1. Eaa ta te au Kerititiano papetitoia ka rave ua atu?

KUA papetitoia ainei koe? Me koia ïa, kua akaari koe ki te katoatoa i toou irinakianga ia Iehova e toou inangaro i te aru i tana akaaerenga. * Inara, ka anoanoia koe kia akamatutu i toou akarongo ia Iehova. E te akaketaketa i toou irinaki e te arataki nei rai a Iehova i tana akaaerenga i teia tuatau.

2-3. Na teea tu e arataki ra a Iehova i tana akaaerenga i teia tuatau? Oronga mai te akaraanga.

² I teia tuatau, te arataki nei a Iehova i tana akaaerenga e te akaari maira te reira i tona tu, tana akakoroanga, e tana au kaveinga. Ka uriuri tatou i to Iehova au tu e toru te akaari ra tana akaaerenga.

³ Mea mua, “kare te Atua e akono i te tu o te tangata.” (Anga. 10:34) Akakeu te aroa ia Iehova kia oronga mai i tana Tamaiti ei “oko i te tangata katoa.” (1 Timo. 2:6; Ioa. 3:16) Kua akakeu a Iehova i tona iti tangata kia tutu aere i te nuti meitaki ki te au tangata te ka akarongo mai, i te tauturu anga ia ratou kia puapinga mei te oko. Te rua, e Atua mako e te ‘au a Iehova. (1 Kori. 14:33, 40) No reira, ka tavini katoa tona aronga akamori iaia ei pupu mako e te ‘au. Te toru, ko Iehova te “Orometua” Maata. (Isa. 30:20, 21) No reira, ka taangaanga tana akaaerenga i te apii i tana Tuatua akauruia, i roto i te putuputuanga e te angaanga tutu aere. Akapeea te putuputuanga Kerititiano i mua ana i te akaari anga i to Iehova au tu? Akapeea teia au tu i te akaari angaia i teia tuatau? Akapeea te vaerua tapu me tauturu ia koe e angaanga ra i roto i ta Iehova akaaerenga i teia tuatau?

4. Ia Angaanga 1:8, eaa ta Iesu i akaue i tana au pipi kia rave, e eaa te ka tauturu ia ratou?

⁴ I te anere mataiti mua. Kua oronga ta Iesu karere i tutu aere i te manakonakoanga ki te tangata ravarai. (Luka 4:43) Akaue aia i tana au pipi kia rave ua atu i tana angaanga i akamata, te tutu aere anga “e tae ua atu ki te openga o te enua.” (E tatau ia Angaanga 1:8.) Inara, kare e rauka ia ratou i te rave i teia angaanga i to ratou uaorai maroiroi. Ka anoano ratou i te tauturu a te vaerua tapu—“te akapumaana” ta Iesu i taputou mai kia ratou.—Ioa. 14:26; Zeka. 4:6.

5-6. Na teea mataara i tauturu ei te vaerua tapu i te pipi a Iesu?

⁵ Kua orongaia te vaerua tapu ki ta Iesu au pipi ia Penetekote 33 T.N. Mari ua ake te tauturu a te vaerua, kua akamata viviki ratou i te tutu aere, e i roto i te tuatau poto, kua āriki te tauatini tangata i te nuti meitaki. (Anga. 2:41; 4:4) Te tupuanga te takinokino, kare te au pipi i mataku ana kua uri ratou ki te Atua no te tauturu. Pure ratou: “E akamaroiroi mai i to au tavini kia tuatua ua i taau tuatua ma te mataku kore.” Akakiia maira ratou ki te vaerua tapu e “kua tuatua ua iora i te tuatua a te Atua ma te mataku kore.”—Anga. 4:18-20, 29, 31.

⁶ Kua tupu tetai atu manamanata ki te au pipi a Iesu. Ei akaraanga, e meangiti ua te au kopi o te Tuatua Tapu ka rauka. Kare a ratou au puka tauturu no te akamārama i te au mea pae vaerua mei teia tuatau. Ka tutu aere te au pipi ki te aronga reo ke ke. Noatu teia manamanata, kua rave te au pipi maroiroi i tei kore i manakoia ana—i roto i te toru ngauru mataiti, kua tutu aere ratou i te nuti meitaki “ki te tangata ravarai i raro ake i teianei rangi.”—Kolo. 1:6, 23.

7. E 100 tuma mataiti akenei, akapeea te au tavini o Iehova i kite ei eaa ta te Atua e inangaro maira no ratou, e eaa ta ratou i rave?

⁷ I teia tuatau. Te arataki nei a Iehova e te akamaroiroi nei i tona iti tangata. E tika, te aere maira te aratakianga no ko mai i ta te Atua Tuatua akauruia e te vaerua. I roto i reira ka kite tatou i te au tataanga no runga i ta Iesu angaanga orometua e tana akauenga ki tana pipi kia rave ua rai i tana angaanga i akamata. (Mata. 28:19, 20) I roto i teia makatini o Tiurai 1881, te karanga ra: “Kare matou i kapikiia, e i akatainuiia kia akangateiteiia e kia akaputu i te au apinganui mari ra kia akapou maata i te tuatau no te tutu aere i te nuti meitaki.” Akakite ra te puka To Whom the Work Is Entrusted, tei neneiia i te 1919, e: “Akaraanga e ākā angaanga teia, inara na te Atu teia, e na roto i tona maroiroi ka rave ua rai matou i teia angaanga.” Ae, mei te au Kerititiano o mua ana, kua rave mataku kore te au taeake i te angaanga, ma te irinaki i te vaerua tapu kia tauturu ia ratou kia tutu aere ki te au tangata ravarai. Pera katoa i teia tuatau te irinaki nei rai tatou i te vaerua tapu.

8-9. Eaa te au ravenga ou ta te akaaerenga a Iehova i taangaanga no te tutu aere?

⁸ Kua taangaanga ta Iehova akaaerenga i te au apinga tauturu no te tutu aere i te nuti meitaki. Ka kapiti mai teia au apinga, i te au puka neneiia, te “Photo-Drama of Creation,” te ponokarapa, te au motoka akatangi ako, akatangianga i runga i te ratio e i ou akenei, te au apinga digital. Te rave katoa nei ta te Atua akaaerenga i te angaanga urianga i te au reo tukeke kare i raveia ana i mua ana! No teaa ra? E rauka  ai i te au tangata ravarai i te akarongo i te nuti meitaki i roto i to ratou reo. Kare a Iehova i papakitai; kua totou aia e ka tutu aereia te nuti meitaki “ki te pa enua katoa, e te au kopu, e te au reo, e te au iti tangata.” (Apo. 14:6, 7) Inangaro aia i te katoatoa kia kite i te karere o te Patireia.

⁹ Akapeea te aronga kare e rauka i te aravei i ko i to ratou apatimani no te mea kua araiia te reira? No te inangaro i te aravei i teia aronga, kua tamata ta Iehova akaaerenga i te au ravenga ou no te tutu aere i te ngai tangata. Ei akaraanga, i te 2001, kua āriki te Pupu Akaaere e kia taangaangaia te pereoo puka e tetai au akaariarianga i Varani e i muri mai ki tetai atu ngai. Kua puapinga te reira. I te 2011 kua tamataia teia ravenga ou i Marike ki te oire maata te tangata, ko New York City. I roto i te mataiti mua, kua orongaia e 102,129 puka e e 68,911 makatini ki te au tangata. E 4,701 tangata tei pati mai i tetai apii Pipiria! Taka meitaki e te turuturu ra te vaerua tapu i teia angaanga. No reira, kua āriki te Pupu Akaaere e kia taangaangaia te pereoo puka e tetai au akaariarianga ki tetai au enua ke.

10. Eaa ta tatou ka rave kia akamaata mai i to tatou karape i te tutu aere?

¹⁰ Eaa taau ka rave. E taangaanga meitaki i te au ravenga apiipii ta Iehova i oronga mai i te au uipaanga Kerititiano. Angaanga putuputu ki toou pupu tutu evangeria. I reira koe, e tauturuia ai i te ngai te paruparu ra koe e ka akamaroiroiia e te akaraanga manea o tetai pae. E akakoromaki i te rave i te angaanga tutu aere. Mei ta tatou irava mua e akamaara maira, ka rave tatou i to te Atua anoano ma te tauturu a te vaerua tapu, kare i to tatou maroiroi. (Zeka. 4:6) No te mea te rave nei tatou i ta te Atua angaanga.

11. Akapeea te pupu akaaere i te anere mataiti mua i te akaari i te ‘au i rotopu i te iti tangata o te Atua?

¹¹ I te anere mataiti mua. Kua angaanga taokotai te pupu akaaere i Ierusalema no te akatupu i te tu mako e te ‘au i rotopu i to te Atua iti tangata. (Anga. 2:42) Ei  akaraanga, i te tauetono anga tetai pae no runga i te peritome i te 49 T.N., kua uriuri te pupu akaaere ma te tauturu a te vaerua tapu i teia māroanga. Naringa i vai ua te ke i roto i te putuputuanga no teia manamanata, kare e rauka ia ratou te rave i te angaanga tutu aere. Noatu e ngati Iuda ratou, kare te au apotetoro e te aronga pakari i akakeuia e te peu ngati Iuda me kore e te manako o te aronga e turuturu ra i teia māroanga. Mari ra, kua akara ratou ki ta te Atua Tuatua e te vaerua kia arataki i ta ratou ikianga. (Anga. 15:1, 2, 5-20, 28) Eaa tei tupu mai? Kua akameitaki a Iehova i ta ratou ikianga, kua tupu te ‘au e te taokotai, e kua rave ua rai ratou i te angaanga tutu aere.—Anga. 15:30, 31; 16:4, 5.

12. Eaa te akaari maira i te tu mako e te ‘au o ta Iehova akaaerenga i teia tuatau?

¹² I teia tuatau. Kua tauturu ta Iehova akaaerenga i te akono i te tu mako e te ‘au i rotopu i to Iehova iti tangata. Mei te 1895 mai, kua tataia tetai atikara i roto i te Zion’s Watch Tower and Herald of Christ’s Presence o Noema 15 no runga i te tu “Mako e te Tika,” no roto mai ia 1 Korinetia 14:40. Te na ko ra te atikara: “Maata te au manako ta te apotetoro i tata ki te Putuputuanga no runga i te tu mako . . . E mea tau no te aru meitaki i ‘te au tuatua ravarai oki i tataia i muatangana, i tataia ïa kia kite tatou.’” (Roma 15:4) Ae, te kiteaia nei teia tu mako e te ‘au o te Kerititiano o mua ana i roto i ta Iehova akaaerenga i teia tuatau. Ei akatutuanga: Me tae koe ki tetai Apii Punanga Tiaki i roto i tetai putuputuanga—i te enua ke—ka kite koe akapeea te apii me raveia ana e te atikara e uriuriia ra. I reira rai ka mareka koe! Eaa ua ra kua vai rai te taokotaianga no te vaerua tapu o te Atua?—Zepha. 3:9.

13. Kia tau kia Iakobo 3:17, eaa te au uianga ka ui tatou?

¹³ Eaa taau ka rave. Inangaro a Iehova i tona iti tangata kia “vai rai te taokotaianga a te vaerua ra i te ruru o te au.” (Ephe. 4:1-3) E ui kia koe uaorai: ‘Te akaari ra ainei au i te tu taokotai e te ‘au i roto i te putuputuanga? Te akarongo ra ainei au ki te aronga arataki? Ka irinaki ainei tetai  kiaku, me e apainga taku i roto i te putuputuanga? E tae vave ana au, e tauturu ua ana, e te viviki i te rave i te angaanga?’ (E tatau ia Iakobo 3:17.) Me kite koe ka anoanoia te akatikatikaanga, e pure no te vaerua tapu. Ia koe e ariu ra ki te reira kia akatanotano i toou tu e te akakeu ia koe kia angaanga, ka akaperepere maata toou au taeake e te au tuaine ia koe.

14. Ia Kolosa 1:9, 10, akapeea a Iehova i te apiianga i tona iti tangata i te anere mataiti mua?

¹⁴ I te anere mataiti mua. E reka ana a Iehova i te apii i tona iti tangata. (Sala. 32:8) Inangaro aia ia ratou kia kite iaia, kia akaperepere iaia, e kia ora e tuatau ua atu ei tamariki akaperepere nana. Kare teia e rauka me kare tana apiianga. (Ioa. 17:3) Kua taangaanga a Iehova i te putuputuanga Kerititiano i te anere mataiti mua no te apii i tona iti tangata. (E tatau ia Kolosa 1:9, 10.) Kua tauturu te vaerua tapu—te “akapumaana” ta Iesu i taputou mai—i te akatupu i teia. (Ioa. 14:16) Kua tauturu te reira i te au pipi kia mārama i te Tuatua a te Atua, kua maara ia ratou te au apiianga ta Iesu i tuatua e i rave, tei tataia i roto i te au Evangeria. Kua akamatutu teia kite i te akarongo o te au Kerititiano o mua ana e to ratou inangaro i te Atua, tana Tamaiti e tetai e tetai.

15. Na teea mataara i kite ana koe ia Iehova i te akatupuanga i tana taputou ia Isaia 2:2, 3?

¹⁵ I teia tuatau. Kua totou a Iehova i te “au rā openga ra,” ka putuputu mai te au tangata ravarai ki tona maunga kia apiiia i tana au aerenga. (E tatau ia Isaia 2:2, 3.) Te kite nei tatou i teia totou e akatupuia nei. Kua akateiteiia te akamorianga mou ki rungao i te au akamorianga viivii. E ākā umukai pae vaerua tikai ta Iehova e oronga mai nei! (Isa. 25:6) Na roto  i “te tavini akono meitaki e te pakari,” te oronga maira aia i te au kai maata e te tukeke, mei te au atikara ki te au akoanga e te au teata digital e te au vitio. (Mata. 24:45) Aiteite to tatou tu ki te oa o Iobu ko Eliu, tei tuatua e: “Koai tei aite [i te Atua] i te apii anga?”—Iobu 36:22.

16. Eaa taau ka rave kia maroiroi ua atu koe i te pae vaerua?

¹⁶ Eaa taau ka rave. Ka tauturu te vaerua o te Atua ia koe kia taangaanga i taau e tatau ra e apii ra i roto i ta te Atua Tuatua. Pure iora te tata salamo e: “E apii mai koe, e Iehova, i toou ra arataa, kia aere au i taau ra tuatua-mou; kia tavaitai toku ngakau i te mataku anga i to ingoa.” (Sala. 86:11) No reira, e kai i te kai pae vaerua ta Iehova e oronga maira na roto i tana Tuatua e tana akaaerenga. Ae, ko taau akakoroanga kare anake e kia rauka ua te kite. Ka akapapu koe e teia te tuatua mou e ka taangaanga i te reira i roto i toou oraanga. Ka tauturu te vaerua o Iehova ia koe kia rave i teia. Ka akamaroiroi katoa koe i toou au taeake e te au tuaine. (Ebe. 10:24, 25) No teaa ra? No te mea e ngutuare pae vaerua ratou noou. E pure no te vaerua o te Atua kia tauturu ia koe kia paupau ma te ngakau tae i te au uipaanga Kerititiano e kia aruaru i te rave i taau tuanga i te uipaanga. Na teia mataara te akaari ra koe kia Iehova e tana Tamaiti e te inangaro ra koe i ta raua “mamoe” akaperepere.—Ioa. 21:15-17.

17. Na teea mataara ka akaari koe e te turu tiratiratu ra koe i ta Iehova akaaerenga?

¹⁷ Kare e roa atu ko te akaaerenga anake ka vai ki te enua nei ko tei aratakiia e te vaerua o te Atua. No reira e rave maroiroi i te angaanga ma te akaaerenga a Iehova. Akaari ua rai i to te Atua aroa papakitai kore ki te tangata na te tutu aere anga ki te au tangata ravarai. E aru i tona inangaro i te tu mako e te ‘au e te tu taokotai i roto i te putuputuanga. E akarongo ki toou Puapii Maata na te apiianga mei tana umukai pae vaerua e oronga maira aia. Me takoreia to Satani ao, kare koe e mataku. Mari ra, ka tu koe ma te ngakau toa ki te pae i te aronga e tavini tiratiratu ra i ta Iehova akaaerenga.