1. Akapeea te au tavini mua o te Atua i te akamaroiroiia anga?

 E AKATAKA ana te Tuatua a te Atua i te aronga tiratiratu ei aronga maroiroi. Inara kare ratou e manako ua ana e e tu maroiroi to ratou. Ei akaraanga, i tetai au atianga kua manako te Ariki ko Davida e e maroiroi aia mei te “maunga,” inara i tetai au atianga “kua tumatetenga akera” aia. (Sala. 30:7) Noatu e tumutoa ririnui a Samasona ma te tauturu a te vaerua o te Atua, kua kite ra aia e me kare te mana o te Atua, “ka riro [aia] mei te tangata katoa nei i te paruparu.” (Aka. 14:​5, 6; 16:17) E tu maroiroi to teia aronga tiratiratu no te mea kua akamaroiroi a Iehova ia ratou.

2. Eaa ra a Paulo i karanga ai e kua paruparu e kua maroiroi aia? (2 Korinetia 12:​9, 10)

² Akakite katoa te apotetoro ko Paulo e kua anoano aia i te maroiroi no ko ia Iehova. (E tatau ia 2 Korinetia 12:​9, 10.) Mei ia tatou rai, e tupu ana te maki kia Paulo. (Gala. 4:​13, 14) I tetai atianga, e mea ngatā iaia i te rave i te mea tau. (Roma 7:​18, 19) E kua tupu te manako apiapi e te mataku kiaia. (2 Kori. 1:​8, 9) Noatu ra, kia paruparu a Paulo, kua maroiroi ra aia. Akapeea? Kua akamaroiroi a Iehova ia Paulo. Maroiroi atura a Paulo.

3. Eaa te nga uianga ka pau tatou i teia atikara?

³ Te taputou maira a Iehova i te akamaroiroi ia tatou. (1 Pete. 5:10) Inara kare e rauka ia tatou te maroiroi me kare tatou e tauta. Ei akatutuanga, na te matini e akataka i te motoka kia tere ki mua. Inara, na te tangata akaoro e takai kia tere te motoka. Pera katoa, kua papa ua a Iehova i te oronga mai i te maroiroi kia tatou, kia rauka ia tatou te rave i ta tatou tuanga. Eaa ta Iehova i oronga mai ei  akamaroiroi ia tatou? E eaa ta tatou ka rave kia rauka mai te maroiroi? Ka kite tatou i te pauanga ki teia nga uianga na te akamanako anga i ta Iehova akamaroiroi anga i te aronga Pipiria tokotoru—te peroveta ko Iona, Maria te metua vaine o Iesu, e te apotetoro ko Paulo. Ka apii katoa tatou akapeea a Iehova me akamaroiroi i tona au tavini i teia tuatau.

4. Akapeea a Iehova me akamaroiroi ia koe?

⁴ Na roto i te pure, ko tetai mataara ka rauka te maroiroi no ko ia Iehova. Ei pau i ta tatou pure, ka oronga mai a Iehova i “te mana maata meitaki.” (2 Kori. 4:7) Ka akamaroiroiia tatou me tatau i tana Tuatua e te akamanako oonu i te reira. (Sala. 86:11) E “ririnui” ta Iehova karere i roto i te Pipiria no tatou. (Ebe. 4:12) Me pure koe kia Iehova e te tatau i tana Tuatua, ka akamaroiroiia koe kia akakoromaki, kia vai ua toou rekareka, e kia rave i tetai angaanga ngatā. Akara ana akapeea a Iehova te akamaroiroi anga i te peroveta ko Iona.

5. Eaa te peroveta ko Iona i anoano ei i te maroiroi?

⁵ Kua anoano te peroveta ko Iona i te tu ngakau toa. Kua oro aia mei te rave anga i tetai apainga ngatā ta Iehova i oronga kiaia. Tei tupu, kua vaitata aia i te mate i roto i tetai uriia e kua tuku aia i te oraanga o te au mataro ki roto i te kino. Te titiri anga ratou iaia ki roto i te tai, kua apuku tetai ika maatamaata iaia—e ngai mataku anga. Eaa to Iona manako? Kua manako ainei aia e ka mate aia? Penei kua manako aia e kua akaruke a Iehova iaia? E mea papu kua tumatetenga a Iona.

6. Mei ia Iona 2:​1, 2, 7, eaa tei akapumaana ia Iona iaia i roto i te kopu o te ika?

⁶ Eaa ta Iona i rave kia maroiroi akaou mei te reira ngai mataku? Mea mua, kua pure aia. (E tatau ia Iona 2:​1, 2, 7.) Noatu kua akarongo kore aia kia Iehova, kua irinaki a Iona e ka akarongo a Iehova i tana pure akaaka e te ngakau tae. Kua akamanako meitaki katoa a Iona i te au Tuatua Tapu. Akapeea tatou e kite ei? I roto i tana pure, tei tataia ia Iona pene 2, kua taangaanga aia i te au tuatua aiteite no roto mai ia Salamo. (Ei akaraanga, e akaaite ia Iona 2:​2, 5 kia Salamo 69:1; 86:7.) Te taka ua ra kua kite meitaki a Iona i te reira au irava. E na te akamaaraanga i te reira i tona tuatau tumatetenga, kua papu iaia e ka tauturu mai a Iehova. I muri mai, kua akaokiia a Iona ki te enua marō, e kua papa ua aia i te āriki e te rave i tana angaanga.—Iona 2:10–3:4.

7-8. Akapeea tetai taeake i Taiwan i te akamaroiroiia anga i te tuatau tumatetenga?

⁷ Ka tauturu te akaraanga o Iona ia tatou me tupu te turanga ngatā. Ei akaraanga, e maki kino to tetai taeake ko Zhiming, b i Taiwan. I te pae mai i teia, e takinokino pakari ana tona ngutuare iaia no tona irinakianga ia Iehova. E akamaroiroiia ana aia e Iehova na roto i te pure e te apii. Karanga aia, “I tetai taime me tupu te manamanata, ka taitaia au e kare e rauka iaku te rave i taku apii.” Kare ra aia i tuku i te ’au. Karanga aia, “Mea mua, ka pure au kia Iehova, aru mai ka tamou au i toku earphone e ka akarongorongo ki te au imene Patireia. I tetai taime, ka imene ua au e maru ua atu toku turanga. E oti ka apii au.”

 ⁸ Kua akamaroiroi te apii a Zhiming iaia na roto i te au mataara tukeke. Ei akaraanga, i muri ake i tetai vā’i anga maata, kua akakite mai te neti e e iti roa te vaito o tona toto, e ka anoanoia te pamu anga toto. I te po i mua ake i tona vā’i anga, kua tatau a Zhiming i te tua o tetai tuaine e aiteite to raua vā’i anga. Kua iti ake te vaito toto o te tuaine i tona; noatu ra, kare te tuaine i āriki i te pamu toto e kua meitaki mai aia. Kua akamaroiroi tona tua ia Zhiming kia vai tiratiratu.

9. Me akaparuparu tetai turanga ngatā ia koe, eaa taau ka rave? (Akara katoa i te tutu.)

⁹ Me tupu te turanga ngatā, ka apiapi maata ainei koe e kare e rauka i te pure kia Iehova? Me kore, ka roiroi ainei koe e kare e rauka i te apii? E akamaara e kua mārama a Iehova i toou turanga. No reira me pure ua koe, papu ia koe e ka oronga mai aia i te tauturu. (Ephe. 3:20) Me tupu te turanga apikepike e te mamae ngakau e kare e rauka ia koe te tatau e te apii, penei e akarongorongo ki te au akatangianga Pipiria e te au puka Pipiria. Pera katoa te akarongo ki ta tatou imene e te akara i te au vitio i runga i te jw.org. Na te pure anga kia Iehova e te kimi i te pauanga i roto i te tauturu pae vaerua tana i oronga mai, nana koe e akamaroiroi.

10. Akapeea te au taeake e te au tuaine Kerititiano me akamaroiroi ia tatou?

¹⁰ Ka taangaanga a Iehova i te au taeake e te au tuaine Kerititiano ei akamaroiroi ia tatou. Ka “akapumaana mai” ratou ia tatou me tupu te au timataanga e me ngatā i te rave i tetai angaanga. (Kolo. 4:​10, 11) Ka inangaroia te au oa “no te tuatau e tumatetenga’i ra.” (Mase. 17:17) Me paruparu tatou, ka tauturu te au taeake akamori ia tatou i te pae kopapa, te pae manako, e te pae vaerua. Akamanako ana akapeea a Maria, te metua vaine o Iesu, te rauka anga mai te maroiroi.

11. Eaa a Maria i anoano ei i te maroiroi?

¹¹ Kua inangaro a Maria i te maroiroi kia rave i to Iehova anoano. E akamanako i to Maria taitaia te rauka anga  tetai apainga teiaa no ko mai i te angera ko Gaberiela. Kare aia i akaipoipo ake; inara, ka nui aia. Kare ona kite i te utuutu tamariki, inara ka akono aia i te tama te ka riro mai ko te Mesia. E no te mea kare aia i piri ana ki te tane, akapeea a Maria me akamārama i tona turanga kia Iosepha?—Luka 1:​26-33.

12. Ia Luka 1:​39-45, akapeea a Maria i te akamaroiroiia anga?

¹² Akapeea i rauka ai ia Maria te maroiroi kia akono i teia angaanga puapinga e te ngatā? Kua kimi aia i te tauturu a tetai ke. Ei akaraanga, kua pati aia ia Gaberiela kia oronga mai i te au akakiteanga no teia angaanga. (Luka 1:34) Kare i roa i muri mai, kua aere atu aia ki “te pae enua maunga” o Iuda i te atoro i tona kopu tangata ko Elizabeta. Kua pauna tona tere. Kua akameitaki a Elizabeta ia Maria e kua akauruia e Iehova kia totou no te pepe i roto i te kopu o Maria. (E tatau ia Luka 1:​39-45.) Karanga a Maria e “kua akakite [a Iehova] i te marōrō o tona rima.” (Luka 1:​46-51) Na roto ia Gaberiela e Elizabeta, kua akamaroiroi a Iehova ia Maria.

13. Akapeea tetai tuaine i Bolivia i te akameitakiia anga e te au taeake?

¹³ Mei ia Maria rai, ka rauka katoa ia koe te maroiroi mei te au taeake. Kua anoano maata a Dasuri, e tuaine i Bolivia, i te maroiroi. Te tu anga tona papa i tetai maki e ka mate atu, kua rave a Dasuri i te au mea tei anoanoia no te akono iaia. (1 Timo. 5:4) Kare ra teia i te mea māmā. Karanga aia, “E maata te taime kua inangaro au i te tuku i te ’au.” Kua pati tauturu ainei aia? I te akamata anga, kare. “Kare au i inangaro i te tamanata i te au taeake,” i karanga ai aia. “Kua manako mai au, ‘Ko Iehova te ka oronga mai i te tauturu kiaku.’ Inara kua kite mai au e te akatakake ra au iaku mei te au taeake, e ko au anake te akono ra i toku manamanata.” (Mase. 18:1) Kua iki a Dasuri i te tata ki tetai pae o tona au taeake no te akamārama i tona turanga. Karanga aia, “Kare e rauka iaku i te akameitaki atu i te akamaroiroianga maata a toku au taeake Kerititiano akaperepere. Kua apai mai ratou i te kai i te are maki e kua akamaroiroi iaku na roto i te au irava. E mea pumaana tikai i te kite e kare ko tatou anake ua. E mema tatou no te pamiri o Iehova—e pamiri tei puareinga ua i te tauturu, i te aue kapiti, e te akamaroiroi ia tatou i te tavini kapiti ia Iehova.”

14. Eaa tatou ka āriki ei i te tauturu a te aronga pakari?

¹⁴ Tetai mataara ka akamaroiroi a Iehova ia tatou, na roto i te aronga pakari. E apinga aroa ratou te taangaanga ra aia no te akapumaana e te paruru ia tatou. (Isa. 32:​1, 2) No reira me apiapi koe, e akakite i toou manako ki te aronga pakari. Me oronga ratou i te tauturu, e āriki ua i te reira. Na roto ia ratou, te akamaroiroi ra a Iehova ia koe.

15. Eaa te manakonakoanga te akaperepere ra te au Kerititiano?

¹⁵ Ka akamaroiroiia tatou e te manakonakoanga i roto i te Pipiria. (Roma 4:​3, 18-20) Ei au Kerititiano, tei ia tatou te manakonakoanga no te ora mutu kore—i te enua parataito me kore i te Patireia i te rangi. Ka akamaroiroi teia manakonakoanga ia tatou kia akakoromaki i te au turanga ngatā, kia tutu aere i te nuti meitaki, e kia rave i te au angaanga tukeke i  roto i te putuputuanga. (1 Tesa. 1:3) Kua riro rai teia manakonakoanga i te akamaroiroi i te apotetoro ko Paulo.

16. Eaa te apotetoro ko Paulo i anoano ei i te maroiroi?

¹⁶ Kua anoano a Paulo i te maroiroi. I roto i tana reta ki to Korinetia, kua akaaite aia iaia uaorai ki tetai āriki paruparu. Kua “kako [aia] i te mate,” “kua pekapeka,” “kua takinga-kinoia,” e “kua uriia ki raro.” Kua tumatetenga aia. (2 Kori. 4:​8-10) Kua tata a Paulo i te reira tuatua i te toru o tona tere mitinari. Penei kare aia i kite e te akamata ra tona manamanata. Kua takinokino te urupu tangata iaia, kua tapekaia, kua tupu te ngaa pai, e kua tiriaia ki roto i te are auri.

17. Ia 2 Korinetia 4:​16-18, eaa tei akamaroiroi ia Paulo kia akakoromaki?

¹⁷ Kua akamaroiroiia a Paulo na te akamou anga ki runga i tona manakonakoanga. (E tatau ia 2 Korinetia 4:​16-18.) Akakite aia ki to Korinetia e noatu ka “mate ua rai te tangata i vao,” koia oki tona kopapa, kare aia e taitaia. Kua akamou a Paulo ki te tuatau ki mua. Kua riro to Paulo manakonakoanga no te ora mutu kore i te rangi ei akatupu i te “kakā maata rava teimaa mutu kore,” tei puapinga atu i te au kino tei tupu kiaia. Kua akamaara ua a Paulo i teia manakonakoanga, e tei tupu kua “akaouia [aia] i tera rā e tera rā.”

18. Akapeea te manakonakoanga i te akamaroiroi anga ia Tihomir e tona ngutuare?

¹⁸ Ko Tihomir, e taeake i Bulgaria, kua rauka iaia te maroiroi mei tona manakonakoanga. I nga mataiti i topa, kua mate tona teina ko Zdravko, te u anga tona motoka. No tetai tuatau roa, kua mamae ngakau a Tihomir. Kua akapumaanaia aia e tona ngutuare na te akamanakoanga mei teaa rai te tuakaouanga. Karanga aia: “E uriuri ana matou e ka aravei matou ia Zdravko kiea, te kai ka maani nana, e koai ka patiia ki te kaikai me oki mai aia, e eaa ta matou ka akakite kiaia no te tuatau openga.” Karanga a Tihomir na te akamaaraanga  i to ratou manakonakoanga i tauturu i tona ngutuare kia akakoromaki e te tapapa i te tuatau me akatuakaou mai a Iehova i tona teina.

19. Eaa taau ka rave kia rauka ia koe te maroiroi no toou manakonakoanga? (Akara katoa i te tutu.)

¹⁹ Akapeea koe me akamaroiroi ia koe no toou manakonakoanga? Ei akaraanga, me e manakonakoanga toou i te noo ki te enua e tuatau ua atu, e tatau i te au irava no te Parataito e e akamanako oonu i te reira. (Isa. 25:8; 32:​16-18) Akamanako ana mei teaa te oraanga i te ao ou. E akamanako ia koe i reira. Koai taau e kite atura? Eaa taau e akarongo ra? Eaa toou manako? Ei tauturu ia koe kia akamanako, e akara i te au tutu Parataito i roto i ta tatou au puka me kore e akara i te vitio imene, Roto i te Ao Ou, Teia Roa Mai Nei, e Manako Ana. Me mou to tatou manakonakoanga no te ao ou, e “mea ngiti poto māmā” to tatou manamanata. (2 Kori. 4:17) Na roto i te manakonakoanga ta Iehova i oronga mai, nana koe e akamaroiroi.

20. Noatu me paruparu, akapeea tatou e maroiroi akaou ei?

²⁰ Me paruparu tatou, “e maroiroi [ei tatou] i te Atua.” (Sala. 108:13) Ka oronga mai a Iehova i te maroiroi taau e anoano ra. No reira me anoano tauturu koe kia rave i taau angaanga, kia akakoromaki i te turanga ngatā, kia rekareka, e pure ngakau tae kia Iehova e e kimi i tana tauturu na roto i te apii. E āriki i te tauturu a toou au taeake e te au tuaine Kerititiano. E akamanako ua rai i toou manakonakoanga no te tuatau ki mua. Ei reira koe e “akamaroiroiia mai i te au maroiroi katoa, kia tau i [to te Atua] mana kakā, kia maata atu te akakoromaki, e te maru anga kia roa, ma te rekareka.”—Kolo. 1:11.