1. Eaa ta tatou ka apii mai mei te aronga pakarikari?

 KA ANOANO pouroa tatou i te tauturu me rave i tetai au ikianga puapinga. Ka orongaia mai te reira aratakianga mei te aronga pakari e tetai au Kerititiano tukatau. Me e pakarikari ratou, eiaa tatou e manako e kare ta ratou aratakianga e puapingaia no tatou i teia rā. To Iehova inangaro kia apii tatou mei ia ratou. E maata atu to ratou kite, te mārama e te pakari ki to tatou.—Iobu 12:12.

2. Eaa ta tatou ka uriuri mei teia atikara?

² I te tuatau Pipiria, kua taangaanga a Iehova i te aronga pakarikari ei akamaroiroi e te arataki i tona iti tangata. Akamanako ana i tetai au akaraanga mei ia Mose, Davida e te apotetoro ko Ioane. Kua noo ratou i tetai au tuatau ke, e kua tuke to ratou turanga. I te openga o to ratou oraanga, kua oronga ratou i te au akoanga puapinga ki te au mapu. Kua akakite teia au tavini tiratiratu i te puapinga kia akarongo ki te Atua. Kua tata a Iehova i ta ratou au tuatua pakari no tatou i teia tuatau. Noatu e mapu me kore e pakarikari tatou, ka puapingaia tatou me aru i te akoanga. (Roma 15:4; 2 Timo. 3:16) I teia atikara, ka uriuri tatou i te au tuatua taopenga a teia au tavini tiratiratu e toru, e eaa ta tatou ka apii mei te reira.

“KO TE ROA ÏA O TOOU RA PUKE RĀ”

3. Eaa te au angaanga pakari ta Mose i rave?

³ Kua angaanga pakari a Mose na Iehova i roto i tona oraanga. Kua tavini aia ei peroveta, akava, ei arataki e pera ei tangata tata. E maata ta Mose i apii mai mei tona au tupuanga! Kua arataki aia i to Iseraela ki vao, te tuikaa  anga i Aiphiti e e maata tana i kite no te au semeio a Iehova. Taangaanga a Iehova iaia kia tata i te au puka mua e rima o te Pipiria, mei ia Salamo 90 e Salamo 91. E kua tata katoa aia i te puka o Iobu.

4. Koai ma ta Mose i akamaroiroi, e eaa te tumu?

⁴ I mua ake ka mate ei aia, e 120 ona mataiti, kua akamaara a Mose ki to Iseraela i ta ratou i kite te tauturu anga a Iehova ia ratou. I to ratou mapu anga, kua kite mata tetai pae i te au akairo e te semeio ta Iehova i rave e pera Tana akavaanga i to Aiphiti. (Exo. 7:​3, 4) Kua aaere ratou na rotopu i te Tai Muramura e kua kite ratou te takore anga a Iehova i to Pharao au vaeau. (Exo. 14:​29-31) I roto i te metepara, kua paruru e kua akono a Iehova ia ratou. (Deu. 8:​3, 4) E teianei te tapapa ra te ngati Iseraela kia tomo ki roto i te Enua Taputouia, i te reira atianga openga kua akamaroiroi a Mose ia ratou. a

5. Ia Deuteronomi 30:​19, 20, eaa ta Mose au tuatua taopenga no te akamaroiroi i to Iseraela?

⁵ Eaa ta Mose i tuatua? (E tatau ia Deuteronomi 30:​19, 20.) Ka tapapa atu to Iseraela i te akameitaki anga a te tuatau ki mua. Ka noo ratou ki runga i te enua no tetai tuatau roa mei ta Iehova i taputou. E ka kī te enua i te au kai meitaki e te manea! Akakite a Mose: “E au oire mamaata, e te meitaki, kare i patuia e koe ra; E te au are i ki i te au mea memeitaki katoa, kare taau i akaki ra, e te au ruavai i koia, kare taau i ko ra, te au kainga vine e te olive kare taau i tanu ra.”—Deu. 6:​10, 11.

6. Eaa te Atua i akatika ai i tetai au enua kia autu atu i te ngati Iseraela?

⁶ Kua akamatakite katoa a Mose i te ngati Iseraela. E ora ai ratou i roto i teia enua manea, ka anoanoia kia akarongo ratou ki ta Iehova au akauenga. Kua akamaroiroi a Mose ia ratou kia akarongo kia Iehova e rauka ai “te ora,” e “kia piri atu [ratou] kiaia.” Inara, kua patoi to Iseraela ia Iehova. No reira, kua akatika te Atua i to Asura e muri mai i to Babulonia kia autu e kia apai ia ratou ei tuikaa.—2 Ari. 17:​6-8, 13, 14; 2 Para. 36:​15-17, 20.

7. Eaa ta tatou ka kite mai mei te apii a Mose? (Akara katoa i te tutu.)

⁷ Eaa te apiianga no tatou? Me akarongo tatou kia Iehova, ka ora tatou e tuatau ua atu. Mei te ngati Iseraela tei vaitata i te tomo ki roto i te Enua Taputouia, te vaitata katoa nei tatou ki roto i te ao ou ta te Atua i taputou no tatou. Kare e roa atu ana, ka riro te enua ei parataito akaou. (Isa. 35:1; Luka 23:43) Ka takoreia te Tiaporo e tana au temoni. (Apo. 20:​2, 3) Kare te au akonoanga e apii i te au pikikaa no runga ia Iehova. (Apo. 17:16) Kare te kavamani a te tangata e takinokino akaou i te iti tangata o Iehova. (Apo. 19:​19, 20) Kare ua e aronga kino i te Parataito. (Sala. 37:​10, 11) Ka kauraro te aronga katoatoa i ta Iehova au ture, e ka akatupu i te tu taokotai e te ’au. No reira, ka akaari ratou i te aroa e te irinaki i tetai e tetai. (Isa. 11:9) Ka tapapa tatou i te reira tuatau! E pera katoa, me akarongo tatou kia Iehova, ka noo ua  rai tatou ki runga i te enua parataito e tuatau ua atu!—Sala. 37:29; Ioa. 3:16.

8. Akapeea te taputou no te tuatau ki mua te tauturu anga i tetai taeake? (Iuda 20, 21)

⁸ Me akamanako oonu ua rai tatou i te taputou a te Atua no te ora mutu kore, ka tauturu te reira ia tatou kia akarongo kiaia noatu to tatou au manamanata. (E tatau ia Iuda 20, 21.) Ka riro teia taputou ei akamaroiroiia tatou kia autu atu i te au turanga paruparu. Tetai taeake tei tavini ana ei mitinari i Aperika no tetai au mataiti, kua akamārama aia i tona timataia anga kia akamareka kore ia Iehova. Karanga aia: “Kare au e ō atu ki roto i te parataito e tuatau ua atu me kare au e akarongo kia Iehova. Tauturu te reira iaku kia akatikatika i toku au manamanata e kia pure putuputu kia Iehova. Ma tana tauturu, kua tavini ua atu rai au iaia.”

KA AUTU KOE

9. Eaa te au tumatetenga tei tupu kia Davida?

⁹ E ariki meitaki tikai a Davida. E tangata imene aia, e tata pee, e tumutoa e te peroveta katoa. E maata te au tumatetenga tei tupu kiaia. No tetai au mataiti, kua oro e kua pipini aia mei te ariki vareae ko Saula. Te riro anga mai aia ei ariki, kua oro akaou a Davida mei tana tamaiti ko Abasaloma tei inangaro i te tamate atu ia Davida e kia riro aia ei ariki. Noatu teia au manamanata e tona tu ara, kua vai tiratiratu a Davida ki te Atua e tae ua atu ki tona matenga. Akakite a Iehova no runga iaia ei “tangata e tau i [toku] ngakau.” E mea papu e kia akarongo tatou ki te akoanga pakari a Davida!—Anga. 13:22; 1 Ari. 15:5.

10. Eaa a Davida i ako atu ei i tana tamaiti ko Solomona?

¹⁰ Akamanako ana i tetai akaraanga, te ako anga a Davida i tana tamaiti ko Solomona, koia te ka mono mai iaia. Kua iki a Iehova ia Solomona kia akatu i te iero e kia akamori te tangata ia Iehova. (1 Para. 22:5) Ka na roto a Solomona i tetai au manamanata e te kino. Eaa i reira ta Davida ka tuatua kiaia? Ka akara tatou.

11. Ia 1 Ariki 2:​2, 3, eaa te ako ta Davida i oronga kia Solomona, e eaa te ka tupu me akarongo a Solomona? (Akara katoa i te tutu.)

¹¹ Eaa i reira ta Davida i tuatua? (E tatau ia 1 Ariki 2:​2, 3.) Kua akakite a Davida ki tana tamaiti me akarongo aia kia Iehova, ka puapingaia aia. E kua mataora a Solomona i tona oraanga rongonui. (1 Para. 29:​23-25) Kua pātu aia i te iero manea e kua tata i tetai au puka i roto i te Pipiria. Kua rongonui aia no tona pakari e te apinganui. (1 Ari. 4:34) Inara kua akakite a Davida kia Solomona kia akarongo kia Iehova e puapingaia ai aia. Te mea tangi, i muri mai kua aru a Solomona i tetai au atua ke. Kare a Iehova i mareka,  no reira kua ngere a Solomona i te pakari kia tutara i te tangata ma te tuatua tika.—1 Ari. 11:​9, 10; 12:4.

12. Eaa ta tatou ka apii mai mei te au tuatua a Davida?

¹² Eaa te apiianga no tatou? Me akarongo tatou kia Iehova, ka akameitaki e ka tauturu aia ia tatou. (Sala. 1:​1-3) E tika, kare a Iehova i taputou ana e ka rongonui e ka maata ta tatou moni mei ia Solomona rai. Inara me kauraro tatou ki te Atua, ka oronga mai aia i te pakari kia iki meitaki tatou. (Mase. 2:​6, 7; Iako. 1:5) Ka tauturu mai ta Iehova ako ia tatou kia rave i te au ikianga meitaki no te ngai angaanga, te apii teitei, te moni e te tamataora anga. Me aru tatou i tana ako, ka paruru aia i to tatou pirianga vaitata kiaia e te oraanga mutu kore. (Mase. 2:​10, 11) Ka rauka te au oa meitaki. E ka mataora to tatou ngutuare tangata.

13. Eaa tei tauturu ia Carmen kia taui i tona oraanga?

¹³ Kua manako tetai tuaine ko Carmen, e noo ra i Mozambique, e ko te maata atu i tana apii ka puapinga atu tona oraanga. Kua aere aia ki tetai apii teitei no te parani are e kua karanga aia. “Reka tikai au i taku e apii ra. Inara ka pou te ora e toku maroiroi. Ka aere au ki te apii mei te 7:30 i te popongi e tae ua atu ki te 6:00 i te aiai. E ngatā iaku i te aere ki te uipaanga e kua paruparu toku pirianga kia Iehova. Kare au e aru ana i ta Iehova akoanga.” (Mata. 6:24) Kua pure aia no tona turanga e kua rave i tetai kimikimianga mei ta tatou au puka. Karanga aia: “Te akoanga te aronga pakari e toku mami iaku, kua akaruke au i taku apii e kua tavini tamou au ia Iehova. Kua rave au i tetai ikianga meitaki e kua mataora au.”

14. Eaa te akoanga puapinga ta Mose e Davida i oronga atu?

¹⁴ Kua akaperepere a Mose e Davida ia Iehova e kua akarongo raua kiaia. I ta raua au tuatua openga, kua akamaroiroi raua i te aronga e akarongo maira kia aru i to raua akaraanga e kia akavaitata atu kia Iehova. Akamatakite katoa raua e me akaruke tetai ia Iehova, ka ngere aia i te au akameitaki anga mei ko mai iaia. Kua puapingaia tatou mei ta raua akoanga.  Mei tetai anere mataiti i muri mai, kua akakite katoa tetai tavini o Iehova i te puapinga kia tiratiratu ua rai ki te Atua.

“REKAREKA ANGA MAATA”

15. Eaa ta te apotetoro ko Ioane i kite i roto i tona oraanga?

¹⁵ E oa piri mou tikai a Ioane no Iesu Karaiti. (Mata. 10:2; Ioa. 19:26) Kua aru vaitata a Ioane ia Iesu i te angaanga tutu aere e kua kite atu aia i ta Iesu au semeio. Kua vai tiratiratu aia kia Iesu. Kite aia ia Iesu te tamateia anga e te akatuakaouia anga. Kua kite katoa aia te totoa anga te putuputuanga Kerititiano mei te anere mataiti mua. Kua tutu aereia te nuti meitaki “ki te tangata ravarai i raro ake i teianei rangi.”—Kolo. 1:23.

16. Koai ma tei puapingaia mei ta Ioane au reta?

¹⁶ Te ruaine anga a Ioane, kua rauka iaia tetai tikaanga ngateitei kia tata i te puka o Apokalupo, no runga i te “eeuanga a Iesu Mesia.” (Apo. 1:1) Kua tata a Ioane e tai puka Evangelia no runga i tona ingoa. Kua tata katoa aia e toru au reta, kapikiia e ko Ioane tai, rua e te toru. I roto i tana au reta e toru, kua taiku a Ioane i tetai tangata tiratiratu ko Gaio, tana i akaperepere. (3 Ioa. 1) I te reira taime, penei e maata atu te aronga ta Ioane i aroa ana ei tamariki. Ko ta teia tangata ruaine i tata, kua akamaroiroi aia i te au pipi a Iesu e tae ua mai kia tatou i teia tuatau.

17. Ia 3 Ioane 4, eaa te ka akatupu i te rekareka?

¹⁷ Eaa ta Ioane i tata? (E tatau ia 3 Ioane 4.) Kua tata a Ioane i tona rekareka me kauraro tatou ki te Atua. I te taime e tata ra a Ioane i te toru o te reta, te akakite ra tetai aronga i te au apiianga pikikaa e te akatupu ra i te ke i roto i te putuputuanga. Inara, ko tetai pae kua ‘akono ratou i te tuatua-mou.’ Kua akarongo ratou kia Iehova e kua “akono [ratou] i tana au akauenga.” (2 Ioa. 4, 6) Kua riro teia au Kerititiano tiratiratu ei apai mai i te rekareka maata kia Ioane e pera ia Iehova.—Mase. 27:11.

18. Eaa ta tatou ka apii mai mei te au tuatua a Ioane?

¹⁸ Eaa te apiianga no tatou? Me tiratiratu tatou kia Iehova, ka mataora tatou e tetai ke. (1 Ioa. 5:3) Ei akaraanga, ka mataora tatou no te mea te akarekareka ra tatou ia Iehova. Mataora aia me patoi tatou i te au timataanga o teia ao e te āriki  i te tuatua mou. (Mase. 23:15) Rekareka katoa te au angera i te rangi. (Luka 15:10) Ka mataora katoa tatou i te kite i tetai ke e tiratiratu ra, noatu me takinokinoia e me timataia ratou. (2 Tesa. 1:4) E no reira me takoreia te ao o Satani, ka rekareka tatou e kua vai tiratiratu tatou kia Iehova.

19. Eaa ta te tuaine ko Rachel i tuatua no te apii i te Pipiria ki tetai ke? (Akara katoa i te tutu.)

¹⁹ Ka rekareka maata tatou me apii atu i te tuatua mou ki tetai ke. Akakite a Rachel no te Dominican Republic mai e e tikaanga ngateitei i te apii i tetai ke no runga i to tatou Atua ko Iehova. Kua tauturu aia i tetai pae kia akamori ia Iehova. Karanga aia: “E ngatā i te tāpu i toku rekareka me kite au i te aronga taku i apii ana e akaperepere ra ia Iehova, te irinaki iaia e te taui i to ratou oraanga kia akamareka ia Iehova. E maata atu te rekareka no te maroiroi taku i akaatinga atu no te apii ia ratou.”

PUAPINGAIA TE AU TUATUA OPENGA A TE AU TAVINI TIRATIRATU

20. Eaa tetai au mea tei aite rai tatou kia Mose, Davida e Ioane?

²⁰ Kua noo ana a Mose, Davida e Ioane i tetai au tuatau roa e kua tuke to ratou au turanga ki to tatou. Inara, kua aite tatou kia ratou. Te tavini ra ratou i te Atua mou, e pera katoa tatou. Mei ia ratou, te pure ra tatou kia Iehova, te irinaki kiaia e te akara kiaia no te aratakianga. E noatu to ratou ruaine, mea papu e te akameitaki ra a Iehova i te aronga e akarongo ra kiaia.

21. Eaa te au akameitaki anga no te aronga tei aru i te ako a te aronga tiratiratu mei ia Mose, Davida e Ioane?

²¹ No reira, e aru tatou i te ako a te aronga pakari na te akarongo anga ki ta Iehova au akauenga. Me kauraro tatou kia Iehova, ka akameitaki e ka tauturu aia ia tatou. Ka noo tatou e tuatau ua atu e “ko te roa ïa o toou ra puke rā,” ae, e tuatau ua atu! (Deu. 30:20) E ka tupu te rekareka me akamareka tatou i to tatou Metua i te rangi, koia te ka akameitaki mai ia tatou na roto i te au ravenga umere tikai.—Ephe. 3:20.