1. Eaa ta Iehova e kite ra no tona au tavini?

 TE KITE maira a Iehova i te au mea te tupu ra ki tona au tavini i te enua nei. Kua kite aia i to tatou mataora e te manamanata. (Sala. 37:18) Me kite aia ia tatou e tauta ra i te tavini iaia ma te ngakau toa noatu to tatou mamae ngakau, te mareka ra aia ia tatou! E ka inangaro aia i te tauturu e te akapumaana ia tatou.

2. Eaa ta Iehova ka rave no te aronga ngakau paruparu e akapeea tatou e puapinga ai mei tana tauturu?

² Karanga a Salamo 147:3 e ka ‘tākai a Iehova i te au puta’ o te aronga ngakau paruparu. Te akataka ra teia irava i to Iehova inangaro i te aronga mamae ngakau. Eaa ta tatou ka rave kia puapingaia mei ta Iehova tauturu? Akamanako ana i teia akatutuanga. E maata ta tetai taote ka rave i te rapakau i tetai tangata. Inara e puapinga ai aia, ka aru meitaki aia i te au akamatakite anga a te taote. I teia atikara, ka uriuri tatou i ta Iehova e akakite ra i roto i Tana Tuatua ki te aronga mamae ngakau e akapeea tatou me akono i tana akoanga aroa.

AKAPAPU A IEHOVA E PUAPINGA TATOU KIAIA

3. Eaa tetai pae i manako ei e puapinga kore ratou?

³ Te noo nei tatou i roto i tetai ao aroa kore, e te mea tangi e maata te tangata tei manako e e puapinga kore ratou. Karanga tetai tuaine ko Helen a: “Kare to matou nga metua e aroa ana ia matou. E tangata kino toku papa tei karanga i te au rā ravarai e e puapinga kore matou.” Mei ia Helen, penei kua takinokinoia koe, kua akaapaia e  kare oou puapinga. Me koia ïa, ka ngatā i te irinaki e te inangaro maira tetai tangata ia koe.

4. Ia Salamo 34:​18, eaa ta Iehova e taputou maira kia tatou?

⁴ Noatu kua takinokinoia koe e tetai ke, mea papu te inangaro e te akaperepere maira a Iehova ia koe. “Te vaitata nei a Iehova i te aronga ngakau paruparu.” (E tatau ia Salamo 34:18.) Me e “ngakau taitaia” toou, e akamaara kua kite a Iehova i toou au tu meitaki e kua akavaitata atu ia koe kiaia. (Ioa. 6:44) Kua papa aia i te tauturu ia koe no tona akaperepere maata ia koe.

5. Eaa ta tatou ka kite mai mei ta Iesu akonoanga i te aronga tei akavaavaaia?

⁵ Ka kite tatou i to Iehova inangaro me akamanako tatou i to Iesu akaraanga. I te tuatau iaia i te enua, kua takinga meitaki a Iesu i te aronga tei akavaavaaia e kua akono ia ratou ma te aroa. (Mata. 9:​9-12) Ei akaraanga, te amiri anga tetai vaine maki i te kakau o Iesu, kua akapumaana a Iesu iaia e kua akameitaki iaia no tona akarongo. (Mare. 5:​25-34) Kua aru meitaki tikai a Iesu i te tu o tona Metua. (Ioa. 14:9) No reira, e mea papu te akaperepere ra a Iehova ia koe, te kite ra i toou tu meitaki, kapiti mai toou akarongo e te inangaro iaia.

6. Eaa taau ka rave me manako koe e kare oou puapinga?

⁶ Eaa taau ka rave me manako koe e kare oou puapinga? E tatau i te au irava tei akapapu mai e te akaperepere ra a Iehova ia koe e e akamanako oonu i te reira. b (Sala. 94:19) Auraka e akaaite ia koe ki tetai ke, e auraka e akamou ki  runga i taau kare e rauka i te rave. Kua kite ua a Iehova i to tatou au kotinga. (Sala. 103:​13, 14) Me kua takinokinoia ana koe, eiaa e akaapa ia koe. Kare noou te apa! E akamaara na Iehova e akava i te aronga rave kino. (1 Pete. 3:12) Karanga a Sandra, tei takinokinoia i tona tamariki anga: “E pati putuputu ana au kia Iehova no te tauturu kia kite au i toku au tu meitaki.”

7. Akapeea te au mea tei tupu i roto i to tatou oraanga me tauturu ia tatou kia tavini ia Iehova?

⁷ Mea papu e ka taangaanga a Iehova ia koe kia tauturu i tetai ke. Kua oronga aia i te tikaanga ngateitei kia riro koe ei oa rave angaanga nona i roto i te angaanga tutu aere. (1 Kori. 3:9) No tei tupu kia koe i roto i toou oraanga, penei ka māmā ua ia koe i te mārama i te tu o te aronga e mamae ra. E maata taau ka rave ei tauturu ia ratou. Mei ia Helen tei taikuia i mua ana, kua tauturuia aia e i teianei te tauturu nei aia i tetai ke. Karanga aia: “Kua manako au e kare oku puapinga i mua ana, inara kua kite au i to Iehova aroa, e te taangaanga nei aia iaku kia tauturu i tetai ke.” Te tavini mataora nei a Helen ei painia tamou.

KA INANGARO A IEHOVA IA TATOU KIA ĀRIKI I TANA AKAKOREANGA ARA

8. Ia Isaia 1:​18, eaa ta Iehova e akakite maira kia tatou?

⁸ Te taitaia nei tetai au tavini o Iehova no te au ara ta ratou i rave i mua ana e i muri ake i to ratou papetitoanga. E akamaara, kua oronga mai a Iehova i te atinga oko no tona akaperepere ia tatou. E mea papu, ka inangaro aia kia āriki tatou i tana apinga aroa. Karanga a Iehova, me “akatikatika ana tatou i te tuatua,” c e kia tataraara, kare aia e akamanako akaou i ta tatou au ara. (E tatau ia Isaia 1:18.) Ka akameitaki tatou i to tatou Metua aroa ko Iehova tei akakore takiri i ta tatou ara! E kare katoa aia e akangaropoina i ta tatou au angaanga meitaki i rave.—Sala. 103:​9, 12; Ebe. 6:10.

9. Eaa te tumu auraka tatou e akamou i te manako ki te au ara ta tatou i rave i mua ana?

⁹ Me kua taitaia koe no taau i rave i mua ana, e akamou i toou manako ki runga i taau e rave ra i teianei e i te tuatau ki mua. E akamanako i te akaraanga o te apotetoro ko Paulo. Kua tataraara aia no te mea kua takinokino maata aia i te au Kerititiano i mua ana, inara kua kite aia e kua akakore a Iehova i tana ara. (1 Timo. 1:​12-15) Kua akamanako ua ainei aia i tana ara i rave i mua ana? Kare, kare aia i akapou i te taime no te akamanako i te au mea tana i rave i roto i te akonoanga ngati Iuda. (Phili. 3:​4-8, 13-15) Mari ra, kua rave maroiroi a Paulo i te angaanga tutu aere e kua akara ki te tuatau ki mua. Mei ia Paulo rai, kare e rauka i te taui i taau i rave i mua ana. Ka rauka ra ia koe i te akangateitei ia Iehova i teianei e te tapapa atu i te manakonako anga manea tana i taputou no te tuatau ki mua.

10. Eaa taau ka rave me kua akatupu koe i te mamae ki tetai ke?

¹⁰ Penei ka taitaia koe i te au mea taau i rave i mua ana tei akatupu i te mamae ki tetai ke. Eaa taau ka rave? E tauta  i te akameitaki atu i toou pirianga kia ratou, kapiti mai te tataraara anga ma te ngakau tae. (2 Kori. 7:11) E pati ia Iehova kia tauturu e kia akapumaana i te aronga taau i akakino. Ka tauturu aia ia koe e ratou kia tavini ua atu iaia e kia rauka te ’au.

11. Eaa ta tatou ka apii mei te akaraanga o te peroveta ko Iona? (Akara katoa i te tutu.)

¹¹ E apii mei toou au tarevake e kia puareinga ua i te tavini ia Iehova. E akamanako i te akaraanga o te peroveta ko Iona. Kare aia i aere ki Nineve mei ta te Atua i akaue, mari ra kua oro a Iona. Kua ako a Iehova ia Iona e kua apii aia mei tona tarevake. (Iona 1:​1-4, 15-17; 2:​7-10) Kare a Iehova i akaruke ia Iona, mari ra kua akaue te Atua iaia kia aere ki Nineve e kua akarongo a Iona. Noatu kua tataraara aia i tona tarevake, kua rave a Iona i ta Iehova i akaue mai.—Iona 3:​1-3.

KA AKAPUMAANA A IEHOVA IA TATOU NA ROTO I TONA VAERUA TAPU

12. Akapeea a Iehova me tauturu ia tatou me tupu te tumatetenga? (Philipi 4:​6, 7)

¹² Na roto i tona vaerua tapu, ka akapumaana a Iehova ia tatou me tupu te au tumatetenga. Akamanako ana i tei tupu kia Ron e Carol. Te mea tangi, kua tamate ta raua tamaiti iaia uaorai. Karanga raua: “Kua tupu ana te au tumatetenga kia maua i mua ana, inara ko teia te mea kino rava atu. Kare maua i varea ana e te moe i te po, no reira kua pure maua kia Iehova e kua rauka te ’au tei akatakaia i roto ia Philipi 4:​6, 7.” (E tatau.) Me te akakoromaki nei koe i tetai turanga ngatā tikai, e pure putuputu kia Iehova e te pati akatenga i tana tauturu. (Sala. 86:3; 88:1) E pati ia Iehova kia oronga mai i tona vaerua tapu. Ka tauturu ua rai aia ia koe.—Luka 11:​9-13.

13. Akapeea te vaerua tapu me tauturu ia tatou kia akamori ia Iehova ma te tiratiratu? (Ephesia 3:16)

¹³ Kua paruparu ainei koe no tetai turanga ngatā? Ka akamaroiroi te vaerua tapu o Iehova ia koe kia akamori ia Iehova ma te tiratiratu. (E tatau ia Ephesia 3:16.) E akamanako i tei tupu ki tetai tuaine ko Flora. Kua tavini kapiti raua ko tana tane ei nga mitinari, inara kua akaturi tana tane e kua tatara raua. Karanga aia: “Kua mamae tikai toku ngakau no tona tu pikikaa. Kua pure au kia Iehova no tona vaerua tapu kia rauka iaku i te akakoromaki. Kua akapumaana a Iehova iaku, e noatu e ngatā tikai i te akamataanga, kua akamaroiroiia au kia akakoromaki ma tana tauturu.” Kua kite a Flora e kua tauturu te Atua iaia kia ngakau toa e kia akakoromaki i te au tumatetenga. Karanga a Flora: “Kua tauturu tikai a Salamo 119:32 iaku: ‘Ka oro au na te arataa taau i akaue maira, kia akamaoraoraia e koe toku nei ngakau.’”

14. Akapeea te vaerua tapu o te Atua me tauturu ia tatou?

¹⁴ Me pati koe ia Iehova kia oronga mai i tona vaerua tapu, eaa atu taau ka rave? E rave i te au angaanga te ka tauturu ia koe kia rauka te vaerua tapu o te Atua. Kapiti mai te aere ki te au uipaanga e te tutu aere. E tatau i te Pipiria i te au rā ravarai. Ka tauturu teia ia koe kia akamanako oonu i tona au manako. (Phili. 4:​8, 9) Me tatau koe i te irava, e akamanako i te aronga i roto i te Pipiria tei akakoromaki i te au tumatetenga e ta Iehova tauturu ia ratou kia akakoromaki.  Ko Sandra, tei taikuia i mua ana, e maata te au manamanata tei tupu i roto i tona oraanga. Karanga aia: “Kua akamaroiroi te tua o Iosepha iaku. Kare aia i akatika i te au manamanata e te tu tika kore kia akaparuparu i tona pirianga kia Iehova.”—Gene. 39:​21-23.

KA AKAPUMAANA A IEHOVA IA TATOU NA ROTO I TE AU TAEAKE

15. Koai te ka akapumaana ia tatou, e akapeea ratou me tauturu ia tatou? (Akara katoa i te tutu.)

¹⁵ Me tupu te manamanata kia tatou, ka “akapumaana” to tatou au taeake ia tatou. (Kolo. 4:11) Na roto i te au taeake e te au tuaine, ka aroa mai a Iehova ia tatou. Ka akapumaana ratou ia tatou na te akapou anga i te tuatau kia tatou e te akarongo ki to tatou manako taitaia. Penei ka tatau ratou i tetai irava ei akamaroiroi ia tatou e te pure kapiti kia tatou. d (Roma 15:4) I tetai taime, ka tauturu tetai taeake me kore tuaine ia tatou kia akamaara i to Iehova au manako e te tauturu ia tatou kia akakoromaki. Ka tauturu katoa te au taeake Kerititiano ia tatou, ei akaraanga na te apai anga mai i te kai na tatou.

16. Eaa ta tatou ka rave kia rauka te tauturu a tetai ke?

¹⁶ I tetai taime, ka anoanoia tatou kia  pati i tetai ke no te tauturu. Akaperepere te au taeake e te au tuaine ia tatou e ka inangaro ratou i te tauturu. (Mase. 17:17) Inara, penei kare ratou i kite i to tatou manamanata e ta tatou e anoano ra. (Mase. 14:10) Me taitaia toou ngakau, e akakite i toou au manako ki te au oa meitaki. E pati i ta ratou tauturu. E akakite i toou manako taitaia ki tetai tangata pakari taau i mātau. Penei ka pati te au tuaine i te tauturu a tetai tuaine pakarikari.

17. Eaa tetai au manamanata te ka tāpu ia tatou e akapeea tatou me autu i te reira?

¹⁷ E akapou i te taime ki toou au taeake e te au tuaine. Penei no toou mamae ngakau, kare koe e inangaro i te kapiti atu kia ratou. E penei kare toou au taeake e te au tuaine e mārama i toou turanga e ka tuatua i te au mea tarevake. (Iako. 3:2) Inara auraka e akaruke i toou au taeake e te au tuaine. Ka taangaanga a Iehova ia ratou kia akamaroiroi ia koe. Karanga tetai tangata pakari ko Gavin, tei akakoromaki i te maki taitaia: “Maata te taime, kare au e inangaro i te puka e te akapou i te taime ki toku au oa.” Noatu ra, ka tauta a Gavin i te kapiti atu ki tona au oa e ka akamaroiroiia aia e tetai ke. Karanga tetai tuaine ko Amy: “No tei tupu kiaku i mua ana, e ngatā iaku i te irinaki i te tangata. Inara, te apii nei au kia inangaro e kia irinaki i toku au taeake e te au tuaine mei ia Iehova rai. Kua kite au e ka akamareka teia ia Iehova e ka mataora katoa au.”

KIA AKAPUMAANAIA E TE AU TAPUTOU A IEHOVA NO TE TUATAU KI MUA

18. Eaa ta tatou ka tapapa atu a te tuatau ki mua e eaa ta tatou ka rave i teianei?

¹⁸ Kare e roa atu ana, ka takore takiri a Iehova i to tatou mamae ngakau e te au manamanata. (Apo. 21:​3, 4) A tera tuatau, “kare e akamanako akaouia” te au mea kino tei tupu kia tatou. (Isa. 65:17) Mei ta tatou i apii mai, te ‘takai nei a Iehova i to tatou au puta’ i teianei. E maata te tauturu ta Iehova i oronga mai ei akapumaana ia tatou. E āriki tatou i te reira. Auraka e akangaropoina, e “koia oki te tiaki mai ia kotou.”—1 Pete. 5:7.