1. Eaa te uianga ka ui tatou kia tatou uaorai?

APIAPI ainei koe me akamanako i te au mea te ka tupu kare e roa atu ana—te takore anga i te au akonoanga pikikaa, te tamaki a Goga a Magoga e te tamaki o Aramakito? Kua ui ainei koe, ‘Me tae mai te reira tuatau, ka vai tiratiratu ainei au me tupu teia au mea matakuia?’ Me manako akapera koe, ka riro teia uriurianga i ta Iesu i tuatua i roto i te irava tumu ei tauturu ia koe. Akakite aia ki tana au pipi: “Auraka e taitaia to kotou ngakau: ka akarongo i te Atua.” (Ioa. 14:1) Ka tauturu te akarongo ketaketa ia tatou kia akakoromaki noatu eaa te ka tupu a te tuatau ki mua.

2. Akapeea tatou me akaketaketa i to tatou akarongo, e eaa ta tatou ka uriuri i teia atikara?

² Me akamanako i ta tatou ka rave i teianei me tupu te au mea te ka timata i to tatou akarongo, ka tauturuia tatou kia kite eaa tei anoanoia kia akaketaketa i to tatou akarongo. Ka kite katoa tatou e ko teea te au ngai o to tatou akarongo ka tau tatou kia akara meitaki. Me akakoromaki i te timataanga, ka ketaketa atu to tatou akarongo. Ka rauka i reira ia tatou i te akakoromaki i te au timataanga i te tuatau ki mua. I teia atikara, ka uriuri tatou e ā turanga te ka akaari mai e kua anoanoia te au pipi a Iesu kia akamaata atu i to ratou akarongo. Ka uriuri katoa tatou i te au turanga aiteite i teia tuatau, e akapeea te reira me akapapa ia tatou no te tuatau ki mua.

3. Tei tataia i roto ia Mataio 6:30, 33, eaa te manako maata ta Iesu e apii ra no runga i te akarongo?

³ Mea natura no tetai upoko o te ngutuare kia inangaro i te oronga i te kai, te kakau, e te ngai nooanga no tana vaine e  tana anau. Kare ra teia i te mea māmā i te rave i teia tuatau ngata. Tetai taime, ka akanooia to tatou au taeake irinaki mei ta ratou angaanga, e noatu ka tauta ratou, kare e rauka mai tetai ngai angaanga. E tetai pae, kare ratou e āriki i tetai ngai angaanga kare e tau no te au Kerititiano. Me tupu te reira, ka anoanoia te akarongo ketaketa e ka akono mai a Iehova i to tatou au anoano i te pae kopapa. Apii a Iesu i teia ki tana au pipi i roto i tana Akoanga i te Maunga. (E tatau ia Mataio 6:30, 33.) Mea papu tikai e kare a Iehova e akaruke ia tatou, no reira ka rauka ia tatou i te akamou ki runga i te tavini anga iaia. Me kite tatou akapeea a Iehova te akono anga ia tatou i te pae kopapa, ka akavaitata atu tatou kiaia e ka akaketaketa i to tatou akarongo.

4-5. Eaa tei tauturu i tetai ngutuare kia akakoromaki i te apiapi no runga i to ratou au anoano pae kopapa?

⁴ Akamanako akapeea a Iehova te tauturu anga i tetai ngutuare i Venezuela te tupu anga te manako apiapi i to ratou au anoano pae kopapa. I mua ana, kua rava ua te moni a te ngutuare Castro mei ta ratou angaanga tanutanu i ko i to ratou kainga. I reira, kua aere mai tetai pupu aronga e pupui ta ratou, kua rave i to ratou kainga, e kua tuaru ia ratou kia aere. Akakite te metua tane ko Miguel: “Teia taime ka angaanga matou i runga i tetai potonga enua meangiti, ta tetai tangata i oronga mai no matou. Ka akamata au i te au rā ravarai na te pati anga ia Iehova kia oronga mai i ta matou i anoano no tera rā.” E ngata te oraanga no teia ngutuare, inara ma te akarongo mou tikai e ka akono mai to tatou Metua aroa i to ratou au anoano i te au rā, ka aere putuputu te ngutuare Castro ki te au uipaanga a te putuputuanga e ka tutu aere. Ko te tavini anga ia Iehova te mea puapinga roa atu i roto i to ratou oraanga, e ka irinaki ratou e akono mai a Iehova ia ratou.

⁵ I tera tuatau ngata, kua akamou a Miguel e tana vaine ko Yurai i to raua manako akapeea a Iehova te akono anga ia ratou. I tetai au atianga, kua taangaanga a Iehova i te au taeake e te au tuaine ei oronga i tetai apinga ta ratou e anoano ra, e kua tauturu ia Miguel kia kimi i tetai ngai angaanga. I tetai atianga ke, kua taangaanga a Iehova i te opati Betela ei oronga i te tauturu no ratou. Kare rava a Iehova i akaruke ana ia ratou. Tei tupu, kua ketaketa roa atu te akarongo o teia ngutuare tangata. Muri ake i te akakite anga i tetai atianga takake i tauturu ei a Iehova ia ratou, karanga ta raua tamaine mua ko Yoselin: “Mea pumaana i te kite taka meitaki akapeea a Iehova te akono anga ia matou. Koia toku oa e ka irinaki papu au iaia kia tauturu mai iaku.” Karanga katoa aia: “Riro te au timataanga ta matou i na roto ei ngutuare ei akapapa ia matou no te au timataanga pakari a te tuatau ki mua.”

6. Akapeea koe me akaketaketa i toou akarongo me tupu te au manamanata pae moni?

⁶ Te tupu ra ainei te au manamanata pae moni kia koe? Me koia ïa, e tuatau ngata teia noou. Inara, noatu te ngata i toou turanga, ka  rauka ia koe i te akapou i teia taime no te akamatutu i toou akarongo. Pure kia Iehova e e tatau i ta Iesu i tuatua ia Mataio 6:25-34, ma te akamanako oonu i te reira. Akamanako i te au akaraanga o teia tuatau tei akapapu mai e ka akono a Iehova i te aronga tei rave maata i tana angaanga. (1 Kori. 15:58) Me akapera koe, ka ketaketa roa atu toou akarongo e ka tauturu a Iehova ia koe, mei tana rai i rave no etai ke tei na roto i te au turanga aiteitei. Kua kite aia i taau e anoano ra, e akapeea me oronga i te reira. Me kite koe i ta Iehova tauturu i roto i toou oraanga, ka ketaketa atu toou akarongo kia akakoromaki i te au timataanga maata i te tuatau ki mua.—Haba. 3:17, 18.

7. Ia Mataio 8:23-26, akapeea “tetai uriia maata” te timata anga i te akarongo o te au pipi?

⁷ Te rokoia anga a Iesu e tana au pipi e tetai uriia i tai, kua taangaanga a Iesu i te reira ei tauturu ia ratou kia kite e ka anoanoia kia akaketaketaia to ratou akarongo. (E tatau ia Mataio 8:23-26.) Te moe ua ra a Iesu te tupu anga te uriia, e kua akamata te tai i te tapoki i te paī. Akaara atu te au pipi mataku ia Iesu e kua pati iaia kia akaora ia ratou. Kua ako maru te Atu ia ratou: “Eaa kotou i mataku ei, e kotou, te aronga akarongo mea ngiti nei?” Ka tau te au pipi mataku kia mārama e e mea māmā ua na Iehova i te akaora ia Iesu e ratou katoa. Eaa te apiianga no tatou? Ka tauturu te akarongo ketaketa ia tatou kia akakoromaki i te au “uriia maata” me kore te au manamanata tei aite mei te uriia rai.

8-9. Akapeea te akarongo o Anel te timataia anga, e eaa tei tauturu iaia?

⁸ Akamanako ana akapeea te akarongo o tetai tuaine kare i akaipoipo no Puerto Rico mai, te akaketaketaia anga e tetai timataanga ngata. Kua timataia tona akarongo e tetai “uriia maata.” Akamata te reira i te 2017 te takoreia anga tona kainga i roto i te Uriia ko Maria. Pera katoa kua ngere aia i tona ngai angaanga no te uriia. “I tera tuatau ngata, kua apiapi tikai au,” i karanga ai a Anel, “inara apii au kia irinaki kia Iehova na roto i te pure, e auraka au e tuku i te apiapi kia tāpu iaku mei te rave anga i taku i anoanoia kia rave.”

⁹ Karanga katoa a Anel e kua tauturu te tu akono iaia kia akakoromaki i te turanga ngata. Karanga aia: “Na te aru anga i te aratakianga a te akaaerenga i tauturu iaku kia noo maru ua. Tauturu mai a Iehova iaku na roto i te au taeake e te au tuaine, tei akamaroiroi mai iaku e kua oronga i te au mea taku e anoano ra i te pae kopapa.” Karanga katoa aia: “E maata ua atu ta Iehova i oronga mai kiaku i taku i pati, e kua akaketaketa maataia toku akarongo.”

10. Eaa taau ka rave me tupu “tetai uriia maata” kia koe?

¹⁰ Te tupu ra ainei “tetai uriia maata” i roto i toou oraanga? Penei kua na roto koe i tetai tumatetenga natura. Me kore, penei kua tu koe i tetai maki kino, e kua taitaia koe e kare i  papu eaa taau ka rave. Penei ka apiapi koe i tetai taime, inara auraka e akatika i toou apiapi kia akakore i toou irinaki ia Iehova. E akavaitata atu kiaia na roto i te pure akatenga. Akaketaketa i toou akarongo na te akamaara anga i te au tuatau i tauturu ei a Iehova ia koe. (Sala. 77:11, 12) Ka papu roa ia koe e kare a Iehova e akaruke ia koe—kare rava!

11. Eaa ra tatou ka tauta ai kia akono i te aratakianga a te akaaerenga?

¹¹ Eaa atu te ka tauturu ia koe kia akakoromaki i te turanga ngata? Mei ta Anel i akakite mai, ko toou tu akono. Tauta kia irinaki i te aronga ta Iehova e Iesu e irinaki ra. Tetai taime, ka oronga mai te au taeake e arataki ra i te au ikuikuanga tei tangi tuke ua akerai. Inara ka akameitaki a Iehova i toou tu akono. Kua kite tatou mei tana Tuatua e mei tei tupu ki te au tavini tiratiratu e ka riro te tu akono ei akaora ia tatou. (Exo. 14:1-4; 2 Para. 20:17) Akamanako oonu i teia au akaraanga. Ka riro te reira ei akamaroiroi i toou inangaro kia aru i te aratakianga a te akaaerenga a Iehova i teianei e a te tuatau ki mua. (Ebe. 13:17) Kare i reira koe e mataku i te mate maata e vaitata maira.—Mase. 3:25.

12. Ia Luka 18:1-8, eaa te pirianga o te akatupu i te akarongo e te akakoromaki i te tu tika kore?

¹² Kite a Iesu e ka riro te tu tika kore ei timata i te akarongo o tana au pipi. Ei tauturu ia ratou, kua akakite aia i tetai akatutuanga tei tataia i roto i te puka a Luka. Akakite a Iesu i te parapore no tetai vaine takaua tei pati akatenga i tetai akava tuatua tika kore kia akatika mai i tana. Kua papu i te vaine takaua, me pati putuputu ua rai aia ki te akava, ka tauturu mai te akava iaia. Aere ua rai, kua akarongo te akava kiaia. Eaa te apiianga? Kare a Iehova i te Akava tuatua tika kore. No reira a Iesu i karanga e: “Kare aina oki te Atua e akatika mai i tona uaorai tangata i ikiia ra, ko tei kapiki atu iaia i te po e te ao.” (E tatau ia Luka 18:1-8.) E oti karanga a Iesu: “Kia tae maira te Tamaiti a te tangata nei, e kitea ainei e ia te akarongo i te enua nei?” Me tupu te tu tika kore kia tatou, ka anoanoia kia akaari i te tu akakoromaki marie e te tauta atu rai kia rauka mai te akarongo ketaketa mei to te vaine takaua rai. Me akatupu i taua tu akarongo, ka irinaki papu tatou e ka tauturu mai a Iehova ia tatou. Ka anoano katoaia tatou kia irinaki e e mea ririnui te pure. Tetai taime, penei ka pauia ta tatou pure na roto i tetai mataara kare tatou i manako atu ana.

13. Akapeea te pure te tauturu anga i tetai ngutuare tei akonoia ma te tu tika kore?

¹³ Akamanako ana i tei tupu ki tetai tuaine ko Vero, e noo ana aia i te Democratic Republic of the Congo. Anoanoia a Vero, tana tane kare i te Kite, e ta raua tamaine e 15 ona mataiti kia akaruke i to ratou oire te tae anga mai tetai pupu vaeau. I runga i te mataara, kua rokoia ratou e te pupu vaeau tei opu ia ratou e kua karanga e ka tamateia ratou. Te akamata  anga a Vero i te aue, tauta tana tamaine i te akamaru iaia na te pure anga ma te reo maata e te taiku putuputu i te ingoa o Iehova i roto i tana pure. Te akaoti anga aia, kua ui te rangatira vaeau, “E maine, naai i apii ia koe kia pure?” Pau atu aia: “Na toku mama, e kua taangaanga aia i te pure i roto ia Mataio 6:9-13.” Karanga te rangatira, “E maine, e aere maru koe e toou nga metua, e kia paruru to Atua ko Iehova ia koe!”

14. Eaa te ka timata i to tatou akarongo, e eaa te ka tauturu ia tatou kia akakoromaki?

¹⁴ Te apii maira teia au tupuanga auraka tatou kia akangaropoina i te puapinga o te pure. Akapeea ra me kare taau pure e pau vivikiia mai me kore na roto i tetai tu umere? Mei te vaine takaua rai i roto i te parapore a Iesu, e pure putuputu ma te irinaki e kare te Atua e akaruke ia koe e ka pau mai aia i taau pure. Pati akatenga ia Iehova no tona vaerua tapu. (Phili. 4:13) E akamaara kare e roa atu, ka akameitaki maata a Iehova ia koe e ka akangaropoina koe i te au manamanata tei tupu kia koe. Me akakoromaki koe i te au timataanga ma te tauturu a Iehova, ka ketaketa roa atu koe no te akakoromaki i te au timataanga i te tuatau ki mua.—1 Pete. 1:6, 7.

15. Tei akakiteia mai ia Mataio 17:19, 20, eaa te manamanata tei tupu ki ta Iesu au pipi?

¹⁵ Apii a Iesu i tana au pipi e ka tauturu te akarongo ia ratou kia autu i te au turanga ngata. (E tatau ia Mataio 17:19, 20.) I tetai atianga, kare i rauka ia ratou i te tuaru i tetai temoni ki vao noatu kua rauka ia ratou i te rave i te reira i mua ana. Eaa te tumu? Akamārama a Iesu e ka anoanoia ratou kia akamaata atu i to ratou akarongo. Akakite aia me e akarongo to ratou, ka autu atu ratou i te au turanga ngata mei te maunga rai! I teia tuatau katoa, ka tupu te au manamanata kia tatou tei ngata tikai i te autu atu.

16. Akapeea te akarongo te tauturu anga ia Geydi kia autu i te tumatetenga e te mamae ngakau?

¹⁶ Akamanako ana i tei tupu kia Geydi, e tuaine i Guatemala. Kua tamateia tana tane ko Edi te oki anga mai raua mei te uipaanga a te putuputuanga. Akapeea te akarongo o Geydi te tauturu anga iaia kia akakoromaki i tona ngakau mii? Akakite aia: “Tauturu te pure iaku kia tuku i taku apainga kia Iehova e kia rauka mai te manako ‘au. Riro te tavini maroiroi anga ia Iehova ei tamaru i toku mamae ngakau. Kua tauturu te reira iaku kia akakoromaki i te au rā tataki tai, e auraka kia apiapi i to apopo. Mei taku i na roto, apii mai au e noatu te turanga ngata te ka tupu a te tuatau ki mua, ka rauka iaku i te autu atu i te reira ma te tauturu a Iehova, Iesu, e te akaaerenga.”

17. Eaa ta tatou ka rave me tupu te au turanga ngata mei tetai maunga rai?

¹⁷ Te mii ra ainei koe no tei takake atu tetai tei akaperepereia? Akanoo i tetai tuatau no te akaketaketa i toou akarongo i te manakonakoanga o te tuakaouanga na te tatau i te au  tua Pipiria no te aronga tei akatuakaouia mei te mate. Te mii ra ainei koe no te mea kua akaateaia tetai mema o toou ngutuare ki vao i te putuputuanga? Rave i te apii ei akapapu kia koe uaorai, ka riro te akoanga a te Atua ei mea meitaki rava atu. Noatu eaa te manamanata te tupu ra kia koe, taangaanga i te reira atianga kia akaketaketa i toou akarongo. E riringi i toou ngakau ki mua ia Iehova. Eiaa e akatakake ia koe uaorai mei etai ke, mari ra e noo vaitata ua i te pae i toou au taeake e te tuaine. (Mase. 18:1) Rave i te au angaanga te ka tauturu ia koe kia akakoromaki, noatu ka pururu ua te roimata. (Sala. 126:5, 6) Akono tamou i taau akapapaanga no te aere ki te au uipaanga, te angaanga tutu aere e te tatau i te Pipiria. Akamou i toou manako ki runga i te au akameitakianga manea ta Iehova ka oronga mai kia koe. Me kite koe akapeea a Iehova me tauturu ia koe, ka ketaketa roa atu toou akarongo.

18. Me kite koe e kua paruparu toou akarongo, eaa taau ka rave?

¹⁸ Me kua riro te au timataanga o te tuatau i topa me kore i teianei ei akaari e kua paruparu toou akarongo, auraka e taitaia. Akariro i teia ei atianga no te akaketaketa i toou akarongo. Mei te au apotetoro a Iesu, e pati: “E akamaata mai i to matou akarongo.” (Luka 17:5) Pera katoa, akamanako i te au akaraanga ta tatou i uriuri i roto i teia atikara. Mei ia Miguel e Yurai, e akamaara i te au taime i tauturu ana a Iehova ia koe. Mei te tamaine a Vero e Anel, pure akatenga kia Iehova i te tuatau tikai me tupu tetai tumatetenga. E mei ia Geydi, e akamaara penei ka tauturu a Iehova ia koe na roto i toou ngutuare tangata e te au taeake. Me akatika koe ia Iehova kia tauturu ia koe kia akakoromaki i te au timataanga i teianei, papu roa e ka tauturu mai aia ia koe me tupu tetai ua atu timataanga i te tuatau ki mua.

19. Eaa ta Iesu i irinaki papu, e eaa taau ka irinaki papu?

¹⁹ Akakite mai a Iesu i te au ngai i ngere ei tana au pipi i te akarongo. Inara, kare aia i ekoko ana e ka tauturu a Iehova ia ratou kia autu i te au timataanga. (Ioa. 14:1; 16:33) Kua papu katoa iaia e ka ora mai tetai urupu maata mei roto i te mate maata no to ratou akarongo ketaketa. (Apo. 7:9, 14) Ko koe ainei tetai ia ratou? Ma te tauturu a Iehova, ka rauka ia koe te reira me rave i taau ka rauka i teianei i te akaketaketa i toou akarongo!—Ebe. 10:39.