1. Eaa ta te Tuatua a te Atua e apii maira ia tatou?

KA RAUKA ia tatou i te autu i tetai ua atu akaaoanga—no te mea ko Iehova to tatou Orometua Maata. (Isa. 30:20, 21) Te oronga maira Tana Tuatua i te au mea ravarai ta tatou ka anoano “kia apa kore” tatou e kia “tau tikai i te au angaanga memeitaki katoa ra.” (2 Timo. 3:17) Me aru tatou i te au apiianga Pipiria, ka pakari atu to tatou manako i te aronga te turu ra i “te pakari oki o teianei ao.”—1 Kori. 3:19; Sala. 119:97-100.

2. Eaa ta tatou ka akara matatio i roto i teia atikara?

² Mei ta tatou ka kite, e reka ana te tangata i te pakari o teianei ao tei akatupu i to ratou uaorai anoano noinoi i te pae kopapa. No reira, ka ngata rai ia tatou i te patoi i te au manako e te au angaanga a teianei ao. Te tumu, karanga ra te Pipiria: “E matakite ko te pou aea kotou i te tuatua pakari e te pikikaa puapinga kore a tetai tangata atu, i te tuatua ikuiku a te tangata nei.” (Kolo. 2:8) I teia atikara, ka akara matatio tatou akapeea te nga pikikaa e rua te tupu maata anga. Ka akara tataki tai tatou, te tumu e e puapinga kore te pakari o teianei ao, e akapeea te pakari o te Tuatua a te Atua i meitaki rava atu ei i tetai ua atu apinga ta teianei ao ka oronga mai.

3-4. Eaa te au taui anga manako no te pirianga ainga tei tupu i Marike i te tuanga mua o te 20 anere mataiti?

³ I Marike, kua kiteaia te taui maata i te tuanga mua o te 20 anere mataiti no te au manako o te tangata no runga i te  pirianga ainga. I mua atu ana, e manganui tei irinaki e kua akonoia te pirianga ainga no te aronga akaipoipo, e kare te reira e uriuriia ana i te ngai tangata.

⁴ I te toru ngauru mataiti o te 20 anere mataiti tei karangaia ko te Tamataora Anga Rua Ngauru mataiti, ko te taui anga maata rava atu te reira. “Kua kiteaia te reira tu i roto i te au akatutu anga teata, te au imene, te au puka, e te au akakitekite anga o te au tamataora anga no te pirianga ainga,” i karanga ai tetai tangata kimikimi. I te reira tai ngauru mataiti, kua kiteaia te au tu ura ainga tau kore e e marikonga kore te au tu kakau. Mei ta te Pipiria i totou no te tuatau openga, ka riro te maata o te tangata “ei anoano i te au mea e navenave ei ra.”—2 Timo. 3:4.

5. Eaa tei tupu ki te manako o teianei ao no te pirianga ainga mei te au mataiti o te 1960?

⁵ I te au mataiti o te 1960, kua tupu maata te noo kapiti kare i akaipoipo, te pirianga tane e te tane e te pirianga vaine e te vaine, e ka rauka ua i te tatara i te tokorua. E maata te au tu tamataora tei akariari ua mai i te pirianga ainga. I te au ngauru mataiti i topa akenei, kua kiteaia te kino o teia au tu. Tata tetai vaine tata puka, e no te au ngutuare tangata ngaangaa, te au ngutuare tangata okotai metua, te mamae ngakau, te peu akara tutu ainga viivii, i tupu ei “te tauianga o te pirianga ainga i roto i te iti tangata.” No te maata o te maki pirianga ainga, mei te AIDS, ko tetai akaari anga teia e e neneva te pakari o teianei ao.—2 Pete. 2:19.

6. Akapeea te manako o teianei ao no te pirianga ainga me turu i to Satani akakoroanga?

⁶ Te turu ra te manako o teianei ao no te pirianga ainga i te akakoroanga o Satani. Kare e ekoko anga, te reka ra aia i te kite i te tangata e takino ra i te apinga aroa a te Atua, no te pirianga ainga e te oraanga akaipoipo. (Ephe. 2:2) Ka takino te pirianga ainga tau kore i ta Iehova apinga aroa no te anau tamariki, e ka takino katoa i te aronga tei rave i te reira, e kare e rauka te ora mutu kore.—1 Kori. 6:9, 10.

7-8. Eaa te manako tau e te meitaki no te pirianga ainga tei akakiteia i roto i te Pipiria?

⁷ Te akavaavaa ra te tangata i te pakari o te Pipiria no te pirianga ainga, te karanga anga e e tau kore te reira. Penei ka ui ratou, ‘Eaa te Atua ka anga ai i te au anoano ainga e  oti ka akakite mai kia tatou kia tapupu i te reira?’ Te uiia ra teia uianga no te mea kua vare ua ratou i te manako, e ka rave ua te tangata i tona uaorai anoano. Inara kare te Pipiria e akakite ana i te reira. Te akangateitei ra te reira ia tatou e ka rauka rai ia tatou i te akatere i to tatou uaorai au anoano. (Kolo. 3:5) Pera katoa, kua oronga mai a Iehova i te apinga aroa o te akaipoipo, e ka rauka te au anoano ainga i te akamerengoia. (1 Kori. 7:8, 9) Na roto i teia tu, ka mareka tetai tane e tetai vaine i te pirianga ainga, ma te kore e manata atu i te kino ka tupu i roto i te pirianga moeaana.

⁸ Te turu ra te Pipiria i tetai oraanga pirianga ainga tau e te meitaki. Te akatika ra te reira e, ka riro te pirianga ainga ei pirianga marekaia. (Mase. 5:18, 19) Inara, te karanga ra te Pipiria: “Kia kite kotou ravarai e pini ua ake i te vaio i tona uaorai āriki ma te tapu e te ngateitei; Auraka i te inangaro tika kore, mei te etene tei kore i kite i te Atua ra.”—1 Tesa. 4:4, 5.

9. (a) Akapeea te iti tangata o Iehova i te akamata anga o te 20 anere mataiti, te akamaroiroiia anga kia aru i te pakari ngateitei o te Tuatua a te Atua? (e) Eaa te akoanga pakari ia 1 Ioane 2:15, 16? (ng) Mei tei akakiteia ia Roma 1:24-27, eaa te au angaanga tau kore kia patoi tatou?

⁹ I te akamataanga o te 20 anere mataiti, kare te iti tangata o Iehova i aru ana i te manako tau kore o te aronga “kite kore [e] te akama.” (Ephe. 4:19) Kua tauta ratou i te aru meitaki i te au turanga o Iehova. Akakite te Punanga Tiaki o Me 15, 1926, e “kia akono tetai tane me kore tetai vaine i te tu mā i te pae o te manako e tana ka rave, i roto tikai i te pirianga ki tetai e tetai.” Noatu eaa te tupu ra i teianei ao, kua aru te iti tangata o Iehova i te pakari ngateitei o te Tuatua a te Atua. (E tatau ia 1 Ioane 2:15, 16.) Mei teaa atura to tatou rekareka i te Tuatua a te Atua! Mataora katoa tatou e te oronga maira a Iehova i te au kai pae vaerua i te tuatau tau, no te tauturu ia tatou kia patoi i te pakari o teianei ao, no te pirianga ainga. *—E tatau ia Roma 1:24-27.

10-11. Eaa ta te Pipiria i akamatakite mai e ka tupu i te tuatau openga?

¹⁰ Akamatakite mai te Pipiria i te tuatau openga, “e riro te tangata nei ei akaperepere ia ratou uaorai.” (2 Timo. 3:1, 2) Kare i te mea poitirere, e te akakeu ra teianei ao kia anoano tetai iaia uaorai. Karanga tetai tataanga, e i te au mataiti o te 1970 “tupu maata te au puka tauturu.” Tetai au puka, “kua māro i te aronga tatau kia kite e kia āriki ia ratou uaorai e kia akaepaepa ia ratou uaorai.” Ei akaraanga, akamanako ana i te akakiteanga i roto i teia puka: “Inangaro au iaku uaorai no te manea iaku, te oaoa e te puapinga rava atu—ko au rai.” Te akakite ra teia puka no tetai “tu tangata tei anoano i tana uaorai ka rave, tei akatumuia ki runga i tona uaorai akava ngakau e te au ture no tana peu.”

¹¹ I kite ana ainei koe i teia tu? Kua akamaroiroi katoa a Satani ia Eva kia pera. Karanga aia “e ka riro korua mei te Atua ra te tu, i te kite i te meitaki e te kino.” (Gene. 3:5) I teia tuatau, e manganui te manako ra ia ratou uaorai—e kare te Atua e akakite mai kia ratou eaa tei tau e eaa tei tarevake. Ei akaraanga, te kite maataia ra teia tu i roto i te oraanga akaipoipo.

12. Eaa te tu akaipoipo ta teianei ao e akakite ra?

¹² Te ako ra te Pipiria i te tane e te vaine, kia akangateitei i tetai e tetai, i roto i ta  raua taputou no te oraanga akaipoipo. Te akamaroiroi ra te reira i te au tokorua akaipoipo kia noo kapiti, te karanga anga: “E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.” (Gene. 2:24) E tuke rai te manako o te aronga tei turu i te pakari o teianei ao, te karanga ra, e kia akamou tetai tokorua ki runga i tona uaorai au anoano. “I roto i tetai au akaipoipo,” i akakite ei tetai puka no te tatara, “kua tupauia te tia kia akaipoipo ‘e mate ua atu’ ki te taputou kia akaipoipo ‘e motu ua atu te inangaro.’” Kua riro teia manako tau kore no te akaipoipo, ei akatupu i te ke e te mamae ngakau i roto i te au ngutuare tangata. Kare e ekoko anga, e apiianga neneva teia na teianei ao no te akaipoipo.

13. Eaa tetai tumu ka rikarika ai a Iehova i te aronga ngakau parau?

¹³ Karanga ra te Pipiria: “Te rikarika rā Iehova i te aronga katoa i parau te ngakau ra.” (Mase. 16:5) Eaa ra a Iehova ka rikarika ai i te aronga ngakau parau? Tetai tumu te akaari ra teia i te tu akatietie o Satani, me akatupu e me akamaata ratou i te inangaro ia ratou uaorai. Kua taangaanga te Atua ia Iesu no te anga i te au mea ravarai. Akamanako ana, e kua irinaki a Satani e ka tupou a Iesu ki raro e ka akamori iaia! (Mata. 4:8, 9; Kolo. 1:15, 16) Te akaari maira teia tu tau kore e e neneva te pakari o teianei ao ki te Atua.

14. Akapeea a Roma 12:3 me tauturu ia tatou kia rauka te manako tau?

¹⁴ Ka tauturu te Pipiria ia tatou kia manako ia tatou uaorai ma te tau. Te āriki ra te reira i te manako tau kia inangaro ia tatou uaorai. Karanga a Iesu: “E aroa atu i to tangata tupu mei te aroa ia koe uaorai,” e kia akamanako meitaki tatou i to tatou uaorai anoano. (Mata. 19:19) Inara, kare te Pipiria e apii maira e kia akateitei tatou ia tatou uaorai ki rungao i tetai ke. Mari ra, te akakite ra: “Auraka takiri e mea e raveia ma te taumāro,  e te akanengonengo puapinga kore; ei ngakau akaaka ra, i te manako akameitaki atu tetai ki tetai, auraka iaia uaorai.”—Phili. 2:3; e tatau ia Roma 12:3.

15. Eaa te tumu ka riro te ako a te Pipiria no te manako iaia uaorai ei mea tau?

¹⁵ I teia tuatau, e manganui te aronga kite, te akavaavaa ra i te akoanga a te Pipiria. Karanga ratou e na te akangateitei anga i tetai, ka akaparuparu te reira ia koe, e ka māro mai tetai ia koe kia rave i tona anoano. Inara, eaa tikai te tu manako tei akamaataia e to Satani ao? Eaa taau i kite ana? E mataora ainei te aronga manako ia ratou uaorai? E mataora ainei to ratou ngutuare tangata? E au taeake piri ainei to ratou? E pirianga vaitata ainei to ratou ki te Atua? Mei taau i kite ana, ko teea te tupuanga meitaki rava atu—kia aru i te pakari o teianei ao me kia aru i te pakari o te Tuatua a te Atua?

16-17. Eaa ta tatou ka akameitaki, e eaa te tumu?

¹⁶ Ka aite te aronga tei aru i te ako a te aronga kite o teianei ao, mei tetai tangata turoto tei ui ki tona taeake naea me aere me ngaro raua. Karanga a Iesu no te aronga “pakari” i tona tuatau: “E matapo arataki matapo ïa. E kia arataki te matapo i te matapo, e topa kapipiti ïa ki roto i te vaarua.” (Mata. 15:14) E tika rai, e neneva te pakari o teianei ao ki te Atua.

¹⁷ Kua riro ua ana rai te ako pakari a te Pipiria ei “mea meitaki ei apiianga, ei akoanga, ei akakiteanga apa, e ei akakite mai i te tuatua-tika ra.” (2 Timo. 3:16) Mei teaa atura to tatou akameitaki ia Iehova na roto i tana akaaerenga e kua paruru aia ia tatou mei te pakari o teianei ao! (Ephe. 4:14) Kua riro te kai pae vaerua tana i oronga mai ei akamaroiroi ia tatou kia akono meitaki i tana au turanga o tana Tuatua. Mei teaa atura te akameitakianga kia aratakiia e te pakari mou no roto mai i te Pipiria!