1-2. Eaa te angaanga “meitaki” ta tetai tangata pakari ka rave?

 ME KUA tavini ana koe no tetai tuatau ei tavini tauturu, penei kua angaanga pakari koe e te aruaru ra kia riro mai ei tangata pakari. Ka rauka ainei ia koe i te rave i tetai au “angaanga meitaki”?—1 Timo. 3:1.

² Eaa te angaanga ta tetai tangata pakari ka rave? Ka arataki aia i te angaanga tutu aere, atoro i tetai taeake no te akamaroiroi atu, apii mei te Pipiria e te akamaroiroi i te putuputuanga na roto i tana tuatua e tona akaraanga meitaki. Ka mārama i reira tatou i te tumu i kapiki ei te Pipiria i te aronga pakari e ko te au tangata “meitaki.”—Ephe. 4:8.

3. Akapeea koe e riro mai ei ei tangata pakari? (1 Timoteo 3:​1-7; Tito 1:​5-9)

³ Akapeea koe e riro mai ei ei tangata pakari? Kare e aiteite ana te karape o tetai tangata pakari ki tetai tangata angaanga moni. E rauka ai tetai ngai angaanga naau, ka anoanoia te au tu karape e te kite. E tuke rai kia tavini ei tangata pakari. Ka anoano maataia te au tu karape no te angaanga tutu aere e te apii Pipiria. Ka anoano katoaia aia kia akaari i teia au tu meitaki i roto ia 1 Timoteo 3:​1-7 e Tito 1:​5-9. (E tatau.) Ka uriuri teia atikara eaa ta te aronga pakari ka rave na roto i teia au ravenga e toru: 1) Kia rauka tetai turanga meitaki, 2) akanoo i tetai akaraanga meitaki ei upoko no te ngutuare tangata e te 3) tavini maroiroi i te putuputuanga.

 KIA RAUKA TETAI TURANGA MEITAKI

4. Eaa te aiteanga e kia riro mai tetai “ei tangata apa kore”?

⁴ E riro mai ei ei tangata pakari, ka anoanoia koe “ei tangata apa kore,” tera te aiteanga, kia akaari koe i te au tu meitaki i roto i te putuputuanga. E pera katoa ‘ei rongo meitaki tona ki te aronga i vao.’ E tika, ka akaapa te aronga kare e tavini ana ia Iehova i to tatou irinakianga, inara kare ratou e ekoko i toou tu akaaka e te meitaki. (Dani. 6:​4, 5) E ui kia koe, ‘E turanga meitaki ainei toku i roto me kore i vao ake i te putuputuanga?’

5. Akapeea koe me akaari e e inangaro toou kia riro mai ei “tangata meitaki”?

⁵ Me ka inangaro aia kia riro mai ei “tangata meitaki,” ka akara aia i te meitaki o tetai ke e te akameitaki ia ratou no to ratou au tu manea. Ka mataora katoa koe i te rave i te meitaki ki tetai ke, noatu e maata atu tei anoanoia. (1 Tesa. 2:8.) Eaa teia tu i puapinga ai no te aronga pakari? No te mea ka akapou maata ratou i to ratou taime no te atoro i te putuputuanga e te akono i ta ratou au apainga. (1 Pete. 5:​1-3) Noatu ra, e maata atu te rekareka i te tavini maata atu i tetai ke.—Anga. 20:35.

6. Eaa tetai au ravenga ka akaari koe i te tu “oronga” ua? (Ebera 13:​2, 16; akara katoa i te tutu.)

⁶ Ka akaari koe e e tangata “oronga” ua koe, me rave i te au mea meitaki ki tetai ke e pera ki te aronga kare i te oa piri mou. (1 Pete. 4:9) Karanga tetai tangata tata tuatua no te tangata oronga ua: “Ka akatuera aia i tona ngutupa ki te katoatoa noatu e aronga ke ratou.” E ui kia koe, ‘Ka akaari ainei au i te tu takinga meitaki ki te au taeake e atoro maira i taku putuputuanga?’ (E tatau ia Ebera 13:​2, 16.) Ka oronga ua tetai taeake i tana ka rauka me atoro mai te au taeake, kapiti mai te aronga putaua, te aronga e angaanga pakari nei, te au akaaere kotinga e te au taeake ka rave i te akoanga.—Gene. 18:​2-8; Mase. 3:27; Luka 14:​13, 14; Anga. 16:15; Roma 12:13.

7. Akapeea tetai tangata pakari me akaari e kare aia e “noinoi moni” ana?

 ⁷ “Eiaa ei noinoi moni.” Te aiteanga o teia, auraka e akamou ki runga i te au apinganui. Noatu e maata taau moni me kore e putaua, ko te tavini ia Iehova te mea puapinga atu i roto i toou oraanga. (Mata. 6:33) Ka akapou koe i toou taime, toou maroiroi, tetai au apinga no te akamori ia Iehova, te akono i toou ngutuare tangata e te tavini i te putuputuanga. (Mata. 6:24; 1 Ioa. 2:​15-17) E ui kia koe uaorai: ‘Eaa toku manako no runga i te moni? Ka mareka ainei au i taku apinga i teianei? Me kore te inangaro ra ainei au kia maata taku moni e te apinga materia?’—1 Timo. 6:​6, 17-19.

8. Eaa tetai au ravenga ka akaari koe i te tu “maroiroi” e te marū?

⁸ Me e tangata “maroiroi” koe e te marū, te akono meitaki ra koe i te au mea i roto i toou oraanga. Ei akaraanga, kare koe e kaikai maata e te inu maata i te kava, kia tau ua toou tu akamanea anga e te iki meitaki i te tamataora anga tau. Kare koe e aru i te au peu o teianei ao. (Luka 21:34; Iako. 4:4) Ka noo marū ua koe me akakino mai tetai ia koe. Kare koe i te “tangata inu ua i te wina”; kare katoa koe i te tangata inu maata i te kava. E ui kia koe uaorai, ‘Te akaari ra ainei au e e tangata maroiroi ua au e te marū?’

9. Akapeea koe me riro mai ei tangata “akono meitaki” e te “noo marie”?

⁹ Ei tangata “akono meitaki,” ka akara meitaki koe i te au kaveinga Pipiria no toou au turanga. Ka akamanako meitaki koe i teia au kaveinga, e ka akamārama i taau au ikianga meitaki. Kare koe e rave ua i tetai apinga, mari ra, ka akapapu koe na mua e kua rauka te au mea pouroa taau i inangaro. (Mase. 18:13) Te ka tupu, te iki meitaki ra koe i te au mea tei tau kia Iehova. Me e tangata “noo marie” ua koe, e tangata akaaere meitaki koe e te irinakiia. Ka kiteia koe ei tangata irinakiia e te aru katoa i te au aratakianga. Ka tauturu teia au tu meitaki ia koe kia riro ei tangata meitaki. Teianei, ka uriuri tatou i te au tu ta te Pipiria e karanga ra no tetai tangata pakari, kia riro aia ei akaraanga meitaki ei upoko no te ngutuare tangata.

AKANOO I TE AKARAANGA MEITAKI EI UPOKO NO TE NGUTUARE TANGATA

10. Akapeea tetai tangata e riro ei “ei arataki meitaki i tona uaorai ngutuare”?

¹⁰ Me e tane akaipoipo koe e ka inangaro koe kia tavini ei tangata pakari, ka akaari koe i te au akaraanga meitaki ki toou ngutuare tangata. Ka anoanoia koe kia riro “ei arataki meitaki i [toou] uaorai ngutuare.” No reira, ka akaari koe i te aroa e te akono meitaki i taau apainga ei upoko ngutuare. Ka arataki koe i te akamorianga ngutuare, kia tae te ngutuare tangata ki te au uipaanga e te tauturu ia ratou kia rave i te angaanga tutu aere. Eaa teia i puapinga ai? Karanga a Paulo: “Ko te tangata oki kare i kite i te arataki i tona uaorai ngutuare, eaa e tika’i iaia kia tiaki i te ekalesia a te Atua?”—1 Timo. 3:5.

11-12. Eaa te au turanga o te tamariki ta te taeake ka rave me inangaro aia kia riro ei tangata pakari? (Akara katoa i te tutu.)

¹¹ Me e metua tane koe, ka anoanoia taau tamariki kia “kauraro marie” atu kia koe. Ka apii e ka tereni koe ia ratou na roto i te tu aroa. E tika, e reka ana ratou i te kanga e te katakata. Inara, ka apii koe ia ratou kia akarongo kia koe, kia  akangateitei i tetai ke e kia noo marū ua. Pera katoa ka tauturu koe i taau tamariki kia rauka tetai pirianga vaitata kia Iehova, kia aru i te au kaveinga Pipiria e kia aruaru atu kia papetitoia ratou.

¹² “Te tamariki akarongo, kare i tapepeia i te kaimoumou, e te akongata.” Me rave tetai tamaiti i te ara kino i roto i te ngutuare, eaa te ka tupu ki te metua tane? Me kare te metua tane e tereni e te ako atu iaia, kare i reira aia e tau ei tangata pakari.—Akara i Te Punanga Tiaki kapi 21, para. 6-7 o Okotopa 15, 1996.

TAVINI MAROIROI I TE PUTUPUTUANGA

13. Akapeea koe me riro “ei tangata maru,” e “auraka ei tangata māro”?

¹³ Ko te au taeake e au tu meitaki to ratou, ka tauturu ratou i te putuputuanga. Ka riro mai aia “ei tangata maru.” Pera katoa, ka akarongo te tangata marū i tetai ke e kia mārama i to ratou manako. I te uipaanga, me āriki te maata anga o te aronga pakari i te ikianga tei rotai ki te au kaveinga Pipiria, ka turuturu ainei koe i te reira? “Auraka ei tangata māro,” te aiteanga eiaa e māro atu i te rave i te au mea taau e inangaro ra. E mea puapinga kia akarongo i te au manako o tetai ke. (Gene. 13:​8, 9; Mase. 15:22) “Eiaa ei tangata tauetono” me kore ei tangata “riri ua.” Mari ra, e akaari i te tu marū e te papu. Ei tangata akatupu i te ’au, ka aruaru koe i te akatupu i te ’au ki tetai ke, noatu te ngatā. (Iako. 3:​17, 18) Ka tamarū taau au tuatua i te tu o tetai ke e pera te aronga e patoi maira.—Aka. 8:​1-3; Mase. 20:3; 25:15; Mata. 5:​23, 24.

14. Eaa te aiteanga e “auraka . . . ei tangata akarongo ou ua” koe e te “tiratiratu”?

¹⁴ Ko tetai taeake te aruaru ra kia riro mai ei tangata pakari, “auraka [aia] ei tangata akarongo ou ua.” Noatu kare koe i roa i te papetitoanga, ka anoanoia tetai tuatau noou kia tukatau ei Kerititiano. I mua ake ka ikiia ai koe ei tangata pakari, e aru i te au tu o Iesu, kia  akaaka e kia tiaki marie ia Iehova no tetai au angaanga. (Mata. 20:23; Phili. 2:​5-8) No reira, kia papu e tangata “tiratiratu” koe, ka noo tamou ua koe kia Iehova e tana au turanga tuatua tika e te aru i tana aratakianga na roto i tana akaaerenga.—1 Timo. 4:15.

15. Ka anoanoia ainei tetai tangata pakari kia riro ei vaa tuatua tukatau? Akamārama mai.

¹⁵ Te akakite maira te au Irava no te au akaaere kia “tau [ratou] kia apii.” Te aiteanga ainei e ka anoanoia ratou kia riro ei vaa tuatua meitaki atu? Kare. Kare te maata anga o te aronga pakari i te vaa tuatua tukatau. Inara, me tutu aere e me rave ratou i te au atoroanga akamaroiroi, ka taangaanga ratou i te Pipiria no te apii e te akamaroiroi i te au taeake e te au tuaine. (1 Timoteo 3:2; akaaite kia 1 Korinetia 12:​28, 29 e Ephesia 4:11.) Noatu kare koe i te vaa tuatua tukatau, ka angaanga pakari koe kia meitaki mai koe. Akapeea koe e riro mai ei ei puapii meitaki?

16. Akapeea koe e riro mai ei ei puapii meitaki? (Akara katoa i te tutu.)

¹⁶ “E te tāpu piri tikai i te tuatua-mou.” Kia riro mai ei puapii meitaki, e akapapu e ko taau e apii ra e te ako ki te au taeake e te au tuaine, kua rotai te reira ki te Pipiria. E rave ei i te reira, e apii i te Pipiria e pera te au puka apii. (Mase. 15:28; 16:23) Ia koe e apii ra, e akamanako i te au akamārama anga ou o te au irava Pipiria. E me apii, e aruaru i te akakeu i te ngakau o te tangata. Ka meitaki atu koe me pati e te akarongo i te tauturu a te aronga pakari tei tukatau. (1 Timo. 5:17) Ka anoanoia te aronga pakari ‘kia apii’ e kia akamaroiroi i te au taeake e te au tuaine; inara kia ako katoa atu e kia “akakite atu i te ara” a tetai ke. I te reira au turanga, kia akaari te aronga pakari i te tu takinga meitaki. Te marū e te aroa e te akatumu i taau apiianga mei roto i te Pipiria ka puapingaia koe, no te mea te aru ra koe i te Puapii Maata, ko Iesu.—Mata. 11:​28-30; 2 Timo. 2:24.

 E ARUARU UA ATU RAI

17. (a) Eaa te ka anoanoia no te au tavini tauturu kia aruaru ua atu rai? (e) Eaa ta te aronga pakari ka akamaara me inangaro tetai taeake kia riro ei tangata pakari? (Akara i te pia “ Kia Tau me Akara i te Turanga o Tetai Taeake.”)

¹⁷ Ka manako tetai au tavini tauturu e kare ratou e riro mai ei tangata pakari, no te mea e maata roa te au tu ka anoanoia ratou kia akaari. Inara e akamaara kare a Iehova e te akaaerenga e umuumu maira kia aru meitaki koe i teia au tu. (1 Pete. 2:21) E na te vaerua tapu o Iehova e tauturu ia koe kia akaari i teia au tu manea. (Phili. 2:13) Ka inangaro ainei koe kia meitaki atu koe i te akaari i tetai tu? E pure kia Iehova no te tauturu. E rave i tetai kimikimianga e te ui ki tetai tangata pakari no te tauturu akapeea me rave i te reira.

18. Eaa ta te au tavini tauturu e akamaroiroiia ra kia rave?

¹⁸ Kia aruaru ua rai tatou, kapiti mai te aronga pakari i te akaari i te au tu tei uriuriia i roto i teia atikara. (Phili. 3:16) E tavini tauturu ainei koe? E aruaru ua atu rai! Pati ia Iehova kia tereni ia koe kia meitaki atu i te tavini iaia e te putuputuanga. (Isa. 64:8) Ka akameitaki ua rai a Iehova i taau tauta anga kia riro ei tangata pakari.