1-2. (a) Eaa te ka tauturu ia tatou kia akakoromaki i te au rā ravarai? Akamārama mai. (e) Eaa ta tatou ka uriuri i roto i teia atikara?

“ME AKAMANAKO au i toku manamanata, kua kite au e kare e rauka iaku i te akakoromaki i te reira ko au anake ua.” Kua tupu ainei teia kia koe? Te maata anga ia tatou, ae. Penei kua maara ia koe i toou akakoromaki anga i tetai maki kino me kore te mate o tei akaperepereia. Penei kua maara ia koe e kua rauka ia koe i te akakoromaki, no tei rauka “te mana maata,” mei te vaerua tapu o Iehova.—2 Kori. 4:7-9.

² Ka anoano katoa tatou i te vaerua tapu ei tauturu ia tatou kia patoi i te tu kino o teia ao. (1 Ioa. 5:19) Ka anoano katoaia tatou kia patoi i “te au vaerua kikino.” (Ephe. 6:12) Ka uriuri tatou e rua mataara ka tauturu te vaerua tapu ia tatou. E ka uriuri tatou i ta tatou ka rave e puapinga ai mei te vaerua tapu.

3. Eaa tetai mataara ka tauturu a Iehova ia tatou kia akakoromaki i te manamanata?

³ Ka oronga mai to Iehova vaerua tapu i te maroiroi, no te rave i ta tatou angaanga noatu te manamanata. Karanga te apotetoro ko Paulo e kua rauka iaia i te tavini ua atu ia Iehova noatu te manamanata, no te mea kua irinaki aia ki runga i “te maroiroi o te Mesia.” (2 Kori. 12:9) I te rua o tona tere mitinari, kua maroiroi a Paulo i te tutu aere e kua angaanga i te akono iaia uaorai. Kua noo aia ki Korinetia, ki te kainga o Akuila e Peresila. E nga tokorua maani are kakau raua. Mei tera katoa a Paulo, kua angaanga kapiti aia kia raua no tetai  au rā. (Anga. 18:1-4) Kua akamaroiroi te vaerua tapu ia Paulo i tana ngai angaanga e te angaanga tutu aere.

4. Ia 2 Korinetia 12:7e-9, eaa to Paulo manamanata?

⁴ E tatau ia 2 Korinetia 12:7e-9. I teia irava, eaa te aiteanga o ta Paulo tuatua “tetai tara i roto i taku kopapa nei”? Me puta toou kopapa i te tara, ka mamae koe. Te karanga nei a Paulo e kua tupu tetai turanga mamae tikai kiaia. Kua akaaite aia i te reira ei “karere na Satani” e kua “pāpā” iaia. Penei kare na Satani e tana au angera temoni i akatupu i to Paulo manamanata, mei te mea atura e na ratou i koputa i te tara ki roto iaia. Inara te kite anga taua au vaerua kikino i te “tara,” penei kua aruaru rai ratou i te pēreʼi oonu atu i te reira, no te akamaata atu i to Paulo mamae. Eaa ta Paulo i rave?

5. Akapeea a Iehova te pau anga i te pure a Paulo?

⁵ I te akamata anga, kua inangaro a Paulo ia Iehova kia akakore atu i tona “tara.” Karanga aia: “E toru oki aku pati anga atu i te Atu [ia Iehova] . . . kia akataka keia iaku.” Kua vai rai te tara i tona kopapa noatu ta Paulo pure. Ko te aiteanga ainei e kare a Iehova i pau mai ana i te pure a Paulo? Kare. Kua pau mai rai aia i tana pure. Kare ra a Iehova i akakore ana i te manamanata, mari ra kua akamaroiroi aia ia Paulo kia akakoromaki i te reira. Karanga a Iehova: “Ei te apikepike e taka meitaki ravaʼi toku maroiroi.” (2 Kori. 12:8, 9) Ma te tauturu a te Atua, kua rauka ia Paulo i te noo maru ua e te rekareka!—Phili. 4:4-7.

6. (a) Akapeea a Iehova me ariu mai ki ta tatou pure? (e) Eaa te au akapapu anga i roto i te au irava ei akamaroiroi ia tatou?

⁶ Mei ia Paulo rai, kua pati akatenga ainei koe ia Iehova kia akakore i toou manamanata? E noatu taau pati akatenga kua tupu ua atu rai te manamanata—e kua kino rava atu—kua manata ainei koe e kare a Iehova e mareka mai ana ia koe? Me koia ia, e akamaara i to Paulo akaraanga. Mei ta Iehova pau anga i tana au pure, ka akarongo katoa mai Aia i taau pure! Penei kare a Iehova e akakore i te manamanata. Na roto i tona vaerua tapu, ka oronga mai aia i te maroiroi kia rauka ia koe i te akakoromaki i te reira. (Sala. 61:3, 4) Penei “kua uriia [koe] ki raro” inara kare a Iehova e akaruke ia koe.—2 Kori. 4:8, 9; Phili. 4:13.

7-8. (a) Mei teaa te tu o te vaerua tapu me akaaiteia ki te matangi? (e) Akapeea a Petero te akatutu anga i te angaanga a te vaerua tapu?

⁷ Eaa atu tetai mataara ka tauturu te vaerua tapu ia tatou? Mei tetai matangi meitaki i roto i te moana uriia, ka akakeu te vaerua tapu ia tatou kia na roto i te au manamanata uriia e tae ua atu ki te ngai akapuanga o te ao ou ta te Atua i taputou mai.

⁸ Ei tangata tautai, kua matau te apotetoro ko Petero i te teretere pai. Kua akatutu aia i te angaanga a te vaerua tapu mei te teretere anga pai rai. Tata aia: “Kare oki to te inangaro o te tangata i tae mai ei te totou i taito ra; ko te au tangata tapu ra o te Atua tei tuatua i ta te vaerua tapu i tuku mai ia ratou ra.” Te tuatua Ereni tei uriia “tuku mai,” tona aiteanga, apainaia; akakeuia.—2 Pete. 1:21.

9. Eaa ta Petero akatutuanga i akamanako no te kupu akakeuia?

⁹ Eaa ta Petero akatutuanga i akakite no te kupu, akakeuia? Ei tata no te puka a Angaanga kua taangaanga a Luka i tetai tuatua Ereni, no te akatutu i tetai pai tei ‘mānuia’ e te matangi. (Anga. 27:15) Te tata anga a Petero e kua akakeuia te aronga tata Pipiria, kua taangaanga aia i “tetai tuatua akaaite  anga no te teretere moana,” mei tei akakiteia e te tangata apii Pipiria. Karanga a Petero, mei tetai pai tei apainaia e te matangi ki tona ngai e aere ra, pera katoa te au peroveta e te aronga tata Pipiria tei akakeuia e te vaerua tapu kia rave i ta ratou angaanga. Karanga te tangata apii: “Kua uuti te au peroveta i to ratou kie.” Kua rave a Iehova i tana tuanga angaanga. Kua oronga aia i “te matangi,” me kore te vaerua tapu. Kua rave te aronga tata Pipiria i ta ratou tuanga angaanga. Kua angaanga kapiti ratou ki te arataki anga a te vaerua tapu.

10-11. Eaa te nga takainga e rua tei akapapu e te akakeuia ra tatou e te vaerua tapu? Akataka mai.

¹⁰ E tika, kare a Iehova e akauru akaou ana i tona vaerua tapu kia tata puka i teia tuatau. Inara, te taangaanga nei rai a Iehova i tona vaerua tapu ei arataki i tona iti tangata. Te rave nei rai a Iehova i tana tuanga angaanga. Akapeea tatou e puapinga ai mei te vaerua tapu o te Atua? Kia rave ua rai tatou i ta tatou tuanga angaanga. Akapeea tatou me rave i te reira?

¹¹ Akamanako ana i teia akaaiteanga. E puapinga ai mei te matangi, ka rave te mataro e rua apinga. Te mea mua, ka tuku aia i tona poti na te ara o te matangi. Kare tona poti e tere ki mua me noo ua te mataro ki roto i te ava e e mamao mei te ara o te matangi. Te rua, ka anoanoia aia kia uuti i tona au kie kia akapuena meitaki i te reira. E rauka ai i te poti i te tere ki mua ka anoanoia te au kie kia puena e kia ki i te matangi. Pera katoa, ka rauka ia tatou i te tavini ua atu ia Iehova me rauka te tauturu a te vaerua tapu. E puapinga ai mei te vaerua tapu, ka rave tatou e rua takainga. Te mea mua, ka rave tatou i te au angaanga te arataki ra te vaerua tapu o te Atua ia tatou kia rave. Te rua, ka anoanoia tatou kia uuti i to tatou kie na te piri maroiroi anga ki roto i teia au angaanga.  (Sala. 119:32) Me rave tatou i teia au angaanga, ka akakeu te vaerua tapu ia tatou kia na roto i te au ngaru o te patoi anga e te manamanata, e kia akakoromaki tiratiratu tatou e tae ua atu ki te ao ou o te Atua.

12. Eaa ta tatou ka uriuri i teianei?

¹² Kua uriuri tatou i teianei e rua mataara akapeea te vaerua tapu me tauturu ia tatou. Ka oronga mai te vaerua tapu i te maroiroi kia vai tiratiratu noatu te manamanata. Ka akakeu katoa te vaerua tapu ia tatou kia tere ki mua e kia noo ki runga i te ara o te ora mutu kore. Ka uriuri tatou i teianei e a apinga e puapinga ai mei te vaerua tapu.

13. Ia 2 Timoteo 3:16, 17, eaa ta te irava ka rave no tatou, e eaa ta tatou ka anoanoia kia rave?

¹³ Te mea mua, e apii i te Tuatua a te Atua. (E tatau ia 2 Timoteo 3:16, 17.) Te tuatua Ereni tei uriia “e mea akauruia mai e te Atua,” tona aiteanga kua “akapuangi te Atua.” Kua taangaanga te Atua i tona vaerua kia “akapuangi” i tona au manako ki roto i te manako o te aronga tata. Me tatau tatou i te Pipiria e te akamanako oonu i te reira, ka mou mai te au apiianga a te Atua ki roto i to tatou manako e te ngakau. Ka akakeu te au manako akauruia ia tatou kia akatano i to tatou oraanga ki to te Atua anoano. (Ebe. 4:12) E puapinga ai mei te vaerua tapu, kia akanoo tatou i te tuatau no te apii tamou i te Pipiria e kia akamanako oonu i ta tatou e tatau ra. Ka akakeu i reira te Tuatua a te Atua i ta tatou ka tuatua e te rave.

14. (a) Eaa tatou ka tuatua ai e “te pupui ra te matangi” i ko i ta tatou uipaanga Kerititiano? (e) Akapeea tatou me aere ki te au uipaanga ma te “au kie puena”?

¹⁴ Te rua, e akamori kapiti i te Atua. (Sala. 22:22) Ka riro ta tatou au uipaanga Kerititiano ei ngai “te pupui ra te matangi.” Te vaira to Iehova vaerua i ko i te au uipaanga. (Apo. 2:29) Eaa tatou ka karanga ai i teia? No te mea, me akamori kapiti tatou ki te au taeake Kerititiano, te pure ra tatou no te vaerua tapu, te imene ra tatou i te au imene Patireia o te Tuatua a te Atua, e te akarongo i te ako Pipiria a te au taeake tei ikiia e te vaerua tapu. Te tauturu katoa ra te vaerua tapu i te au tuaine kia akapapa e kia oronga i ta ratou tuanga apii. E puapinga ai mei te vaerua tapu, ka anoanoia tatou kia akapapa e kia paupau no te au uipaanga. Me pera tatou, te aere ra tatou ki te au uipaanga ma te “au kie puena.”

15. Akapeea te vaerua tapu me tauturu ia tatou i roto i te angaanga tutu aere?

¹⁵ Te toru, e piri ki roto i te angaanga tutu aere. Me taangaanga tatou i te Pipiria i roto i te angaanga tutu aere e te apii, te tuku ra tatou i te vaerua tapu kia tauturu i ta tatou angaanga tutu aere. (Roma 15:18, 19) E puapinga ai mei te vaerua o te Atua, ka anoanoia koe kia maroiroi i te tutu aere e kia taangaanga i te Pipiria. Tetai ravenga meitaki kia maroiroi i taau angaanga tutu aere na te taangaanga anga i te au pukapuka anga i roto i te Oraanga e te Angaanga Orometua, Puka Angaanga.

16. Eaa te ravenga viviki roa atu kia rauka te vaerua tapu?

¹⁶ Te a, e pure kia Iehova. (Mata. 7:7-11; Luka 11:13) Te ravenga viviki roa atu kia rauka te vaerua tapu, na te pati anga kia Iehova na roto i te pure. Kare e apinga e tāpu i ta tatou pure kia tae kia Iehova e kare e apinga e tāpu i te apinga aroa meitaki o te vaerua o te Atua kia tae mai kia tatou—kare e paruru are auri e kare e rauka ia Satani i te arai i te reira. (Iako. 1:17) Akapeea tatou me pure e puapinga ai mei te vaerua tapu?  Ka akara matatio tatou i teia apinga e pure, na te uriurianga i te akatutuanga i roto i te Evangeria a Luka. *

17. Eaa te apiianga no te pure i te akatutuanga a Iesu ia Luka 11:5-9, 13?

¹⁷ E tatau ia Luka 11:5-9, 13. Te akaari maira te akatutuanga a Iesu akapeea tatou me pure kia rauka te vaerua tapu. I roto i te akatutuanga, kua rauka ta te tangata i anoano, no tona tu “pati akatenga.” Kare aia i mataku ana i te pati tauturu ki tona oa noatu te roa anga i te po. (Luka 11:8) * Akapeea a Iesu te taangaanga anga i teia akatutuanga no te pure? Karanga aia: “E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou.” Eaa te apiianga no tatou? E rauka ai te vaerua tapu, ka anoanoia tatou kia pure akatenga no te reira.

18. I roto i ta Iesu akatutuanga, eaa tatou i papu ei e ka oronga mai a Iehova i tona vaerua tapu?

¹⁸ Te akaari katoa maira ta Iesu akatutuanga i te tumu ka oronga mai a Iehova i te vaerua tapu. Kua inangaro te tangata i roto i te akatutuanga kia riro aia ei tangata akono manuiri. Kua inangaro aia i te oronga i te manga ki tana manuiri i te roa anga o te po, inara kare ana kai. Karanga a Iesu e kua inangaro te tangata tiaki i te oronga i te manga no tei pati akatenga mai te reira tangata. Eaa ta Iesu e apii maira? Me te anoano ra tetai tangata apa ua i te tauturu i tona tangata tupu tei pati akatenga mai, mei teaa atura to tatou Metua takinga meitaki i te rangi me tauturu i te aronga tei pati akatenga kiaia no te vaerua tapu! No reira, ka rauka ia tatou i te pure ma te papu e ka akarongo mai a Iehova i ta tatou patianga rapurapu no tona vaerua tapu.—Sala. 10:17; 66:19.

19. Eaa tatou i papu ei e ka autu tatou?

¹⁹ Noatu ta Satani tauta anga i te tamaki mai ia tatou, ka autu rai tatou. Eaa te tumu? No te mea ka tauturu te vaerua tapu ia tatou e rua mataara. Te mea mua, ka oronga mai aia i te maroiroi kia rauka ia tatou i te akakoromaki i te manamanata. Te rua, ko te maroiroi ïa te ka “akapuena i to tatou kie,” kia tavini ua atu ia Iehova e tae ua atu ki te ao ou o te Atua. Kia aruaru tatou e puapinga ai mei te tauturu a te vaerua tapu!