1. Eaa to tatou “anoano i te pae vaerua,” e eaa te pirianga o te reira ki te mataora?

 KARE te mataora mou tikai i te tu mataora ua te ka tupu ua mai e oti ka ngaro atu. Ka vai ua rai te reira i roto i te oraanga o tetai tangata. Akapeea ra? Kua akamārama mai a Iesu i roto i tana Ako i te Maunga: “E mataora to te aronga tei manako i to ratou anoano i te pae vaerua.” (Mata. 5:3, NW) Kua kite a Iesu e kua angaia te au tangata ma te inangaro pakari i te kite e i te akamori i Tei Anga mai ia ratou, te Atua ko Iehova. Ko to tatou “anoano i te pae vaerua” te reira. No te mea e “Atua mataora” a Iehova, ka mataora katoa te aronga te akamori ra iaia.​—1 Timo. 1:11, (NW).

2-3. (a) Kia tau ki ta Iesu, koai ma te ka mataora? (e) Eaa ta tatou ka uriuri i roto i teia atikara, e no teaa ra?

² Ka mataora ainei tatou me kare o tatou manamanata? Kare. I roto i tana ako, kua akakite mai a Iesu i tetai mea umere. Koia oki, te aronga “tei aue”​—penei kua tataraapa no ta ratou ara me kore no te maata te manamanata i roto i to ratou oraanga—​ka mataora rai ratou. Pera katoa, te aronga “tei takinga-kinoia i te tuatua-tika ra” me kore te aronga tei ‘akakinoia’ no te mea e au pipi ratou na Karaiti, ka mataora katoa, i karanga ai a Iesu. (Mata. 5:4, 10, 11) Akapeea tetai e mataora ai i roto i te reira turanga?

³ Te apii maira a Iesu e ka tupu te mataora kare na roto i tetai turanga tau ua o te oraanga, mari ra na roto i to tatou anoano i te pae vaerua e te akavaitata anga ki te Atua. (Iako. 4:8) Akapeea tatou me rave i te reira? I teia atikara, ka uriuri tatou e toru takainga te ka akatupu i te mataora mou tikai.

4. Eaa te takainga mua no te mataora mou tikai? (Salamo 1:1-3)

⁴ TAKAINGA 1: Kia mataora tikai, ka anoanoia tatou kia akamanako i te kai pae vaerua. Kua akaaite a Iesu i te Tuatua a te Atua ki te kai. No reira, e ora ai te tangata e te manu ka anoanoia kia kai ratou i te au kai pae kopapa. Inara, ko te tangata anake ua te ka akamanako i te au kai pae vaerua. Ko ta tatou ïa ka inangaro. No reira a Iesu i karanga ai: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mata. 4:4) No reira, auraka tatou e tuku kia topa tetai rā ma te kore e akamanako i te kai pae vaerua i roto i te Tuatua akaperepere a te Atua, te Pipiria. Te akakite maira te tata salamo: ‘E ao to te tangata tei inangaro ra i te ture a Iehova; e tei tana ture tona manako anga i te po e te ao.’​—E tatau ia Salamo 1:1-3.

5-6. (a) Eaa ta tatou i kite mai i roto i te Pipiria? (e) Na roto i teea au mataara ka tauturuia tatou no te tatau anga i te Pipiria?

⁵ I roto i te Pipiria, kua oronga aroa mai a Iehova i tetai akakiteanga puapinga kia mataora tatou. Kua kite tatou i tona akakoroanga no runga i to tatou oraanga. E akapeea me akavaitata kiaia e kia akakore mai aia i ta tatou au ara. E te manakonakoanga umere tana i taputou mai no te tuatau ki mua. (Iere. 29:11) Rekareka tikai to tatou ngakau i teia au tuatua mou no te apiianga i te Pipiria!

⁶ Kua kite katoa tatou e maata te ako anga tau a te Pipiria no runga i te oraanga i te au rā ravarai. Me aru tatou i taua ako  anga, ka mataora tatou. Me manako taitaia koe no te oraanga manamanata, e akapou meitaki i te taime na te tatau anga i te Tuatua a Iehova e te akamanako anga i te reira. Karanga ra a Iesu: “Ko tei akarongo i te tuatua a te Atua e kua akono atura, ko ratou tei [mataora] roa.”​—Luka 11:28.

7. Eaa te ka tauturu ia koe kia puapingaia no te tatau anga i te Tuatua a te Atua?

⁷ Ia koe e tatau ra i te Tuatua a te Atua, e akapou meitaki i toou taime i te tatau marie. Ei akatutuanga, kua tupu ana ainei teia kia koe? Kua tunu mai tetai tangata i te kai e reka ana koe. Penei kare e rava ana toou taime me kore te manata ra koe i tetai mea, kua kai rapurapu ua koe e kare i kai marie ana i te reira. Oti anga taau kaikai i kite ei koe e kua kai rapurapu koe, e naringa i kai marie ua i taau kai. I na, ko toou tu ainei ïa me tatau rapurapu koe i te Pipiria e kare e tatau e te akamanako marie i tana karere? No reira, e akapou meitaki i te taime kia tatau koe i ta te Atua Tuatua ma te rekareka; na te akamanako anga i te au tutu, te au reo, e taau e tatau ra. Me rave koe i teia ka mataora koe.

8. Eaa ta “te tavini akono meitaki e te pakari” e rave nei? (Akara katoa i te tataanga rikiriki.)

⁸ Kua iki a Iesu i “te tavini akono meitaki e te pakari” kia oronga mai i te kai pae vaerua i te ora mou, e te angai meitakiia nei tatou i te pae vaerua. * (Mata. 24:45) E tuanga puapinga maata te au Tuatua Tapu tei akauruia i roto i te au mea ravarai ta te tavini akono meitaki i oronga mai. (1 Tesa. 2:13) Te tauturu maira taua kai pae vaerua ia tatou kia kite i to Iehova manako i roto i te Pipiria. No reira tatou ka tatau ei i te au makatini te Punanga Tiaki e te E Ara! e te au atikara i runga i te jw.org. E ka akapapa tatou no te au uipaanga a te putuputuanga i te epetoma e te openga epetoma. E ka akarakara tatou i te au porokaramu o te mārama i runga i te JW Broadcasting^®. E na te akamanako anga i te kai pae vaerua ka tauturu te reira ia tatou kia rave i te takainga rua te ka akatupu mai i te mataora mou tikai.

9. Eaa te takainga rua te ka akatupu i te mataora mou tikai?

⁹ TAKAINGA 2: Kia mataora tikai, ka anoanoia kia akono tatou i ta Iehova au ture. Kua tata te tata salamo: “E ao to te aronga katoa i mataku ia Iehova; ko tei aere na tona ra au arataa.” (Sala. 128:1) Kia mataku ia Iehova te aiteanga kia akangateitei maata tatou iaia kia kore tatou e rave i tetai mea te ka akamareka kore iaia. (Mase. 16:6) No reira, ka tauta ua rai tatou i te akono i te au ture a te Atua no te au mea tika e te tarevake i roto i te au kapi o te Pipiria. (2 Kori. 7:1) Ka mataora tatou me rave tatou i te au mea ta Iehova e inangaro ra e ka kopae i te au mea tana e rikarika ra.​—Sala. 37:27; 97:10; Roma 12:9.

10. Kia tau kia Roma 12:2, eaa ta tatou ka rave?

¹⁰ E tatau ia Roma 12:2. Penei kua kite tetai tangata e tei ia Iehova te tikaanga i te akakite mai eaa te mea tika e te tarevake, inara ka anoano katoaia aia kia āriki i ta te Atua au ture. Ei akaraanga, kua kite tetai tangata e tei te kavamani te tikaanga i te akanoo i te ture no te akaoro viviki i runga i te mataara. Inara, ka āriki ainei aia i te au ture? Inara, kua akaoro viviki aia. Na roto i to tatou tu, te irinaki tikai ra tatou e me aru tatou i ta Iehova au ture, ko te mataara meitaki rava atu ïa. (Mase. 12:28) Kua kite katoa a Davida i teia tu, i tona tuatua anga no runga ia Iehova: “Ka akakite mairai koe  iaku i te ara ora; tei mua i to aroaro te ki anga o te rekareka; tei to rima katau te pereperekavana e tuatau ua atu.”​—Sala. 16:11.

11-12. (a) Me manamanata me kore me taitaia tatou, ka matakite tatou i teaa? (e) Akapeea te au tuatua i roto ia Philipi 4:8 te tauturu anga ia tatou me iki i te tamataoraanga?

¹¹ Me manamanata me kore me taitaia tatou, penei ka rave tatou i tetai mea te ka tauturu ia tatou kia kore tatou e manamanata. No reira, kia matakite tatou e auraka e rave i tetai mea te rikarika ra a Iehova.​—Ephe. 5:10-12, 15-17.

¹² I roto i tana reta ki to Philipi, kua akamaroiroi te apotetoro ko Paulo i te au Kerititiano kia akamaara ua rai i “te au mea tika ra, te au mea viivii kore ra, te au mea rekarekaia ra, . . . [e] te meitaki.” (E tatau ia Philipi 4:8.) Noatu e kare a Paulo e tata maira no runga i te tamataoraanga, ko tana i tata maira ka akakeu ïa i ta tatou ikianga no te tamataora. E tamata i teia: I te ngai ka kiteaia te tuatua “au mea” i roto i te irava e mono i te reira ki te tuatua “au imene,” “au teata,” “au puka,” me kore “au vitio kangakanga.” Me rave tatou i teia, ka kite tatou e ko teea te au mea ta te Atua ka āriki e kare e āriki. Ka akarotai tatou i to tatou oraanga ki ta Iehova au ture ngateitei. (Sala. 119:1-3) No reira ma te akava ngakau meitaki, ka rauka ia tatou i te neke atu ki te takainga ka aru mai te ka akatupu i te mataora mou tikai.​—Anga. 23:1.

13. Eaa te takainga toru te ka akatupu i te mataora mou tikai? (Ioane 4:23, 24)

¹³ TAKAINGA 3: Akapapu meitaki e ko te akamori anga ia Iehova te mea mua i roto i toou oraanga. No te mea na Iehova i anga mai ia tatou, e tau kia akamori tatou iaia. (Apo. 4:11; 14:6, 7) No reira, te mea puapinga maata atu i roto i to tatou oraanga, ko te akamori anga ia Iehova na roto i te tu tana e inangaro ra, “ma te vaerua e te tuatua-mou.” (E tatau ia Ioane 4:23, 24.) Inangaro tatou i te vaerua tapu o te Atua kia arataki i ta tatou akamori anga kia rotai te reira ki te au tuatua mou i roto i tana Tuatua. Ko ta tatou akamori anga te mea mua noatu te noo ra tatou i tetai enua kua kotingaia me kore kua araiia ta tatou angaanga. I teianei, kua tere atu e 100 o to tatou au taeake e te au tuaine tei roto i te are auri no te mea e Au Kite no Iehova ratou. * Noatu teia tu, te rave mataora nei ratou i te ka rauka na roto i te pure, te apii, e te akakite ki tetai ke no runga i to tatou Atua e tona Patireia! Me akakinoia me kore me takinga kinoia tatou, mataora tatou i te kite e te tauturu maira a Iehova ia tatou kia akakoromaki ua e ka oronga mai aia i te tutaki kia tatou.​—Iako. 1:12; 1 Pete. 4:14.

14. Eaa tei tupu ki tetai taeake mapu i Tajikistan, e no teaa ra?

¹⁴ Kua tupu te au turanga ngatā ki tetai o to tatou au taeake e te au tuaine, inara kua mataora tikai ratou no te mea kua aru ratou i te nga takainga e toru ta tatou i uriuri ake nei. Akamanako ana i tei tupu kia Jovidon Bobojonov, e 19 ona mataiti no Tajikistan mai, no te mea kare aia i inangaro ana i te ō atu ki roto i te vaeau. I roto ia Okotopa 4, 2019, kua opuia aia i ko i tona kainga, kua titiriia ki roto i te are auri no tetai au mārama, e kua takinokinoia ei tangata kino. Kua ripotiia teia tu kino ki roto i te nuti i roto i tetai au enua. Kua  akakiteia mai e kua papaia aia i te tauta anga i te māro iaia kia āriki i te taputou kia vai tiratiratu ki te vaeau e kia aao i te kakau vaeau. I muri mai, kua akaapaia e kua tukunaia ki tetai puakapa tuikaa e tae ua atu ki te tuatau i akakore ei te peretiteni o te enua i tana ara e i akaueia ai kia tukuia kia aere. I roto i teia takinga kino anga, kua akono tamou ua rai a Jovidon i tona tu tuatua tika e tona mataora. Akapeea ra? Na te akamanako ua anga i tona anoano i te pae vaerua.

15. Akapeea i rauka ai ia Jovidon i te akamanako i te kai pae vaerua iaia i roto i te are auri?

¹⁵ Iaia i roto i te are auri, kua akamanako a Jovidon i te kai pae vaerua, noatu e kare ana Pipiria me kore ta tatou au puka. Akapeea i rauka ai iaia te reira? Kua apai mai te au taeake e te au tuaine i te au kai nana e kua tata i te tia o te rā ki runga i te vaʼi kai. No reira, kua rauka iaia i te tatau i te Pipiria e kia akamanako i te reira i te au rā katoa. I muri ake te tukunaia mai anga aia mei te are auri, teia tana ako anga ki te aronga kare i tupu ake te turanga taitaia kia ratou: “E mea puapinga tikai kia taangaanga koe i toou tuatau manamanata kore i te akaoonu i toou kite no runga ia Iehova na te tatau anga i tana Tuatua e ta tatou au puka.”

16. Kua akamou a Jovidon i tona manako ki runga i teaa?

 ¹⁶ Kua akono to tatou taeake i ta Iehova au ture. Kare aia i akamanako ana i te au anoano tarevake e te rave i te au mea kino, kua akamou aia ki runga ia Iehova e Tana e akaperepere ra. Kua akara umere a Jovidon i te manea o te au mea ta te Atua i anga. I te au popongi ravarai ka ara mai aia ki te imene anga a te au manu. I te po ka akara aia ki te mārama e te au etu. Kua karanga aia: “Ko taua au apinga aroa no ko mai ia Iehova kua riro ei tamataora e ei akamaroiroi iaku.” Me āriki rekareka tatou i ta Iehova au mea i te pae vaerua e to te kopapa, ka rekareka to tatou ngakau, e ka rauka i taua rekareka ra i te akamaroiroi ia tatou kia akakoromaki ua.

17. Akapeea te au tuatua o 1 Petero 1:6, 7 i te akakeu i tetai ua atu tangata kua aite tona turanga ki to Jovidon?

¹⁷ Kua tuku katoa a Jovidon i te akamori anga ia Iehova na mua. Kua kite aia i te puapinga no te akono tamou anga i tona tu tuatua tika ki te Atua mou. Kua karanga a Iesu: “Ko toou Atua ra ko Iehova taau e akamori, e koia anake rai taau e akarongo.” (Luka 4:8) Kua māro tikai te au rangatira e te au vaeau kia akaruke a Jovidon i tana akonoanga. Inara, kua pure pakari aia i te au rā katoa e i te au po katoa, i te pati anga kia Iehova kia tauturu mai iaia kia kore aia e tuku i te ‘au me kore e akaruke i tona akarongo mou. Noatu te takinga kino tei tupu kiaia, kare rava a Jovidon i akaruke ana i tona akarongo mou. Tei tupu, rekareka tikai aia no te mea kua rauka mai iaia tetai apinga kare i tupu ana kiaia i mua ake ka opuia ai, papaia ai, e te titiriia anga ki roto i te are auri—koia oki, te timata anga o tona akarongo.​—E tatau ia 1 Petero 1:6, 7.

18. Akapeea tatou me akaari i to tatou mataora?

¹⁸ Kua kite a Iehova i ta tatou e anoano ra kia mataora tikai tatou. Me aru koe i te nga takainga e toru te ka akatupu mai i te mataora mou tikai, ka rauka ia koe i te akaari i toou mataora noatu te taitaia maata. No reira, ka rauka katoa ia koe i te tuatua e: “E ao to te aronga, ko Iehova to ratou Atua.”​—Sala. 144:15.