KUA akarakara te tangata angaanga no te reva i te ka tupu i runga i te radar. Kite atura aia i tetai puaioio kino e vaitata maira ki tetai ngai tangataia. Kua manata aia i te tangata i reira, kua rave aia i te ka rauka no te akamatakite anga i te tangata, i mua ake ka tupu ei te reira.

Akapera katoa a Iehova, i te akamatakite anga i te tangata no runga i tetai “puaioio” kino, e tuke ki te akamatakite anga no tetai reva kino. Akapeea aia i te rave anga i teia? Eaa ra tatou i papu ei e kua rava te taime no te tangata i te ariu mai ki tana akamatakite anga? E kitea ai te pauanga, ka akamanako ana tatou i te au akamatakite anga ta Iehova i oronga, i te au tuatau o mua ana.

I te au tuatau Pipiria, kua akamatakite a Iehova no runga i te au “puaioio” tukeke me kore tana au angaanga akavaanga, ki rungao i te aronga tei patoi i tana akauenga. (Mase. 10:25; Iere. 30:23) Noatu eaa te turanga, ka na mua aia i te akamatakite i te tangata, e oti ka akamaroiroi aia ia ratou kia ariu mai. (2 Ari. 17:12-15; Nehe. 9:29, 30) Ei tauturu i te tangata, ka tono aia i tona au tavini tiratiratu kia akakite i tana akavaanga e ka akamaroiroi ia ratou kia ariu mai.—Amo. 3:7.

Ko Noa tetai tavini tiratiratu tei rave ana i teia. No tetai tuatau roa, kua akamatakite aia ma te ngakau toa i te au tangata takinga kino e te kaitamaki i tona tuatau, no runga i te Vaipuke te ka tupu i te enua nei. (Gene. 6:9-13, 17) Kua akakite katoa aia kia ratou i ta ratou ka rave e ora ai, e kua kiteaia aia ei “tangata i ako i te tuatua-tika ra.”—2 Pete. 2:5.

Noatu kua tauta a Noa, kare te au tangata o te reira tuatau i mua ake ka tupu ei te Vaipuke, i akarongo ana ki ta te Atua karere. Kare ratou i irinaki ana e ka tupu te reira. Kua rokoia iora ratou i te Diluvi e “ope takiri akera ratou i te mate.” (Mata. 24:39; Ebe. 11:7) Ia ratou e matemate atura, papu e kua akamatakite rai te Atua ia ratou.

I tetai au taime, kua akamatakite a Iehova i te tangata tataki tai i mua ake ka tupu ei te “puaioio” koia oki tana akavaanga. Kua akapapu aia e kia akamatakiteia te tangata e kua rava te tuatau no ratou i te ariu mai. Ei akaraanga, kua akamatakite putuputu aia i te ka tupu no te Mate Ngauru ki to Aiphiti o mua ana. Tetai akaraanga, kua tono a Iehova ia Mose raua ko Aarona i te akamatakite ia Pharao e tona au tavini no runga i te itu o te mate, te ua toka pakari. No te mea ka akamata te ua toka i tera mai rā, kua rava ainei te tuatau ta te Atua i akakite no ratou kia kimi i te marumaru e ora ai i te puaioio? Akakite mai te Pipiria: “E ko tei mataku i te tuatua a Iehova i te au tavini o Pharao ra, kua akaoro ïa i tona au tavini, e tana au puaka ki roto i te au are: Kareka tei kore i akono i te tuatua a Iehova ra, kua vaoo ïa i tona au tavini e tana au puaka ki vao.” (Exo. 9:18-21) Taka meitaki ra, kua rava rai te tuatau i akamatakite ei a Iehova i te tangata, te aronga tei akarongo ra kua ora ratou mei te ua toka.

Kua akamatakite katoaia a Pharao e tona au tavini i mua ake ka tupu ei te mate tino ngauru. Inara, kare ratou i akarongo ana i te akamatakite anga. (Exo. 4:22, 23)Tei tupu, kua kite ratou i ta ratou tama mua i te mate anga. E mea mii tikai! (Exo. 11:4-10; 12:29) Kua rava ainei to ratou tuatau no te akarongo anga ki te akamatakite anga? Ae! Kua akamatakite a Mose i to Iseraela no te reira mate tino ngauru, e kua akakite aia i ta ratou ka rave e ora ai to ratou  ngutuare tangata. (Exo. 12:21-28) Eia aronga i akarongo ki te reira akamatakite anga? Kua tamanakoia, e toru mirioni tangata, kapiti mai to Iseraela e te “tangata ke ke” kare i te ngati Iseraela e te au Aiphiti, kua ora mai i te akavaanga a te Atua e kua akaruke ia Aphiti.—Exo. 12:38.

Akaari maira teia au akaraanga, e kua akapapu a Iehova e kua rava te tuatau, no te akamatakite anga i te tangata i tana ka rave. (Deu. 32:4) Eaa to te Atua akakoroanga no te reira? Akamārama mai te apotetoro ko Petero no runga ia Iehova “kare rava i anoano e kia mate atu tetai, kia rauka katoatoa ra te tataraara.” (2 Pete. 3:9) Ae, te inangaro ra te Atua i te tangata. Kua inangaro aia ia ratou kia tataraara e kia ariu mai ki tana akoanga i mua ake ka tupu ei tana akavaanga.—Isa. 48:17, 18; Roma 2:4.

I teia tuatau, ka anoanoia te au tangata ravarai kia ariu mai ki tetai akamatakite anga rapurapu te raveia nei i teianei ao. Iaia i te enua nei, kua akamatakite a Iesu e ka takoreia teianei akatereanga i te tuatau o tetai “mate maata.” (Mata. 24:21) No te akavaanga a te tuatau ki mua, kua akakite mai aia i tetai totou taka meitaki ta te au pipi ka kite, i te reira e vaitata mai nei. Kua akamārama i reira a Iesu i te au mea ka tupu i teianei ao, ta tatou e kite nei.—Mata. 24:3-12; Luka 21:10-13.

No runga i teia totou, te akamaroiroi nei a Iehova i te katoatoa kia ariu mai ki Tana tutara anga aroa. Tona anoano kia rauka te oraanga meitaki i te aronga akarongo i teianei e kia rauka te au akameitakianga a te tuatau ki mua, i roto i tona ao ou tuatua tika. (2 Pete. 3:13) Kia akaketaketa i to tatou akarongo i roto i tana au taputou, kua oronga mai a Iehova i te karere ora, kia “tutu aereia te evangelia o te basileia nei,” ta Iesu i totou “e kako rava ake te ao katoa nei; ei kite no te pa enua ravarai.” (Mata. 24:14) Kua akanoo te Atua i tona aronga akamori kia tutu aere i te karere na te Atua ei “kite,” i roto i te 240 tuma enua. Inangaro a Iehova e kia maata te tangata kia ariu mai e ora ai i te “puaioio” o tana akavaanga tuatua tika, e vaitata mai nei.—Zepha. 1:14, 15; 2:2, 3.

Te uianga puapinga i reira, kare me kua rava te tuatau te oronga maira a Iehova no te akamatakite anga i te tangata. Akaari maira te au akapapuanga e maata te taime. Mari ra, te uianga puapinga maata: Ka akarongo mai ainei te tangata i ta te Atua akamatakite anga koi vai ei te tuatau? Ei au tavini no te Atua, e tauturu ua atu tatou i te au tangata kia ariu mai e ora ai ratou.