mai koe i  te au manu, te manumanu, te rakau, e te vai atura. Karanga mai a Karina, no Tiamani, e: “E reka ana a mami i te tiare, i toku tamariki anga, ka tou mai aia i te au tiare manea me aere maua.” E te au metua, ka rauka katoa ia kotou te taangaanga i te au vitio e te au puka no runga i te au mea anga ta te akaaerenga i oronga mai ei apii i taau tamariki. Noatu eaa te turanga, ka rauka ia koe te tauturu i taau tamariki kia apii i ta Iehova i anga. Ka akara ana tatou i tetai au tu o Iehova ka apii koe ki taau tamariki.

11. Akapeea te au metua me apii i to te Atua aroa ki ta ratou tamariki?

¹¹ Kia tauturu i taau tamariki kia kite i to Iehova aroa, ka apii koe i te tu maru o te au manu e akono ra i ta ratou punua. (Mata. 23:37) Ka apii katoa i te au mea tukeke e reka ana tatou i roto i te au mea angaia. Karanga a Karina, tei taikuia mai i mua ana, e: “Me aere ana matou, ka tāpu mai a mami iaku kia akara i te au tiare tukeke e to ratou manea i te akaari mai i to Iehova aroa. I te au mataiti i aereia mai, te akara nei rai au i te au tiare​—to ratou tu, te maani anga, e te kara. Riro te reira ei akamaara mai i to Iehova akaperepere ia tatou.”

12. Akapeea te au metua me apii i to te Atua pakari ki ta ratou tamariki? (Salamo 139:14) (Akara katoa i te tutu.)

¹² Tauturu i taau tamariki kia kite i to te Atua pakari. E pakari atu a Iehova ia tatou. (Roma 11:33) Ei akaraanga, penei ka apii koe no runga i te au vai tei riro mai ei tiaorangi i roto i te mareva. (Iobu 38:36, 37) Ka akakite koe i te au mea umere o te kopapa tangata. (E tatau ia Salamo 139:14.) Ko teia ta tetai metua tane ko Vladimir i rave. Karanga mai aia: “I tetai rā, kua inga ta maua tamaiti ki raro mei tona patikara e kua pakiko tona pakiri. I nga mea rā i muri mai, kua meitaki te ngai motu. Kua apii maua ko taku vaine kiaia e kua anga a Iehova i to tatou au cell te akameitaki akaou i te reira. Kua apii atu maua kare teia i roto i te au mea tei maaniia e te tangata. Ei akaraanga, kare e rauka i te motoka te ripea i te reira i muri mai i tetai  u anga. Na roto i teia akaraanga i tauturu ei i ta maua tamaiti kia mārama i to Iehova pakari.”

13. Akapeea te au metua me apii no runga i te mana o te Atua ki ta ratou tamariki? (Isaia 40:26)

¹³ Te pati maira a Iehova kia akara tatou ki te rangi e akapeea tona mana i te akamou anga i te ao rangi e pini ua ake. (E tatau ia Isaia 40:26.) E akamaroiroi i taau tamariki kia akara ki te rangi e kia akamanako i ta ratou e kite ra. Kua maara ia Tingting, e tuaine no Taiwan, i tona tamariki anga e: “Kua aere maua ko mami i te camping, e kua akara ki runga i te rangi i te po. I te reira tuatau te taitaia ra au no te māroanga a te au oa e kua ekoko e me ka rauka rai iaku i te tavini tiratiratu ia Iehova. Kua akamaroiroi mai a mami kia akamanako au i te mana ta Iehova i taangaanga no te anga mai i te au etu e kia akamaara e ka rauka rai Iaia i te taangaanga i tona mana no te tauturu kia autu au i toku timataanga. Muri mai i te akara anga i te au mea anga o te reira tere, kua akamaroiroiia au kia apii meitaki no runga ia Iehova e te akaketaketa i taku ikianga kia tavini iaia.”

14. Akapeea te au metua me apii i to Iehova tu mataora na roto i te au mea angaia?

¹⁴ Te akaari maira ta Iehova au mea anga i tona tu rekareka e tona tu katakata. Kua kite ana te aronga taieni e e kanga kanga ana te au manu, kapiti mai i te au manu rere e te au ika. (Iobu 40:20) E katakata ana taau tamariki ia ratou e akara i te au manu e kanga ra? Penei e kiorengiao e arumaki ra i te poro me kore e punua puakaoa e kanga kapiti ra ki tetai mai punua. Me kata akaou taau tamariki ia ratou e akara ra i te au manu e kanga ra, e akamaara atu kia ratou e te tavini ra ratou i te Atua mataora.​—1 Timo. 1:11.

15. Eaa te ka tauturu i te au metua kia akakeu i te au tamariki kia akakite mai i to ratou manako? (Maseli 20:5) (Akara katoa i te tutu.)

¹⁵ I tetai au taime, ka ngatā i te au metua i te akakeu i ta ratou tamariki kia akakite  mai i to ratou manako. Me ko toou turanga teia, ka anoanoia koe kia akakeu marie i taau tamariki kia tuatua mai i to ratou manako. (E tatau ia Maseli 20:5.) Ka rauka i te au metua i te rave i teia me akara kapiti ratou ko te au tamariki i te au mea angaia. No teaa ra? Ko tetai tumu kare e mea e tamanata ana ia ratou. Te akakite maira tetai metua tane ko Masahiko i Taiwan i teia: “Me akapou matou ko ta maua tamariki i te tuatau i vao ake i te are​—mei te piki maunga e te aere na taatai—​ka maru ua to ratou turanga. Ka māmā ia maua i te akakeu marie ia ratou kia akakite mai i to ratou manako.” Karanga mai a Katya, tei taikuia mai i mua ana e: “Me akamutu te apii, ka apai a mami iaku ki tetai park manea. I konei, ka māmā iaku i te akakite kiaia i toku tuatau i te apii e taku e manata ra.”

16. Akapeea te au ngutuare me akangaroi e te katakata ia ratou e akara mataora ra i ta Iehova au mea anga?

¹⁶ Te apii maira ta Iehova au mea angaia ki te au ngutuare i tetai tuatau kia akangaroi e kia katakata, i te akamaroiroi anga i te kopu tangata. Karanga ra te Pipiria e “e tuatau to te kata” e “e tuatau to te ura.” (Kohe. 3:1, 4) Na roto i ta Iehova au angaanga, kua oronga mai aia i te au ngai taurekareka kia mataora tatou. E mataora ana te au ngutuare me aere ratou ki te au ngai manea, te au ngai i vao ake i te oire, i te au maunga, e i taatai. E reka ana tetai au tamariki i te oro e te kanga i te park, akarakara i te au animara, te pai vai i roto i te vai-roto, te kauvai e i taatai. Ka mataora tikai tatou i te tarekareka ki te au ngai ka kitea te au mea angaia e Iehova!

17. Eaa ra te au metua ka tauturu ei i ta ratou tamariki kia rekareka i ta te Atua au mea angaia?

¹⁷ I te ao ou o te Atua, ka rekareka kapiti te au metua e te au tamariki i ta Iehova au mea angaia. Kare tatou e mataku i te au animara; kare katoa ratou e mataku ia tatou. (Isa. 11:6-9) Tei ia tatou te tuatau mutu kore kia rekareka i ta Iehova au mea i anga. (Sala. 22:26) Inara e te au metua, eiaa e tavarevare i te tauturu i taau tamariki kia rekareka i te au mea angaia. Ia koe e apii ra ia ratou no runga ia Iehova mei te au mea angaia, papu e ka āriki ratou i ta te Ariki ko Davida i tuatua: “Kare oki e angaanga e arite ki taau [e Iehova] ra angaanga.”​—Sala. 86:8.