Au Tauturu Kia Apii Putuputu i te Pipiria
E NGATĀ ainei ia koe i te apii putuputu i te Pipiria e kia mataora i te reira? E manako akapera ana tatou i tetai au taime. Inara e akamanako i tetai au angaanga e rave putuputu ana tatou mei te pa’i. Ka pou te tuatau e te maroiroi i te pa’i, inara ka mataora koe me mā koe! Ka aite katoa te apii i te Pipiria mei “te orei anga [ki te] vai.” (Ephe. 5:26) E akamanako i tetai au ravenga tauturu:
Akanoo i tetai papaanga. E “maata ua atu te meitaki” me rave koe i tetai apii Pipiria naau, tei anoanoia no te au Kerititiano katoatoa. (Phili. 1:10) Ei tauturu ia koe kia kore e ngaropoina i taau apii Pipiria, e tata ki raro i te au rā e te ora ki runga i tetai pepa e te tuku ki tetai ngai ka kite koe. Me kore e akanoo i te alarm i runga i taau apinga electronic, kia akamaara ia koe toou ora apii.
Akatano ki toou turanga. E mea māmā ainei ia koe i te apii no te tuatau roa me kore tuatau poto ua? Kua kite meitaki koe i toou turanga. E akatanotano i taau apii kia tau kia koe. Me kare koe e mataora ana i te tuatau i akanoo ei koe no taau apii, penei e akamata e tai ngauru miniti. Noatu kua tamou apii ana koe, e maata taau ka kite mai. E me akamata koe i te apii ka akamaroiroiia koe kia apii ua atu i te Pipiria.—Phili. 2:13.
E iki i taau ka apii na mua. Me akamanako koe eaa taau ka apii e me tae ki te tuatau apii, ka “taporoporo marie [koe] i te tuatau.” (Ephe. 5:16) E tata i te au atikara me kore te au manako taau ka inangaro i te apii? Me e uianga taau ka inangaro i te kite, e tata ki raro. E i te openga o taau apii, penei ka kapiti atu i tetai au manako ke, taau ka inangaro i te kite maata atu.
Kia papa ua i te taui. Kia papa ua koe i te taui i roto i taau akapapaanga no te apii, penei te roa o te taime e apii ra koe e taau tumu manako ka iki no te apii. Ko te mea puapinga, kia apii putuputu i te au epetoma. E tupu ei te reira, e akatanotano i te rā e te ora me apii koe, e eaa te roa o te apii me kore taau tumu manako ka apii.
Me apii putuputu tatou i te au epetoma, ka rauka te au akameitakianga. Ka piri vaitata tatou kia Iehova, ka rave i te au ikianga meitaki te ka akamaroiroi ia tatou.—Iosu. 1:8.
