1. Eaa ta Iehova i akatika ia tatou kia rave?

AKATIKA a Iehova ia tatou kia iki i to tatou tu oraanga. Apii mai aia ia tatou kia rave i tetai ikianga meitaki, e te tauturu ra aia ia tatou kia rave i te ikianga ei akamareka iaia. (Sala. 119:173) Te maata atu ia tatou i te taangaanga i te pakari o te Tuatua a te Atua, ka riro ta tatou ikianga ei mea meitaki.—Ebe. 5:14.

2. Eaa ka ngata ei ia tatou i te rave i te ikianga?

² Noatu te rave ra tatou i te ikianga pakari, ka ngata rai ia tatou i te akatupu i te reira. Akamanako ana i tetai au akaraanga: Kua manako tetai taeake mapu i te tatau i te katoa anga o te Pipiria. Kua rave meitaki aia i te reira i tetai nga epetoma, e oti kua akamutu. Kua iki tetai tuaine i te painia tamou, inara kua tuku atu aia ki tetai rā ke mai. E mea matau na te pupu o te aronga pakari i te tuku i tetai ikianga te ō maira te angaanga tiaki i roto i te putuputuanga, inara i muri ake i tetai au marama kare ratou i rave ana i te reira. E tuke rai teia au turanga, inara e aiteite ua ratou. Kare te reira au ikianga i raveia ana. Kua aite te reira ki te au Kerititiano i Korinetia i te anere mataiti mua. Akamanako ana eaa ta tatou i apii mai mei ia ratou.

3. Eaa te ikianga ta Korinetia i rave, e eaa tei tupu?

³ I te 55 T.N., kua rave to Korinetia i tetai ikianga puapinga. Kua kite ratou i to ratou au taeake i Ierusalema e Iudea i te na roto anga i te tu mamae e te putaua, e te akaputu ra tetai  au putuputuanga i te moni ei tauturu ia ratou. Na roto i te rima oronga e te takinga meitaki, kua rave to Korinetia i tetai ikianga kia oronga i te moni, e kua pati i te apotetoro ko Paulo akapeea ratou me tauturu. Kua tuku aia i tetai ikuikuanga ki te putuputuanga e kua iki ia Tito kia tauturu i te reira. (1 Kori. 16:1; 2 Kori. 8:6) I nga marama i muri mai, kua kite a Paulo e kare to Korinetia i aru meitaki ana i te reira. Tei tupu, kare ta ratou apinga i papa ana no te apai ki Ierusalema, ma te au apinga oronga mei tetai au putuputuanga mai.—2 Kori. 9:4, 5.

4. Ia 2 Korinetia 8:7, 10, 11, eaa ta Paulo i akamaroiroi i to Korinetia kia rave?

⁴ Kua rave meitaki to Korinetia i te ikianga meitaki, e kua akameitaki a Paulo ia ratou no te akarongo tiratiratu e te inangaro i te oronga ua. E kua akamaroiroi aia ia ratou kia akaoti i ta ratou i akamata. (E tatau ia 2 Korinetia 8:7, 10, 11.) Kua riro to ratou tupuanga ei apii ia tatou, e ka ngata rai i te au Kerititiano tiratiratu i te rave i te ikianga meitaki.

5. Eaa te au uianga ka pau tatou?

⁵ Mei to Korinetia rai, ka ngata katoa ia tatou i te rave i ta tatou ikianga. No teaa ra? E aronga apa ua tatou e ka tavarevare i ta tatou ikianga. E no te au angaanga kitea koreia te ka kore e rauka ia tatou i te aru e te rave i ta tatou i iki. (Kohe. 9:11; Roma 7:18) Akapeea tatou me uriuri akaou i te ikianga e kia akara akaou no te akatikatika i te reira? E akapeea tatou i te akapapu anga i ta tatou i akamata?

6. Aea tatou e anoano ei i te akatikatika i te ikianga?

⁶ Tetai au ikianga puapinga, kare rava tatou e taui. Ei akaraanga, ka iki tatou i te tavini ia Iehova, kia vai tiratiratu ki to tatou tokorua akaipoipo. (Mata. 16:24; 19:6) Tetai atu au ikianga, penei ka anoanoia kia akatikatikaia. No teaa ra? No te mea ka taui te turanga. Eaa te au takainga te ka tauturu ia tatou kia rave i te ikianga meitaki?

7. Eaa ta tatou ka pure, e no teaa ra?

⁷ Pure no te pakari. Kua akauru a Iehova ia Iakobo kia tata e: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai.” (Iako. 1:5) I tetai tu, te “ngere ra [te katoatoa] i te pakari.” No reira, e irinaki ua ia Iehova me rave i tetai ikianga e te uriuri i te reira. Ka tauturu a Iehova ia tatou kia rave i te ikianga pakari.

8. Eaa te kimikimi anga ta tatou ka rave i mua ake ka iki ei?

⁸ Kimikimi meitaki. Akara i ta te Atua Tuatua, tatau i te au puka na te akaaerenga a Iehova, e oti tuatua ki tetai ka tauturu mai ia koe. (Mase. 20:18) Ka anoanoia tetai kimikimi anga puapinga i mua ake ka iki ei koe kia taui i te ngai angaanga, kia neke, e te iki i te apii meitaki ei tauturu i taau angaanga tutu aere.

9. Akapeea tatou e puapingaia ai me rave tatou i te tika?

⁹ Akara matatio i toou akakoroanga. Te manako maira a Iehova i ta tatou e rave ra. (Mase. 16:2) Ka inangaro aia ia tatou kia rave i te tika i roto i te au mea ravarai. No reira me rave tatou i te au ikianga, kia rave i te tika no runga i to tatou akakoroanga. Me kare tatou e rave i te tika, ka ngata ia tatou i te akanoo i tetai ikianga. Ei akaraanga, penei ka inangaro tetai taeake mapu kia riro mai ei painia tamou. I muri mai, kua ngata iaia i te akatae i tona ora, e kua kite mai aia e kare aia e mataora ana i tana  angaanga orometua. Penei kua manako aia e ko tona akakoro anga ei painia, kia akamareka ia Iehova. Inara penei ko te tumu tikai i painia ei aia, ko te akamareka i tona nga metua me kore i tetai ke?

10. Eaa te ka anoanoia kia taui?

¹⁰ Akamanako ana i te turanga o tetai tangata apii i te Pipiria, tei akaruke i te kai avaava. I te akamata anga e ngata iaia, kua mako ua aia no te tai e te rua epetoma, e oti kua kai avaava akaou aia. I te openga, kua akaruke aia i te reira! Na tona inangaro ia Iehova e tona anoano i te akamareka Iaia, tei tauturu iaia kia autu.—Kolo. 1:10; 3:23.

11. Eaa koe ka anoano ei i te au akakoro anga papu?

¹¹ Kia papu i taau ka rave. Me papu taau ka rave, e māmā i reira i te akatupu i taau i akamata. Ei akaraanga, penei ka iki koe i te tatau putuputu i te Pipiria. Inara me kare aau akapapa anga papu, kare e rauka ia koe i te aru i taau parani. * Penei ka iki te aronga pakari i roto i te putuputuanga kia atoro putuputu i te mamoe, inara i muri ake i tetai tuatau, kare ratou i rave ana i te reira. Ei akatupu i te reira, ka ui ratou i teia au uianga: “Kua kite ainei tatou i te au taeake e te au tuaine te ka puapingaia mei teia atoro anga? Kua akanoo ainei tatou i tetai tuatau no te atoro ia ratou?”

12. Eaa ta tatou ka anoano i te rave, e no teaa ra?

¹² Akamanako meitaki. Kare o tatou taime, au apinga, me kore maroiroi i te rave i te au mea ravarai. E akamanako meitaki e kia manako tau. Penei, ka anoanoia koe kia taui i te ikianga te kare e rauka ia koe i te rave. (Kohe. 3:6) Penei kua akara akaou koe i taau ikianga, kua akatikatika e kua rave i te reira. Akamanako ana e rima mataara te ka tauturu ia koe kia akaoti i taau i akamata.

13. Akapeea e rauka ai ia koe te maroiroi, kia rave i taau ikianga?

¹³ Pure no te maroiroi kia rave. Oronga mai te Atua kia koe i “te inangaro e te rave” i taau ikianga i tuku. (Phili. 2:13) No reira e pati kia Iehova no tona vaerua tapu kia oronga mai i te maroiroi. E pure ua rai, noatu kare te reira e pauia mai noatu eaa te roa. Mei ta Iesu i tuatua: “E pati, e e orongaia mai [te vaerua tapu kia] kotou.”—Luka 11:9, 13.

14. Akapeea te kaveinga ia Maseli 21:5 me tauturu ia koe kia rave i taau ikianga?

¹⁴ Akapapa i te parani. (E tatau ia Maseli 21:5.) Ei akaoti i tetai angaanga taau i akamata, ka anoanoia koe kia akapapa i tetai parani. E oti, ka anoanoia koe kia taangaanga i taau i parani. Me rave koe i tetai ikianga, e akapapa i te au ravenga takake e te aru i te reira. Me rave koe i tetai angaanga e rave i te tuanga rikiriki na mua, te ka tauturu ia koe kia akamama mai i te reira. Akamaroiroi a Paulo i to Korinetia kia akanoo i tetai apinga no te oronga ua “kia tae ki te rā mua o te ebetoma” e eiaa e tiaki kia koi i te reira me tae mai aia. (1 Kori. 16:2) Me rave koe i tetai angaanga e rave i te tuanga rikiriki na mua, kare i reira koe e apiapi roa.

15. Me akapapa koe i tetai parani, eaa taau ka rave?

¹⁵ Ko tetai parani taka meitaki taau ka tata, ka tauturu te reira ia koe kia rave i taau ikianga. (1 Kori. 14:40) Ei akaraanga, kua akaueia te au pupu aronga pakari kia tuku i tetai tangata pakari, kia rekoti i te au ikianga a te pupu aronga pakari, e koai tei tukuia kia  rave i te reira e kia tata i te rā kua raveia te reira. Ko te aronga pakari tei aru i teia, ka rave meitaki ratou i ta ratou ikianga. (1 Kori. 9:26) Ka rauka ia koe i te rave i teia ki toou oraanga. Ei akaraanga, ka akapapa koe i tetai parani e te akanoonoo i te reira kia māmā ia koe i te rave. Ka tauturu te reira ia koe kia akaoti i taau i akamata, e pera katoa ka maata atu taau ka oti i te rave.

16. Eaa tei anoanoia kia rave i taau ikianga, e akapeea a Roma 12:11 te turu anga i teia?

¹⁶ E aruaru. Ka aruaru koe i te aru i taau parani e te akaoti i taau i akamata. (E tatau ia Roma 12:11.) Akakite a Paulo kia Timoteo kia “akamaroiroi rai” e “e tamou tika rai i te reira” kia riro ei puapii meitaki. Ka aite rai te reira manako ki te au akakoroanga pae vaerua.—1 Timo. 4:13, 16.

17. Akapeea a Ephesia 5:15, 16 te tauturu anga ia tatou kia rave i ta tatou ikianga?

¹⁷ Akapou meitaki i toou taime. (E tatau ia Ephesia 5:15, 16.) E iki i tetai tuatau kia rave koe i te ikianga e kia akamou ki runga i te reira. E kopae i te tiaki no tetai tuatau tau; penei kare te reira e tupu. (Kohe. 11:4) Kia matakite eiaa e tuku i te au mea puapinga kore kia akapou i toou taime e te maroiroi no te rave i te au mea puapinga. (Phili. 1:10) Penei ake, e akanoo i te tuatau kare e maata ana te manamanata. E tuatua atu ki tetai pae e ka anoanoia tetai tuatau noou kia akamanako. E tamate atu i taau tereponi, e akara i taau imere e te social media i muri ake. *

18-19. Eaa taau ka rave kia akatupu i tetai ikianga meitaki noatu te ngata i te reira?

¹⁸ Akamou ki runga i te ka tupu. Tei tupu ki taau ikianga, ka akaaiteia ki tetai tere kua tae koe. Me inangaro tikai koe kia tae ki reira, ka aere ua atu koe, noatu kua topiriia te mataara e ka anoanoia koe kia taui i toou kaveinga. Mei te reira rai, me akamou tatou ki runga i ta tatou ikianga, kare tatou e tuku i te au noatu te ngata i te reira.—Gala. 6:9.

¹⁹ E ngata rai i te rave i te ikianga meitaki e te akatupu i te reira. Inara ma te tauturu a Iehova, ka rauka ia koe te pakari e te maroiroi taau e anoano ra, kia akaoti i taau i akamata.