1. Eaa to Paulo manako no te au tavini tauturu?

 E RAVE ana te au tavini tauturu i te au angaanga puapinga i roto i te putuputuanga. Kua akaperepere maata te apotetoro ko Paulo i teia au taeake tiratiratu. I tona tataanga ki te au taeake i Philipi, kua aroa atura aia i te au tavini tauturu e te aronga pakari i reira.—Phili. 1:1.

2. Eaa to Luis manako no tana angaanga ei tavini tauturu?

² Me e mapu me e pakarikari koe, ka mataora te au taeake papetito i te tavini tauturu. Ei akaraanga, e 18 mataiti o Devan tona riro anga mai ei tavini tauturu. Kareka ra te taeake ko Luis e 50 tuma ona mataiti i ikiia ai aia. Kua akakite aia, “e akameitakianga naku i te rave i te angaanga ei tavini tauturu, me akamanako au i te aroa o te au taeake i roto i te putuputuanga!”

3. Eaa te au uianga ka uriuri tatou?

³ Me e taeake papetito koe, e kare i riro ake ei tavini tauturu, ka rauka ainei ia koe i te aruaru i teia akakoroanga? Eaa te akakeu ra ia koe kia rave i teia angaanga? E eaa te au kaveinga Irava ka anoanoia koe kia akono? I teia atikara, ka kite mai tatou i te au pauanga. Inara te mea mua, ka uriuri tatou i te au angaanga a te tavini tauturu.

 EAA TE AU ANGAANGA A TE TAVINI TAUTURU?

4. Eaa te au angaanga a te tavini tauturu? (Akara katoa i te tutu.)

⁴ E taeake papetitoia tetai tavini tauturu e na roto i te vaerua tapu o Iehova, ka tauturu ratou i te aronga pakari, kia akono i te putuputuanga. Ka akapapu te au tavini tauturu e kia rava te ngai tutu aere e te au puka no te angaanga tutu aere. Ka tauturu tetai pae i te tamā e te akono i te Are Uipaanga. Ka tavini katoa ratou ei aronga raverave, e ka akono katoa i te au apinga akatangi e te vitio i te au uipaanga. E au angaanga puapinga ta te au tavini tauturu e rave ana. E inangaro to ratou i te Atua na mua, tei akaperepere ia Iehova e te akono i tana au kaveinga tuatua tika. E inangaro maata to ratou i te au taeake e te au tuaine. (Mata. 22:​37-39) Akapeea tetai taeake papetito me akamaata atu i tana ka rave kia riro ei tavini tauturu?

5. Eaa te aiteanga kia riro mai ei tavini tauturu?

⁵ Te akataka maira te Pipiria i te au apainga ka akono tetai kia riro mai ei tavini tauturu. (1 Timo. 3:​8-10, 12, 13) Ka rauka te reira, na te apii meitaki anga i teia au kaveinga e te taangaanga i roto i to ratou oraanga. Inara ko te mea mua, ka akamanako koe i toou akakoroanga kia riro ei tavini tauturu.

EAA TEI AKAKEU IA KOE KIA RIRO EI TAVINI TAUTURU?

6. Eaa te ka akakeu ia koe kia tavini i te au taeake e te au tuaine? (Mataio 20:28; akara katoa i te tutu.)

⁶ Akamanako ana i to tatou akaraanga meitaki, ko Iesu. Kua akakeu tona inangaro i tona Metua e te tangata iaia kia rave i tana au angaanga. Kua akakeu te aroa iaia kia angaanga maroiroi ma te akaaka. (E tatau ia Mataio 20:28; Ioa. 13:​5, 14, 15) Me akakeuia koe e te aroa, ka akameitaki a Iehova ia koe e ka tauturu ia koe kia riro ei tavini tauturu.—1 Kori. 16:14; 1 Pete. 5:5.

7. Eaa tetai taeake ka kopae ei i te tu noinoi?

⁷ E mareka ana te tangata i teianei ao i te aronga tei akapuapinga ia ratou.  Kare i aite ki ta Iehova akaaerenga. Kua akakeuia tetai taeake e te aroa mei ia Iesu rai, kare aia e akateitei iaia kia manakoia e tangata puapinga aia. Me ikiia te reira tangata i roto i te putuputuanga, penei ka patoi aia i te rave i te au angaanga rikiriki no te akono i te au mamoe a Iehova. Penei ka manako aia e e angaanga puapinga kore te reira. (Ioa. 10:12) Kare a Iehova e akameitaki i tetai tangata ngakau parau e te noinoi.—1 Kori. 10:​24, 33; 13:​4, 5.

8. Eaa ta Iesu akoanga ki tana au apotetoro?

⁸ I tetai atianga, kua tauta te nga taeake o Iesu kia akameitakiia raua inara e tarevake to raua akakoroanga. Akamanako ana i tei tupu ki ta Iesu apotetoro ko Iakobo e Ioane. Kua pati raua kia Iesu e kia orongaia te taoonga maata i roto i tona Kavamani kia raua. Kare a Iesu i akameitaki ana i ta raua i pati. Mari ra, kua akamārama aia ki tana 12 apotetoro: “Ko te anoano i te akamaata i o kotou na, kia riro ïa ei tavini no kotou; E ko te inangaro kia maata aia i o kotou ra, ei tavini akaaka aia no kotou ravarai.” (Mare. 10:​35-37, 43, 44) Ko te au taeake e akakoroanga meitaki to ratou kia tavini i tetai ke, e akameitakianga ratou i roto i te putuputuanga.—1 Tesa. 2:8.

EAA TE KA AKAMAROIROI IA KOE KIA RIRO EI TAVINI TAUTURU?

9. Akapeea koe me akatupu i toou inangaro kia riro ei tavini tauturu?

⁹ E tika, kua inangaro koe ia Iehova e te tavini i tetai ke. Inara, kare i tupu ake toou inangaro kia riro ei tavini tauturu. Akapeea koe me akatupu i te reira e kia tavini i tetai ke? E rekareka ana koe i te tavini i toou au taeake e te au tuaine? Karanga a Iesu: “E mea meitaki i te oronga atu i te rave mai.” (Anga. 20:35) Kua akono aia i teia au tuatua. Mataora tikai aia i te tavini i tetai ke, e ka rauka rai ia koe.

10. Akapeea a Iesu te akaari anga i tona mataora i te tavini i tetai ke? (Mareko 6:​31-34)

¹⁰ Akamanako ana i to Iesu mataora i te tavini i tetai ke. (E tatau ia Mareko 6:​31-34.) I tetai atianga, kua roiroi a Iesu e tana au apotetoro. Te aere ra ratou ka akangaroi ki tetai ngai motutaa. Inara kua oro atu te urupu tangata na mua ake ia ratou, ma te tapapa atu ia Iesu kia apii ia ratou. Ka rauka ua iaia i te patoi i te reira. No te mea “kare o ratou tuatau kia kai i te kai.” Me kore ka rauka ia Iesu i te akaruke i te tangata i muri mai i te apiianga ia ratou. Inara, no tona inangaro ia ratou, kua “apii atura aia i te au tuatua e manganui.” Kua apii ua atu rai aia e “parepare akera te rā.” (Mare. 6:35) No tona “tangi” ia ratou, kua rave aia i te reira. Kua inangaro aia i te apii e te tavini ia ratou e kua mataora tikai a Iesu.

11. Eaa ta Iesu i rave no te aronga tei akarongo kiaia? (Akara katoa i te tutu.)

¹¹ Te apii anga Iesu i te tangata, e maata atu tana i rave ei tauturu ia ratou. Kua akono aia ia ratou i te pae kopapa. Na roto i tetai semeio, kua oronga aia i te kai e kua akaue atu i tana au pipi kia tu’a i te reira. (Mare. 6:41) Na roto i teia ravenga, kua apii aia ia ratou akapeea me tavini i tetai ke. Kua akaari katoa aia i te puapinga kia riro ei tavini tauturu. E akamanako ana i te rekareka  o te au apotetoro ia ratou e rave kapiti ra i te angaanga ma Iesu katoa, kua tu’a i te au kai e kua “pangia rava akera” ratou! (Mare. 6:42) Ko teia tetai akaraanga ta Iesu i rave ki tetai ke. Kua akapou aia i tona oraanga katoa i te tavini i te au tangata. (Mata. 4:23; 8:16) Kua rekareka a Iesu i te apii i te tangata e te oronga atu i ta ratou e anoano ra. Ka mataora rai koe me tauta kia riro ei tavini tauturu.

12. Eaa tatou ka kore ei e manako e kare a tatou angaanga ka rauka i te rave?

¹² Me manako koe e kare oou meitaki no te tauturu, auraka e taitaia. Penei e au tu rai toou ka taangaanga koe ei tauturu i tetai i roto i te putuputuanga. Penei ka puapingaia koe me tatau meitaki i ta Paulo akamaroiroi anga i roto ia 1 Korinetia 12:​12-30. Mei ta Paulo au tuatua, e tuanga puapinga taau e pera tetai au tavini ke o Iehova i roto i te putuputuanga. Me kare i rauka ake ia koe te au turanga ei tavini tauturu, auraka e taitaia. E aruaru kia rauka ia koe i te tavini maata ia Iehova e toou au taeake. E akamaroiroi, te akara maira te aronga pakari i taau angaanga e rave ra.—Roma 12:​4-8.

13. Eaa te au tu tau ta te aronga e aruaru ra kia riro ei tavini tauturu?

¹³ Akamanako akaou i tetai tumu kia riro koe ei tavini tauturu: Kua tau rai teia au tu ki te au Kerititiano katoatoa. Ka akavaitata atu te au Kerititiano kia Iehova, ka mataora i te oronga ki tetai ke, e ka akamareka i te Atua. Eaa tikai ta tetai taeake ka aruaru i te akono?

AKAPEEA KOE ME RIRO EI TAVINI TAUTURU

14. Eaa te aiteanga kia “mamaru katoa”? (1 Timoteo 3:​8-10, 12)

¹⁴ Akamanako ana tatou i te au tu kia riro koe ei tavini tauturu i roto ia 1 Timoteo 3:​8-10, 12. (E tatau.) Ka riro tetai tavini tauturu ei tangata “mamaru katoa.” Ko tetai urianga kia “akangateiteiia.” Kare te aiteanga e kare aia i te tangata mataora e te katakata. (Kohe. 3:​1, 4) Mari ra, ka tauta pakari aia kia oti tana angaanga. Me rave koe i te reira, ka irinakiia e ka akangateiteiia koe e te putuputuanga.

15. Eaa te aiteanga “eiaa e vaa-rua” e te “morimori apinga”?

 ¹⁵ “Eiaa e vaa-rua,” ko te aiteanga e tangata ngakau tika aia e ka irinakiia. Ka tuatua aia i te tika e kare e akavare i tetai ke. (Mase. 3:32) “Eiaa ei morimori apinga,” ko tona aiteanga ka rave aia i te au mea tika i roto i te angaanga pitiniti e te moni. Kare aia e noinoi e kare e akavare i tona au taeake i roto i te putuputuanga.

16. (a) Eaa te aiteanga “eiaa e inu ua i te wina”? (e) Eaa te aiteanga e kia mā te “akava-ngakau”?

¹⁶ “Eiaa e inu ua i te wina,” ko te aiteanga kare koe e inu maata i te kava e kia kiteia ei tangata inu i te kava. Me mā toou “akava-ngakau,” ka akono koe i ta Iehova au kaveinga. Noatu kare koe i te tangata tiama, e pirianga meitaki toou kia Iehova e ka akatupu i te ’au.

17. Akapeea tetai taeake me irinakiia, noatu ka “timata marie” ia aia? (1 Timoteo 3:10; akara katoa i te tutu.)

¹⁷ Kia “timata marie,” ko te aiteanga kia akaari e kua irinakiia koe me rave i te au angaanga. Me oronga te aronga pakari i tetai angaanga kia koe, e aru meitaki i te aratakianga a te akaaerenga. E akapapu e kua mārama koe eaa te ō maira ki taau ka rave e te akaoti i te reira. Ia koe e rave ra i te reira, ka akameitakiia koe e te putuputuanga. No reira e te aronga pakari, e tereni i te au taeake tei papetitoia. (E tatau ia 1 Timoteo 3:10.) E taeake papetito ainei koe, e mapu me kare e tamaiti? Te rave ra ainei koe i taau apii naau uaorai? Te paupau putuputu ra ainei koe e te tutu aere? Me koia ia, e oronga i te au angaanga tei tau ki to ratou mataiti e to ratou turanga. Na teia mataara, te “timata marie” ia ra teia au taeake ou. Me mapu mai ratou, ka riro i reira ratou ei tavini tauturu.

18. Eaa te aiteanga, “kare e tapepeanga”?

¹⁸ “Kare e tapepeanga,” ko te aiteanga kare koe i rave ake i te au ara kino. E tika, ka akaapa pikikaaia tetai Kerititiano. Kua akaapaia a Iesu e kua totou aia e ka tupu rai te reira ki tana au pipi. (Ioa. 15:20) Inara, me akono koe i te tu mā mei ia Iesu rai, ka akameitakiia te putuputuanga.—Mata. 11:19.

19. Eaa te ō maira “ei tangata vaine okotai anake”?

 ¹⁹ “Ei tangata vaine okotai anake.” Me kua akaipoipo tetai taeake, ka akono aia i ta Iehova kaveinga no te oraanga akaipoipo e okotai tane e okotai vaine. (Mata. 19:​3-9) Auraka tetai tangata Kerititiano e rave i te peu ainga viivii. (Ebe. 13:4) Inara e maata atu te ō maira. Kia tiratiratu ua rai aia ki tana vaine, auraka e akameamea atu i tetai vaine ke.—Iobu 31:1.

20. Akapeea tetai upoko me akono meitaki i tona ngutuare ma te “meitaki”?

²⁰ “Te arataki meitaki anga oki i ta ratou tamariki e to ratou uaorai ngutuare.” Me e upoko ngutuare koe, e akono meitaki koe i taau apainga. E rave putuputu i te akamorianga a te ngutuare. E tutu aere kapiti ma toou ngutuare tangata. E tauturu i taau tamariki kia piri vaitata kia Iehova. (Ephe. 6:4) Ko tetai tangata tei akono meitaki i tona ngutuare, ka akono meitaki rai aia i te putuputuanga.—Akaaite kia 1 Timoteo 3:5.

21. Me kare koe i riro ake ei tavini tauturu, eaa taau ka rave?

²¹ E te au taeake, me kare koe i riro ake ei tavini tauturu e akamanako meitaki i teia atikara. E apii i te au mea tei anoanoia kia riro ei tavini tauturu e te akono i te reira. Akamanako i toou inangaro ia Iehova e toou au taeake e te au tuaine. E akaketaketa i te reira kia tavini ia ratou. (1 Pete. 4:​8, 10) E rekareka mei te tavini anga i toou ngutuare i te pae vaerua. Ka akameitaki ua rai a Iehova ia koe no te mea, kua aruaru koe kia riro ei tavini tauturu!—Phili. 2:13.