1. Eaa ta tetai angera i tuatua, e eaa te aiteanga no tatou?

 ME KA tuatua mai tetai angera kia koe, ka akarongo ainei koe ki tana tuatua? Ko te tika, te tuatua nei tetai angera “ki te pa enua katoa, e te au kopu, e te au reo, e te au iti-tangata.” Eaa tana tuatua? “Ka mataku i te Atua, e akakakā iaia; . . . e akamori kotou iaia i tei anga i te rangi, e te enua.” (Apo. 14:​6, 7) Ko Iehova te Atua mou anake ka akamori te katoatoa. Mareka tikai tatou e kua oronga mai aia i te tuatau kia akamori iaia i roto i tona iero maata i te pae vaerua!

2. Eaa to Iehova iero pae vaerua? (Akara i te pia “ Kare i Te.”)

² Eaa te iero pae vaerua, e ka kitea te akakiteanga e te akamārama anga o te reira kiea? Kare te iero pae vaerua i te are tika tikai. Mari ra ko ta Iehova akanoonooanga no te akamorianga tei akatumuia ki runga i te atinga oko o Iesu. Kua akamārama te apotetoro ko Paulo i teia i roto i tana reta ki te au Kerititiano Ebera i Iudea i te anere mataiti mua. b

3-4. Eaa a Paulo i taitaia ei no te au Kerititiano Ebera i Iudea, akapeea aia i te tauturu anga ia ratou?

³ Eaa a Paulo i tata ai i teia reta ki te au Kerititiano Ebera i Iudea? Penei e rua tumu. Mea mua, kia akamaroiroi ia ratou. Kua utuutuia te maata anga ia ratou i roto i te akonoanga ngati Iuda. Kua akakino to ratou arataki akonoanga ia ratou no te riro anga mai ei au Kerititiano. No teaa ra? No te mea kare o te au Kerititiano iero manea ka aere no te akamorianga, kare e atarau no te oronga i te  atinga ki te Atua, e kare e kau taunga no te tavini ia ratou. Penei kua akamaromaroa teia i te au pipi a Iesu e kua akaparuparu i to ratou akarongo. (Ebe. 2:1; 3:​12, 14) Penei kua timataia tetai pae ia ratou kia oki akaou ki te akonoanga ngati Iuda.

⁴ Te rua, kua akakite a Paulo e kare te au Kerititiano Ebera i tauta ana kia mārama i te au apiianga ou e te oonu, te “kai pakari” i roto i te Tuatua a te Atua. (Ebe. 5:​11-14) I te akaraanga, te aru ra rai tetai pae i te Ture a Mose. Inara, kua akamārama a Paulo e kare te au atinga a te Ture e akakore i te ara. No teia tumu i “akakore roaia” ai te Ture. No reira kua apii a Paulo i tetai au tuatua mou puapinga. Kua akamaara aia ki tona au taeake Kerititiano “i te irinakianga meitaki i akavaitata ai [ratou] ki te Atua” tei akatumuia ki runga i te atinga oko o Iesu.—Ebe. 7:​18, 19.

5. Eaa ta tatou ka mārama mai mei te puka Pipiria o Ebera, e no teaa ra?

⁵ Kua akamārama a Paulo ki tona au taeake Ebera i te tumu i meitaki atu ei te akamorianga Kerititiano i te akamorianga a te ngati Iuda. Ko te akamorianga a te ngati Iuda “e ata anake ïa no te ka tupu a muri atu: kareka te kopapa tika ra, ko te Mesia ïa.” (Kolo. 2:17) Ko te ata o tetai apinga, ko te tutu ua te reira no te apinga tika tikai. Pera katoa, ko te akamorianga a te ngati Iuda e ata ua te reira no te akamorianga mou ka aru mai. Ka anoanoia tatou kia mārama i ta Iehova akanoonooanga kia akakoreia ta tatou ara e kia akamori iaia. Ka akaaite tatou i te “ata” (te akamorianga ngati Iuda) ki te “kopapa tika” (te akamorianga Kerititiano) i roto i te puka Pipiria o Ebera. Me rave tatou i teia, ka mārama meitaki atu tatou i te iero pae vaerua e ta tatou ka rave.

6. Akapeea te taangaangaia anga te tapenakara?

⁶ Te akamorianga ngati Iuda. Kua akatumu a Paulo i tana uriurianga ki runga i te tapenakara ta Mose i pātu i te 1512 M.T.N. (Akara i te tutu “Te Akamorianga Ngati Iuda—Te Akamorianga Kerititiano.”) Mei te puakapa rai te tapenakara ta te ngati Iseraela i apai aere me neke ratou mei tetai ngai ki tetai ngai. Kua taangaanga ratou i te reira vaitata atu i te 500 mataiti e tae ua atu ki te pātuia anga te iero i Ierusalema. (Exo. 25:​8, 9;  Nume. 9:22) Ko te “Are uipaanga” te ngai maata e uipa ei te ngati Iseraela no te aere ki mua i te aroaro o te Atua kia oronga i te au atinga e kia akamori iaia. (Exo. 29:​43-46) Inara, e maata atu ta te tapenakara e akatutu maira no te au Kerititiano.

7. I naea te iero pae vaerua i riro ei ei mea tika tikai?

⁷ Te akamorianga Kerititiano. Ko te tapenakara “te ata o te au mea o te rangi ra,” e te akatutu maira i te iero maata o Iehova i te pae vaerua. Karanga a Paulo e e “akatauanga te reira [tapenakara] no teianei tuatau.” (Ebe. 8:5; 9:9) No reira i te tata anga aia ki to Ebera, kua riro te iero pae vaerua ei mea tika tikai ki te au Kerititiano. Kua akamata te reira i te 29 T.N. I te reira mataiti, kua papetitoia a Iesu, kua akatainuia ki te vaerua tapu e kua akamata i te tavini ei “taunga maata teitei” no Iehova i roto i te iero pae vaerua. c—Ebe. 4:14; Anga. 10:​37, 38.

8-9. Ia Ebera 7:​23-27, eaa te tuke i rotopu i te taunga maata Iseraela e te Taunga Maata ko Iesu Karaiti?

⁸ Te akamorianga ngati Iuda. Kua akamanaia te taunga maata kia riro ei mata no te tangata ki mua i te Atua. Ko Aarona te taunga maata mua o Iseraela tei ikiia e Iehova i te akatapuia anga te tapenakara. Inara, kua akamārama a Paulo e e “manganui oki to ratou i riro ei taunga, no te mea kare ratou e ora tamou i te mate.” d (E tatau ia Ebera 7:​23-27.) E ei aronga apa ua, kua anoanoia te au taunga maata kia oronga i te atinga no ta ratou uaorai ara. Teia i reira te tuke anga maata i rotopu i te au taunga maata o Iseraela e te Taunga Maata, ko Iesu Karaiti.

⁹ Te akamorianga Kerititiano. Ei Taunga Maata no tatou, ko Iesu Karaiti te “taunga no te ngai-tapu, i roto i te puakapa mou, ta te Atu i patia, kare ta te tangata.” (Ebe. 8:​1, 2) Akamārama mai a Paulo e “no te mea e tika [a Iesu] i te noo anga e tuatau ua atu, e kare tona taoonga taunga e riro ia etai ke.” Karanga katoa a Paulo e ko Iesu tei “viivii kore, e te taka ke oki te aronga rave ara ra” kare mei te au taunga maata o Iseraela, “kare oki e tau iaia, kia na mua i te tuku i te atinga i tana uaorai ara, . . . i te au rā katoa ra.” I teianei ka uriuri tatou i te tuke i rotopu i te atarau e te au atinga a te akamorianga ngati Iuda e te akamorianga Kerititiano.

10. Eaa ta te au atinga i runga i te atarau veo e akatutu maira?

¹⁰ Te akamorianga ngati Iuda. Tei vao i te ngutupa o te tapenakara te atarau veo e akaatingaia ai te au manu kia Iehova. (Exo. 27:​1, 2; 40:29) Inara, kare te reira au atinga e akakore i te au ara a te tangata. (Ebe. 10:​1-4) Kua akatutu te au atinga manu i ko i te tapenakara i te atinga okotai te ka akakore takiri i te ara a te tangata.

11. I runga i teea atarau i oronga ai a Iesu iaia ei atinga? (Ebera 10:​5-7, 10)

¹¹ Te akamorianga Kerititiano. Kua kite a Iesu e kua tono mai a Iehova iaia ki te enua kia oronga i tona ora ei atinga oko no te tangata ravarai. (Mata. 20:28) No  reira, i tona papetitoanga kua oronga a Iesu iaia uaorai kia rave i ta Iehova i inangaro. (Ioa. 6:38; Gala. 1:4) Kua akaatinga a Iesu iaia ki runga i te atarau tutu ua tei akakite i to te Atua “anoano” kia akaatinga tana Tamaiti i tona oraanga apa kore. Kua akaatingaia to Iesu oraanga ei “apai anga okotai” me kore ei akakore takiri anga i te ara a te aronga tei akarongo ia Iesu. (E tatau ia Ebera 10:​5-7, 10.) Aru mai, ka uriuri tatou i te au mea o roto i te tapenakara.

12. Koai ka tomo ki roto i te tapenakara?

¹² Te akamorianga ngati Iuda. Aiteite ua a roto i te tapenakara e te au iero i pātuia i Ierusalema. E rua tuanga i roto—“te Ngai Tapu” e “te Ngai Tapu Roa Atu”—tei araiia e te paruru tuitui. (Ebe. 9:​2-5; Exo. 26:​31-33) Tei roto i te Ngai Tapu te lamepa auro, te atarau no te atinga kakara, e te kaingakai areto. Ko te “taunga i akatainuia ra” te ka akatikaia ki roto i te Ngai Tapu no te rave i ta ratou angaanga tapu. (Nume. 3:​3, 7, 10) Tei roto i te Ngai Tapu Roa Atu te aruna koreromotu auro tei akatutu mai i to Iehova aroaro. (Exo. 25:​21, 22) Ko te taunga maata anake ua ka akatikaia kia tomo na roto i te paruru ki te Ngai Tapu Roa Atu i te Rā Tapokiangaara. (Levi. 16:​2, 17) Mei tera mataiti ki tera mataiti, ka tomo aia ma te apai i te toto o te au manu ei tapokiangaara nana uaorai e na te iti tangata. Aere ua rai, kua akakite mai a Iehova na roto i tona vaerua tapu i te  aiteanga o teia au mea i roto i te tapenakara.—Ebe. 9:​6-8. e

13. Eaa te akatutu maira i te Ngai Tapu e te Ngai Tapu Roa Atu o te tapenakara i roto i te akamorianga Kerititiano?

¹³ Te akamorianga Kerititiano. E iti ua te numero o te au pipi a Karaiti tei akatainuia ki te vaerua tapu e e pirianga takake to ratou kia Iehova. Ko ratou te 144,000 te ka tavini ei kau taunga ma Iesu i te rangi. (Apo. 1:6; 14:1) Te akatutu maira te Ngai Tapu o te tapenakara i to ratou akatainuia anga ki te vaerua ei tamariki na te Atua i te enua nei. (Roma 8:​15-17) Te akatutu maira te Ngai Tapu Roa Atu o te tapenakara i te rangi, te ngai e noo ra a Iehova. “Te paruru” tei akatakake i te Ngai Tapu mei te Ngai Tapu Roa Atu, te akatutu maira i to Iesu kopapa tangata tei arai iaia mei te aere anga ki te rangi ei Taunga Maata no te iero pae vaerua. Na te akaatinga anga i tona kopapa tangata no te tangata ravarai, kua akatuera a Iesu i te mataara no te oraanga i te rangi no te au Kerititiano akatainuia. Ka anoano katoaia ratou kia akakore i to ratou kopapa tangata kia rauka ta ratou tutaki i te rangi. (Ebe. 10:​19, 20; 1 Kori. 15:50) I muri ake i to Iesu tuakaouanga, kua tomo aia ki roto i te Ngai Tapu Roa Atu o te iero pae vaerua, i reira e kapitiia atu ei te katoa anga o te aronga akatainuia kiaia.

14. Ia Ebera 9:​12, 24-26, eaa i meitaki atu ei ta Iehova akanoonooanga no te iero pae vaerua?

¹⁴ Te kite taka meitaki ua nei tatou i ta Iehova akanoonooanga meitaki rava atu no te akamorianga mou tei akatumuia ki runga i te atinga oko e te taoonga taunga o Iesu Karaiti. Kua tomo te taunga maata i Iseraela i te Ngai Tapu Roa Atu tei angaia e te tangata ma te apai i te toto atinga manu, inara kua tomo a Iesu ki “te rangi mou ra,” te ngai tapu roa atu ki mua i te aroaro o Iehova. I reira kua oronga aia i te puapinga o tona oraanga tangata apa kore no tatou “kia akakore aia i te ara i te akariro anga iaia uaorai ei atinga.” (E tatau ia Ebera 9:​12, 24-26.) Ko te atinga o Iesu te atinga puapinga rava atu te ka akakore takiri i te ara. Mei ta tatou ka kite mai, ka rauka ia tatou katoatoa me e manakonakoanga to tatou i te rangi me kore i te enua i te akamori ia Iehova i roto i tona iero pae vaerua.

15. Koai tei tavini i te paepae o te tapenakara?

¹⁵ Te akamorianga ngati Iuda. E paepae to te tapenakara—e ngai atea tei auaia, e rave ana te kau taunga i ta ratou angaanga. Tei roto i te paepae te atarau veo maatamaata no te atinga karakaratio, e pera katoa te āriki vai veo e taangaanga ana te kau taunga no te tamā ia ratou i mua ake ka rave ei i ta ratou angaanga. (Exo. 30:​17-20; 40:​6-8) Inara, i roto i te au iero tei pātuia i muri mai, e paepae to vao i te ngai e tu ana te aronga kare i te kau taunga no te akamori i te Atua.

16. Koai tei tavini i ko i te paepae i roto e i vao o te iero pae vaerua?

¹⁶ Te akamorianga Kerititiano. I mua ake ka riro mai ratou ei kau taunga ma Iesu i te rangi, ka tavini tiratiratu te toenga o te aronga akatainuia i te enua nei i te paepae i roto i te iero pae vaerua. E akamaaraanga puapinga te āriki vai maatamaata no ratou, e no te au Kerititiano  pouroa, kia vai tiamā e kia mā ua i te pae vaerua. Ko teiea i reira te ngai e akamori ana te “aronga maata rava,” tei turu tiratiratu i te au taeake akatainuia o Karaiti? Kua kite te apotetoro ko Ioane ia ratou “i te tu ua anga ki mua i te terono,” te akatutu maira i te paepae i vao i te enua nei, te ngai “i akamori ei ratou [i te Atua] i te po e te ao i tona nao.” (Apo. 7:​9, 13-15) Ka akaperepere maata tatou i to tatou ngai i roto i te akanoonooanga a Iehova no te akamorianga mā!

17. Eaa te au atinga ta tatou ka oronga kia Iehova?

¹⁷ Teia tuatau tei te au Kerititiano pouroa te tika anga ngateitei kia apai i te au atinga na Iehova na te akapou anga i to ratou taime, maroiroi, e te au apinga no te turu i te au anoano o te Patireia o te Atua. Mei ta te apotetoro ko Paulo i tuatua ki te au Kerititiano Ebera, “e na ko tatou iaia ra i te apai i te atinga ra, i te akameitaki i te Atua, eiaa e tivata, koia oki ta te vaa nei, i te akapaatu anga i tona ingoa.” (Ebe. 13:15) Ka akaperepere tatou i te akameitakianga no te akamori ia Iehova na te oronga anga i ta tatou atinga meitaki rava atu.

18. Ia Ebera 10:​22-25, eaa ta tatou ka rave tamou e auraka e ngaropoina?

¹⁸ E tatau ia Ebera 10:​22-25. Ei taopenga i tana reta ki to Ebera, kua akakite mai a Paulo i te au tuanga o ta tatou akamorianga kia rave tamou ua rai tatou. Koia oki kia akavaitata atu kia Iehova na roto i te pure, te akakiteanga i to tatou manakonakoanga, te uipa kapiti no te akamaroiroi i tetai e tetai e “kia maata atu rai te maroiroi, no te mea te akara na [ta]tou i [to Iehova] rā ra i te vaitata anga mai.” Vaitata ki te openga o te puka o Apokalupo, e rua taime kua akakite te angera a Iehova: E ‘akamori i te Atua!’ (Apo. 19:10; 22:9) Auraka e akangaropoina i teia au tuatua mou puapinga no te iero maata o Iehova e kia akaperepere i ta tatou akamorianga i to tatou Atua maata!