1-2. Na teea au mataara e takinokinoia ana tatou?

 KUA akakite a Iesu i tetai parapore no tetai vaine takaua tei pati ua atu ki te akava kia tauturu iaia no te mea te takinokinoia ra aia. Kua mārama ua te au pipi a Iesu i te tua o te vaine takaua no te mea te takinokinoia ra ratou e te tangata. (Luka 18:​1-5) Ka mārama katoa tatou i te reira tua no te mea te na roto nei tatou i te takinokino anga.

² E akaari ana te tangata i te tu akavaavaa, te aroa kore e te noinoi, no reira kare tatou e poitirere me takinokinoia tatou. (Kohe. 5:8) Inara ka taitaia tatou, me akakino mai tetai taeake e tetai tuaine ia tatou. E tika, kare ratou i te aronga patoi i te tuatua mou. E aronga apa ua ratou. E maata ta tatou ka apii mai mei ia Iesu i tona takinokinoia anga e te aronga kino. Me ka rauka ia tatou i te akakoromaki i te aronga patoi, ka akakoromaki katoa tatou i te au taeake! Eaa to Iehova manako me takinokinoia tatou e te au taeake i roto i te putuputuanga e tetai ke i vao? Te tangi ra ainei aia ia tatou?

3. Te tangi ra ainei a Iehova ia tatou me takinokinoia, e no teea ra?

³ Inangaro a Iehova i te akono ia tatou, inara kua kite aia e ka takinokinoia tatou. “E mea inangaro oki na Iehova  te tuatua-tau.” (Sala. 37:28) Kua akapapu a Iesu e i te taime tau ka rave a Iehova i te tika. (Luka 18:​7, 8) E kare e roa atu ana ka takore aia i te au taitaia e te au tu takinokinoanga.—Sala. 72:​1, 2. 

4. Eaa ta Iehova tauturu ka oronga mai no tatou i teia tuatau?

⁴ Ia tatou e tapapa ra ia Iehova kia akatikatika i te au manamanata i teia tuatau, ka tauturu aia ia tatou kia akakoromaki. (2 Pete. 3:13) Ei akaraanga, ka apii mai aia i ta tatou ka rave me takinokinoia. Na roto i tana Tamaiti, kua oronga mai a Iehova i te akaraanga meitaki akapeea tatou me akakoromaki. E kua oronga mai Aia i te au kaveinga Pipiria kia tauturu ia tatou me takinokinoia.

E MATAKITE I TAAU KA RAVE ME TAKINOKINOIA KOE

5. Eaa tatou ka matakite ei me takinokinoia mai?

⁵ Penei ka mamae e ka taitaia tatou me takinokinoia tatou. (Kohe. 7:7) Kua na roto ana te au tavini tiratiratu mei ia Iobu e Habakuka i te reira turanga. (Iobu 6:​2, 3; Haba. 1:​1-3) E mea matauia teia au tu, inara kia matakite tatou me takinokinoia, auraka e rave i tetai angaanga neneva.

6. Eaa te apiianga mei te akaraanga o Abasaloma? (Akara katoa i te tutu.)

⁶ Me takinokino tetai tangata ia tatou, ka inangaro tatou i te tutaki i te kino kiaia. Inara, ka akatupu te reira i te au manamanata. Akamanako i te akaraanga o Abasaloma, te tamaiti a te Ariki ko Davida. Kua riri tikai aia i te kino ta Amona i rave ki tona tuaine ko Tamara kia moe raua. I raro i te Ture a Mose, ka tamateia a Amona. (Levi. 20:17) Noatu to Abasaloma riri i tona tuakana, kare aia e tau kia tamate atu ia Amona.—2 Samu. 13:​20-23, 28, 29.

7. Eaa te manako o te tata salamo, te kite anga aia i te kino e tupu ra?

⁷ Me ko te akaraanga e kare te aronga kino e akautungaia, ka ekoko tatou me e puapinga ainei te rave i te meitaki. Akamanako ana i ta te tata salamo i kite, te puapinga ra te aronga kino inara kua takinokinoia te aronga meitaki. Karanga aia: ‘Ko te aronga akono kore i te Atua, ko tei manuia i teianei ao.’ (Sala. 73:12) Kua taitaia tikai aia no te kino tei  tupu ki te tangata, e no te reira kua manako aia me e puapinga rai i te tavini ia Iehova, karanga aia: ‘Kia kite au i taua mea nei, e mea pikipiki ïa iaku.’ (Sala. 73:​14, 16) E kua akakite aia: “Kareka au nei, kua vaitata toku vaevae i te paeke; me turori oki toku takainga.” (Sala. 73:2) Kua tupu tetai manamanata ki te taeake ko Alberto.

8. Eaa ta tetai taeake i rave no te takinokinoanga tei tupu kiaia?

⁸ Kua akaapaia a Alberto no te keia i te moni a te putuputuanga. No te reira, kua ngere aia i tana akameitakianga e kare te au taeake i roto i te putuputuanga i akangateitei iaia. Karanga aia: “Kua riri tikai au.” Kua paruparu tona pirianga kia Iehova e kua akamutu aia i te aere ki te au uipaanga no tetai rima mataiti. Te akaari maira teia akaraanga, eaa te ka tupu me akamoupuku tatou i te au kino.

E ARU I TO IESU AKARAANGA ME TAKINOKINOIA

9. Eaa te au tu takinokinoanga ta Iesu i akakoromaki? (Akara katoa i te tutu.)

⁹ Kua oronga mai a Iesu i te akaraanga manea akapeea me akakoromaki me takinokinoia.  Kua takinokinoia aia e te tangata katoatoa e pera tona ngutuare tangata. Kua kapiki tona ngutuare tangata iaia ei auouo, karanga te au arataki akonoanga e no te demoni tona mana, aviriia aia e te au vaeau Roma, kua takinokinoia, pāpāia e kua tamateia. (Mare. 3:​21, 22; 14:55; 15:​16-20, 35-37) Noatu te reira, kua akakoromaki a Iesu i te au takinokino tei tupu kiaia e kare i akakino atu ia ratou. Eaa ta tatou ka apii mai mei tona akaraanga?

10. Akapeea a Iesu te akakoromaki anga i te au takinokino? (1 Petero 2:​21-23)

¹⁰ E tatau ia 1 Petero 2:​21-23. a Kua oronga a Iesu i te akaraanga, akapeea tatou me akono i te aronga tei takinokino mai ia tatou. Kua kite aia i te tuatau kia muteki e te tuatau kia tuatua. (Mata. 26:​62-64) Kua iki aia kia muteki ua noatu ka akaapa te aronga kino iaia. (Mata. 11:19) Inara me tuatua aia, kare aia i akakino atu ia ratou. Kua akakoromaki ua a Iesu i tona turanga e ‘kua tuku iaia uaorai [kia Iehova] nona te manako tika.’ Kua kite a Iesu e te akara maira a Iehova iaia e takinokinoia ra. Kua irinaki aia e na Iehova e akatikatika i te au manamanata i te tuatau tau.

11. Eaa tetai au ravenga kia matakite tatou? (Akara katoa i te au tutu.)

¹¹ Me akakino tetai tangata ia tatou, ka aru tatou i te akaraanga o Iesu e kia matakite i ta tatou ka tuatua. Tetai taime kare tatou e anoanoia kia tuatua me akakinoia tatou. Me kore ka muteki ua tatou me akatupu ratou i te  manamanata. (Kohe. 3:7; Iako. 1:​19, 20) E tetai taime, ka anoanoia tatou kia paruru i tetai tei takinokinoia me kore kia akakite i te tika no runga i to tatou irinakianga. (Anga. 6:​1, 2) Me ka tuatua tatou, e rave i te reira ma te marū e te ngateitei.—1 Pete. 3:15. b

12. Akapeea tatou me akaruke i te au mea kia Iehova “nona te manako tika”?

¹² Ka aru katoa tatou ia Iesu na te akaruke anga i te au mea kia Iehova, “nona te manako tika.” Me akakinoia mai tatou, e irinaki kua kite a Iehova i te tika. Ka akakoromaki tatou i te reira no te mea na Iehova e akatikatika i te au tarevake. Me akaruke tatou i te reira kiaia kare tatou e akamoupuku i tetai ke. Ka akakeu te riri ia tatou kia rave i te kino, kare tatou e mataora e ka takinoia to tatou pirianga kia Iehova.—Sala. 37:8.

13. Eaa te ka tauturu ia tatou kia akakoromaki me takinokinoia?

¹³ E tika, kare e rauka ia tatou i te aru i to Iesu akaraanga meitaki. I tetai taime, ka rave e ka tuatua tatou i tetai apinga e ka tataraara tatou i muri ake. (Iako. 3:2) E tetai au takinokino anga ka mamae e ka taitaia tikai tatou no tetai tuatau roa. Me ko tera tei tupu kia koe, e akakoromaki, te kite maira a Iehova i toou turanga. Kua kite katoa a Iesu no te mea kua takinokinoia ana aia. (Ebe. 4:​15, 16) Kapiti mai ki to Iesu akaraanga, kua oronga mai a Iehova i te au kaveinga Pipiria ei tauturu ia tatou kia akakoromaki. Ka uriuri tatou e rua irava mei te puka o Roma te ka tauturu ia tatou.

E AKARUKE “I TE RIRI”

14. Eaa te aiteanga kia akaruke “i te riri”? (Roma 12:19)

¹⁴ E tatau ia Roma 12:19. Te akoanga a Paulo i te au Kerititiano kia akaruke “i te riri,” noai te riri tana e tuatua ra? Kia akaruke i te riri kia Iehova. Ka tapapa atu tatou e na Iehova e akatikatika i te au manamanata i tona tuatau tau. Karanga a John, tei takinoia: “Kua anoanoia au kia akakoromaki e auraka e tutaki i te kino. Kua tauturu a Roma 12:19 iaku kia tiaki marie ia Iehova.”

15. Eaa i meitaki ei kia tiaki e na Iehova e akatikatika i te manamanata?

¹⁵ Ka puapingaia tatou me tiaki e na Iehova e akatikatika i te manamanata. Me rave tatou i te reira, ka kore te taitaia. Ka tauturu a Iehova ia tatou. Karanga aia, ‘E akaruke i te kino kiaku e naku e akatika i te reira.’ Me irinaki tatou i ta Iehova tuatua e tei “iaku te akaoko,” kare tatou e taitaia no te mea ka rave aia i te tika. Ko tera ta John i rave, karanga aia, “Ka akaruke au e na Iehova e akatikatika i toku manamanata.”

‘KIA MATE RA TE KINO I TE MEITAKI’

16-17. ‘Kia mate te kino ia ratou i te meitaki,’ akapeea te pure me tauturu ia tatou? (Roma 12:21)

¹⁶ E tatau ia Roma 12:21. Kua akamaroiroi a Paulo i te au Kerititiano, ‘kia mate te kino ia ratou i te meitaki.’ I roto i ta Iesu ako i runga i te Maunga, karanga aia: “E aroa atu i to kotou aronga enemi, . . . e pure oki no te aronga e akakino mai e tei takinga-kino mai ia kotou.” (Mata. 5:44) Kua rave aia i te reira. Akamanako ana e kua akakoromaki a Iesu i tona patitiia anga ki runga i te rakau e te  au vaeau Roma. Kua takinokinoia e kua akakoromaki aia i te mamae, inara kare tatou i kite i te pakari o te reira takinokinoanga.

¹⁷ Kua tiratiratu a Iesu kia Iehova noatu te pakari o te takinokinoanga. Kare aia i taumaa atu i te au vaeau mari ra kua pure e kua karanga aia: “E taku Metua, e akakore mai koe i ta ratou ara, kare oki ratou i kite i ta ratou i rave.” (Luka 23:34) Me pure tatou kia Iehova no te aronga tei takinokinoia tatou, ka marū to tatou ngakau, kare e riri ia ratou, e pera ka taui to tatou manako no ratou.

18. Akapeea te pure te tauturu anga ia Alberto e John kia akakoromaki?

¹⁸ Kua tauturu te pure i te nga taeake tei taikuia i roto i teia atikara, kia akakoromaki i te takinokinoanga. Karanga a Alberto: “Kua pure au no te au taeake tei takinokino mai iaku. Kua pati akatenga au kia Iehova kia akakore au i te riri.” Ma te mataora, te tavini tiratiratu nei a Alberto ia Iehova. Karanga a John: “E maata te au taime ka pure au no te taeake tei akakino mai iaku. Kua tauturu te reira pure iaku kia akakore i tana ara e auraka e akava atu iaia. E kua marū katoa au no te reira.”

19. Eaa ta tatou ka rave e tae ua atu ki te openga o teianei ao? (1 Petero 3:​8, 9)

¹⁹ Ka tupu rai te takinokino anga kia tatou i mua ake ka ope ei teia ao kino. Noatu ka akakoromaki tatou, ka pure ua rai tatou kia Iehova no tana tauturu. Pera katoa, ka aru tatou i te akaraanga o Iesu i tona takinokinoia anga e te taangaanga i te au kaveinga Pipiria. Me pera tatou, e mea papu e ka akameitaki mai a Iehova ia tatou.—E tatau ia 1 Petero 3:​8, 9.