1. Eaa te tumu ka ngata ai i tetai pae i te inangaro i te apii?

E NGATA te angaanga moni i teia tuatau. E manganui te au taeake, te angaanga roa nei no te akono i to ratou ngutuare tangata. Ka pou rai te taime i te au rā tataki tai no te au taeake kia tae ki te ngai angaanga. E maata te akono ra ia ratou uaorai, na te rave anga i te angaanga pakari. Me tae ki te openga o te rā, kua roiroi rai te au taeake e te au tuaine! No to ratou roiroi, ka ngata rai i te inangaro i te apii.

2. Eaa toou taime e apii ana koe?

² Te tika, kia akanoo tatou i te taime no te apii—kia apii tikai—i te Tuatua a te Atua e te au puka Kerititiano. Ka anoanoia teia me ka inangaro tatou i tetai pirianga meitaki kia Iehova e kia rauka te ora mutu kore! (1 Timo. 4:15) E ara vave ana tetai pae i te au rā ravarai no te apii, e kare e turituri i te kainga, e te oraora ra te manako no te akangaroi meitaki. E akanoo ana tetai pae i tetai manga miniti i te openga o te rā, no te apii i te pae vaerua ma te akamanako oonu i te reira.

3-4. Eaa te au taui anga tei akanooia no te maata o te au mea ka tatau e te akarakara, e eaa te tumu?

³ Kare e ekoko anga ka akatika koe, e mea puapinga no te akanoo i tetai tuatau no te apii. Inara eaa ta tatou ka apii? ‘E maata roa te au mea ka tatau,’ i naau ei. ‘E ngata iaku i te tatau i te au mea ravarai.’ Ka rauka i tetai pae i te tatau i te au mea pae vaerua, inara e manganui te au taeake e ngata kia akanoo  i te taime no te rave i te reira. Kua kite te Pupu Akaaere i teia. No reira, kua oronga mai ratou i te arataki anga no te akaiti mai i te au mea ka apii, te au apinga tei neneiia, e te au mea i runga i te roro uira.

⁴ Ei akaraanga, kare te Yearbook of Jehovah’s Witnesses e nenei akaouia, mei te mea e maata te au tua akamaroiroi i runga i te jw.org^® pera katoa te au porokaramu o te marama no te JW Broadcasting^®. Te neneiia ra i teianei Te Punanga Tiaki na te katoatoa e te Awake! e toru taime i te mataiti. Kare teia au taui anga i raveia kia akapou maata atu i te taime no tetai au angaanga ke. Kua akanooia te reira kia rauka ia tatou te tuatau no “te au mea e maata ua atu te meitaki.” (Phili. 1:10) Ka uriuri tatou akapeea me akanoo i te au mea puapinga e akapeea koe e puapinga ai mei taau apii Pipiria.

5-6. Eaa te au puka ta tatou ka apii meitaki?

⁵ Eaa te mea mua ta tatou ka apii? Kia akapou tatou i te taime i te au rā tataki tai no te apii i te Tuatua a te Atua. Kua akaitiia te au irava tatau Pipiria a te putuputuanga i te au epetoma, kia rauka tetai taime no te akamanako oonu i ta tatou e tatau ra, e kia rauka tetai kimikimi anga maata. To tatou akakoroanga, kare kia oti te reira i te tatau, mari ra kia riro te karere Pipiria ei akakeu i to tatou ngakau e kia akavaitata atu kia Iehova.—Sala. 19:14.

⁶ Eaa atu tetai ta tatou ka apii meitaki? E tikai, ka inangaro tatou i te akapapa no te apii Punanga Tiaki e te Apii Pipiria a te Putuputuanga, e te katoa anga o te apii no te epetoma. Kia aruaru katoa tatou i te tatau i Te Punanga Tiaki e te Awake!

7. Ka manata ainei tatou me kare e rauka ia tatou te tatau i te au mea ravarai i runga i ta tatou website e ta tatou JW Broadcasting?

⁷ ‘Meitaki,’ i naau ei, ‘inara akapeea te au mea i runga i ta tatou website, jw.org, pera katoa te au mea i runga i te JW Broadcasting? E maata tikai!’ Akamanako ana i tetai akatutuanga: E maata te au kai tukeke i runga i te kaingakai i ko i tetai are kai. Kare e rauka i te aronga kaikai i te kai i te katoa anga o te kai i runga i te kaingakai. No reira ka iki ua ratou i tetai manga kai. Pera katoa me kare e rauka ia koe i te tatau i te au mea ravarai i runga i te roro uira, auraka e manata. E tatau e e akara i taau ka rauka. Ka uriuri tatou i teianei, eaa te ka ō mai ki roto i te apii, e akapeea tatou e puapinga ai mei ta tatou e apii ra.

8. Eaa te au takainga taau ka rave me apii i Te Punanga Tiaki, e akapeea koe e puapinga ai mei te reira?

⁸ Me apii, ka anoanoia koe kia akara matatio i taau e tatau ra. Kare kia tatau viviki ua i te apii e kia akairo i te au pauanga. Ei akaraanga, te mea mua, me akapapa no te Apii Punanga Tiaki, e akara i te tuanga i roto i teia apii i te akamata anga o te atikara. Te rua, e tatau e e akamanako i te upoko tuatua o te atikara, pera katoa te au tumu tuatua rikiriki, e te au uianga openga. E oti, e tatau marie meitaki i te atikara. E akara i te aerenga tuatua mua o te au parakarapa tataki tai. Ka akamatakite ua mai te aerenga tuatua mua, kia kite koe i te apiianga tei akatakaia i roto i te parakarapa. Ia koe e tatau ra i te atikara, akamanako i te apiianga i roto i te parakarapa, ei turu i te au tumu tuatua rikiriki, e tei rotai ki te upoko tuatua o te atikara. E tata i te au tuatua taka kore e te au manako taau ka inangaro i te kimikimi maata atu.

9. (a) Eaa e akapeea me akara meitaki i te au irava me apii i Te Punanga Tiaki? (e) Mei tei akakiteia ia Iosua 1:8, eaa ta tatou ka rave i te pae i te tatau anga i te au irava?

 ⁹ Te Apii Punanga Tiaki, e apii te reira i roto i te Pipiria. E akara meitaki i te au irava, te au irava tatau te ka uriuriia e te putuputuanga. E akara meitaki akapeea te au tuatua me kore te au aerenga manako i roto i te au irava me turu i te tumu manako i roto i te parakarapa. Pera katoa, e akamanako oonu meitaki i te au irava taau e tatau ra, e e akamanako akapeea koe me taangaanga meitaki i te reira i roto i toou oraanga.—E tatau ia Iosua 1:8.

10. Ia Ebera 5:14, eaa te au metua ka akapou ei i tetai tuatau o te akamorianga ngutuare no te apii i ta ratou tamariki akapeea me apii e te rave i te kimikimi anga?

¹⁰ E tika, ka inangaro te au metua i te Akamorianga Ngutuare i te epetoma ei tuatau apii mataora no ta ratou tamariki. Noatu e ka anoanoia te au metua kia akanoo i tetai apii papu na te akamorianga ngutuare, kare e anoanoia kia akapapa i tetai au angaanga takake me kore au angaanga tamataora i te au epetoma ravarai. Penei ka riro te Akamorianga Ngutuare ei tuatau no te akarakara i te JW Broadcasting i te au marama, me kore te rave i tetai angaanga takake, mei te maani anga i te araka o Noa, e mea puapinga katoa kia apiiia te tamariki akapeea me apii. Ei akaraanga, ka anoanoia ratou kia kite akapeea me akapapa no te au uipaanga a te putuputuanga, e akapeea me kimikimi i tetai tumu manako tei tupu mai i te apii. (E tatau ia Ebera 5:14.) Me akapou ratou i tetai taime ki runga i te au apii takake i te kainga, ka papa meitaki atu ratou no te apii i ko i te au uipaanga putuputuanga, te au akaputuputuanga, e te au uruoaanga, penei kare te akarakara vitio e kapitiia mai ki roto. E tika, e mea puapinga kia akara i te mataiti e te tu o te tamariki me raveia te au apii tataki tai.

11. Eaa i puapinga ai kia apii tatou i te aronga apii Pipiria akapeea me apii meitaki ko ratou anake?

¹¹ Ka anoano katoaia ta tatou aronga apii Pipiria kia kite akapeea me apii. I to ratou ou anga, ka rekareka ua tatou me akairo ratou i te au pauanga no ta ratou apii Pipiria me kore no te au uipaanga putuputuanga. Inara ka anoanoia tatou kia apii i ta tatou aronga apii Pipiria, akapeea me rave i te kimikimi anga e akapeea me rave i tetai apii oonu ko ratou anake. Me tupu mai te au manamanata, kare ratou e oro vave ki tetai ke o te putuputuanga no te tauturu, ka kite ua ratou na te kimikimi anga i roto i ta tatou au puka.

12. Eaa to tatou au akakoroanga kia apii?

¹² Me kare koe i te tangata reka i te apii oonu, penei kare rai koe e reka i te apii. Inara, ka rauka rai ia koe. E akamata ki te au tuatau poto ua e oti e akamaata atu i te taime taau ka akapou. E akanoo i tetai akakoroanga. E tika, to tatou akakoroanga koia oki kia akavaitata atu kia Iehova. Penei, tetai akakoroanga, ko te pau i te uianga tei uiia mai e tetai tangata me kore kia kimikimi no runga i tetai manamanata ta tatou e aro atura.

13. (a) Akataka mai i te au takainga ka rave tetai mapu no te paruru i tona au irinakianga i te apii? (e) Akapeea koe me taangaanga i te ako ia Kolosa 4:6?

¹³ Ei akaraanga, e mapu ainei koe i te apii? Penei te irinaki ra toou au oa apii no runga i te au mea tupu ua. Ka inangaro koe i te paruru i te apiianga a te Pipiria, inara kare koe i papa ake no te reira. No reira ka anoanoia tetai apii naau uaorai! E rua oou akakoroanga: (1) e akaketaketa i toou uaorai irinakianga e na te Atua i anga i te au mea pouroa e te (2) e apii meitaki kia karape koe i te paruru i te tuatua mou. (Roma 1:20; 1 Pete. 3:15) Penei ka ui koe kia koe uaorai, ‘Eaa te au manako ta te au oa i taangaanga no te turu i te au mea tupu ua?’ E oti e rave i te au kimikimi anga meitaki i roto i ta tatou au puka. Penei kare i te mea ngata kia paruru i toou irinakianga, mei taau i manako. Te irinaki ra te maata anga o te tangata i te irinakianga o te au mea tupu ua, no te mea na tetai tangata kite i akakite i te reira kia ratou. Me kitea mai e koe e rua manako no te oronga atu, penei ka rauka ia koe i te oronga atu i tetai pau anga meitaki ki te tangata tei inangaro i te apii i te tuatua mou.—E tatau ia Kolosa 4:6.

14-16. (a) Akapeea koe e kite ei i tetai puka Pipiria kare koe i matau meitaki? (e) Na te taangaanga anga i te au irava tei taikuia, e akamārama mai akapeea e rauka ai ia koe tetai apiianga no te puka a Amosa? (Akara katoa i te pia “ E Akariro i te Pipiria ei Mea Ora!”)

¹⁴ Penei i ko i tetai uipaanga putuputuanga, kua patiia mai tatou kia akara meitaki i te au tataanga o tetai o te au peroveta rikiriki, penei kare tatou i matau meitaki. Penei te takainga mua, e akatupu i te inangaro kia kite i ta te peroveta i tata. Akapeea koe me akamata i te reira?

¹⁵ Te mea mua, e ui kia koe uaorai: ‘Eaa taau i kite no runga i te tangata tei tata i te puka? Koai aia, e noo ana aia kiea, e eaa tana angaanga?’ Penei no te ngai i utuutuia mai ei aia, te ka akataka katoa mai i tana au kupu tuatua e tana au akatutuanga i taangaanga. Ia koe e tatau ra i te Pipiria, e akara i te au aerenga tuatua tei akakite mai i te tu o te tangata tata.

¹⁶ Aru mai, ka kite koe inaea teia puka i tataia ai? Ka kite ua koe na te akaraanga i te “Ingoa o te au Puka” i mua i Te Bibilia Tapu Ra. Pera katoa, ka rauka ia koe i te akara i muri i te au mapu o te Pipiria, te ngai i aaere ei te ngati Iseraela, te noo anga ratou i te enua taputouia. Me e puka totou taau e apii ra, e mea meitaki kia kite koe mei teaa te tu i te reira tuatau. Eaa te au tu e te au angaanga kino ta te au peroveta i manako atu no te akatikatika? Koai ma tona au taeake i te reira tuatau? Kia mārama meitaki i teia, ka anoanoia koe kia akara i tetai atu au puka ke. Ei akaraanga, kia mārama meitaki atu eaa tei tupu i te tuatau o te peroveta ko Amosa, ka puapingaia koe me akara meitaki i te au irava i roto i nga puka o 2 Ariki e 2 Paraleipomeno, tei tataia i te pae mai ia Amosa 1:1. Pera katoa, penei ka tatau koe i te au tataanga  a Hosea, e taeake aia no Amosa. Ka riro teia au tataanga ei akamārama i te tuatau i noo ei a Amosa.—2 Ari. 14:25-28; 2 Para. 26:1-15; Hose. 1:1-11; Amo. 1:1.

17-18. I teia au akaraanga i roto i te parakarapa e taau uaorai akaraanga, e akataka mai akapeea taau akara anga i te au akakiteanga rikiriki me akariro i taau apii Pipiria ei mea mataora.

¹⁷ E mea meitaki i te tatau i te Pipiria no te apii maata atu i te reira. Ei akaraanga, me tatau koe i te pene 12 o te totou a Zekaria, tei totou mai i te mate o te Mesia. (Zeka. 12:10) Me tae koe ki te irava 12, ka tatau koe i “te kopu o te ngutuare o Natana” tei aue maata i te mate o te Mesia. Auraka e akara ua i te au tuatua, mari ra e tapu ma te ui kia koe uaorai: ‘Eaa te pirianga i rotopu i te ngutuare o Natana e te Mesia? Ka rauka ainei tetai atu au akakiteanga ke?’ E “kimi” atu kia rauka te mārama. Ka taki atu te kimikimi anga kia 2 Samuela 5:13, 14, ka kite koe e ko Natana tetai tamaiti a te Ariki ko Davida. Te rua o te akakiteanga, ia Luka 3:23, 31, te akakite maira e e uanga tikai a Iesu no Natana na roto mai ia Maria. (Akara i Te Punanga Tiaki, Aukute 2017, kapi 32, para. 4.) Kare i roa, kua reka koe i te tatau i te reira! Kua kite koe e kua totouia e e uanga a Iesu no Davida. (Mata. 22:42) Inara e 20 tuma a Davida au tamariki tamaroa. Kare ainei i te mea umere e kua akataka meitaki a Zekaria e kua aue maata te ngutuare o Natana i te mate o Iesu?

¹⁸ Akamanako ana i tetai akaou akaraanga. I te pene mua o Luka, ka tatau tatou no te angera ko Gaberiela tei aravei ia Maria no te akakite e ka anau aia i tetai pepe tamaroa: “Ka maata aia, e ka tuatuaia i te Tamaiti na Tei Teitei: e na te Atu ra, na te Atua e oronga mai i  te terono o tona metua o Davida nona: Ei iaia te au i te kopu-tangata o Iakoba e tuatau ua atu, kare rava ïa e kore tona basileia.” (Luka 1:32, 33) Penei ka anoanoia tatou kia akara ua i te tuanga mua o te karere a Gaberiela, koia oki, ka kapikiia a Iesu e ko te “Tamaiti na Tei Teitei.” Inara kua totou katoa a Gaberiela no Iesu e “Ei iaia te au.” No reira ka ui tatou kia tatou uaorai, eaa te aiteanga o ta Gaberiela au tuatua kia Maria. Kua mārama ainei aia i te au tuatua a Gaberiela e ka mono a Iesu i te Ariki ko Heroda—me ko tetai o tona au tutara te ka mono iaia i Iseraela? Naringa a Iesu i riro mai ei ariki, ko Maria i reira te mama ariki vaine, e ka noo tona ngutuare tangata i ko i te are ariki. Inara, kare e akakiteanga e kua taiku a Maria i te reira kia Gaberiela; e kare katoa e ngai te akakite ra, e kua pati a Maria i tetai taoonga i te Patireia, mei ta te nga pipi a Iesu i pati. (Mata. 20:20-23) Te akakite papu maira teia e e vaine akaaka tikai a Maria!

19-20. Mei tei akatakaia ia Iakobo 1:22-25 e te 4:8, eaa to tatou akakoroanga no te apii?

¹⁹ Akamaara, to tatou akakoroanga kia apii i te Tuatua a te Atua e te au puka Kerititiano, koia oki kia akavaitata atu kia Iehova. Ka inangaro katoa tatou kia kite i to tatou “tu” e eaa te au taui anga ka anoanoia no te akamareka i te Atua. (E tatau ia Iakobo 1:22-25; 4:8.) I te akamata anga o te au tuatau apii tataki tai, e pati kia Iehova no tona vaerua tapu. E pati akatenga kiaia kia akapuapinga mai i ta tatou apii e kia rave i te au taui anga tei anoanoia.

²⁰ Kia aite tatou ki te tavini tiratiratu o te Atua tei akatakaia e te tata taramo: “Ko tei inangaro ra i te ture a Iehova; e tei tana ture tona manako anga i te po e te ao. . . . ko tana katoa e rave ra, te meitaki ra ïa.”—Sala. 1:2, 3.