1. Akapeea tatou e kite ei te inangaro maira a Iehova i te piri vaitata kia tatou?

 PATI maira a Iehova ia tatou kia piri vaitata kiaia. (Iako. 4:8) Inangaro aia kia riro ei Atua no tatou, ei Metua e ei Oa. Te pau maira aia i ta tatou pure e te tauturu ra ia tatou i teia au tuatau kino. E te taangaanga ra aia i tana akaaerenga kia apii e kia paruru ia tatou. Eaa ta tatou ka rave kia piri vaitata kia Iehova?

2. Akapeea tatou me piri vaitata kia Iehova?

² Ka piri vaitata tatou kia Iehova na te pure anga kiaia, tatau i tana Tuatua e te akamanako marie i te reira. Me pera tatou, ka akakiia to tatou ngakau ki te aroa e te akaperepere maata iaia. Akakeuia tatou kia akarongo e kia akapaapaa iaia. (Apo. 4:11) Te maata atu ia tatou i te apii no runga ia Iehova, ko te maata atu ïa to tatou irinaki anga iaia e tana akaaerenga.

3. Akapeea te Diabolo me tauta i te akatakake ia tatou mei ia Iehova, e eaa te ka tauturu ia tatou kia kore e akaruke i to tatou Atua e tana akaaerenga? (Salamo 31:13, 14)

³ I tetai tua, ka tauta te Diabolo i te akatakake ia tatou mei ia Iehova, me tupu ake te manamanata. Eaa tana maunu akavare? Ka tauta aia i te akaparuparu i to tatou tu irinaki ia Iehova e tana akaaerenga. Inara ka rauka ia tatou i te patoi i te reira. Me matutu to tatou akarongo kare to tatou irinaki ia Iehova e ngaueue, kare tatou e akaruke i to tatou Atua e tana akaaerenga.​—E tatau ia Salamo 31:13, 14.

4. Eaa ta tatou ka uriuri i teia atikara?

 ⁴ I teia atikara, ka uriuri tatou e toru manamanata i vao i te putuputuanga; penei ka akaparuparu te reira i to tatou irinaki ia Iehova e tana akaaerenga. Akapeea teia au turanga ngatā me akatakake ia tatou mei ia Iehova? E eaa ta tatou ka rave kia patoi i ta Satani au ravenga?

5. Akapeea te au manamanata me akaparuparu i to tatou irinaki ia Iehova e tana akaaerenga?

⁵ E tupu ana te manamanata kia tatou​—mei te patoianga a te kopu tangata e te ngere anga i te angaanga. Akapeea teia au manamanata me akaparuparu i to tatou irinaki anga i te akaaerenga a Iehova e kia akatakake ia tatou mei iaia? Me tupu te manamanata no tetai tuatau roa, ka taitaia tatou e ka mamae ngakau. Ka akariro a Satani i teia turanga kia ekoko tatou i to Iehova aroa no tatou. Ka inangaro te Diabolo ia tatou kia manako e na Iehova e Tana akaaerenga i akatupu i to tatou mamae. Kua tupu ana te reira ki tetai o Iseraela i Aiphiti. I te akamata anga kua irinaki ratou na Iehova i iki ia Mose e Aarona kia akaora ia ratou. (Exo. 4:29-31) I muri mai i te akatupu anga a Pharao i te kino kia ratou, kua akaapa ratou ia Mose e Aarona, te tuatua anga kia raua: “Kua akariro io nei korua ia matou ei mea viivii i mua i te aroaro o Pharao, e i te aroaro katoa o tona au tavini, kua tuku korua i te koke ki to ratou rima ei ta mai ia matou.” (Exo. 5:19-21) Kua akaapa ratou i te nga tavini tiratiratu o te Atua. Te kino tikai! Me kua tupu ana te taitaia kia koe no tetai tuatau roa, akapeea koe me akamatutu i toou tu irinaki ia Iehova e tana akaaerenga?

6. Eaa te apiianga mei te peroveta ko Habakuka me akakoromaki i te au manamanata? (Habakuka 3:17-19)

⁶ E riringi i toou ngakau kia Iehova na roto i te pure, e te pati akatenga i tana tauturu. Kua tupu te kino e manganui ki te peroveta ko Habakuka. I tetai atianga, kua ekoko aia me te manako maira a Iehova iaia. No reira kua riringi aia i tona manako ngakau kia Iehova na roto i te pure. Karanga aia: “Mei teaa te roa, e Iehova, o toku kapiki anga, e kare koe akarongo mai! . . . te vai nei oki te āru e te rave aroa kore ki mua iaku nei.” (Haba. 1:2, 3) Kua ariu atura a Iehova ki te pure akatenga a tona tavini tiratiratu. (Haba. 2:2, 3) I muri ake i te akamanako anga i ta Iehova au angaanga akaora, kua rekareka akaou a Habakuka. Irinaki papu aia e te aroa maira a Iehova iaia e ka tauturu mai kia akakoromaki i tona turanga. (E tatau ia Habakuka 3:17-19.) Eaa te apiianga no tatou? Me tupu te au manamanata, e pure kia Iehova e te akakite i toou manako. E oti e kimi i tana tauturu. Me pera koe, ka papu ia koe e ka oronga mai a Iehova i te maroiroi kia akakoromaki. Me kite ana koe i tana tauturu, ka ketaketa ua atu toou akarongo iaia.

7. Eaa ta te kopu tangata o Shirley i tauta i te rave, inara eaa tei tauturu iaia kia irinaki ua atu ia Iehova?

⁷ E rave tamou i taau apii pae vaerua. Akamanako ana akapeea te reira i te tauturu anga ia Shirley, e tuaine i Papua New Guinea, no tona manamanata. b E aronga putaua te pamiri o Shirley e i tetai taime ka ngere ratou i te kai. Kua tauta tetai kopu tangata i te akaparuparu i tona irinaki ia Iehova. Karanga aia: “Karanga mai koe te tauturu nei te vaerua tapu o te  Atua ia koe, teiea i reira te tauturu? Te putaua nei te ngutuare tangata. Te kaimoumou nei koe i toou taime i te tutu aere.” Akakite a Shirley: “Kua ui ana au: ‘Te manako maira ainei te Atua ia matou e me kare?’ No reira kua pure viviki au kia Iehova e kua akakite i toku manako kiaia. Kua tatau au i taku Pipiria e te au puka Pipiria, e te tutu aere e te aere ki te au uipaanga.” Kua kite mai aia e te akono ua ra a Iehova i tona ngutuare. Kare ratou i mate ana i te pongi, e te mataora ra ratou. Karanga a Shirley: “Kite mai au e te pau maira a Iehova i taku au pure.” (1 Timo. 6:6-8) Me rave tamou koe i taau apii pae vaerua, kare koe e tuku i te au manamanata me kore te manako ekoko kia akatakake ia koe mei ia Iehova.

8. Eaa te ka tupu ki te au taeake arataki i roto i ta Iehova akaaerenga?

⁸ Na roto i te au media e te au social network, kua akatotoa to tatou au enemi i te au pikikaa me kore tuatua tarevake no te au taeake arataki i roto i ta Iehova akaaerenga. (Sala. 31:13) Kua opuia tetai au taeake e kua akaapaia ei aronga rave kino. Kua tupu ana teia turanga ki te au Kerititiano o te anere mataiti mua i te akaapa tarevakeia anga te apotetoro ko Paulo e kua tapekaia. Eaa ta ratou i rave?

9. Eaa ta tetai au Kerititiano i rave i te tapekaia anga a Paulo?

⁹ Kua akamutu tetai au Kerititiano o te anere mataiti mua i te tauturu ia Paulo i tona tapekaia anga i Roma. (2 Timo. 1:8, 15) No teaa ra? Kua akamā ainei ratou ia Paulo no te mea kua manako te tangata e e tangata rave kino aia? (2 Timo. 2:8, 9) Me kua tamatakuia ainei ratou, te manako anga e ka takinga kinoia rai ratou? Noatu eaa te tumu, akamanako ana i to Paulo tu. Kua akakoromaki ana aia i te au turanga ngatā e kua rokoia tona oraanga e te kino no te au taeake. (Anga. 20:18-21; 2 Kori. 1:8) Auraka rava tatou e aite mei te aronga tei akaruke ia Paulo i tona  tuatau tumatetenga! Eaa ta tatou ka akamanako me takinga kinoia te au taeake arataki?

10. Eaa ta tatou ka akamaara me takinga kinoia te au taeake arataki, e eaa ra?

¹⁰ Akamaara i te tumu i takinga kinoia ai tatou e naai i akatupu i te reira. Akakite a 2 Timoteo 3:12 e: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.” No reira auraka tatou e poitirere me takinga kino a Satani i te au taeake arataki. Tona akakoroanga koia oki kia akaparuparu i to ratou tu tiratiratu e te tamataku ia tatou.​—1 Pete. 5:8.

11. Eaa ta tatou ka apii mei te akaraanga o Onesiphoro? (2 Timoteo 1:16-18)

¹¹ E tauturu ua atu i to tatou au taeake e te piri tiratiratu kia ratou. (E tatau ia 2 Timoteo 1:16-18.) Tuke te tu o tetai Kerititiano ko Onesiphoro o te anere mataiti i te tapekaia anga a Paulo. “Kare i akama i [to Paulo] nei pirianganaoa.” Mari ra, kua kimi a Onesiphoro ia Paulo, i te kitea angaia aia, kua tauturu aia ia Paulo. E kua tuku a Onesiphoro i tona oraanga ki roto i te kino. Eaa te apiianga no tatou? Auraka tatou e tuku i te mataku tangata kia tapupu ia tatou mei te tauturu anga i to tatou au taeake tei takinga kinoia. Mari ra, e paruru tatou e kia tauturu katoa ia ratou. (Mase. 17:17) Te anoano ra ratou i to tatou aroa e te tauturu.

12. Eaa ta tatou ka apii mei te au taeake e te au tuaine i Rutia?

¹² Akamanako ana i ta te au taeake e te au tuaine i Rutia i rave no te tauturu i te au taeake tei tapekaia. Me akavaia tetai o ratou, kua aere atu te au taeake e te au tuaine e manganui ki te are akavaanga i te tauturu. Eaa te apiianga no tatou? Me pikikaaia te au taeake e rave ra i te aratakianga, kua tapekaia, takinga kinoia, auraka e mataku. E pure no ratou, e akono i to ratou au pamiri, e e kimi ravenga kia tauturu ia ratou.​—Anga. 12:5; 2 Kori. 1:10, 11.

13. Akapeea te akakino anga me akaparuparu i to tatou irinaki ia Iehova e tana akaaerenga?

¹³ Penei ka akakinoia tatou e te au kopu tangata, au oa angaanga, e te au oa apii no ta tatou angaanga tutu aere e te aru anga i ta Iehova au turanga ngateitei. (1 Pete. 4:4) Penei ka karanga mai ratou: “E reka ana au ia koe, ko taau akonoanga ra e kino tikai e te taito.” Penei ka aviriia tatou no to tatou tu ki te aronga tei akaateaia ki vao, te na ko anga: “Akapeea koe te kapiki anga ia koe e tangata aroa?” Ka akatupu teia i te au manako ekoko. Penei ka manako tatou: ‘E maata ainei ta Iehova e tapapa maira iaku? Penei e arairai kino ana ainei tana akaaerenga?’ Me te tupu ra teia kia koe, akapeea koe me piri vaitata kia Iehova e tana akaaerenga?

14. Eaa ta tatou ka rave me akakinoia mai no te akono i ta Iehova au turanga? (Salamo 119:50-52)

¹⁴ E akono ua rai i ta Iehova au turanga. E tangata akono a Iobu i ta Iehova au turanga noatu kua akakinoia aia. Kua tuatua tetai oa o Iobu e kare te Atua e manako mai ana iaia me ka akono a Iobu i Tana ture. (Iobu 4:17, 18; 22:3) Kare a Iobu i irinaki ana i te au tuatua pikikaa. Kua kite aia e kua tau rai ta Iehova au turanga o te tika e te tarevake, e kua akono aia i te reira. Kare aia i akatika ana kia akaparuparu tetai i tona tu tiratiratu. (Iobu 27:5, 6) Eaa te apiianga no tatou? Auraka e tuku i te akakino anga a tetai kia ekoko tatou i ta Iehova au turanga. Akamanako ana i toou uaorai oraanga. Kare ainei e  kua kite ana koe i te meitaki i ta Iehova au turanga e kua puapingaia koe? E turu ua rai i te akaaerenga te akono ra i te reira au turanga. Noatu te akakino anga a tetai auraka rava e akatakake ia koe mei ia Iehova.​—E tatau ia Salamo 119:50-52.

15. Eaa ra a Brizit i takinga kinoia ai?

¹⁵ Akamanako ana i te akaraanga o Brizit, e tuaine i Initia. Akakinoia aia e tona kopu tangata no tona akarongo. Muri akera i tona papetitoanga i te 1997, kua ngere tana tane irinaki kore i tana angaanga. No reira kua manako te tane kia neke atu aia, a Brizit, e ta raua tamariki tamaine ki te ngutuare o tona nga metua, i tetai mai oire ke. Inara e maata atu to Brizit manamanata. No te kore a tana tane angaanga, kua anoanoia aia kia angaanga tamou no te tauturu i tona ngutuare. E mamao katoa te putuputuanga vaitata mei te 350 kiro mita (220 mi). Ma te taitaia kua patoi te ngutuare o tana tane iaia no tona irinakianga. No te kino i te patoianga kua neke akaou te ngutuare o Brizit. Ma te manako koreia kua takake atu tana tane. Aru mai kua takake atu tetai o ta raua tamaine i te maki cancer, e 12 ona mataiti. Kua akaapa te kopu tangata o Brizit iaia no tei tupu. Karanga ratou naringa kare aia i te Au Kite o Iehova, kare teia au tumatetenga e tupu kia ratou. Kua irinaki ua rai a Brizit kia Iehova e kua piri vaitata ki tana akaaerenga.

16. Akapeea a Brizit i te akameitaki angaia no te piri vaitata kia Iehova e tana akaaerenga?

¹⁶ No te mamao ia Brizit mei te putuputuanga, kua akamaroiroi te akaaere kotinga iaia kia tutu aere i tona ngai e te rave i te au uipaanga i tona kainga. I te akamata anga kua taitaia aia. Inara kua aru aia i te reira aratakianga. Kua tutu aere aia i te nuti meitaki ki tetai ua atu, kua rave i te au uipaanga i tona kainga, e kua rave i ta ratou akamorianga ngutuare ki tana nga tamaine. Eaa tei tupu mai? Kua akamata e kua apii a Brizit i tana au apii Pipiria ki te manganui, e kua papetitoia  tetai pae. I te 2005 kua tavini aia ei painia tamou. Kua tutakiia tona irinakianga kia Iehova e te vai tiratiratu ki tana akaaerenga. Te tavini tiratiratu nei tana nga tamaine ia Iehova, e te rauka nei e rua putuputuanga i tona ngai! Irinaki papu a Brizit e na Iehova aia i maroiroi ei noatu tona manamanata e kua akakoromaki i te akakino anga a tona ngutuare.

17. Eaa ta tatou ka iki kia rave?

¹⁷ Inangaro a Satani ia tatou kia irinaki e ka akaruke a Iehova ia tatou i te tuatau manamanata e ka ngatā te oraanga me turu tatou i ta Iehova akaaerenga. Inangaro a Satani kia mataku tatou me akakinoia, takinga kinoia, e me tapekaia te au taeake arataki. E na roto i te akakino anga, inangaro aia i te akaparuparu i to tatou irinaki i ta Iehova au turanga e Tana akaaerenga. Inara, kua kite tatou i tana au ravenga kino e kare tatou e vare ua atu. (2 Kori. 2:11) E patoi i ta Satani au tuatua pikikaa e kia vai tiratiratu kia Iehova e Tana akaaerenga. E akamaara, kare rava a Iehova e akaruke ia koe. (Sala. 28:7) No reira auraka e akatakake ia koe mei ia Iehova!​—Roma 8:35-39.

18. Eaa ta tatou ka uriuri i te atikara ka aru mai?

¹⁸ I teia atikara, kua uriuri tatou i te au manamanata te ka tupu i vao ake i te putuputuanga. Ka timata katoaia to tatou tu irinaki ia Iehova e tana akaaerenga e te au taeake i roto i te putuputuanga. Akapeea tatou me akakoromaki i te reira? Ka uriuri tatou i teia i te atikara ka aru mai.