1-2. Me kare koe i papa ake no te papetitoanga, eaa ra te tumu kare koe e taitaia? (Akara i te tutu i te kapi mua.)

 ME KA inangaro koe kia papetitoia, kua akanoo koe i tetai akakoroanga meitaki noou uaorai. Kua papa ainei koe no te reira i teianei? Me irinaki koe e kua papa koe e kua āriki mai te aronga pakari, eiaa e taroaroa kia papetitoia. E oraanga mataora te ka rauka mai ia koe i roto i ta Iehova angaanga.

² Tetai tua, kua akakiteia atu ainei kia koe e ka anoanoia kia akameitaki atu koe i toou tu i mua ake ka papetitoia ai? Me kore kua mārama ainei koe i te reira no runga ia koe? Me koia ïa, auraka e taitaia. Ka rauka ia koe kia tere ki mua e kia taeria taua takainga puapinga, me e mapu me kore e tangata pakarikari koe.

3. Eaa ta tetai tangata taoonga Etiopia i ui kia Philipa, e eaa te uianga ka uiia? (Angaanga 8:36, 38)

³ E tatau ia Angaanga 8:36, 38. Kua ui te tangata taoonga no Etiopia ki te tangata apii evangeria ko Philipa: “Eaa au nei e kore ei e bapetizoia?” Kua inangaro te tangata Etiopia kia papetitoia, inara kua papa ainei aia no teia takainga?

4. Akapeea te tangata Etiopia te akaari mai e kua tauta aia i te apii ua atu rai?

⁴ Kua “aere maira [te tangata Etiopia] ki Ierusalema e akamori i te Atua.” (Anga. 8:27) Papu e e pipi ngati Iuda aia; e kua taui ki te akonoanga ngati Iuda. Kare e ekoko e kua kite aia ia Iehova na roto i te au tataanga tapu o te Tuatua Tapu Epera. Noatu rai, kua inangaro aia kia apii ua atu. Ae, i to Philipa aravei anga i taua tangata ra i runga i te  mataara, eaa ta Philipa e kite atura i tera tangata e rave ra? Te tatau ra aia i te pokaikai tuatua a te peroveta ko Isaia. (Anga. 8:28) E kai pae vaerua te reira. Kare taua tangata taoonga ra i āriki ua i tetai au apiianga Pipiria māmā ua; kua inangaro aia i te apii ua atu.

5. Eaa ta te tangata Etiopia i rave no tana i apii mai?

⁵ E taoonga teitei to taua tangata i raro ake i te Ariki Vaine ko Kanedake o Etiopia; “koia te tiaki i te apinga tini nona ra.” (Anga. 8:27) E maata tikai tana au angaanga e te au apainga. Inara, kua aere mai aia i te akamori ia Iehova. Kare i mareka ua i tana i apii no te tuatua mou; kua aru ra aia i tana i apii mai. No reira aia i aere mai ei mei Etiopia ki te iero i Ierusalema i te akamori ia Iehova. Papu e ka pou te taime e te moni no taua tere, inara kua inangaro taua tangata ra i te akamori ia Iehova noatu eaa tei anoanoia.

6-7. Akapeea i maata atu ei te inangaro o te tangata Etiopia ia Iehova?

⁶ Kua kite mai te tangata Etiopia mei ia Philipa i tetai au mea ou puapinga tikai, tei kapiti mai i te akataka anga i te Mesia. (Anga. 8:34, 35) Pakia tikai te ngakau o teia tangata i tana i apii mai no ta Iesu i rave nona. Eaa tana ka rave? Penei ka vai ua rai aia ei tangata ngati Iuda. Inara e maata atu tona inangaro ia Iehova e Tana Tamaiti. Kua akakeuia aia kia taui i tona oraanga e kia papetitoia ei pipi na Iesu Karaiti. Te kite anga a Philipa e kua papa tera tangata kua papetito iaia.

⁷ Me ka aru koe i te akaraanga o te tangata Etiopia, kua papa koe no te papetitoanga. Ka ui papu koe e, “Eaa au nei e kore ei e bapetizoia?” Ka akara tatou akapeea koe me aru i te takainga ta teia tangata i rave: Kua apii ua atu aia, kua aru aia i tana i apii mai e e maata atu tona inangaro i te Atua.

8. Eaa taau ka rave kia tau ki ta Ioane 17:3 e akakite maira?

⁸ E tatau ia Ioane 17:3. Kua tauturu ainei teia au tuatua a Iesu kia apii koe i te Pipiria? Kua tika teia kia tatou. Te akakite maira ainei tera au tuatua e kia apii ua atu rai tatou? Ae. Kare tatou e akamutu i te “kite . . . i te Atua mou.” (Kohe. 3:11) Ka apii ua atu rai tatou e mutu kore ua atu. Te maata atu ta tatou ka apii, ka akavaitata atu tatou kia Iehova.​—Sala. 73:28.

9. Eaa taau ka rave i muri ake i te apiianga i te au apiianga māmā ua o te tuatua mou?

⁹ Me apii tatou no runga ia Iehova, ka akamata tatou ki te au apiianga māmā ua.  I roto i tana reta ki to Epera, kua taiku te apotetoro ko Paulo i te au apiianga māmā ua e ko “te apiianga mua.” Kare aia i akapuapinga kore i te “tuatua mua”; mari ra te akaaite ra i te reira ki te u a te pepe. (Ebe. 5:12; 6:1) Kua akamaroiroi katoa aia i te au Kerititiano kia kore e apii ua i te au apiianga māmā ua mari ra kia apii katoa i te au apiianga pakari o te Tuatua a te Atua. Kua inangaro ainei koe i te apii i te au apiianga pakari o te Pipiria? Ka inangaro ainei koe kia maata atu toou kite, kia apii ua atu no runga ia Iehova e tona au akakoroanga?

10. Eaa i ngatā ei i tetai pae i te apii?

¹⁰ E ngatā i tetai pae ia tatou i te apii. Akapeea koe? Ia koe i te apii kua tamou ainei koe i te tatau e te apii meitaki? E reka ana koe i te apii? Penei kua āriki ainei koe e kare koe i tukatau i te tamou apii? Kare ko koe ua. Inara ka tauturu mai a Iehova ia koe. E Puapii meitaki tikai aia.

11. Akapeea a Iehova i te akapapu mai anga e koia te ‘Orometua’?

¹¹ Kua kapiki a Iehova iaia uaorai e koia ‘to kotou Orometua.’ (Isa. 30:20, 21) E Puapii akakoromaki, takinga meitaki, e te mārama aia. Te akara ra aia i te meitaki o tana aronga apii. (Sala. 130:3) E kare aia e umuumu mai i tei kore e rauka ia tatou i te rave. E akamaara e nana i anga mai i to tatou roro e e apinga aroa umere tikai. (Sala. 139:14) Ka inangaro tatou i te apii. Te inangaro ra Tei Anga mai ia tatou kia apii ua atu tatou​—e kia mataora i te reira e tuatau ua atu. No reira e mea puapinga kia “kaki tikai” i te tuatua mou Pipiria i teianei. (1 Pete. 2:2) E akanoo i te au akakoroanga ka rauka ia koe i te rave, e kia akono i tetai papaanga no te tatau e te apii i te Pipiria. (Iosu. 1:8) Na roto i ta Iehova akameitakianga, ka mataora koe i te tatau anga e te apii anga no runga iaia.

12. Eaa tatou ka akamanako ei no runga ia Iesu i roto i ta tatou apii?

¹² E akapou putuputu i toou taime i te akamanako i to Iesu oraanga e tana angaanga tutu aere. Ko te aru vaitata anga i to Iesu akaraanga ko te mea maata ia i te tavini ia Iehova, i teia tuatau ngatā. (1 Pete. 2:21) Kua akakite mai a Iesu i te au manamanata ka tupu ki tana au pipi. (Luka 14:27, 28) Kua irinaki tikai aia e ka puapingaia tana au pipi mei iaia rai. (Ioa. 16:33) E apii i to Iesu oraanga, e e tauta i te aru iaia i roto i toou oraanga.

13. Eaa taau ka pati kia Iehova, e no teaa ra?

¹³ Kare e rava ua te kite. Te akakoroanga kia tauturu ia koe kia kite maata no runga ia Iehova e kia akaari i te au tu mei te inangaro e te irinaki iaia. (1 Kori. 8:1-3) Ia koe e apii ra, e pati kia Iehova kia tauturu mai ia koe kia akaketaketa i toou akarongo. (Luka 17:5) Ka pau mai aia i taau au pure. Ko te akarongo mou tikai tei akatumuia ki runga i te kite i te Atua ka tauturu ia koe kia rave i te reira.​—Iako. 2:26.

14. Akapeea te apotetoro ko Petero te akakite mai anga i te puapinga no te aru anga i ta tatou i apii mai? (Akara katoa i te tutu.)

¹⁴ Kua akakite mai te apotetoro ko Petero e e puapinga no te au pipi a Karaiti kia aru ua rai i ta ratou i apii mai. Kua taiku mai aia i te tua o Noa i roto i te Pipiria. Kua akakite a Iehova kia Noa e na roto i te vaipuke, ka takore Aia i te au tangata kino o taua tuatau. Ko te kiteanga e ka tupu mai te vaipuke kare ko te reira te ka akaora mai ia Noa e tona ngutuare. E akara e te tuatua ra a Petero no tetai tuatau i mua ake te Vaipuke e “te tarai anga i  te araka.” (1 Pete. 3:20) Ae, kua aru a Noa e tona ngutuare i ta ratou i apii mai mei te Atua na te tarai anga i tetai araka, e pai maatamaata. (Ebe. 11:7) Kua akaaite a Petero i ta Noa i rave ki te papetitoanga, te tataanga e: “Ko tei tau i te reira ra, ko te bapetizo ïa e ora katoaʼi tatou i teianei.” (1 Pete. 3:21) No reira, ka rauka ia tatou i te akaaite i taau e rave nei kia akapapa no te papetitoanga ki te au angaanga ta Noa e tona ngutuare i rave no tetai au mataiti i te tarai anga i te araka. Eaa taau ka rave kia papa no te papetitoanga?

15. Akapeea tatou me akaari e kua tataraara ngakau tae tatou?

¹⁵ Te mea mua ta tatou ka rave ka tataraara tatou i ta tatou ara. (Anga. 2:37, 38) Me tataraara ngakau tae tatou ka rave tatou i te au taui anga. Kua kopae ainei koe i te au peu kare a Iehova e mareka ana, mei te oraanga tau kore, kai avaava, me kore te tuatua viivii? (1 Kori. 6:9, 10; 2 Kori. 7:1; Ephe. 4:29) Me kare koe i rave ake i te reira, e tauta ua atu rai i te kopae i te reira. E tuatua ki te tangata e apii ra i te Pipiria kia koe, me kore e pati ki te aronga pakari o te putuputuanga kia tauturu mai ia koe. Me e mapu koe e te noo ra rai i te kainga, e pati atu ki to nga metua kia tauturu mai ia koe kia kopae i te au peu kino te tāpu ra ia koe no te papetitoanga.

16. Eaa te ka ō mai ki roto i te akapapaanga meitaki i te pae vaerua?

¹⁶ E puapinga katoa kia aru i tetai akapapaanga meitaki i te pae vaerua. Kapiti maira ki teia ko te aere anga e te paupau anga i ko i te au uipaanga Kerititiano. (Ebe. 10:24, 25) E me akatikaia mai koe kia rave i te angaanga tutu aere, e tauta i te rave putuputu i te reira. Me rave putuputu koe i te angaanga tutu aere, ka maata atu toou rekareka. (2 Timo. 4:5) Me e mapu koe e te noo ra rai i te kainga, e ui kia koe uaorai: ‘Ka akamaara ua mai ainei toku nga metua kia aere au ki te au uipaanga e kia rave i te angaanga tutu aere? E me naku rai e akakeu iaku?’ Me naau rai i rave i te reira, te akaari ra koe i toou akarongo e toou inangaro i te akamareka i te Atua ko Iehova. E  ‘tuatua tapu e te akono i te Atua’ teia, e apinga aroa naau kia oronga atu kia Iehova. (2 Pete. 3:11; Ebe. 13:15) Ko te au apinga aroa ta tatou ka oronga puareinga ua e au apinga mareka ïa ki to tatou Atua. (Akaaite ia 2 Korinetia 9:7.) Ka rave tatou i teia no te mataora i te oronga kia Iehova i tei rauka meitaki ia tatou.

17-18. Eaa te tu puapinga te ka tauturu ia koe kia papetitoia, e no teaa ra? (Maseli 3:3-6)

¹⁷ Ia koe e vaitata atura ki te papetitoanga, ka tupu te manamanata kia koe. Penei ka aviri mai tetai au tangata ia koe no toou akarongo ou; penei ka patoi e ka takinokino mai ratou ia koe. (2 Timo. 3:12) Ia koe e tauta ra kia kore e rave i te au peu kino, i tetai taime ka oki akaou koe i te rave i te reira. Penei, kare e rauka ia koe i te akakoromaki e kua taitaia no te mamao i toou akakoroanga. Eaa te ka tauturu ia koe kia akakoromaki? Ko tetai tu puapinga maata​—ko te inangaro ia Iehova.

¹⁸ E tu manea to tatou i te inangaro ia Iehova, e tu meitaki rava atu. (E tatau ia Maseli 3:3-6.) Ka tauturu te inangaro mou o te Atua ia koe kia akakoromaki i te au manamanata te ka tupu. Te taiku putuputu maira te Pipiria i to Iehova aroa takinga meitaki no tona au tavini. E pirianga ketaketa teia kare rava e ope e e ngaro. (Sala. 100:5) Kua angaia koe i to te Atua tu. (Gene. 1:26) Akapeea koe me akaari i te tu inangaro?

19. Akapeea koe me akaari i te tu akameitaki no ta Iehova i rave noou? (Galatia 2:20)

¹⁹ Na mua te akameitaki. (1 Tesa. 5:18) I te au rā ravarai, e ui kia koe uaorai, ‘Akapeea a Iehova te akaari mai anga i te aroa kiaku?’ E oti e akameitaki ia Iehova na roto i taau pure, na te taiku anga i te au mea tana i rave noou. E akara i tana au angaanga aroa kia koe, mei ta te apotetoro ko Paulo i kite mai no runga ia Iehova. (E tatau ia Galatia 2:20.) E ui kia koe uaorai, ‘Ka inangaro ainei au i te akaari i toku inangaro kiaia?’ Ko te inangaro ia Iehova, ka tauturu te reira ia koe kia patoi ua rai i te au timataanga e te au manamanata. Ka akakeuia koe kia aru ua rai i taau akapapaanga i te pae vaerua, te akaari putuputu anga i toou inangaro ki toou Metua i te au rā ravarai.

20. Eaa koe ka akatapu ei i toou oraanga kia Iehova, e eaa te puapinga no teia ikianga?

 ²⁰ Kare e roa, ka akakeu toou inangaro ia Iehova kia rave i tetai pure puapinga tikai. Ka akatapu koe ia koe ki te Atua. E akamaara me akatapu koe ia koe kia Iehova, tei ia koe teia manakonakoanga manea: Nana koe e tuatau ua atu. Kua tia koe i toou oraanga kia Iehova noatu te manamanata me kore te meitaki o te oraanga. Kare e anoanoia e kia tia akaou i te reira. Tika rai, me akatapu tatou ia tatou uaorai, te rave ra tatou i tetai takainga puapinga. Akamanako ana i teia: E maata te au ikianga taau ka rave i roto i toou oraanga inara e meitaki tikai teia au ikianga no te akatapuanga i toou oraanga kia Iehova. (Sala. 50:14) Ka tauta a Satani i te akaparuparu i toou inangaro i toou Metua, te manako anga e ka aati i toou tu tiratiratu. Auraka e tuku e kia rē a Satani! (Iobu 27:5) Na toou inangaro ia Iehova e tauturu ia koe kia akono i taau akatapuanga e te akavaitata anga ki toou Metua i te rangi.

21. Eaa tatou i karanga ai e kare te papetitoanga ko te openga mari ra ko te akamataanga?

²¹ Muri ake i te akatapuanga i toou oraanga kia Iehova, e tuatua atu ki te aronga pakari i roto i te putuputuanga no te takainga puapinga ka aru mai. E akamaara e kare te papetitoanga ko te openga mari ra ko te akamataanga. I tetai oraanga mutu kore no te tavini anga ia Iehova. No reira e akaketaketa i teianei i toou inangaro i toou Metua. E akanoo i te au akakoroanga kia ketaketa atu toou inangaro i te au rā. Ka akakeu te reira ia koe kia papetitoia. E tuatau manea tikai te reira rā. Inara ko te akamataanga teia. No reira e akaketaketa ua rai i toou inangaro ia Iehova e tana Tamaiti!