ATIKARA APII 43
IMENE 90 Akamaroiroi i Tetai e Tetai
Akapeea me Akakore i te Manako Taitaia
“E akara matariki marie i te au mea katoa ra.” —1 TESA. 5:21.
AKAKOROANGA
Ta tatou ka rave kia akakore i te au manako ekoko te ka tamanata i ta tatou tavini anga ia Iehova.
1-2. (a) Eaa te manako taitaia tei tupu ki te au tavini o Iehova? (e) Eaa ta tatou ka uriuri i roto i teia atikara?
E TUPU ana te manako taitaia ki te au tangata ravarai. Ei akaraanga, e akamanako i tetai taeake mapu tei ekoko i to Iehova inangaro iaia. Penei te emiemi ra aia i te papetito. Me kore e akamanako i tetai taeake tei iki i te tavini ia Iehova na mua i tona mapuanga e kua akaruke aia i tetai ngai angaanga e maata te moni. I teianei kare e rava ana tana moni no te akono i tona ngutuare no reira, kua akamata aia i te ekoko i tana ikianga. E akamanako katoa i tetai tuaine pakarikari kua apikepike tona kopapa e e iti ua tona maroiroi. Kua taitaia aia no te mea kare ona maroiroi i te rave i tana i mātau. Kua ui ainei koe i teia au uianga: ‘Te kite maira ainei a Iehova iaku? Kua pauna ainei te au atinga taku i rave no te tavini ia Iehova? E puapinga ainei toku kia Iehova?’
2 Me kare tatou e pau i teia au uianga, ka riro te reira ei takino i to tatou pirianga kia Iehova. I teia atikara, ka uriuri tatou akapeea te Pipiria me tauturu ia tatou kia akakore i te manako ekoko e (1) kare a Iehova e inangaro ia tatou, (2) kua ekoko tatou i ta tatou ikianga i rave, e te (3) kare o tatou puapinga kia Iehova.
AKAPEEA ME AKAKORE I TE AU MANAKO TAITAIA
3. Eaa tetai mataara no te akakore i te au manako taitaia?
3 Tetai mataara no te akakore i te manako taitaia, e kimi i te pauanga ki taau au uianga mei te Tuatua a te Atua. Me rave tatou i teia, ka akamaroiroiia to tatou akarongo e to tatou pirianga kia Iehova e ka “mou piri tikai [tatou i] te akarongo.”—1 Kori. 16:13.
4. Akapeea tatou me “akara matariki marie i te au mea katoa”? (1 Tesalonia 5:21)
4 E tatau ia 1 Tesalonia 5:21. Te akamaroiroi maira te Pipiria “e akara matariki marie i te au mea katoa.” Akapeea tatou me rave i teia? Me kare e papu ia tatou tetai irinakianga, ka akara matariki marie tatou i ta te Pipiria e akakite ra no te reira. Ei akaraanga, e akamanako i te taeake mapu tei ekoko e te inangaro maira te Atua iaia. Ka āriki ainei aia e e tika tikai tana i manako? Kare. Ka “akara matariki marie [aia] i te au mea katoa” i roto i te Pipiria kia kite i to Iehova manako no runga iaia.
5. Akapeea tatou e kite ei i to Iehova manako no ta tatou au uianga?
5 Me tatau tatou i te Pipiria, mei te mea rai e te tuatua maira a Iehova kia tatou. Inara kia kite i tona manako, e kimi i te pauanga ki ta tatou au uianga. Ka akamanako tatou i te au irava te ka pau i te reira. E ka rave tatou i te kimikimianga i roto i ta tatou au puka. (Mase. 2:3-6) Ka pure e ka pati tatou kia Iehova no tana tauturu kia kite tatou i tona au manako no runga i ta tatou au uianga. E oti ka kimi tatou i te au kaveinga Pipiria e te au akakiteanga te ka tauturu ia tatou. Ka puapinga katoaia tatou me akamanako i te aronga i roto i te Pipiria tei aite to ratou turanga ki to tatou.
6. Akapeea te au uipaanga me tauturu ia tatou kia akakore i te manako taitaia?
6 Ka akarongo katoa tatou i te reo o Iehova i ko i te au uipaanga. Me aere putuputu tatou ki te uipaanga, ka akarongo tatou i tetai akoanga me kore pauanga a te au taeake tei tauturu ia tatou kia akakore i te manako taitaia. (Mase. 27:17) I teianei ka uriuri tatou i te pauanga ki tetai au uianga.
ME EKOKO KOE E TE INANGARO RA A IEHOVA IA KOE
7. Eaa te uianga ta tetai pae ka ui?
7 Kua ui ainei koe, ‘Te kite maira ainei a Iehova iaku?’ Penei kua irinaki koe e kare oou puapinga, e kare koe e riro mai ei oa no te Atua Tei Anga i te au mea katoa. Kua manako akapera te Ariki ko Davida. Kua umere aia e te kite maira a Iehova i te tangata e kua ui aia: “E Iehova, eaa te tangata nei i kite mai ei koe iaia? te tamaiti a te tangata i akono ei koe iaia?” (Sala. 144:3) Ka kitea te pauanga kiea?
8. Ia 1 Samuela 16:6, 7, 10-12, eaa ta Iehova e kite ra i roto i te tangata?
8 Te apii maira te Pipiria e te kite ra a Iehova i te aronga akaaka. Ei akaraanga, kua tono a Iehova ia Samuela ki te ngutuare o Iese kia akatainu i tetai o tana tamariki tamaroa e varu ei ariki no Iseraela. Kua kapiki a Iese e itu o tana tamariki tamaroa kia aravei ia Samuela kare ra te openga ko Davida i reira. a Noatu ra, kua iki a Iehova ia Davida. (E tatau ia 1 Samuela 16:6, 7, 10-12.) Kua kite a Iehova i te tu tikai o Davida e tona akaperepere maata Iaia.
9. Eaa koe i papu ei e te inangaro maira a Iehova ia koe? (Akara katoa i te tutu.)
9 E akamanako akapeea a Iehova te akaari anga i tona inangaro ia koe. Ka oronga mai Aia i te akoanga meitaki tei tau kia koe. (Sala. 32:8) Te akapapu maira teia e kua kite meitaki Aia ia koe. (Sala. 139:1) Me taangaanga koe i ta Iehova akoanga ka papu ia koe e te inangaro maira a Iehova ia koe. (1 Para. 28:9; Anga. 17:26, 27) Te kite maira a Iehova i taau tautaanga e toou au tu meitaki, e ka inangaro aia i te tauturu ia koe. (Iere. 17:10) Ka inangaro katoa Aia ia koe kia āriki i tana patianga kia riro koe ei Oa nona.—1 Ioa. 4:19.
“Kimi koe [ia Iehova] ra, ka kitea atu aia e koe.” —1 Para. 28:9 (Akara i te parakarapa 9) b
ME EKOKO KOE I TAAU AU IKIANGA I RAVE I MUA ANA
10. Me akamanako tatou i te au ikianga ta tatou i rave i mua ana, eaa te au uianga ka ui tatou?
10 I tetai taime, ka ekoko tetai pae me kua rave ratou i te au ikianga tau i te tuatau i topa. Penei kua akaruke ratou i tetai ngai angaanga e maata te moni me kore i tetai pitiniti no te tavini maata atu ia Iehova. Teianei kua roa te tuatau i aereia. Penei ka akamanako ratou i tetai pae tei rave i te au ikianga tuke e i teianei e maata ta ratou moni e e oraanga meitaki to ratou. Tei tupu, penei ka ui ratou: ‘Kua pauna ainei te au atinga taku i rave no te tavini ia Iehova? Naringa au i iki i te angaanga moni, ka meitaki ainei toku oraanga i teianei?’
11. Eaa te manako taitaia o te tata o Salamo 73?
11 Me kua ui ana koe i teia au uianga, e akamanako i te tangata tei tata ia Salamo 73. Kua kite aia e e oraanga mataora e te apinganui to tetai ke e kare o ratou manamanata. (Sala. 73:3-5, 12) Te kite anga aia e kua manuia ratou, kua manako aia e puapinga kore tana tavinianga ia Iehova. Kua “tairoia ra [aia] e po ua atu te rā” no tona manako taitaia. (Sala. 73:13, 14) Eaa tana i rave no te akakore i tona manako taitaia?
12. Ia Salamo 73:16-18, eaa tei tauturu i te tata salamo?
12 E tatau ia Salamo 73:16-18. Kua aere te tata salamo ki te ngai tapu o Iehova. Iaia i reira, kua akamanako meitaki aia i te au mea katoa. Kua mārama aia e noatu e oraanga meitaki to tetai ke, kare o ratou manakonakoanga no te tuatau ki mua. Kua akapumaana teia iaia ma te kite e ko te tavinianga ia Iehova te ikianga meitaki tikai. No reira, kua tauta ua atu rai aia i te tavini ia Iehova.—Sala. 73:23-28.
13. Eaa taau ka rave me ekoko koe i tetai au ikianga taau i rave i mua ana? (Akara katoa i te tutu.)
13 Ka rauka te ngakau ’au ma te tauturu a te Pipiria. Akapeea ra? E akamanako i te puapinga o taau i rauka, kapiti mai i te au apinganui i te rangi. E akamaara, ko te aronga tei kore i tavini ia Iehova kare o ratou manakonakoanga. Penei ka rauka ia ratou tetai ngai angaanga meitaki e te oraanga meitaki inara, kare a ratou apinga ke ka tapapa atu no te tuatau ki mua. I tetai tua, kua taputou mai a Iehova i te au akameitakianga manea tikai noou a te tuatau ki mua. (Sala. 145:16) Akamanako katoa i teia: Ka papu ainei ia koe mei teaa rai toou oraanga i teianei naringa koe i rave i tetai ikianga ke? E akamaara i teia: Me rave tatou i te au ikianga no to tatou inangaro i te Atua e te tangata tupu, kare rava tatou e ngere i te meitaki.
Akamanako meitaki i ta Iehova au akameitakianga (Akara i te parakarapa 13) c
ME MANAKO KOE E KARE OOU PUAPINGA KIA IEHOVA
14. Eaa tetai pae i taitaia ei e eaa te uianga ka ui ratou?
14 Ko tetai au tavini o Iehova kua pakarikari, kua maki e kua kotingaia to ratou turanga. Ka akatupu teia i te manako puapinga kore. Penei ka ui ratou, ‘E puapinga ainei au kia Iehova?’
15. Eaa ta te tata o Salamo 71 i papu?
15 Kua manako akapera katoa te tata o Salamo 71. Kua pure aia: “Me paruparu au ra, auraka e taka ke iaku.” (Sala. 71:9, 18) Noatu ra, kua irinaki papu te tata salamo e me tavini tiratiratu aia i tona Atua, ka arataki e ka tauturu a Iehova iaia. Kua apii aia e te mareka ra a Iehova i te aronga tei tavini maroiroi Iaia noatu to ratou turanga.—Sala. 37:23-25.
16. Eaa te puapinga o te aronga pakarikari kia Iehova? (Salamo 92:12-15)
16 Me kua pakarikari koe, e akamanako eaa ta Iehova e kite maira i roto ia koe. Ka tauturu aia ia koe kia maroiroi i te pae vaerua noatu te paruparu ra koe i te pae kopapa. (E tatau ia Salamo 92:12-15.) E akamou i toou manako ki runga i taau ka rauka i te rave kare ki runga i taau i rave i mua ana. Ei akaraanga, ka riro toou tu meitaki ei akamaroiroi i tetai ke. Ka akakite koe akapeea a Iehova i te akono anga ia koe i te tuatau i aereia mai e te au taputou Pipiria taau e tapapa ra a te tuatau ki mua. Auraka e akangaropoina, ka akamaroiroi taau au pure i tetai ke. (1 Pete. 3:12) Noatu to tatou turanga, ka rauka ia tatou i te tavini ia Iehova e tetai ke.
17. Eaa te tumu auraka tatou kia akaaite i ta tatou e rave ra ki tetai ke?
17 Me taitaia koe e kare e maata taau e rave ana i roto i te angaanga a Iehova, e irinaki papu e te akaperepere ra aia i taau ka rauka i te rave. Penei ka akaaite koe i taau e rave ra ki ta etai ke e rave ra. Auraka e rave i te reira! No teaa ra? No te mea kare a Iehova e akaaite ia koe ki tetai ke. (Gala. 6:4) Ei akaraanga, kua riringi a Maria i te manongi oko maata ki runga ia Iesu. (Ioa. 12:3-5) Kare i aite ki te vaine takaua tei oronga e rua lepeta i ko i te iero. (Luka 21:1-4) Kare a Iesu i akaaite i te angaanga a teia nga vaine mari ra, kua kite aia i to raua akarongo ketaketa. Mei te reira rai, te akaperepere ra to tatou Metua ko Iehova i taau ka oronga no toou inangaro e toou akarongo iaia, noatu e iti ua te reira.
18. Eaa te ka tauturu ia tatou kia akakore i te manako taitaia? (Akara katoa i te pia “ Tauturu ta Iehova Tuatua ia Koe Kia Akakore i te Manako Ekoko.”)
18 E manako taitaia ana tatou i tetai au atianga. Noatu ra mei ta tatou i kite, ka tauturu te Pipiria ia tatou kia akakore i teia au manako. No reira, e tauta i te akakore i toou au manako taitaia. Ka tauturu teia ia koe kia manako papu. Te kite maira a Iehova i taau e rave ra. Te akaperepere ra aia i toou tu akaatinga e kua taputou aia i te akameitaki ia koe. E irinaki papu e te akaperepere ra a Iehova i tona au tavini tiratiratu.
IMENE 111 Te Tumu o to Tatou Rekarekaanga
a Noatu kare te Pipiria i akakite mai i to Davida mataiti i te ikianga a Iehova iaia ei ariki, te mapu ra rai aia.—Akara i The Watchtower, o Tepetema 1, 2011, kapi 29, para. 2.
