ATIKARA APII 33
IMENE 130 Kia Akakore i te Ara
E Aru i to Iehova Manako no te Aronga Ara
“Kia rokoia atura tetai tangata i te ara, e tika to tatou tei ko i te Metua.”—1 IOA. 2:1.
AKAKOROANGA
Ta tatou ka apii mai mei tei tupu i roto i te putuputuanga i Korinetia, no tetai tangata tei rave i te ara kino.
1. Eaa ta Iehova e inangaro maira no te tangata ravarai?
KUA anga a Iehova i te tangata kia rave i ta ratou ikianga. Ka rave putuputu tatou i te reira i te au rā. Ko tetai ikianga puapinga koia oki kia akatapu tetai iaia kia Iehova e kia riro katoa ei ngutuare Nona. Kua inangaro a Iehova i te katoatoa kia pera. No teaa ra? Akaperepere aia i te tangata e te inangaro ra i te meitaki no ratou. Anoano katoa aia e kia piri vaitata ratou kiaia e kia ora e tuatau ua atu.—Deu. 30:19, 20; Gala. 6:7, 8.
2. Eaa ta Iehova e tapapa maira no te aronga rave ara? (1 Ioane 2:1)
2 Inara, kare a Iehova e marō i tetai tangata kia tavini iaia. Kua oronga mai aia i te tikaanga kia iki te reira tangata. Eaa ta te aronga pakari ka rave me kua rave tetai Kerititiano papetitoia i te ara kino? Ka akatakakeia aia mei te putuputuanga me kare aia e tataraara. (1 Kori. 5:13) Noatu ra, te tapapa maira a Iehova iaia kia tataraara e kia piri vaitata akaou Kiaia. Ko te tumu puapinga teia i oronga mai ei a Iehova i te atinga oko, kia tataraara te aronga rave ara. (E tatau ia 1 Ioane 2:1.) E Atua akaperepere a Iehova kua inangaro aia i te aronga rave ara kia tataraara.—Zeka. 1:3; Roma 2:4; Iako. 4:8.
3. Eaa ta tatou ka uriuri i roto i teia atikara?
3 Te akakite maira a Iehova i tona manako no te ara e te aronga tei rave i te ara kino. Inangaro aia ia tatou kia aru i tona manako. Ka uriuri tatou i roto i teia atikara eaa ta tatou ka rave. Ia koe e tatau ra i teia, e akamanako (1) eaa ta te putuputuanga i Korinetia ka rave no tetai tangata tei ara, (2) eaa te aratakianga ta Paulo i akakite no te tangata tei rave i te ara kino e kua tataraara, e te (3) eaa ta te Pipiria e akakite maira kia tatou no to Iehova manako.
EAA TE KA TUPU ME RAVE TETAI TANGATA I TE ARA KINO
4. Eaa tei tupu i roto i te putuputuanga i Korinetia? (1 Korinetia 5:1, 2)
4 E tatau ia 1 Korinetia 5:1, 2. Te atoro anga a Paulo i te putuputuanga i Korinetia no te toru taime, kua akarongo aia i tetai nuti kino. Te rave ra tetai tangata i te ainga viivii ki tona mama angai. E peu rikarika e “kare rava i kitea ki o te etene katoa ra”! Kua āriki ua te putuputuanga i tana e rave ra. Penei kua manako tetai pae e te akaari ra ratou i te aroa mei ia Iehova rai ki te reira tangata. Inara e mea rikarika te reira kia Iehova. Kua riro tana peu viivii ei akakino ia Iehova e te putuputuanga. E penei ka akakeu i tetai au Kerititiano kia aru i tana peu. No reira, eaa ta Paulo akoanga ki te putuputuanga?
5. Eaa ta Paulo i ako i te putuputuanga kia rave, e eaa te aiteanga? (1 Korinetia 5:13) (Akara katoa i te tutu.)
5 E tatau ia 1 Korinetia 5:13. Kua akakeu a Iehova ia Paulo kia tata ki te putuputuanga kia akatakakeia tera tangata kare i tataraara. Akapeea te putuputuanga me akono iaia? Akakite a Paulo e “auraka [ra]tou e kapiti atu” kiaia. Eaa te aiteanga? Akamārama mai a Paulo “auraka katoa e kai atu i te manga” kiaia. (1 Kori. 5:11) Me kaikai kapiti ki te reira tangata ka piri vaitata atu tetai kiaia. No reira a Paulo i ako atu ei i te putuputuanga, auraka e kapiti kiaia. Ka paruruia te putuputuanga mei tana au peu viivii. (1 Kori. 5:5-7) Pera katoa, na te kopae anga i te reira tangata ka kite i reira aia i tona tarevake e ka akakeuia aia kia tataraara.
Kua tata a Paulo ki te putuputuanga kia akaatea i te tangata ara kino tei kore i tataraara (Akara i te parakarapa 5)
6. Te tae anga ta Paulo reta ki to Korinetia, eaa ta te putuputuanga e ta te tangata ara i rave?
6 I muri mai te tuku anga i tana reta ki to Korinetia, kua akamanako a Paulo eaa ta te putuputuanga i rave. Kua akakite a Tito i te nuti meitaki kia Paulo. Kua āriki ratou i ta Paulo reta. (2 Kori. 7:6, 7) Kua akono te putuputuanga i tana akaueanga. Kua tataraara te tangata rave ara. Kua taui i tona oraanga e kua akono akaou i ta Iehova au kaveinga tuatua tika. (2 Kori. 7:8-11) Eaa i reira ta Paulo i ako atu i te putuputuanga kia rave?
TA TE PUTUPUTUANGA KA RAVE KI TE TANGATA ARA TEI TATARAARA
7. Eaa tei tupu te akatakakeia anga te tangata rave ara mei te putuputuanga? (2 Korinetia 2:5-8)
7 E tatau ia 2 Korinetia 2:5-8. Karanga a Paulo: “Kua oti ua na taua mate i tukuia atu e te tangata e manganui i taua tangata ra.” Ko tera te aiteanga e kua akono te reira tangata i te akoanga. Eaa te akakoroanga? Kia akakeu iaia kia tataraara.—Ebe. 12:11.
8. Eaa ta Paulo i ako atu i te putuputuanga kia rave?
8 Kua akakite a Paulo ki te putuputuanga, akapeea me akono i te taeake tei ara: “E akakore atu kotou i tana ara, e e akapumaana atu” iaia, e te “akakite pu tikai kotou i to kotou aroa iaia.” Na roto i ta ratou au tuatua e te angaanga, kua akakore ratou i tana ara. Kua akakite a Paulo ki te putuputuanga kia aroa ua atu i te reira tangata. Ka kite te taeake e kua āriki akaouia aia e te putuputuanga.
9. Eaa tetai pae i emiemi ei i te akakore i te ara a te tangata tei tataraara?
9 Kua emiemi ainei tetai pae i roto i te putuputuanga, te āriki akaouia mai anga te tangata ara tei tataraara? Kare tatou i kite me kua tupu te reira. Noatu ra, penei kua riri tetai pae no te ara kino tana i akatupu i roto i te putuputuanga e kua taitaia ratou. Penei kua manako tetai pae auraka te reira tangata e āriki akaouia mai ki te putuputuanga. (Akaaite kia Luka 15:28-30.) Eaa ra i puapinga ai kia aroa ua te putuputuanga i te taeake tei tataraara?
10-11. Eaa te ka tupu me kare te aronga pakari e akakore i te ara a te tangata tataraara?
10 Akamanako ana i te turanga o te tangata tei tataraara, me kare te aronga pakari e āriki akaou mai iaia ki te putuputuanga. Penei ka taitaia e ka “aue maata” aia. Te manako anga e kare e rauka akaou iaia i te tavini ia Iehova. Penei kare a Iehova i akakore i tana ara. E ka akamutu aia i te akavaitata atu ki te Atua.
11 Eaa te ka tupu ki te au taeake e te au tuaine me patoi ratou i te akakore i te ara a te tangata tataraara? Ka takino ratou i to ratou pirianga kia Iehova. No teaa ra? Kare ratou i aru ia Iehova tei akakore i te ara a te aronga ara mari ra kua aru ratou ia Satani. Kua āriki ratou e kia taangaanga te Tiaporo ia ratou kia tāpu i te taeake kia kore e tavini akaou ia Iehova.—2 Kori. 2:10, 11; Ephe. 4:27.
12. Akapeea te putuputuanga me aru i to Iehova akaraanga?
12 Akapeea te putuputuanga i Korinetia me aru i te akaraanga o Iehova, kare i to Satani? Na te akakoreanga i te ara a te tangata tataraara, mei ia Iehova rai. Akamanako ana i ta te aronga tata Pipiria i tuatua no Iehova. Karanga a Davida, “kua tika ia koe i te akakore mai i te ara nei.” (Sala. 86:5) Tata a Mika: “Koai ïa Atua e tau ia koe ra, i te akakore anga i te tuatua kino, e te tutaki kore anga i te ara?” (Mika 7:18) E kua akakite a Isaia: “Kia akaruke te tangata kino i tona aerenga, e te tangata tuatua-tika kore i tona manako: ka oki ei aia kia Iehova, e nana aia e aroa mai; e ki to tatou Atua, te maata ra oki iaia te akakore i te ara.”—Isa. 55:7.
13. Eaa te tumu i āriki akaouia mai ei te tangata ara ki te putuputuanga? (Akara i te pia “ No Naea te Tangata i Korinetia i Āriki Akaouia Mai Ei?”)
13 Ei aru ia Iehova, kua āriki te putuputuanga i Korinetia i te tangata tei tataraara e kua aroa akaou iaia. Na te akono anga i ta Paulo aratakianga kia aroa i te tangata tataraara, kua ‘akarongo te putuputuanga i te au tuatua.’ (2 Kori. 2:9) Noatu kua akatakakeia te tangata ara no tetai au marama, kua tataraara aia. No reira, kare te aronga pakari e tiaki kia āriki akaouia mai aia ki roto i te putuputuanga.
ARU I TO IEHOVA AKARAANGA NO TE TU TIKA E TE AROA
14-15. Eaa te au apiianga ta tatou i kite mei to Korinetia? (2 Petero 3:9) (Akara katoa i te tutu.)
14 Kua tataia tei tupu i Korinetia ei akaraanga no tatou “kia kite” i te apiianga. (Roma 15:4) Mei te reira, kua apii tatou kare a Iehova e āriki i te aronga tei rave i te ara kino ki roto i te putuputuanga. Penei ka manako tetai pae no te aroa ia Iehova, ka akatika ua aia i tetai tei rave i te kino ki roto i te putuputuanga, inara kare a Iehova e pera ana. Noatu e tu aroa Tona, kare aia e āriki i te au peu viivii. Kare katoa tana au kaveinga tuatua tika e taui. (Iuda 4) Me ārikiia te aronga ara ki te putuputuanga, kare e aroa i reira e ka akakinoia te au taeake e te au tuaine.—Mase. 13:20; 1 Kori. 15:33.
15 Noatu ra, kua kite mai tatou kare a Iehova e anoano ana kia takoreia tetai. Inangaro aia e kia ora te au tangata ravarai. Ka aroa aia i te aronga tei taui i to ratou oraanga e kia riro akaou ei oa nona. (Eze. 33:11; e tatau ia 2 Petero 3:9.) No reira, te tataraara anga te tangata rave ara i Korinetia e kua akaruke i tona aerenga kino, kua akamārama a Paulo ki te putuputuanga kia akakore ratou i tana ara e kia āriki akaou mai iaia.
E aru i to Iehova aroa e te tuatua tika, e āriki pumaana i te aronga tei tataraara e tei oki mai kia Iehova (Akara i te parakarapa 14-15)
16. Eaa taau i kite mai no Iehova, mei te akaraanga o te tangata rave ara tei tataraara?
16 Te akaari maira te akaraanga no te tangata rave ara tei tataraara, i to Iehova aroa takinga meitaki e te tuatua tika. (Sala. 33:5) Kare ainei e ka akakeuia koe kia akapaapaa ia Iehova? No te mea e aronga ara tatou, ka anoanoia tana akakoreanga ara. Ka tau rai kia akapaapaa tatou ia Iehova no te atinga oko tei akakore i ta tatou ara. E mea pumaana e te akaperepere ra a Iehova i tona iti tangata e te inangaro ra i te meitaki no ratou!
17. Eaa ta tatou ka uriuri i te atikara ka aru mai?
17 I teia tuatau, akapeea me akatikatikaia te au ara kino? Akapeea te aronga pakari me aru i te akaraanga o Iehova no te tauturu i tetai tangata ara kia tataraara? Eaa ta te katoatoa ka rave me akatakakeia te tangata ara e me āriki akaouia mai aia ki te putuputuanga? Ka uriuriia teia au uianga i te atikara ka aru mai.
IMENE 109 Aroa ma te Ngakau Tae
