1-2. Eaa te au manamanata tei tupu ki te Au Kite o Iehova?

AKAMAROIROI te apotetoro ko Paulo ia Timoteo e te au Kerititiano katoatoa kia rave akaope takiri i te angaanga tutu aere. (2 Timo. 4:5) No reira ka aru meitaki tatou i ta Paulo ako. Inara, tetai taime ka ngatā te reira. Ka anoanoia te tu ngakau toa no te tutu aere. (2 Timo. 4:2) Ei akaraanga, akamanako i to tatou au taeake e noo ra i te au enua kua araiia ta tatou angaanga. Ka tutu aere ratou noatu ka tiriaia ratou ki roto i te are auri!

² Tukeke te manamanata e tupu ana ki te iti tangata o Iehova te ka akataitaia ia ratou. Ei akaraanga, e angaanga roa ana tetai pae kia rauka mai te au mea tei anoanoia no te ngutuare. Ka inangaro ratou i te rave maata atu i te angaanga tutu aere, inara i te openga epetoma, kare o ratou maroiroi. Tetai pae, e iti ua ta ratou ka rauka i te rave no te mea e maki kino to ratou me kore kua pakarikari; e penei kare e rauka i te akaruke i to ratou kainga. E tetai pae, kua tupu te manako puapinga kore kia ratou. Karanga tetai tuaine ko Mary * tona ingoa: “E ākā angaanga i te patoi i toku au manako kino e ka roiroi au i te manako ua i te reira. E oti ka maromaroa au no te mea kare oku taime e te maroiroi no te angaanga tutu aere.”

3. Eaa ta tatou ka akamanako i roto i teia atikara?

³ Noatu to tatou turanga, ka akamaroiroi a Iehova ia tatou kia tavini maroiroi ua atu iaia. I mua ake ka akamanako ei tatou akapeea a Iehova me tauturu ia tatou, ka akara tatou akapeea aia i te akamaroiroi anga ia Paulo e Timoteo kia rave akaope i ta raua angaanga tutu aere noatu te au manamanata.

4. Eaa te au manamanata tei tupu kia Paulo?

⁴ E maata te manamanata tei tupu kia Paulo. Kua inangaro maata aia i te maroiroi te pāpāia anga aia, te peî angaia ki te toka, e tona tapeka angaia. (2 Kori. 11:23-25) Akakite a Paulo e kua tupu ana te manako taitaia kiaia. (Roma 7:18, 19, 24) Akakoromaki katoa aia i “tetai tara i roto i [tona] kopapa,” e kua pati ki te Atua kia apai ke i te reira.​—2 Kori. 12:7, 8.

5. Eaa ta Paulo i rauka i te rave noatu tona au manamanata?

⁵ Akamaroiroi a Iehova ia Paulo kia rave i te angaanga tutu aere noatu te au manamanata tei tupu kiaia. Akamanako eaa ta Paulo i rauka i te rave. Ei akaraanga, i te tuatau i tapekaia ai aia i roto i tona are i Roma, kua tutu maroiroi aia i te nuti meitaki ki te au arataki ngati Iuda e pera ki te au arataki kavamani. (Anga. 28:17; Phili. 4:21,22) Kua tutu katoa aia ki te au tiaki o te are ariki, pera katoa te aronga tei atoro mai iaia. (Anga. 28:30, 31; Phili. 1:13) I taua tuatau ra, kua tata a Paulo i te au reta akauruia tei tauturu i te au Kerititiano o mua ana e tae mai ki teia tuatau. Kua riro katoa to Paulo akaraanga ei akamaroiroi i te putuputuanga i Roma, e “kua maata atura to ratou maroiroi kia apii i te tuatua ma te mataku kore.” (Phili. 1:14) Noatu kua kotingaia a Paulo, kua rave aia i tana i rauka, e “kua riro te au mea i rokoia mai ei [aia] ei akatupu i te evangelia nei.”​—Phili. 1:12.

6. Ia 2 Korinetia 12:9, 10, eaa tei tauturu ia Paulo kia rave akaope i tana angaanga tutu aere?

⁶ Kua mārama a Paulo e no te maroiroi o te Atua i rauka ai iaia te tavini ia Iehova, kare no tona uaorai maroiroi. Akakite aia e “ei te apikepike e taka meitaki ravaʼi [to te Atua] maroiroi.” (E tatau ia 2 Korinetia 12:9, 10.) Na roto i Tona vaerua tapu, kua akamaroiroi a Iehova ia Paulo kia rave akaope takiri i tana angaanga orometua​—noatu te takinokinoanga, te tapekaanga, e te au manamanata ke atu.

7. Eaa te au manamanata ta Timoteo i akakoromaki ei rave akaope i tana angaanga tutu aere?

⁷ Ko Timoteo te taeake mapu o Paulo, kua irinaki katoa aia ki te maroiroi o te Atua kia rave i tana angaanga tutu aere. Kua aru a Timoteo ia Paulo i tana  au tere mitinari. Pera katoa, kua tono a Paulo iaia ki te au ngai ke no te atoro e te akamaroiroi i te au putuputuanga. (1 Kori. 4:17) Penei kua manako a Timoteo e kare e rauka iaia i te rave i te reira. No reira a Paulo i akamaroiroi ei iaia: “Auraka rava e tangata e akavaavaa mai i toou ou anga.” (1 Timo. 4:12) Kua akakoromaki katoa a Timoteo i tetai tara i tona kopapa​—“te maki putuputu.” (1 Timo. 5:23) Noatu rai, kua kite a Timoteo e ka oronga mai te vaerua tapu ririnui o Iehova i te maroiroi tei anoanoia kia tutu aere i te nuti meitaki e te tavini i tona au taeake​—2 Timo. 1:7.

8. Akapeea a Iehova me akamaroiroi i tona iti tangata i teia tuatau?

⁸ I teia tuatau, ka oronga mai a Iehova i “te mana maata meitaki” ki tona iti tangata kia tavini tiratiratu ratou iaia. (2 Kori. 4:7) Ka akamanako tatou e ā tauturu ta Iehova ka oronga mai ei akamaroiroi ia tatou e ka tauturu ia tatou kia vai tiratiratu kiaia: te pure, te Pipiria, te au taeake Kerititiano e te angaanga tutu aere.

9. Akapeea te pure me tauturu ia tatou?

⁹ Akamaroiroiia e te pure. Ia Ephesia 6:18, akamaroiroi a Paulo ia tatou kia “pure tukumoe kore” ki te Atua. I reira ka akamaroiroi mai te Atua ia tatou. Kua kite a Jonnie, tei noo i Bolivia, i teia tauturu te tupu anga te au manamanata kiaia. Kua tu tana vaine e tona nga metua i te maki kino. Kua ngatā tikai ia Jonnie i te akono ia ratou. Kua mate tona metua vaine, e kua roa te tuatau i meitaki ei te maki o tana vaine e te metua tane. Karanga a Jonnie no runga i tei tupu, “I te au taime ngatā tikai, kua tauturuia au e te pure kia Iehova ma te akamārama i toku au manako.” Kua oronga a Iehova i te maroiroi ta Jonnie e anoano ra kia akakoromaki. Ko Ronald, e tangata pakari i Bolivia, kua kite mai aia e kua tu tona metua vaine i te maki cancer. E tai marama i muri mai, kua mate tona metua vaine. Eaa tei tauturu iaia kia akakoromaki? Karanga aia: “Me pure au kia Iehova ka rauka iaku te riringi i toku ngakau e te akakite i toku au manako kiaia. Kua kite au e kua mārama meitaki atu aia iaku i tetai ua atu tangata, e au katoa.” Tetai taime, penei ka manako tatou e maata roa te manamanata e ka ekoko eaa ta tatou ka pure. Inara, te pati maira a Iehova kia pure tatou kiaia noatu e ngatā te akamārama i to tatou manako kiaia.​—Roma 8:26, 27.

10. Ia Ebera 4:12, eaa ra te tatau Pipiria e te akamanako oonu i puapinga roa ai?

¹⁰ Akamaroiroiia na roto i te Pipiria. Kua tatau a Paulo i te au Tuatua Tapu kia rauka mai te maroiroi e te akapumaana, e ka rauka katoa ia tatou te rave i te reira. (Roma 15:4) Me tatau tatou i te Pipiria e me akamanako oonu, ka tauturu a Iehova ia tatou kia mārama akapeea te Pipiria me akamaroiroi ia tatou. (E tatau ia Ebera 4:12.) Karanga a Ronald, tei taikuia i mua ana: “Mataora au e kua tauta au i te tatau i te Pipiria i te au po ravarai. Ka akamanako putuputu au i to Iehova au tu e tona aroa takinga meitaki ki tona au tavini. Na teia i akamaroiroi iaku.”

11. Akapeea te Pipiria te akamaroiroi anga i tetai tuaine e mii ra?

¹¹ Me akamanako oonu tatou i te Pipiria, ka tauturuia tatou kia rauka te manako meitaki no runga i to tatou au manamanata. Akamanako akapeea te Pipiria te tauturu anga i tetai vaine takaua e mii ra. Karanga  tetai tangata pakari kiaia e ka rauka mai te tauturu meitaki me tatau aia i te puka a Iobu. Iaia e tatau ra, kua viviki aia i te akaapa ia Iobu no tona manako tarevake. Karanga aia: “E Iobu! Auraka e akamanako ua i toou manamanata!” Inara kite mai aia e kua aiteite tona tu ki to Iobu. Tauturu teia iaia kia akatikatika i tona manako e kua akamaroiroi iaia kia akakoromaki i te mamae ngakau te mate anga tana tane.

12. Akapeea a Iehova me akamaroiroi ia tatou na roto i te au taeake irinaki?

¹² Akamaroiroiia e te au taeake Kerititiano. Tetai akaou mataara ka akamaroiroi a Iehova i te au Kerititiano, na roto i te au taeake akamori. Tata a Paulo i tona anoano maata “kia pumaana oki [aia] e kotou katoa”​—tona au taeake e te au tuaine pae vaerua. (Roma 1:11, 12) Ko Mary, tei taikuia i mua ana, akaperepere aia i te au taeake. Karanga aia: “Kua taangaanga a Iehova i te au taeake e te au tuaine tei kore i kite i toku au manamanata. E tuatua akamaroiroi ta ratou, kua tata mai i tetai kāti naku, e ko te reira tikai taku i anoano. E meitaki katoa kia pukapuka ki te au tuaine e aiteite to matou manamanata e kia kite mai eaa ta ratou i rave. E kua tauturu te aronga pakari iaku kia kite e te akaperepere ra te au taeake i roto i te putuputuanga iaku.”

13. Akapeea tatou me akamaroiroi i tetai e tetai i ko i te au uipaanga a te putuputuanga?

¹³ Ko te au uipaanga a te putuputuanga tetai ngai meitaki rava atu no te akamaroiroi i tetai e tetai. Me aere koe ki te uipaanga, e tauta i te akamaroiroi i tetai ke na te akaari anga i toou aroa no ratou e te akameitaki ia ratou no ta ratou e rave ra. Ei akaraanga i mua ake i tetai uipaanga, karanga tetai tangata pakari ko Peter ki tetai tuaine kare tana tane i te Kite: “Mea akamaroiroi tikai te kite ia koe. Kua akamanea meitakiia taau toko ono tamariki e kua papa ua i te paupau.” Kua kī te mata o teia metua vaine i te roimata e kua pau atu: “Pumaana tikai au i te akarongo i taau tuatua!”

14. Akapeea te angaanga tutu aere me tauturu ia tatou?

¹⁴ Akamaroiroiia na roto i te angaanga tutu aere. Me akakite tatou i te tuatua mou ki tetai ke, ka mataora tatou me ka ariu mai te tangata e me kare. (Mase. 11:25) Akakite tetai tuaine ko Stacy akapeea te angaanga tutu aere te akamaroiroi anga iaia. Te akaateaia anga tetai mema o tona ngutuare mei te putuputuanga, kua maromaroa tikai aia e kua karanga, ‘Naringa e apinga taku i rave ei tauturu iaia!’ Pou ua to Stacy manako ki runga i te reira. Eaa tei tauturu iaia kia akakoromaki? Te angaanga tutu aere! Te aere anga aia i te tutu aere, kua akamou tona manako ki runga i te aronga tei inangaro i tana tauturu. Karanga aia: “I tera tuatau, kua oronga mai a Iehova i tetai apii Pipiria naku tei viviki i te taangaanga i tana e apii ra. Kua akamaroiroi tikai teia iaku. Ko te mea tei tauturu iaku kia ngaueue kore, ko te angaanga tutu aere.”

15. Eaa taau i apii mai mei ta Mary i tuatua?

¹⁵ No to ratou turanga, penei ka manako tetai pae kare e maata ta ratou ka rauka i te rave i roto i te angaanga tutu aere. Me manako akapera koe, e akamaara e te mareka ra a Iehova i taau ka rauka. Akamanako akaou i te akaraanga o Mary. Te neke anga aia ki tetai ngai reo ke, manako aia e iti ua tana ka rauka i te rave. Karanga aia, “No tetai tuatau, ka oronga ua au i te pauanga poto, ka tatau i tetai irava, e ka oronga i te aenga pepa me tutu aere.” Kare ona puapinga me akaaiteia ki te aronga tei kite i te reo. Inara, kua taui tona aerenga manako. Kua mārama aia e ka rauka ia Iehova i te taangaanga iaia noatu kare aia i kite meitaki i te reo. Karanga aia, “E māmā ua i te mārama i te tuatua mou o te Pipiria, e na te reira e taui i te oraanga o te tangata.”

16. Eaa te ka akamaroiroi i te aronga kare e rauka i te akaruke i to ratou kainga?

 ¹⁶ Te kite maira e te mareka ra a Iehova me inangaro tatou i te rave i te angaanga tutu aere, noatu kare e rauka i te akaruke i to tatou kainga. Penei ka oronga mai aia i tetai au atianga kia tutu aere tatou ki te aronga tiaki, te au taote e te neti. Me akaaite tatou i ta tatou e rave ra i teianei ki te tuatau mua, penei ka maromaroa tatou. Inara, me kite tatou akapeea a Iehova me tauturu ia tatou i teianei, ka akamaroiroiia tatou kia akakoromaki i tetai ua atu manamanata ma te rekareka.

17. Ia Koheleta 11:6, eaa ra tatou ka rave tamou ei i te angaanga tutu aere noatu kare e tupuanga meitaki?

¹⁷ Kare tatou i kite e ko teea te au tuatua mou ta tatou i ruru te ka akaia e ka tupu. (E tatau ia Koheleta 11:6.) Ei akaraanga, ko Barbara, e tuaine e 80 tuma ona mataiti, e putuputu aia i te tutu aere na runga i te tereponi e te tata reta. I roto i tetai reta, kua tauru aia i te Watchtower o Mati 1, 2014, tei roto te atikara “What God Has Done for You.” Kare aia i kite e kua tukuia teia reta ki tetai nga tokorua akaipoipo e Kite raua no Iehova i mua ana. Kua tatau putuputu raua i te makatini. Manako te tane mei te mea e te tuatua ra a Iehova kiaia. Kua akamata te nga tokorua i te aere ki te au uipaanga, e aere ua rai kua tavini maroiroi akaou raua ei nga Kite​—muri ake i te 27 mataiti. Kua akamaroiroiia tikai a Barbara i teia tupuanga meitaki no tetai reta tana i tata!

18. Eaa ta tatou ka rave kia akamaroiroiia e te Atua?

¹⁸ E maata ta Iehova i oronga mai no te akamaroiroi ia tatou. Me taangaangaia tana au tauturu i oronga mai​—te pure, te Pipiria, te au taeake Kerititiano e te angaanga tutu aere​—te akaari ra tatou i to tatou irinaki i to Iehova mana e tona inangaro i te tauturu ia tatou. E irinaki ua rai tatou i to tatou Metua i te rangi “kia oronga mai aia i te maroiroi ki te aronga i tika te ngakau iaia.”​—2 Para. 16:9.