1. Eaa ta tatou ka manako no runga i tetai tangata aroa?

ME AKAMANAKO tatou i tetai tangata aroa, penei ka tamanako tatou i tetai tangata takinga meitaki, ngakau maanaana, tangi aroa e te oronga ua. Penei ka akamaara tatou i te parapore a Iesu no te tangata Samaria. Ko teia tangata no te enua ke mai “tei aroa atu” i te tangata ngati Iuda tei opuia e te aronga keia e kua akarukeia kia mate. “Aroa atura” te tangata Samaria i te tangata ngati Iuda tei rokoia e te tumatetenga e kua akono iaia ma te aroa. (Luka 10:29-37) Te akataka maira teia akatutuanga i tetai tu manea o te Atua​—te aroa. E akaari ana te Atua i teia tu aroa no tona inangaro ia tatou e ka akaari aia i te reira kia tatou i te au rā ravarai na roto i te au mataara tuke ke.

2. Eaa tetai mataara ke ka akaariia te aroa?

² Penei ka akamanako tatou i tetai mataara ke ka akaari te tangata i te aroa. Penei ka tāpu te tangata aroa i te akautunga i tetai tangata tei tau kia akautungaia. Na roto i teia tu, kua aroa maata mai a Iehova ia tatou. “Kare akenei aia i akaoko mai ia tatou e kia aite ki ta tatou au ara,” i karanga ai te tata salamo. (Sala. 103:10) Inara, i tetai taime ka ako pakari a Iehova i te tangata tei rave i te tarevake.

3. Eaa te au uianga ka pau tatou?

³ I teia atikara, ka pau tatou e toru uianga: Eaa a Iehova i akaari ei i te aroa? Ka rauka ainei te ako pakari i tetai tangata ma te aroa? E eaa te ka tauturu ia tatou kia akaari i te aroa? Akara tatou akapeea te Tuatua a te Atua me pau i teia au uianga.

4. Eaa ra a Iehova i akaari ei i te aroa?

⁴ Mea inangaro na Iehova te aroa. Kua akauruia te apotetoro ko Paulo kia tata e “aroa maata” to te Atua. I roto i teia irava, te akataka ra a Paulo i te aroa o te Atua na te oronga anga i te  manakonakoanga no te oraanga i te rangi ki tona au tavini apa ua tei akatainuia. (Ephe. 2:4-7) Inara kare a Iehova e aroa ua mai i te aronga akatainuia. Akakite te tata salamo ko Davida: “Takinga-meitaki to Iehova ki te tangata ravarai; e te vai ra tona aroa akaperepere ki runga i tana katoa ra au angaanga.” (Sala. 145:9) No to Iehova akaperepere i te tangata ravarai, ka akaari aia i te aroa me e tumu tau tetai kia pera aia.

5. Akapeea a Iesu i apii ei no runga i to Iehova aroa?

⁵ Kua mārama a Iesu e kare e aiteia te aroa ta Iehova e akaari ra. Kua angaanga kapiti te Metua e te Tamaiti i te rangi e tauatini ua atu mataiti i mua ake ka aere mai ei a Iesu ki te enua nei. (Mase. 8:30, 31) Maata te au atianga i kite ei a Iesu i tona Metua i te akaari anga i te aroa no te aronga ara. (Sala. 78:37-42) I roto i tana apiianga, kua taiku putuputu a Iesu i teia tu akaperepereia o tona Metua.

6. Akapeea a Iesu te akatutu anga i te aroa o tona Metua?

⁶ I roto i te atikara i mua ana, akakite a Iesu i te parapore no te tamaiti ngaro ei tauturu ia tatou kia mārama mei teaa te maata o to Iehova aroa. Kua akaruke te tamaiti i tona kainga e “kua kaituauau atura i tona apinga i te kanga.” (Luka 15:13) Muri mai, kua tataraara aia i tana peu tau kore, kua taakaaka iaia uaorai e kua oki ki tona kainga. Akapeea tona metua te ariu anga atu? Kare te tamaiti mapu i tiaki roa. Karanga a Iesu: “Tei te ngai mamao rai [te tamaiti], kua akara maira tona metua iaia, aroa maira, oro maira, takave maira i runga i tona kaki, kua ongi maira iaia.” Kare te metua i taakama ana i tana tamaiti. Mari ra, kua aroa atu i tana tamaiti e kua akakore i tana ara, e kua āriki akaou iaia ki tona ngutuare. Kua rave te tamaiti ngaro i te ara maata, inara no tei tataraara aia ma te ngakau tae, kua akakore tona metua i tana ara. Te akatutu maira te metua i roto i teia parapore ia Iehova. Na roto i te tu pumaana, kua akatutu a Iesu i te ngakau puareinga o tona Metua i te akakore i te ara a te aronga ara tei tataraara ma te ngakau tae.​—Luka 15:17-24.

7. Akapeea te tu i akaari ei a Iehova i tona aroa te akapapu anga i tona pakari maata?

⁷ Akaari a Iehova i te aroa no tona pakari aite kore. Ka rave ua rai a Iehova i te au ikianga tei riro ei meitaki no tana au mea i anga. Akakite te Pipiria e ko “te pakari no runga maira . . . kua ki ïa i te aroa, e te takinga-meitaki.” (Iako. 3:17) Mei tetai metua aroa rai, kua kite a Iehova e ka puapingaia tana tamariki me akaari  aia i te aroa no ratou. (Sala. 103:13; Isa. 49:15) No to Iehova aroa i tona iti tangata, e manakonakoanga to ratou noatu e aronga apa ua ratou. No te pakari maata o Iehova, ka akaari ua rai aia i te aroa me e tumuanga tetai kia pera aia. I taua taime rai, kua kite a Iehova aea aia e tāpu ei i tona aroa. Ma te pakari, kare aia e akaari i te aroa me ka akatika ua rai te reira i te rave ara.

8. I tetai au atianga, eaa te ka raveia, e no teaa ra?

⁸ Akamanako ana e kua rave akakoro tetai tavini o te Atua i te ara na te noo anga i te oraanga tau kore. Ka akapeea i reira? “Auraka kotou e kapiti atu” kiaia, i karanga ai a Paulo. (1 Kori. 5:11) Ka akaateaia te aronga rave ara tei kore e tataraara mei te putuputuanga. Ka raveia te reira ei paruru i te au taeake e te au tuaine akarongo e te akono i to Iehova au turanga tapu. Inara, penei e ngata i tetai pae i te akamanako i te akaatea anga ei akairo i to te Atua aroa. E tika ainei teia? Ka akara tatou.

9-10. Kia tau ia Ebera 12:5, 6, eaa tatou i karanga ai e mea aroa kia akaatea i tetai tangata mei te putuputuanga? Akatutu mai.

⁹ Me rongo tatou i te tuatua akakite i ko i te uipaanga Kerititiano no runga i tetai tangata ta tatou i akaperepere e “kare aia e kapiki akaouia e e Kite no Iehova,” ka maromaroa takiri tatou. Penei ka ui tatou me kua anoanoia rai aia kia akaateaia. E mea aroa ainei kia akaatea i tetai mei te putuputuanga? Ae. Me tāpu i te ako mei tetai tangata e anoano ra i te reira, kare i te tu pakari e te aroa. (Mase. 13:24) Me akaateaia tetai tangata ara tei kore e tataraara, ka tauturu ainei iaia kia taui? Ae. E manganui tei inga no te rave i te ara kino kua tauturuia e teia akoanga a te aronga pakari kia rako tangata mai, kia taui i to ratou aerenga kino e kia oki mai kia Iehova.​—E tatau ia Ebera 12:5, 6.

¹⁰ Akamanako i teia akatutuanga. Kua kite te tiaki mamoe e kua maki tetai mamoe ana. Kite aia e ei rapakau i teia tu maki, ka anoanoia kia akaatea i te mamoe maki mei roto i te anana. Inara, ka inangaro te mamoe i te aere kapiti ma te anana e penei ka maromaroa me noo takake mai. Inara ko te aiteanga ainei e tu aroa kore to te tiaki e te takinokino ra i te mamoe na roto i teia ravenga rapakauanga? Kare rava. Kua kite aia e me tuku ua i te mamoe kia aru i te anana, ka totoa te maki. Na te akaatea anga mai i te mamoe maki, ka paruru aia i te katoaanga o te anana.​—Akaaite ia Levitiku 13:3, 4.

11. (a) Akapeea te tangata tei akaateaia i aite ei mei te mamoe maki? (e) Eaa te tauturu ka rauka mai e te aronga kua akaateaia?

¹¹ Penei ka akaaite tatou i tetai Kerititiano tei akaateaia mei taua mamoe maki ra. No tei takinoia tona pirianga kia Iehova, aite aia mei tetai tangata maki rai. (Iako. 5:14) Mei te maki piri te ka totoa viviki ki te katoatoa, ka riro tetai tangata tei takinoia tona pirianga kia Iehova ei akanauru i tetai ke kia rave i te kino. No reira i anoanoia ai kia akaatea i te tangata ara mei te putuputuanga. Te akaari maira teia i to Iehova aroa no te au taeake tiratiratu i roto i tana anana, e penei ka tauturu i te tangata rave ara kia kite mei teaa rai te kino o tana ara e kia tataraara. Iaia e akaateaia ra, ka rauka iaia i te aere ki te au uipaanga, te ngai ka angaiia aia ki te kai pae vaerua e ka akamaroiroiia tona akarongo. Ka rauka katoa iaia te tatau i te au puka e te akara i te JW Broadcasting^®. Pera katoa, me kite te aronga pakari e te rave ra aia i te tauianga, penei ka oronga ratou i tetai tauturu na roto i te ako i tetai au taime ei tauturu iaia kia akameitaki i tona pirianga kia Iehova e kia āriki akaouia mai ei Kite no Iehova. *

12. Eaa te mea aroa ta te aronga pakari ka rave no tetai tangata rave ara tei kore i tataraara?

 ¹² E puapinga kia akamaara e ko te aronga rave ara ua tei kore i tataraara te ka akaateaia. Kua mārama te aronga pakari e e apainga puapinga teia e ka akamanako meitaki i mua ake ka rave ei ratou i te tukuanga tika kia akaatea iaia ki vao. Kua kite ratou e ka ako a Iehova “ma te tuatua-tau,” no reira ka tauta ratou kia aru i tona tu. (Iere. 30:11) Akaperepere ratou i te au taeake e kare ratou i inangaro i tetai ua atu apinga kia takino i to ratou pirianga kia Iehova. Inara i tetai taime, ko te mea aroa kia rave koia oki, kia akaatea i te tangata rave ara mei te putuputuanga no tetai tuatau.

13. Eaa te tumu i akaateaia ai tetai Kerititiano i Korinetia?

¹³ Akamanako ana i ta te apotetoro ko Paulo i rave no tetai tangata ara tei kore i tataraara i te anere mataiti mua. Te noo ra tetai Kerititiano i Korinetia i te oraanga tau kore ma te vaine a tona metua tane. E mea viivii roa teia! Akakite a Iehova ki te ngati Iseraela no runga i teia peu: “E te tangata e moe i te vaine a tona metua, i ta tona metua e moe ra, e mamate katoa ïa raua ravarai.” (Levi. 20:11) Kare a Paulo i akakite ana ki te putuputuanga kia tamate i tera tangata. Inara kua akaue aia i to Korinetia kia akaatea iaia ki vao. Kua riro te peu tau kore a teia tangata ei takino i te putuputuanga, e kare tetai papaki i manako ana e ara kino teia!​—1 Kori. 5:1, 2, 13.

14. Akapeea a Paulo te akaari anga i te aroa no te tangata tei akaateaia i Korinetia, e no teaa ra? (2 Korinetia 2:5-8, 11)

¹⁴ Muri mai, kua apii a Paulo e kua rave teia tangata i te au tauianga maata. Kua tataraara mou tikai teia tangata ara. Noatu kua taakama aia i te putuputuanga, akakite a Paulo ki te aronga pakari e kare aia i inangaro kia pakari roa tana ako. Akakite aia kia ratou: “E teianei e akakore atu kotou i tana ara, e e akapumaana atu e tikaʼi.” Teia te tumu i tuatua akapera ai a Paulo: “Ko te apuku uaia aea taua tangata ra i te aue maata.” Kua tangi a Paulo i teia tangata tei tataraara. Kare te apotetoro i inangaro i teia tangata kia maromaroa tikai e kia manako puapinga kore no tana i rave e ka akamutu aia i te kimi i te akakoreanga ara.​—E tatau ia 2 Korinetia 2:5-8, 11.

15. Akapeea te aronga pakari me ako ma te aroa?

¹⁵ Mei ia Iehova rai, e mea inangaro na te aronga pakari kia akaari i te aroa. Ka ako pakari ratou i te tangata ara me anoanoia, inara ka akaari ratou i te aroa me e tumuanga tau tetai no te akaari i te reira. Me kare te aronga  pakari e ako i te tangata ara, kare teia i te mea aroa mari ra te akatika ua ra ratou i te ara. Inara, ko te aronga pakari ua ainei ka tau kia akaari ua i te aroa?

16. Ia Maseli 21:13, eaa ta Iehova ka rave no te aronga tei kore i akaari i te aroa?

¹⁶ Ka inangaro te au Kerititiano pouroa kia akaari i te aroa mei ia Iehova rai. No teaa ra? Tetai tumu koia oki kare a Iehova e akarongo ki te aronga tei kore e akaari i te aroa. (E tatau ia Maseli 21:13.) Kare tatou e inangaro ia Iehova kia kopae i ta tatou pure, no reira ka matakite tatou auraka kia akatupu i te ngakau aroa kore. Kare tatou e inangaro kia “popani i [to tatou] taringa i te aue o te ao ra,” mari ra kia papa ua rai tatou i te akarongo ki tetai taeake Kerititiano tei rokoia e te tumatetenga. Mei te reira katoa, ka tauta pakari tatou i te taangaanga i te ako a te Pipiria: “Ko te akaapa anake tana e rauka, kare te aroa, ta tei kore rava i aroa ra.” (Iako. 2:13) Me akaaka tatou e me akamaara e ka anoano tatou i te aroa, ka akaari tatou i te aroa. Ka inangaro tikai tatou i te akaari i te aroa me āriki akaouia tetai tangata ara tei tataraara ki roto i te putuputuanga.

17. Akapeea te Ariki ko Davida te akaari anga i te ngakau aroa?

¹⁷ Ka tauturu te au akaraanga Pipiria ia tatou kia akaari i te aroa e kia kopae i te tu aroa kore. Ei akaraanga, akamanako i te Ariki ko Davida. Te maataanga i te taime, e ngakau aroa tona. Noatu kua inangaro a Saula i te tamate iaia, kua akaari a Davida i tona aroa no teia ariki akatainuia a te Atua, e kare rava aia i akaoki ana i te kino.​—1 Samu. 24:9-12, 18, 19.

18-19. Eaa te nga atianga i akaari ei a Davida i te vaerua aroa kore?

¹⁸ Inara, kare a Davida i akaari ana i te aroa i te au taime ravarai. Ei akaraanga, te akakino anga te tangata mārokiakia ko Nabala, e kare i oronga i te kai na Davida e tona au tangata, kua riri maata a Davida e kua akakoro aia kia tamate ia Nabala e te au tane i roto i tona ngutuare. Inara e tu takinga meitaki e te akakoromaki to te vaine a Nabala ko Abigaila, e kua viviki aia i te oronga i te kai na Davida. No reira, kare a Davida i akamaringi i te toto o te aronga ara kore.​—1 Samu. 25:9-22, 32-35.

¹⁹ I tetai atianga ke, kua akakite te peroveta ko Natana kia Davida no runga i tetai tangata apinganui tei rave i te mamoe akaperepere a tetai tangata putaua. Kua pau a Davida ma te riri: “Te ora rā Iehova, ko te tangata i pera ra, e tau tikai iaia te mate.” (2 Samu. 12:1-6) Kua kite a Davida i te Ture a Mose. Me keia tetai tangata i te mamoe, ka anoanoia aia kia tutaki e ā mamoe no te mamoe okotai. (Exo. 22:1) E tau ainei iaia te mate? E utunga pakari te reira. Inara e tua akaaiteite ua ta Natana i akakite ei akatutu i te au ara kino tikai​—te au ara a Davida! E aroa maata atu ta Iehova i akaari no Davida me akaaiteia ki to Davida aroa no te tangata apinganui!​—2 Samu. 12:7-13.

20. Eaa ta tatou ka apii mei te akaraanga o Davida?

²⁰ No te riri maata o Davida ia Nabala i akava ei aia i teia tangata e tona ngutuare kia tamateia.  E i muri mai, kua karanga a Davida e kua tau te tangata apinganui i roto i te akatutuanga a Nabala kia mate. I roto i te rua o te akaraanga, penei ka ui tatou eaa ra tetai tangata takinga meitaki mei ia Davida rai ka akava ei i te tangata apinganui kia tamateia. Akamanako ana eaa te tupu ra kia Davida i tera tuatau. Kua kinokino tona akava ngakau. Ka riro te vaerua akaapa e te aroa kore ei akairo e kua paruparu te pirianga o tetai tangata kia Iehova. Kua akamatakite a Iesu i tana au pipi: “Auraka e akakino atu; kia kore kotou e akakinoia mai. Ko ta kotou oki e akakino ia etai ke ra, e akakino katoaia kotou i te reira.” (Mata. 7:1, 2) No reira kia matakite tatou i te vaerua aroa kore e kia tauta i te akaari i te “aroa maata,” mei to tatou Atua rai.

21-22. Eaa tetai au mataara ka rauka i te akaari i te aroa?

²¹ Me e aroa to tatou, kare tatou e tangi ua i etai ke. Mari ra, ka rave katoa tatou i tetai angaanga no te tauturu ia ratou. No reira, ka rauka ia tatou pouroa i te akamanako meitaki koai ka inangaro tauturu i roto i to tatou ngutuare, te putuputuanga e te ngai e noo ra tatou. Papu e maata te au atianga no te akaari i te aroa! E tangata ainei tetai tei inangaro i te akapumaana? Ka rauka ainei ia tatou te oronga i te tauturu, penei na te kave anga i te kai me kore te rave i tetai angaanga tauturu? Ka anoano ainei tetai Kerititiano tei āriki akaouia mai kia piri ki tetai oa te ka akamaroiroi e ka akapumaana iaia? Ka rauka ainei i te akakitekite i te karere pumaana o te nuti meitaki ki etai ke? Ko teia tetai ravenga meitaki roa atu no te akaari i te aroa ki te aronga ta tatou ka aravei.​—Iobu 29:12, 13; Roma 10:14, 15; Iako. 1:27.

²² Me kite tatou e koai ma ka inangaro tauturu, ka kite tatou e maata ua atu te au atianga no te akaari i te aroa. Me akaari tatou i te aroa, ka akarekareka maata tatou i to tatou Metua i te rangi, te Atua “aroa maata”!