I MUA ana, ka akonokono te akaaere i te au angaanga a te pu ngutuare. Ko te tuatua Epera e te Ereni tei uriia no te “akaaere” tetai taime te taiku ra i te tavini akaaere me kore e manitia no te ngutuare.

Ko Iosepha te tamaiti a Iakobo, e tuikaa aia i Aiphiti, kua riro mai a Iosepha ei akaaere i te ngutuare o tona pu. Kua “akaruke ua atura [tona pu Aiphiti] i te apinga ravarai nana ra kia Iosepha.” (Gene. 39:2-6) I muri akera, te riro mai anga a Iosepha ei mana tutara i Aiphiti, kua iki aia i tetai akaaere ei akono i tona ngutuare.—Gene. 44:4.

I to Iesu tuatau, e noo putuputu ana te pu ngutuare ki te au oire tei mamao mei ta ratou ngai tanutanu. No reira, ka iki te pu kainga i tetai akaaere ei akonokono i te au angaanga e raveia ra i runga i tona enua.

Koai tei tau no te taoonga akaaere? I te anere mataiti mua, kua tata te tangata Roma ko Columella no runga i tetai tuikaa tei ikiia ei tangata tiaki, me kore ei akaaere, “tei kite i te angaanga.” E tangata “tu meitaki tona i te taangaanga i tona mana kia oti meitaki te angaanga, ma te kore e tu kino.” Karanga aia e: “Ko te mea puapinga rava atu—eiaa e manako ua e kua kite aia i te au mea ravarai, e kia aruaru aia i te apii i te au mea ou.”

E taangaanga ana te Tuatua a te Atua i te akaraanga o te akaaere ei akatutu anga, no tetai au angaanga te raveia ra i roto i te putuputuanga Kerititiano. Ei akaraanga, te akamaroiroi ra te apotetoro ko Petero i te au Kerititiano kia taangaanga i to ratou kite karape ta te Atua i oronga mai “mei tei rauka mai iaia ra, mei te tiaki meitaki i te aroa ua tumatatini a te Atua.”—1 Pete. 4:10.

Taangaanga katoa a Iesu i te akaraanga o tetai akaaere i roto i tana akatutuanga ia Luka 16:1-8. I roto i tana totou no te akairo o tona tutaraanga ei Ariki, kua akakite mai a Iesu ki tana au pipi e ka iki aia i te “tavini akono meitaki e te pakari,” me kore “te akaaere tiratiratu.” Ta te akaaere angaanga puapinga, ko te oronga mai i te kai pae vaerua i te tuatau tau no ta Karaiti au pipi i te tuatau openga. (Mata. 24:45-47; Luka 12:42, NW) Te mareka nei tatou i te au puka akamaroiroi i te akarongo, tei akapapaia e te akaaere tiratiratu, na te katoatoa i teianei ao.