1. Eaa ta tatou ka tapapa atu, e eaa ta tatou i papu?

 KA TAPAPA atu tatou i te patoi anga me rave i ta tatou angaanga tutu aere. E ka tupu maata atu te reira a te tuatau ki mua. (Dani. 11:44; 2 Timo. 3:12; Apo. 16:21) Noatu ra, papu ia tatou e ka tauturu a Iehova ia tatou. Eaa te tumu? Kua tauturu ua ana a Iehova i tona au tavini no te akatupu i ta ratou angaanga​—noatu te ngata i te reira. Ei akatutuanga, ka uriuri tatou i tetai au tupuanga i roto i te oraanga o te peroveta ko Ezekiela, tei tutu aere ki te au tuikaa ngati Iuda i Babulonia.

2. Akapeea a Iehova te akatutu anga i te tangata ta Ezekiela i tutu aere atu i tona tuatau e eaa ta tatou ka uriuri i teia atikara? (Ezekiela 2:3-6)

² Eaa te tu tangata ta Ezekiela i tutu aere atu i tona tuatau? Akatutu a Iehova ia ratou ei aronga “uouomatoa,” “ngakau ketaketa,” e te “meameaau.” E aronga kino ratou mei te rakau taratara e te kikino mei te sekopio. No reira a Iehova i tuatua putuputu ei kia Ezekiela: “Auraka e mataku”! (E tatau ia Ezekiela 2:3-6.) Kua rauka ia Ezekiela te rave i tana angaanga tutu aere no te mea (1) kua tonoia aia e Iehova, (2) kua akamaroiroiia aia e te vaerua o te Atua, e te (3) kua akamatutuia aia e te tuatua a te Atua. Akapeea teia au manako e toru te tauturu anga ia Ezekiela? E akapeea teia te tauturu anga ia tatou i teia rā?

3. Eaa te au tuatua tei akamaroiroi ia Ezekiela, e akapeea a Iehova te akapapu anga e ka tauturu Aia iaia?

³ Akakite a Iehova kia Ezekiela: “Te tono nei au ia koe.”  (Eze. 2:3, 4) Kua akamaroiroi teia ia Ezekiela. Eaa ra? Kare e ekoko anga kua maara iaia ta Iehova tuatua i te tono anga Aia ia Mose e Isaia ei peroveta Nana. (Exo. 3:10; Isa. 6:8) Kite katoa a Ezekiela akapeea a Iehova te tauturu anga i tana nga peroveta i to raua manamanata. No reira a Iehova i akakite ei kia Ezekiela e rua taime: “Te tono nei au ia koe,” e tumu anga meitaki ta te peroveta kia irinaki e ka tauturu a Iehova iaia. Pera, i te puka a Ezekiela, ka kite tatou i teia tuatua e maata ua atu te taime: “Tae mai ei te tuatua a Iehova iaku nei, na ko maira.” (Eze. 3:16) Teia tuatua “Tae maira oki te tuatua a Iehova kiaku nei, na ko maira” e maata ua atu te taime i tataia. (Eze. 6:1) Papu ia Ezekiela e na Iehova aia i tono. Pera katoa, e tamaiti aia na te taunga, papu kua apii tona metua tane ia Ezekiela e kua tauturu a Iehova i Tana au peroveta i te au mataiti i aereia. Kia Isaaka, Iakoba, e Ieremia, kua tuatua a Iehova i teia au tuatua: “Tei vaitata katoao au ia koe.”​—Gene. 26:24; 28:15; Iere. 1:8.

4. Eaa te au tuatua pumaana tei akamaroiroi ia Ezekiela?

⁴ Akapeea te au Iseraela te ariu anga ki ta Ezekiela angaanga tutu aere? Akakite a Iehova: “Kare ra te ngutuare o Iseraela e akarongo mai ia koe; kare oki ratou e akarongo mai iaku ra.” (Eze. 3:7) Na te patoi anga ia Ezekiela, te patoi ra te tangata ia Iehova. Kua riro teia tuatua ei akapumaana ia Ezekiela e kare mei te mea kua riro te patoi anga a te tangata ei mea puapinga kore kiaia ei peroveta. Kua akapapu katoa a Iehova kia Ezekiela e me riro tana au akavaanga ei mea tika, ka kite te tangata e “e peroveta tei noo ana i rotopu ia ratou.” (Eze. 2:5; 33:33) Kare e ekoko anga kua riro teia au tuatua pumaana ei akamaroiroi iaia kia rave i tana angaanga tutu aere.

5. Ia Isaia 44:8, noea mai to tatou maroiroi?

⁵ Ka akamaroiroi katoaia tatou te kite anga e kua tonoia tatou e Iehova. Akangateitei aia ia tatou na te kapiki anga ia tatou ei “kite” nona. (Isa. 43:10) Mei teaa atura i te akameitakianga ngateitei! Mei ta Iehova raurau anga ia Ezekiela: “Auraka e mataku,” Te raurau nei a Iehova ia tatou: “Auraka kotou e mataku.” Eaa tatou ka kore ei e mataku i te aronga tei patoi mai ia tatou? Mei ia Ezekiela, kua tonoia tatou e Iehova ma Tona tauturu.​—E tatau ia Isaia 44:8.

6. (a) Akapeea a Iehova te akapapu anga mai i tona tauturu? (e) Eaa te akapumaana anga no tatou?

⁶ Te akapapu maira a Iehova i tona tauturu. Ei akaraanga, i mua ua ake i ta Iehova akakite anga: “Ko kotou toku kite,” karanga aia: “Kia aere koe na raro i te moana, ei vaitata rai au ia koe; e kia na raro i te vai taʼe, kare koe e ninaia; kia aere koe na roto i te ai, kare koe e pakapaka; kare oki te mura ai e mou mai ki runga ia koe.” (Isa. 43:2) Ia tatou e rave ra i ta tatou angaanga tutu aere, ka kite tatou i te au manamanata maata e te au timata anga mei te aʼi te tu. Noatu rai, ka tauturu a Iehova i ta tatou angaanga tutu aere. (Isa. 41:13) Mei to Ezekiela tuatau, kua patoi te maata anga i te karere. E akamaara tatou noatu ta ratou patoi anga kare mei te mea kua puapinga kore tatou ei Au Kite no te Atua. Ka akapumaanaia tatou te kite anga e te mareka ra a Iehova me tutu aere tiratiratu ua atu tatou i tana karere. Akakite te apotetoro ko Paulo: “E rave tetai e tetai i tana uaorai tutaki e tau i tana uaorai angaanga.” (1 Kori. 3:8; 4:1, 2) Karanga tetai painia tei tavini no tetai tuatau roa: “Rekareka tikai au te kite e ka tutaki a Iehova i ta tatou angaanga.”

7. Me akamanako ua rai a Ezekiela i te orama tana i kite, eaa tei tupu kiaia? (Akara i te tutu i te kapi mua.)

⁷ Kua kite a Ezekiela mei teaa te ririnui to te Atua vaerua. I roto i te orama, kua kite aia i te vaerua tapu i te angaanga anga ki runga i te au mea vaerua ririnui e ki runga i te au porotata mamaata o tetai kariota i te rangi. (Eze. 1:20, 21) Eaa ta Ezekiela i rave? Kua tata aia i tei tupu. “E tei te kite anga atu au ra; kua tipapa iora au ki raro te mata.” Ma te tu akangateitei, kua tipapa iora a Ezekiela ki raro. (Eze. 1:28) I muri mai, me akamanako ua rai a Ezekiela i te reira orama umere, kua akamaroiroiia tona irinakianga ma te tauturu o te vaerua o te Atua, ka rauka iaia i te rave i tana angaanga tutu aere.

8-9. (a) Eaa ta Iehova akaue anga i akatupu kia Ezekiela? (e) Akapeea a Iehova te akamaroiroi anga ia Ezekiela no tana ngai tutu aere?

⁸ Kua akaue a Iehova ia Ezekiela: “E te tamaiti a te tangata na, tu ua mai to vaevae, e e karanga atu au kia koe.” Kua akamaroiroi te reira akaueanga e te vaerua o te Atua ia Ezekiela e kua akakeu iaia kia tu ki runga. Tata a Ezekiela: “E kua tomo maira te vaerua ki roto iaku, iaia i tuatua mai kiaku ra, e kua akatu maira aia iaku i toku vaevae.” (Eze. 2:1, 2) I tona oraanga tutu aere i muri mai, kua aratakiia a Ezekiela e te “rima” o te Atua​—koia oki, te vaerua tapu o te Atua. (Eze. 3:22; 8:1; 33:22; 37:1; 40:1) Kua akamaroiroi te vaerua o te Atua ia Ezekiela kia rave i tana angaanga​—te tutu aere ki te au tangata “uouomatoa” e te “ngakau mārokiakia.” (Eze. 3:7) Akakite a Iehova kia Ezekiela: “Kua akamaroiroi au i toou na mata i to ratou au mata, e toou rae kia maroiroi i to ratou au rae. Mei te daimani ra, ketaketa  maata tona i to te toka tama ra, toou ïa rae i te akapakari angaia e au ra: auraka e mataku, auraka oki e kakaravi i to ratou mata.” (Eze. 3:8, 9) Mei tera te tu, akakite a Iehova kia Ezekiela: ‘Auraka e tuku i te au tangata mārokiakia kia akaparuparu ia koe. Naku koe e akamaroiroi.’

⁹ I muri maira, kua akamaroiroi te vaerua o te Atua ia Ezekiela i roto i tana angaanga tutu aere. “Te ririnui maira te rima o Iehova ki runga iaku nei,” i tata ei a Ezekiela. E tai o te peroveta epetoma no te akamanako meitaki i te karere ei akakitekite anga nana. (Eze. 3:14, 15) E oti kua arataki a Iehova iaia ki tetai “ngai mataataa” e kua “tomo maira te vaerua ki roto [iaia].” (Eze. 3:23, 24) Kua papa a Ezekiela no tana angaanga tutu aere.

10. Eaa te tauturu te ka anoanoia kia rave i ta tatou angaanga tutu aere, e no teaa ra?

¹⁰ Eaa te tauturu te ka anoanoia kia rave i ta tatou angaanga tutu aere? Ei pauanga, akamanako ana i tei tupu kia Ezekiela. I mua ake ka akamata ai aia i tana angaanga tutu aere, kua oronga te vaerua o te Atua i te maroiroi kiaia. I teia rā, mei ia Ezekiela, ka rave tatou i te angaanga tutu aere ma te tauturu o te vaerua o te Atua. No teaa ra? No te mea te tamaki nei a Satani kia akamutu tatou i ta tatou angaanga tutu aere. (Apo. 12:17) I roto i te mata tangata, akara anga e ka autu a Satani. Na roto i ta tatou angaanga tutu aere, te autu nei tatou ki rungao iaia! (Apo. 12:9-11) Mei teaa te tu? Me rave tatou i te angaanga tutu aere, te akaari ra tatou e kare tatou e mataku ana ia Satani. Me tutu aere tatou, te ruti ra a Satani. Eaa i reira te akaari maira e ka rauka ia tatou te rave i ta tatou angaanga tutu aere noatu te patoi anga? Te akamaroiroiia nei tatou e te vaerua tapu e te mareka maira a Iehova ia tatou.​—Mata. 5:10-12; 1 Pete. 4:14.

11. Eaa ta te vaerua o te Atua ka rave no tatou, e akapeea e rauka ua ai ia tatou te reira?

¹¹ Eaa tetai atu akapapuanga e kua  akamaroiroi a Iehova i te mata e te rae o Ezekiela? Ka rauka i te vaerua o te Atua i te akamaroiroi ia tatou i tetai ua atu manamanata i roto i ta tatou angaanga tutu aere. (2 Kori. 4:7-9) Eaa, i reira, ta tatou ka rave kia rauka ua te vaerua o te Atua? E pure putuputu tatou, ma te papu e ka akarongo mai a Iehova i ta tatou pure. Kua apii a Iesu i tana au pipi: “E pati, . . . e kimi, . . . e topāpā atu.” E na Iehova e, “oronga i te vaerua tapu i te aronga e pati atu [i]aia ra.”​—Luka 11:9, 13; Anga. 1:14; 2:4.

12. Ia Ezekiela 2:9–3:3, noea mai te pokaikai tuatua e eaa tei tataia i reira?

¹² Kua akamaroiroiia a Ezekiela e te vaerua o te Atua e kua akamatutu katoaia aia e te au tuatua a te Atua. I roto i te orama, kua kite a Ezekiela i tetai rima e mou ra i te pokaikai tuatua. (E tatau ia Ezekiela 2:9–3:3.) Noea mai te pokaikai tuatua? Eaa tei tataia i reira? Akapeea te reira te akamatutu anga ia Ezekiela? Ka akara tatou. No ko mai te pokaikai tuatua i te terono o te Atua. Papu, kua taangaanga a Iehova i tetai o te a angera ta Ezekiela i kite i mua atu ana, kia oake i te pokaikai tuatua kiaia. (Eze. 1:8; 10:7, 20) Tei roto te au tuatua a te Atua i te pokaikai​—e karere akavaanga ta Ezekiela ka akakite ki te au tuikaa mārokiakia. (Eze. 2:7) Kua tataia te reira karere ki roto e ki vao i te pokaikai tuatua.

13. Eaa ta Iehova i akakite kia Ezekiela kia rave ki te pokaikai, e eaa i venereka ai te reira?

¹³ Akakite a Iehova ki tana peroveta kia kai i te pokaikai tuatua e ka ‘akaki i tona kopu ki te reira.’ Kua akarongo a Ezekiela e kua kai iora. Eaa te aiteanga o teia tuanga o te orama? Kua anoanoia a Ezekiela kia akamanako meitaki i te karere. Kia irinaki, e kia akakeu iaia kia akakitekite i te reira. Kua tupu atura tetai apinga umere. Kite mai a Ezekiela ‘e mei te meli te tu i te venereka.’ (Eze. 3:3) Eaa ra? Kua aite ta Ezekiela tavini ngateitei anga ia Iehova mei tetai mea venereka e te mataora. (Sala. 19:8-11) Rekareka tikai aia e kua mareka a Iehova iaia kia tavini ei peroveta.

14. Eaa tei tauturu ia Ezekiela kia papa no te rave i tana angaanga?

¹⁴ I muri mai, akakite a Iehova kia Ezekiela: “Ko te au tuatua katoa naku, taku e karanga atu kia koe ra; ka āriki mai i roto i to ngakau na, e akarongo mai oki to taringa.” (Eze. 3:10) Mei teia au ikuiku anga, akakite a Iehova kia Ezekiela kia akamaara e kia manakonako i teia au tuatua tei tataia i roto i te pokaikai. Kua riro teia ei akamatutu ia Ezekiela. E kua riro katoa teia karere ririnui ei akakite nana ki te tangata. (Eze. 3:11) Ma te karere a te Atua i roto i tona ngakau e i tona vaa, kua papa a Ezekiela te rave i tana angaanga e te akatupu i te reira.​—Akaaite ia Salamo 19:14.

15. Kia akakoromaki, eaa ta tatou ka anoanoia kia ‘āriki i roto i te ngakau’?

¹⁵ Kia akakoromaki i roto i te angaanga tutu aere, ka anoanoia tatou kia akamatutuia e te au tuatua a te Atua. Ka anoanoia tatou kia ‘āriki i roto i te ngakau’ ta Iehova i tuatua maira. I teia rā te tuatua maira a Iehova na roto i tana Tuatua, te Pipiria. Akapeea tatou me akapapu e te akakeu ra te Tuatua a te Atua i to tatou manako, ngakau, e te akakeu anga?

16. Eaa ta tatou ka rave ki te Tuatua a te Atua, e akapeea tatou me akamanako oonu i te reira i roto i to tatou ngakau?

¹⁶ Me kai e te apuku tatou i te kai e kua akamatutuia i te pae kopapa, ka akamatutuia tatou i te pae vaerua me apii  tatou i te Tuatua a te Atua e te manakonako i te reira. Ka akamanako meitaki tatou i teia apiianga no te pokaikai. No runga i te Tuatua a te Atua, ka inangaro a Iehova ia tatou kia ‘akaki i to tatou kopu ki te reira.’ Na roto i te pure, te tatau anga, e te manakonako anga. Te mea mua, ka pure tatou no te akapapa i to tatou ngakau kia rauka te manako o te Atua. E oti, ka tatau tatou i tetai irava Pipiria. Aru mai, ka tāpū tatou ma te manakonako, te akamanako oonu, i ta tatou e tatau ra. Eaa te ka tupu? Me maata atu ta tatou ka manakonako, ko te maata atu ïa ta te ngakau ka akamanako oonu i te Tuatua a te Atua.

17. Eaa i puapinga ai kia manakonako i ta tatou e tatau ra i roto i te Pipiria?

¹⁷ Eaa i puapinga ai kia tatau i te Pipiria e kia manakonako i te reira? Ka akamaroiroi te reira ia tatou kia tutu aere i te karere o te Patireia i teianei e te akakitekite i te karere akavaanga a te tuatau ki mua e vaitata maira. E me manakonako tatou i te au tu manea o Iehova, ka matutu ua atu to tatou pirianga vaitata kiaia. E ka reka tatou i tetai mea venereka tikai, e te mataora​—te tu ’au e te merengo.​—Sala. 119:103.

18. Eaa ta te tangata tei tutu aere atu tatou ka āriki, e no teaa ra?

¹⁸ Kare tatou i aite kia Ezekiela tei akauruia kia totou ki te tangata. Inara, te aruaru nei tatou i te akakitekite i te karere akauruia ta Iehova i akono ki roto i tana Tuatua e tae ua atu ki te taime me mareka aia kua oti te angaanga tutu aere. Me tae mai te tuatau akavaanga, kare a te tangata kotoe anga e kare ratou i rongo ana i te akamatakiteanga e e kua kopae te Atua ia ratou. (Eze. 3:19; 18:23) Mari ra, ka kite ratou e no ko mai i te Atua ta tatou karere i tutu aere.

19. Eaa te ka akamaroiroi ia tatou kia akatupu i ta tatou angaanga tutu aere?

¹⁹ Eaa te ka akamaroiroi ia tatou kia akatupu i ta tatou angaanga tutu aere? Ko taua toru apinga tei akamaroiroi ia Ezekiela. Ka tutu aere ua atu tatou no te mea kua kite tatou e na Iehova tatou i tono, kua akamaroiroiia tatou e te vaerua tapu o te Atua, e kua akamatutuia e te Tuatua a te Atua. Kua akakeuia tatou ma te tauturu o Iehova kia rave i ta tatou angaanga tutu aere e kia akakoromaki “e tae ua atu ki te openga.”​—Mata. 24:13.