ATIKARA APII 46
Tauturu a Iehova ia Tatou Kia Akakoromaki ma te Rekareka
“E tapapa rā Iehova, kia takinga-meitaki aia ia kotou, e e tu aia ki runga kia aroa aia ia kotou.”—ISA. 30:18.
IMENE 3 To Tatou Maroiroi, Manakonakoanga, Irinakianga
I ROTO I TEIA APII a
1-2. (a) Eaa te au uianga ka uriuri tatou? (e) Eaa te akaari maira e te aruaru nei a Iehova i te tauturu ia tatou?
KA TAUTURU a Iehova ia tatou kia akakoromaki i te au manamanata o te oraanga e kia rekareka i ta tatou tavini anga tapu. Eaa te au mataara ka tauturu aia ia tatou? E akapeea tatou e puapinga ai mei te tauturu a Iehova. Ka pauia teia au uianga i roto i teia atikara. I mua ake ka akara matatio ei tatou i te au pauanga, ka uriuri tatou i teia uianga: Te puareinga ua ra ainei a Iehova i te tauturu ia tatou?
2 Kua taangaanga te apotetoro ko Paulo i tetai tuatua i roto i tana reta ki te au Epera te ka tauturu ia tatou kia kite i te pauanga. Tata a Paulo: “Ko Iehova toku tauturu, kare au e mataku; eaa ta te tangata kia rave mai iaku?” (Ebe. 13:6) Akakite tetai kimikimi anga Pipiria i te tuatua “tauturu,” i roto i teia irava, te tuatua ra no tetai tangata tei oro i te tauturu i tetai te kapiki tauturu maira. Akamanako ana ia Iehova e rapurapu atura i te akaora i te reira tangata tei taitaiaia. Papu ka akatika koe e te akaari maira teia i to Iehova tu puareinga—ae, tu aruaru—kia Tauturu ia tatou. Me tauturu a Iehova ia tatou, ka rauka ia tatou i te akakoromaki i te au manamanata ma te rekareka.
3. Eaa te au mataara e toru me tauturu a Iehova ia tatou kia akakoromaki i te manamanata ma te rekareka?
3 Eaa tetai au mataara ka tauturu a Iehova ia tatou kia akakoromaki i te au manamanata ma te rekareka? Ei pauanga, ka akara tatou i te puka o Isaia. Eaa te tumu? E maata te au totou ta Isaia i akauruia kia tata kua tau rai no te au tavini o te Atua i teia rā. E akatutu putuputu ana a Isaia ia Iehova kia mama ua ia tatou i te mārama. Tetai akaraanga tei roto ia Isaia pene 30. Akakite mai a Isaia i te au akatutuanga manea, akapeea a Iehova me tauturu ia tatou ei iti tangata nona (1) na te akarongo meitaki anga e te ariu anga mai ki ta tatou pure, (2) na te oronga anga mai i te arataki anga, e te (3) na te oronga anga mai i te au akameitakianga i teianei e te tuatau ki mua. Ka akara tatou i teia au mataara e toru no ta Iehova tauturu.
AKARONGO MAI A IEHOVA IA TATOU
4. (a) Akapeea a Iehova te akatutu anga i te ngati Iuda i to Isaia tuatau, e eaa Tana i akatika kia tupu? (e) Eaa te manakonakoanga ta Iehova i oronga no te aronga tiratiratu? (Isaia 30:18, 19)
4 I roto i te au tuatua akamataanga o Isaia pene 30, te akatutu ra a Iehova i te au ngati Iuda ei “tamariki meameaau,” tei “na rungao te ara i te ara.” Karanga aia: “E aronga meameaau teianei aronga, . . . akarongo kore i te ture a Iehova.” (Isa. 30:1, 9) No tei akarongo kore te iti tangata, akakite a Isaia e ka tuku ua a Iehova ia ratou kia rokoia e te tumatetenga. (Isa. 30:5, 17; Iere. 25:8-11) Apainaia atura ratou e te au Babulonia ei tuikaa. Inara, te vaira tetai aronga tiratiratu i rotopu i te au ngati Iuda, e karere manakonakoanga meitaki ta Isaia no ratou. Akakite aia te vaira te rā ka akaoki mai a Iehova ia ratou ei iti tangata nona. (E tatau ia Isaia 30:18, 19.) Tupu atura te reira. Kua akarangatira a Iehova ia ratou. Inara, kare to ratou akaora anga e tae viviki mai. Te tuatua “e tapapa rā Iehova, kia takinga-meitaki aia ia kotou” te akaari maira e ka pou tetai tuatau i mua ake ka akaoraia ai te aronga tiratiratu. Te tika, e 70 mataiti te tuikaa anga te ngati Iseraela i Babulonia i mua ake ka akatikaia ai tetai pupu meangiti kia oki ki Ierusalema. (Isa. 10:21; Iere. 29:10) Te oki anga te au tangata ki te enua anau, kua riro to ratou roimata taitaia i mua ana ei roimata rekareka.
5. Eaa te akapumaana anga ta Isaia 30:19 i oronga mai kia tatou?
5 I teia rā ka akapumaanaia tatou e teia au tuatua “Tei te kaku anga o to kotou reo e maata roaʼi tona aroa.” (Isa. 30:19) Te akapumaana maira a Isaia e ka akarongo ua mai a Iehova i ta tatou kapiki anga tauturu Kiaia e ka ariu viviki mai ki ta tatou pure. Karanga katoa a Isaia: “Tei te akarongo anga mai aia ra, nana ïa e āē mai ia kotou.” Te akapapu maira teia au tuatua e ka puareinga ua to tatou Metua—ae, ma te aruaru—i te tauturu i te aronga tei kapiki tauturu atu kiaia. Na te kite anga i teia, ka tauturu ia tatou kia akakoromaki ma te rekareka.
6. Akapeea ta Isaia au tuatua te akaari anga mai e te akarongo maira a Iehova i te pure a tona au tavini tataki tai?
6 Eaa atu te akapapu anga no ta tatou pure te ka rauka mai mei teia irava? Te akarongo meitaki maira a Iehova i ta tatou pure tataki tai. Eaa tatou i karanga ai i te reira? I te tuanga mua o Isaia pene 30, te kauono nomena “kotou” kua taangaangaia te tua-tini no te mea te tuatua ra a Iehova ki tona iti tangata ei pupu. Inara, i te irava 19 kua taangaangaia te tua-tai “kotou”; kua akakiteia te karere ki te au tangata tataki tai. Tata a Isaia: “Kare kotou [tua-tai] e aue ua rai”; tei “to kotou [tua-tai] reo e maata roaʼi Tona aroa”; “tei te akarongo anga mai aia ra . . . ia kotou [tua-tai].” Ei Metua aroa, kare a Iehova e tuatua ki tetai tamaiti me kore tamaine tei taitaiaia, “Kia maroiroi koe mei toou taeake me kore tuaine.” Mari ra, ka akara matatio aia ia tatou ma te akarongo meitaki mai i ta tatou pure.—Sala. 116:1; Isa. 57:15.
Eaa te aiteanga o ta Isaia tuatua: “Auraka e vaoo [ia Iehova] kia noo ua”? (Akara i te parakarapa 7)
7. Akapeea a Isaia e Iesu te akakite anga i te anoano kia pure putuputu?
7 Me akakite tatou i tetai manamanata ki te Atua, ka ariu viviki mai a Iehova ma te akamaroiroi ia tatou kia akakoromaki i te reira. E me kare to tatou manamanata e akamutu mei ta tatou i tapapa atu, penei ka anoanoia tatou kia pati putuputu kia Iehova no te maroiroi kia akakoromaki i te reira. Te pati maira aia kia pera tatou. Tei roto teia i ta Isaia tuatua: “Auraka e vaoo [ia Iehova] kia noo ua.” (Isa. 62:7) Eaa te aiteanga o teia? Kia putuputu ta tatou pure kia Iehova mei te mea atura kare tatou e vaoo ia Iehova kia noo ua. Te akamaara maira te tuatua a Isaia i ta Iesu akatutuanga no te pure i roto ia Luka 11:8-10, 13. Te akamaroiroi maira a Iesu ia tatou kia pure e “pati akatenga,” e “e pati” ua atu rai no te vaerua tapu. Ka pati akatenga katoa tatou kia Iehova kia oronga mai i te arataki anga tei anoanoia kia rauka ia tatou te tuku i te au ikianga meitaki.
ARATAKI A IEHOVA IA TATOU
8. I te au tuatau taito, akapeea te au tuatua o Isaia 30:20, 21 te akatupuia anga?
8 E tatau ia Isaia 30:20, 21. Te opu anga te vaeau o Babulonia ia Ierusalema e tai e te apa mataiti, kua aite te taitaia o te tangata mei te varaoa e te vai. I roto i te irava 20 e te 21, kua taputou a Iehova ki te ngati Iuda e me tataraara ratou e te taui i to ratou tu, ka akaora aia ia ratou. Ei “Orometua” a Iehova no ratou, kua taputou a Isaia ki te tangata e ka apii a Iehova ia ratou akapeea me akamori Iaia ma te tau. Kua akatupuia teia au tuatua te akarangatiraia anga te ngati Iuda. Kua riro a Iehova ei Orometua Maata no ratou, e i raro ake i tana arataki anga, kua autu tona iti tangata i te akaoki akaou i te akamorianga mou. Akameitakiia tatou e Iehova, ei Orometua Maata no tatou i teia rā.
9. Eaa tetai mataara e rauka ana ia tatou ta Iehova arataki anga?
9 Te akara akaou anga i teia akatutuanga, kua akatutu a Isaia ia tatou ei aronga apii tei apiiia e Iehova na roto i te rua mataara. Te mea mua, akakite a Isaia: “E kite ra to kotou mata i to kotou [ra] Orometua.” I teia akatutuanga, kua akatutuia te Orometua e tu ra ki mua i tana aronga apii. Akameitakiia tatou kia puapinga mei teia apii anga i teia rā. Akapeea a Iehova te apii anga ia tatou? Na roto i tana akaaerenga. Akameitaki tikai tatou i te arataki anga taka meitaki mei ta Iehova akaaerenga! Te riro nei te au apii i ko i te au uipaanga putuputuanga e te au uruoaanga pera te au puka, te au broadcast, e te vai atura ei tauturu ia tatou i te tuatau manamanata kia akakoromaki ma te rekareka.
10. Akapeea tatou te rongo anga “i tetai manga tuatua i muri mai ia [tatou]”?
10 Kua tata a Isaia i te rua o te mataara e te apii maira a Iehova ia tatou, te na ko anga: “E na to kotou taringa e akarongo i tetai manga tuatua i muri mai ia kotou.” Te akatutu ra te peroveta ia Iehova ei orometua akarongo meitaki te aaere ra na muri i tana aronga apii, te akaari ra aia i te mataara ki mua ma te arataki anga. I teia rā te akarongo nei tatou i te reo o te Atua i muri ia tatou. Akapeea ra? Kua tataia te au tuatua akauruia a te Atua ki roto i te Pipiria no tetai tuatau roa, kua roa te reira i muri ia tatou. No reira me tatau tatou i te Pipiria, mei te mea atura te rongo ra tatou i te reo o te Atua i muri ia tatou.—Isa. 51:4.
11. Kia akakoromaki ma te rekareka, eaa te nga takainga ka anoanoia tatou kia rave, e no teaa ra?
11 Akapeea tatou e puapinga ai mei te arataki anga a Iehova na roto mai i tana akaaerenga e tana Tuatua? Akara i teia nga tuatua e rua na Isaia. Te mea mua, “teia te ara.” Te rua, “e na reira te aere.” (Isa. 30:21) Kare e rava ua kia kite i “te ara.” Ka anoano katoaia tatou kia “na reira te aere.” Na roto i ta Iehova Tuatua, mei tei akamāramaia e tana akaaerenga, ka apii tatou eaa ta Iehova e umuumu maira ia tatou. Ka apii katoa tatou akapeea me taangaanga i ta tatou e apii ra. Kia akakoromaki ma te rekareka i ta tatou tavini anga ia Iehova, ka anoanoia tatou kia rave i te nga takainga e rua. Me pera tatou ka rauka ta Iehova akameitakianga.
AKAMEITAKI A IEHOVA IA TATOU
12. Ia Isaia 30:23-26, akapeea a Iehova me akameitaki i tona iti tangata?
12 E tatau ia Isaia 30:23-26. Akapeea teia totou te akatupuia anga no te ngati Iuda tei oki ki te enua o Iseraela i muri ake i te tuikaa anga i Babulonia? Kua rauka ia ratou te au akameitakianga maata—i te pae kopapa e te pae vaerua. Kua akameitaki a Iehova i tona iti tangata ma te putunga kai i te pae kopapa. Tei puapinga rava atu, kua akameitaki aia ia ratou ma te au kai pae vaerua te akaoki anga i te akamorianga mou. E maata atu te au akameitakianga pae vaerua ta te iti tangata o te Atua i rekareka i teianei, i tetai ua atu taime i mua ana. Mei tei akakiteia i te irava 26, kua akamaata meitaki a Iehova i te mārama pae vaerua. (Isa. 60:2) Kua riro ta Iehova au akameitakianga ei tauturu i tona au tavini kia tavini ua atu iaia ma te rekareka e te maroiroi no te “rekareka ngakau ra.”—Isa. 65:14.
13. Akapeea te totou o te akaoki anga te akatupuia anga i to tatou tuatau?
13 Ka tau ainei te totou no te akaoki anga i te akamorianga mou kia tatou i teia rā? Ae! Akapeea ra? Mei te 1919 T.N., e mirioni ua atu tangata tei akarangatiraia mei te tuikaa kia Babulonia Maata, te akonoanga pikikaa o teianei ao. Kua aratakiia ratou ki tetai ngai meitaki atu i to Iseraela Enua Taputouia. Kua aratakiia ratou ki tetai parataito pae vaerua. (Isa. 51:3; 66:8) Eaa te reira parataito pae vaerua?
14. Eaa te parataito pae vaerua, e koai ma te noo ra ki reira i teia tuatau? (Akara i te Akamārama Anga Tuatua.)
14 Mei te 1919 T.N., kua rekareka te aronga akatainuia i tetai parataito pae vaerua. b I te tuatau i aereia mai, te aronga ma te manakonakoanga no te enua, te “mamoe ke atu,” kua noo katoa ratou ki roto i teia enua pae vaerua e kua rekareka i ta Iehova au akameitakianga maata.—Ioa. 10:16; Isa. 25:6; 65:13.
15. Teiea te parataito pae vaerua?
15 Teiea te enua pae vaerua, me kore te parataito, i teia rā? Te kiteaia ra te aronga akamori ia Iehova i te au tuanga katoatoa o te enua. Te vai katoa ra teia parataito pae vaerua i te ao katoa. I teia rā, noatu te ngai ta tatou e noo ra i te enua nei, ko tatou tetai tuanga o te parataito pae vaerua tera ua kia turu maroiroi tatou i te akamorianga mou.
Akapeea tatou tataki tai me akamaata atu i te manea o te parataito pae vaerua? (Akara i te parakarapa 16-17)
16. Akapeea tatou e kite ua ai i te manea o te parataito pae vaerua?
16 Kia vai tamou ki roto i te parataito pae vaerua, ka anoanoia tatou kia akaperepere i ta tatou putuputuanga Kerititiano i te ao katoa. Akapeea tatou me rave i te reira? Na te akamouanga ki runga i tona manea, kare ki runga i te au tu apa ua o te au taeake e te au tuaine i reira. (Ioa. 17:20, 21) Eaa te reira i puapinga maata ai? Akamanako i teia akaaite anga. Ka tapapa atu tatou i te kite i te au rakau tukeke i roto i tetai aua tiare manea. Pera rai, kua akamaneaia te parataito pae vaerua i roto i te au putuputuanga ki te au taeake tukeke tei akaaiteia ki te au rakau. (Isa. 44:4; 61:3) Ka anoanoia tatou kia akamou ki runga i te manea o “te vao rakau,” kare ki runga i te au tu apa ua o te au taeake tataki tai o “te au rakau” i te pae ia tatou. Kare tatou e tuku i to tatou au tu apa ua e to tetai pae i roto i te putuputuanga kia tamanata i te manea o te putuputuanga Kerititiano taokotaiia i te ao katoa.
17. Eaa ta tatou ka rave no te akamaata atu i te tu taokotai i roto i te putuputuanga?
17 Akapeea tatou me tauturu ua rai i te putuputuanga kia vai taokotai? Ei aronga akamoeau tatou. (Mata. 5:9; Roma 12:18) I te au taime ravarai, me akamaata tatou i te pirianga ’au ki te katoatoa i roto i te putuputuanga, ka akamaata atu tatou i te manea o te parataito pae vaerua. Kia akamanako tatou e na Iehova i akavaitata mai i te tangata tataki tai ki te akamorianga mou o te parataito pae vaerua. (Ioa. 6:44) Akamanako ana i to Iehova mataora me kite aia ia tatou e angaanga pakari ra i te akamoeau e kia vai taokotai i rotopu i te aronga tei akaperepere aia—ei au tavini nona!—Isa. 26:3; Haga. 2:7.
18. Eaa ta tatou ka akamanako oonu ua, e no teaa ra?
18 Akapeea tatou e puapinga ai mei te au akameitakianga tei rauka ia tatou ei au tavini no te Atua? Ka akamanako oonu tatou i ta tatou i apii mei te Tuatua a te Atua e te au puka Pipiria. Na te reira apii e te akamanako oonu e tauturu ia tatou kia taangaanga i te au tu Kerititiano tei akakeu ia tatou kia “aroa mou” e te “aroa taeake” i roto i te putuputuanga. (Roma 12:10) Ia tatou e akamanako oonu ra i ta tatou akameitakianga i teianei, ka akamatutu tatou i to tatou pirianga kia Iehova. Me akamanako oonu tatou i ta Iehova au akameitakianga ki mua, ka vai tika ua rai te manakonakoanga o te tavini anga iaia e tuatau ua atu. Ka akamaata atu teia i to tatou rekareka no te tavini ia Iehova i teianei.
E AKAKOROMAKI UA ATU
19. (a) Ia Isaia 30:18, eaa ta tatou i papu? (e) Eaa te ka tauturu ia tatou kia akakoromaki ma te rekareka?
19 Ka “tu [a Iehova] ki runga” no tatou me takore aia i teia ao kikino. (Isa. 30:18) Papu ia tatou no Iehova—“e Atua tuatua-tau”—kare aia e akatika i to Satani ao kia vai ua atu no tetai ra toe. (Isa. 25:9) Ka tiaki marie tatou i te pae ia Iehova no te reira rā akaora anga. I teianei, ka aruaru ua atu tatou i te akaperepere i te akameitakianga o te pure, te apii e te taangaanga i te Tuatua a te Atua, e te akamanako oonu i ta tatou akameitakianga. Me pera tatou, ka tauturu a Iehova ia tatou kia akakoromaki ma te rekareka i te akamori iaia.
IMENE 142 Mou Piri i to Tatou Manakonakoanga
a Ka uriuri teia atikara e toru mataara akapeea a Iehova me tauturu i tona aronga akamori kia akakoromaki i te au manamanata ma te rekareka. Ka apii tatou i teia au tauturu na te uriuri anga ia Isaia pene 30. Ia tatou e uriuri nei i teia pene, ka kite tatou i te puapinga kia pure kia Iehova, apii i tana Tuatua, e kia akamanako oonu i ta tatou akameitakianga i teianei e te tuatau ki mua.
b AKAMĀRAMA ANGA TUATUA: Te “parataito pae vaerua” e turanga tinamou te reira me akamori taokotai tatou ia Iehova. I roto i teia turanga, e maata ta tatou kai pae vaerua kare e au pikikaa akonoanga e e maata te angaanga memeitaki, te tutu aere i te nuti meitaki o te Patireia o te Atua. Rekareka tatou i tetai pirianga vaitata kia Iehova, e te noo ’au ua nei tatou ki te au taeake e te au tuaine aroa, tei tauturu ia tatou kia akakoromaki i te au manamanata o te oraanga ma te rekareka. Ka tomo tatou ki roto i te parataito pae vaerua me akamata tatou i te akamori ia Iehova ma te tau e te aru i tona akaraanga.