“ME KARE kotou e tamaki atu ia Varani e Peritane, ka tamate pouroaia kotou!” i ava ei tetai vaeau Nazi ki tetai pupu o te Au Kite o Iehova i te tuatau o te Tamaki II o te Ao. Noatu e te tu ua maira te au vaeau Nazi i te pae mai, kare te au taeake i mataku ana. E ngakau toa tikai ratou! E akaraanga meitaki tikai to te Au Kite o Iehova: Kare tatou e piri ana ki roto i te au tamaki o teianei ao. Noatu me ka tamateia tatou, kare tatou e piri atu ki te au tamaki o teianei ao.

1. OKOTAI RAI O TE ATUA ITI TANGATA

I mua ana, kua iki a Iehova e okotai rai ona iti tangata​—ko Iseraela. Kua kapiki aia i te au Iseraela ei ‘apinga akaperepere maata i te au tangata ravarai.’ (Exo. 19:5) Kua oronga katoa te Atua i tetai tuanga enua no ratou. No reira, te akaue anga te Atua i to Iseraela kia tamaki atu i tetai au enua, kare ratou i tamaki ana e i tamate ana i te aronga te akamori ra ia Iehova. *

I teia tuatau, no roto mai teia aronga akamori mou i “te pa enua ravarai e te au kopu ravarai, e te au iti tangata ravarai, e te au reo katoa oki.” (Apo. 7:9) Me ka piri te iti tangata o te Atua ki roto i te tamaki, te tamaki ra ratou​—e te tamate ra—​i to ratou au taeake akamori.

 2. AKAUE A IEHOVA I TO ISERAELA KIA TAMAKI

I mua ana, na Iehova e tuku ana i te tika e aea e no teaa te au Iseraela ka tamaki ei. Ei akaraanga, kua akaue te Atua ia Iseraela kia rave i tana akava anga ki runga i te au Kanaana, no te mea kua rave ratou i te au akamorianga temoni, te peu ainga viivii, e kua oronga i te tamariki ei atinga. Kua akaue a Iehova i to Iseraela kia takore i teia peu kino i roto i te enua tana i taputou kia ratou. (Levi. 18:24, 25) Te noo anga te au Iseraela ki roto i te Enua Taputouia, kua akaue te Atua ia ratou kia tamaki ei paruru ia Iseraela mei te au enemi kino. (2 Samu. 5:17-25) Inara, kare rava a Iehova i akatika ana i te au Iseraela kia manako ua e ka aere ratou ki te tamaki. Te rave anga ratou i te reira, kua tupu te au tumatetenga.​—Nume. 14:41-45; 2 Para. 35:20-24.

I teia tuatau, kare a Iehova e akaue ana i te tangata kia aere ki te tamaki. E tamaki ana te au enua ei puapinga no ratou uaorai kare no te Atua. Penei ka aere ratou ki te tamaki kia maata atu to ratou enua, kia puapinga i te pae o te moni, te poritiki e te oraanga. Inara akapeea te aronga te aere ra ki te tamaki na roto i te ingoa o te Atua no te paruru i ta ratou akamorianga me kore te tamate i to te Atua au enemi? Ka paruru a Iehova i tona aronga akamori mou e ka takore aia i tona au enemi i roto i tetai tamaki a te tuatau ki mua​—te tamaki o Aramagido. (Apo. 16:14, 16) I te reira tamaki, ka ō mai te au nuku vaeau o te Atua mei te rangi e kare ko tona aronga akamori i te enua nei.​—Apo. 19:11-15.

3. AKAORA TE AU ISERAELA I TE ARONGA TEI AKARONGO

I mua ana, e maata te taime kua akaaroa te au vaeau o Iseraela i te aronga tei akarongo ki te Atua e kua tamate i te aronga tei akavaia e Iehova e kua tau kia tamateia. Teia te nga akaraanga. Noatu kua akaue a Iehova kia takoreia a Ieriko, kua akaora te au Iseraela ia Rahaba e tona ngutuare tangata  no to ratou akarongo. (Iosu. 2:9-16; 6:16, 17) I muri mai, kua akaoraia te oire katoa o Gibeona te akaari anga te ngati Gibeona i te mataku tau no te Atua.​—Iosu. 9:3-9, 17-19.

I teia tuatau, kare te au enua e tamaki ra e akaora ana i te aronga tei taangaanga i te akarongo. I tetai au taime, kua tamatemateia te tangata i roto i te au tamaki o teia au enua.

4. KIA ARU TE AU ISERAELA I TA TE ATUA AU TURE NO TE TAMAKI

I mua ana, kua anoano a Iehova i te au vaeau o Iseraela kia tamaki kia tau ki tana au aratakianga. Ei akaraanga, i tetai au taime kua pati te Atua ia ratou “e au [ta ratou] e apai atu” ki tetai oire te tamaki maira. (Deu. 20:10) Kua anoano katoa a Iehova i te au Iseraela kia vai ma ua to ratou au puakapa e to ratou tu akono tau. (Deu. 23:9-14) E maata te taime, e tauati ana te au nuku vaeau o te au enua i te au vaine i roto i te au enua tei autu ia ratou, kare rava a Iehova i akatika ana i te au Iseraela kia rave i te reira. Te tika, kare ratou e akaipoipo i tetai vaine tei opuia kia tae roa ki te tai marama i muri ake i te opu anga i te reira oire.​—Deu. 21:10-13.

I teia tuatau, kua taina te maata anga o te au enua i tetai koreromotu kia tamaki kia tau ki te au ture. Noatu e kua raveia teia ei paruru i te tangata, ma te mii, kua aati putuputuia teia au ture.

5. KUA TAMAKI TE ATUA NO TONA ITI TANGATA

I mua ana, kua tamaki a Iehova no te au Iseraela, te maata anga o te taime, kua autu ratou na roto i te au semeio. Ei akaraanga, akapeea a Iehova te tauturu anga i te au Iseraela kia autu i te oire o Ieriko? Na roto i ta Iehova arataki anga, “kua maeva iora [te au Iseraela], e maeva maata, e topa pu ua iora taua patu ra ki raro,” i māmā ei ia ratou i te opu i te oire. (Iosu. 6:20) E akapeea ratou te re anga i tetai tamaki ki te ngati Amori? “Kua akatopa mairā Iehova i te ua toka nunui, no runga mai i te rangi, ki runga ia ratou, . . . e maata tei mate i te ua toka i tei mate i te taia e te tamariki a Iseraela ki te koke.”​—Iosu. 10:6-11.

E ARONGA AKAMOEAU TE AU KERITITIANO MOU

Mei ta tatou e kite nei, e tuke to tatou turanga ki to te au Iseraela i taito. Inara, kare teia au tuke i te tumu anake kare tatou e aere ki te tamaki. Te vai atura tetai au tumu. Ei akaraanga, kua akakite te Atua e i te au rā openga, kare te aronga tei apiiia e ïa “e apii akaou i te tamaki,” e kare katoa e piri ki roto i te reira. (Isa. 2:2-4) Pera katoa, karanga a Karaiti ki tana au pipi e “kare [ratou] i to teianei ao”; kua vai takake ua ratou e kare e piri ki te au tamaki o teianei ao.​—Ioa. 15:19.

Kua akamaroiroi katoa a Karaiti i tana au pipi kia rave i tetai atu mea puapinga. Kua apii aia ia ratou kia kopae i te au tu te ka arataki atu ki te akamoupuku, te riri, e te tamaki. (Mata. 5:21, 22) Pera katoa, kua apii katoa aia i tana au pipi kia riro ei aronga “akamoeau” e kia aroa atu i to ratou au enemi.​—Mata. 5:9, 44.

Akapeea tatou tataki tai? Papu, kare tatou e inangaro kia piri atu ki roto i tetai ua atu tamaki, inara penei te vaira tetai au tu kino i roto i to tatou ngakau te ka akatupu i te au taumāro anga me kore te ke i roto i te putuputuanga? Kia maroiroi tatou i te akakore i teia au tu i roto ia tatou.​—Iako. 4:1, 11.

Kare tatou e piri ki roto i te au tamaki a te au enua, ka akatupu tatou i te ’au e te aroa i rotopu ia tatou. (Ioa. 13:34, 35) Kia aruaru ua rai tatou kia vai takake ua me tapapa atu tatou i te rā me takore takiri a Iehova i te au tamaki e tuatau ua atu.​—Sala. 46:9.