1. Akapeea a 2 Korinetia 3:1-3 me akakeu ia tatou kia apii i te tangata apii Pipiria e kia papetitoia? (Akara i te tutu i te kapi mua.)

EAA toou manako me kite koe i tetai tangata apii Pipiria mei roto i taau putuputuanga e papetitoia ra? Papu e ka rekareka koe. (Mata. 28:19) Me naau i apii i te reira pipi ou, mei teaa atura toou rekareka! (1 Tesa. 2:19, 20) E au “leta akameitaki” te au pipi tei papetito ouia, na te aronga tei apii ia ratou e na te putuputuanga.—E tatau ia 2 Korinetia 3:1-3.

2. (a) Eaa te uianga puapinga ta tatou ka uriuri, e no teaa ra? (e) Eaa te apii Pipiria? (Akara i te tataanga rikiriki.)

² I te a mataiti i topa akenei, e 10,000,000 apii Pipiria * tei ripotiia i te marama i te ao katoa. I taua au mataiti, e tere atu i te 280,000 tei papetitoia i te au mataiti ei Au Kite no Iehova e ei pipi ou na Iesu Karaiti. Akapeea tatou me tauturu atu i te mirioni tuma aronga apii Pipiria e kia papetitoia? Koi akakoromaki ei a Iehova i te tangata kia riro mai ei pipi na Karaiti, ka tauta tatou i te tauturu ia ratou kia tere ki mua e kia papetito vivikiia. Te pou nei te tuatau!—1 Kori. 7:29a; 1 Pete. 4:7.

3. Eaa ta tatou ka uriuri i teia atikara no te rave i te au apii Pipiria?

³ Ei akamaroiroi i te angaanga akariro i te tangata ei pipi, kua uiia ki te au opati Betela akapeea me tauturu i  te aronga apii Pipiria e kia papetitoia. I teia atikara e te ka aru mai, ka apii tatou mei te aronga karape mei te au painia, te au mitinari, e te au akaaere kotinga. * (Mase. 11:14; 15:22) Ka akakite mai ratou ta te au puapii Pipiria e ta ratou aronga apii i rave kia puapinga atu te apii Pipiria. I teia atikara, ka uriuri tatou e rima au mea ka anoanoia te aronga apii kia rave kia tere ki mua e kia papetitoia.

4. Eaa ta tatou ka kite mai no te apii Pipiria i te ngutupa?

⁴ E maata te au taeake e te au tuaine te rave ra i te au apii Pipiria i te ngutupa. Noatu e e mea meitaki teia kia reka te tangata i te Pipiria, inara e au uriuri anga poto ua teia penei kare te reira e tupu putuputu ana. Ei akakeu i te inangaro, ka pati tetai pae i te ngai noo anga o te reira tangata e ka taniuniu atu me kore ka tuku karere atu i te pae i te au atoro anga no te oronga i tetai manako Pipiria. Penei ka tupu ua atu teia au uriuri anga no tetai au marama e kare e riro mai ei apii Pipiria. Ka tere ainei te reira apii Pipiria ki mua kia akatapuia e kia papetitoia me ko te tuatau ua te reira tana * e apii ana i te Tuatua a te Atua? Kare.

5. Ia Luka 14:27-33, akapeea a Iesu te akamaroiroi anga i ta tatou angaanga akariro i te tangata ei pipi?

⁵ Akatutu a Iesu i te ka tupu me riro mai tetai ei pipi. Akakite aia no te tangata tei inangaro i te akatu i te are e no te ariki tei inangaro i te aere ki te tamaki. Karanga a Iesu e ka na mua te tangata akatu are i te “noo ki raro, ka tatau ei i te apinga” no te akaoti i te are e “e noo ana [te ariki] ki raro, ka akaeatu” ei me ka rauka i tona pupu vaeau i te tamaki. (E tatau ia Luka 14:27-33.) Kite katoa a Iesu e me ka inangaro tetai tangata kia riro mai ei pipi nana ka na mua aia i te akara matatio i tana ka rave. Ka anoanoia tatou kia akamaroiroi i teia au pipi kia apii kapiti kia tatou i te au epetoma ravarai. Akapeea tatou me rave i teia?

6. Eaa ta tatou ka tauta i te rave kia tere te aronga apii ki mua?

⁶ Ka akamata koe na te akaroaroa anga i te apii i te ngutupa. E uriuri e tai me  kore e rua irava Pipiria me atoro koe i te reira tangata. Me reka te pu ngutuare i tetai atoro anga roa, e ui me e ngai meitaki tetai no te noo kapiti ki raro no te uriuri. Na tana pau anga e akaari mai me te inangaro ra aia i te apii i te Pipiria. Kia tere ki mua, penei ka ui koe me te inangaro ra aia i te apii e rua taime i te epetoma. E maata atu te ka anoanoia i te apii okotai me kore e rua taime i te epetoma.

7. Akapeea te puapii me akapapa meitaki no te apii Pipiria tataki tai?

⁷ Ei puapii, ka anoanoia koe kia akapapa meitaki no te apii Pipiria. Ka akamata koe na te tatau anga i te apii e te akara i te au irava. Akamanako meitaki i te au manako puapinga. Akamanako i te tumu manako o te apii, te au tumu manako rikiriki, te au uianga, te au irava “tatau,” te au tutu, e tetai ua atu vitio te ka akamārama i te tumu manako. Ma te manakonako atu i te tangata apii, akamanako akapeea koe me apii ma te māmā e te taka meitaki kia mārama taau tangata apii e kia taangaanga i te reira.—Nehe. 8:8; Mase. 15:28a.

8. Ia Kolosa 1:9, 10 eaa ta Paulo e apii maira ia tatou kia pure no ta tatou aronga apii Pipiria?

⁸ Ia koe e akapapa ra, e pure kia Iehova no runga i taau tangata apii e tona au anoano. E pati tauturu kia Iehova kia apii mei te Pipiria te ka itae i te ngakau o te tangata apii. (E tatau ia Kolosa 1:9, 10.) Akamanako atu i tetai apinga te ngata ra i te tangata apii kia mārama e kia āriki. Toou akakoro anga kia tauturu iaia kia papetitoia.

9. Akapeea te puapii te tauturu anga i te tangata apii kia akapapa i tana apii? Akamārama mai.

⁹ Na roto i tetai apii Pipiria tamou, ka āriki te tangata apii i ta Iehova e Iesu i rave e ka inangaro i te apii maata atu. (Mata. 5:3, 6) Kia puapinga meitaki mei te apii, ka anoanoia te tangata apii kia akamanako meitaki i tana e apii ra. E akamaroiroi iaia kia akapapa meitaki no te au apii tataki tai, na te tatau anga i te apii i mua ake ana e e akamanako akapeea aia e puapinga ai mei te reira. Akapeea te puapii me tauturu iaia kia akapapa? E akapapa kapiti i te apii ki te tangata apii e e akaari akapeea teia me  raveia. * Akamārama akapeea e kitea ai te pauanga ki te au uianga, e akaari akapeaa me māka i te au aerenga tuatua kia maara iaia te pauanga. E oti e pati kiaia kia oronga i tana uaorai pauanga. Me pera aia, ka kite koe me kua mārama aia i te apii. Te vai atura tetai apinga ke, ka akamaroiroi koe i taau tangata apii.

10. Eaa i puapinga ai kia tatau i te Pipiria i te au rā, e eaa te ka anoanoia kia puapinga te tatau Pipiria?

¹⁰ I te pae i te apii i te au epetoma ravarai ki tona puapii, ka puapingaia te tangata apii me rave aia i tetai au mea koia anake ua. Ka anoanoia aia kia karangaranga kia Iehova. Akapeea ra? Na te akarongo anga e te tuatua anga kia Iehova. Ka akarongo aia kia Iehova na te tatau anga i te Pipiria i te au rā. (Iosu. 1:8; Sala. 1:1-3) Akaari kiaia akapeea me taangaanga i te “Akapapaanga Tatau Pipiria” te ka rauka i te nenei, i runga i te jw.org. * E tika, ei tauturu iaia kia puapinga tana tatau anga Pipiria, e akamaroiroi iaia kia akamanako oonu i ta te Pipiria e apii maira no Iehova e akapeea me taangaanga i tana e apii ra i tona oraanga.—Anga. 17:11; Iako. 1:25.

11. Akapeea tetai tangata apii e kite ei i te pure, e eaa i puapinga ai nona kia pure putuputu kia Iehova?

¹¹ Akamaroiroi i taau tangata apii kia tuatua kia Iehova na te pure anga i te au rā. E oronga i te au pure ngakau tae i te akamata anga e te openga o te apii, te pure kapiti anga ki taau tangata apii. Iaia e akarongo ra ki taau pure, ka apii aia akapeea me pure ma te ngakau tae e kia pure ki te Atua ko Iehova na roto i te ingoa o Iesu Karaiti. (Mata. 6:9; Ioa. 15:16) Akamanako ana akapeea te tatau anga Pipiria i te au rā (akarongo anga kia Iehova) e te pure (tuatua anga kia Iehova) me tauturu i taau tangata apii kia piri vaitata ki te Atua! (Iako. 4:8) Ka tauturu teia i taau tangata apii kia rauka tetai apinga ke te ka taki atu ki tona akatapuanga e te papetitoanga.

12. Akapeea te puapii me tauturu i te tangata apii kia piri vaitata kia Iehova?

¹² Ka riro ta te tangata apii e apii ra ei akakeu i tona manako e te ngakau. Eaa  te tumu? To tatou ngakau—to tatou anoano, manako ngakau, e te au manako, ka akakeu te reira ia tatou. Taangaanga a Iesu i te au akamārama anga tau tei akakeu i te manako. Kua aru katoa te tangata iaia no te mea kua akakeu aia i to ratou ngakau. (Luka 24:15, 27, 32) Ka anoanoia taau tangata apii kia kite ia Iehova ei Peretana tikai, e ka rauka tetai pirianga vaitata, e kia kite Iaia ei Metua nona, ei Atua nona, e ei Oa nona. (Sala. 25:4, 5) I te tuatau o te apii Pipiria, e apii oraora i te tu o te Atua. (Exo. 34:5, 6; 1 Pete. 5:6, 7) Noatu te tumu manako taau e uriuri ra, e akamou ki runga i to Iehova tu. Tauturu i te tangata apii kia āriki i te au tu manea o Iehova—tona aroa, te takinga meitaki, e te tangi aroa. Karanga a Iesu “te akauenga mua teia e tei maata” koia oki “e anoano atu koe i to Atua ia Iehova.” (Mata. 22:37, 38) Apii i te tangata apii kia akaperepere i te Atua.

13. Oronga mai i te akaraanga akapeea te tangata apii e kite ei i to Iehova tu.

¹³ I ta korua pukapuka anga ko taau tangata apii, e akakite i toou akaperepere ia Iehova. Penei ka tauturu teia i taau tangata apii kia kite e ka anoanoia aia kia piri vaitata ki te Atua. (Sala. 73:28) Ei akaraanga, te vaira ainei tetai tuatua i roto i te puka apii me kore i roto i te irava tei akakite mai ia Iehova—tona aroa, pakari, tu tika, e te mana ririnui—tei akakeu i tona ngakau? E taiku i te reira ki taau tangata apii, e akakite kiaia e ko tetai tumu ïa i akaperepere ei koe i te Metua i te rangi. Te vai atura tetai apinga ke ka anoanoia te tangata apii kia tere ki mua e kia papetitoia.

14. Eaa ta Ebera 10:24, 25 e akakite maira no te uipaanga te ka tauturu i te tangata apii Pipiria kia tere ki mua?

¹⁴ Ka inangaro tatou i ta tatou aronga apii kia tere ki mua e kia papetitoia. Tetai mea puapinga, ka akamaroiroi tatou ia ratou kia aere ki te uipaanga. Karanga te au puapii karape e me aere viviki te aronga apii ki te uipaanga ka tere ratou ki mua i te pae vaerua. (Sala. 111:1) Akamārama tetai au puapii ki ta ratou aronga apii e ka rauka tetai apa i ta ratou apii Pipiria mei te apii, e tetai apa mei ko i te uipaanga. E tatau ia Ebera 10:24, 25 ki taau tangata apii, e  akamārama kiaia te puapinga me aere ki te uipaanga. Akatangi i te vitio Eaa te Raveia Ana i ko i te Are Uipaanga Patireia? * Tauturu i taau tangata apii kia tae ki te uipaanga epetoma ei mea puapinga i tona oraanga.

15. Eaa ta tatou ka rave no te akamaroiroi i te tangata apii kia aere putuputu ki te uipaanga?

¹⁵ Eaa taau ka rave me kare taau tangata apii i aere ake ki te uipaanga me kore kare i aere putuputu ki te uipaanga? E akakite i tetai apinga taau i apii mai mei te uipaanga te ka akakeu iaia. E oake i tana Punanga Tiaki e te Puka Angaanga no te Uipaanga te ka apiiia i te reira epetoma. Akaari kiaia eaa te ka uriuriia i te uipaanga ka aru mai, e e ui kiaia eaa tana i reka. Me rongo taau tangata apii i tetai manako tana i reka i ko te uipaanga, e puapinga atu te reira i tana i rongo ana i tana akonoanga. (1 Kori. 14:24, 25) Ka aravei aia i te au taeake akaraanga meitaki to ratou, te ka akakeu iaia kia tere ki mua e kia papetitoia.

16. Eaa te ka anoanoia kia rave i te au apii Pipiria te ka taki atu ki te papetito anga, e eaa ta tatou ka apii mei te atikara ka aru mai?

¹⁶ Akapeea tatou me apii i te au apii Pipiria e kia papetitoia? Ka akamaroiroi tatou i te tangata apii kia apii i te au epetoma ravarai e te akapapa. Ka akamaroiroi katoa tatou iaia kia karangaranga kia Iehova i te au rā e kia piri vaitata Kiaia. Ka inangaro tatou i te akakeu i te tangata apii kia aere ki te uipaanga. (Akara i te pia “ Ta te Aronga Apii ka Rave Kia Papetitoia.”) Mei ta te atikara ka aru mai ka akamārama atu, e rima apinga ta te au puapii Pipiria ka rave kia papetitoia te aronga apii.