1. Eaa ta tetai tangata ara ka rave?

 ME RAVE tatou i te tarevake e mea puapinga kia tataraara tatou. Te karanga ra te Pipiria no te tangata tei tataraara, ka rikarika aia i tana i rave. Ka akamutu e ka tauta aia kia kore e rave akaou i te reira.—Akara i te Glossary, “Repentance.”

2. Eaa tatou ka apii ei no runga i te tataraara? (Nehemia 8:​9-11)

² Ka anoanoia te au tangata kia kite eaa te aiteanga o te tataraara. No teaa ra? E ara ana tatou i te au rā. Ei uanga na Adamu e Eva, kua anauia tatou ma te ara e ka mate. (Roma 3:23; 5:12) No reira kua ara te katoatoa. Kua ngatā i te au tangata tiratiratu mei te apotetoro ko Paulo i te patoi i te tarevake. (Roma 7:​21-24) Ko te aiteanga ainei e ka taitaia tatou no ta tatou au ara? Kare, e Atua aroa a Iehova e ka inangaro aia kia mataora tatou. Akamanako ana i te akaraanga o te au ngati Iuda i to Nehemia tuatau. (E tatau ia Nehemia 8:​9-11.) Kare a Iehova e inangaro ia ratou kia mamae no ta ratou ara i rave, mari ra kia mataora i ta ratou akamorianga. Kua kite a Iehova me tataraara tatou, ka tupu te mataora. No reira, ka apii aia ia tatou no te reira. Me tataraara tatou, mea papu e ka akakore a Iehova i ta tatou ara.

3. Eaa ta tatou ka uriuri i roto i teia atikara?

³ I teia atikara, ka apii tatou no runga i te tataraara. Ka uriuri tatou e toru tumu manako. Te mea mua, ka kite tatou eaa ta Iehova i apii ki te ngati Iseraela no te tataraara. Te rua, ka apii tatou akapeea a Iehova me tauturu i te tangata kia tataraara. E te openga, ka kite tatou eaa ta Iesu i apii ki tana au pipi no te tataraara.

 TA IEHOVA I APII KI TONA ITI TANGATA NO TE TATARAARA

4. Eaa ta Iehova i apii ki te ngati Iseraela no te tataraara?

⁴ Te oronga anga a Iehova i te au Ture ki to Iseraela, kua taputou ratou i te akarongo kiaia. Me akono ratou i tana au ture, ka paruru e ka akameitaki aia ia ratou. Karanga aia: “Kare oki teianei akauenga taku e akaue atu kia koe i teianei rā, i te mea kitea koreia e koe ra, kare oki tei te mamao ke.” (Deu. 30:​11, 16) Inara, me kare to Iseraela e akono i tana au ture e kua akamori i te au atua ke, kare a Iehova e paruru ia ratou. Kare ra te aiteanga e kua akaruke a Iehova ia ratou. Ka rauka ia ratou i te oki mai kia Iehova e kia akarongo i tona reo. (Deu. 30:​1-3, 17-20) Ka rauka i reira ia ratou i te tataraara. Ka akavaitata a Iehova kia ratou e ka akameitaki akaou ia ratou.

5. Akapeea a Iehova te tauta anga i te tauturu i tona iti tangata? (2 Ariki 17:​13, 14)

⁵ Kua meameaau te iti tangata o Iehova. Kua akamori ratou i te au itoro e kua rave i te au peu viivii. E no reira kua tumatetenga ratou. Inara, kua tauta ua rai a Iehova i te tauturu i tona iti tangata kia tavini akaou iaia. Kua tono aia i tana au peroveta kia tauturu i tona iti tangata kia tataraara e kia ariu mai kiaia.—E tatau ia 2 Ariki 17:​13, 14.

6. Na roto i te au peroveta, akapeea a Iehova i te apii anga i tona iti tangata kia tataraara? (Akara katoa i te tutu.)

⁶ Ka tono a Iehova i tana au peroveta kia akamatakite e te ako ia ratou kia taui. Ei akaraanga, kua karanga te Atua na roto ia Ieremia: “Ka oki mai koe e Iseraela akatitima e . . . kare au e akatopa atu i toku riri ki runga ia kotou; e aroa oki toku . . . kare au e akamouriri e tuatau ua atu. E aaki maira koe i toou kino e, kua ara rai koe i toou atua ra ia Iehova.” (Iere. 3:​12, 13) Na roto ia Ioela: “E ariu mai kotou kiaku nei ma to kotou ngakau katoa.” (Ioela 2:​12, 13) Na roto ia Isaia: “E orei ia kotou kia mā kotou; e tuku ke  atu i te kino ta kotou e rave ra ki mua i oku nei mata; kua oti ana i te rave i te kino.” (Isa. 1:​16-19) E na roto ia Ezekiela, kua ui a Iehova: “E manga rekareka mea ngiti ake ainei toku i te mate o te tangata kino? . . . e auraka ainei kia ariu mai aia i tona ra au arataa, e kia ora? Kare rava oki oku e mareka anga i te mate o te tangata e mate ra, . . . e ariu mai, kia ora.” (Eze. 18:​23, 32) Ka rekareka a Iehova me tataraara te tangata ara e kua inangaro kia ora ratou e tuatau ua atu! No reira, kare a Iehova e tapapa kia taui tetai na mua e oti ka tauturu ei ia ratou. Ka akara tatou i tetai au akaraanga.

7. Na roto i te akaraanga o tana peroveta ko Hosea e tana vaine, eaa ta Iehova e apii maira ki tona iti tangata?

⁷ Kua apii a Iehova i tona iti tangata na roto i te akaraanga o Gomera, te vaine a te peroveta ko Hosea. I muri ake i tona akaturi anga, kua akaruke aia ia Hosea no tetai au tane ke. Ka ngatā ainei i tana vaine kia tataraara? Kua akakite a Iehova kia Hosea: “Ka aere rai, ka inangaro atu i te vaine i inangaroia e te oa, e akaturi rai, mei te inangaro o Iehova ki te au tamariki o Iseraela, ko tei akara ki te au atua ke ra.” (Hose. 3:1; Mase. 16:2) Ka kite tatou te rave ra rai te vaine a Hosea i te ara kino. Inara, kua akakite a Iehova kia Hosea kia akakore i tana ara e kia āriki akaou i tana vaine. a Na roto i teia akaraanga, kua inangaro a Iehova i te apii i tona iti tangata. Noatu ta ratou kino, te akaperepere ra rai Aia ia ratou, no reira kua tono aia i tana au peroveta kia tauturu i tona iti tangata kia tataraara e kia taui i to ratou oraanga. Apii mai teia akaraanga te kite ra a Iehova i te ngakau o te tangata e ka tauturu aia i tetai kia tataraara. (Mase. 17:3) Ka akara tatou.

AKAPEEA A IEHOVA ME TAUTURU I TE ARONGA ARA KIA TATARAARA

8. Eaa ta Iehova i rave no te tauturu ia Kaina kia tataraara? (Genese 4:​3-7) (Akara katoa i te tutu.)

⁸ Ko Kaina te tama mua a Adamu e Eva. Kua ara aia mei tona nga metua rai. Karanga te Pipiria: “E tuatua kikino tana.” (1 Ioa. 3:12) No reira a Iehova i kore ei i mareka i ta Kaina atinga. Kare i taui i tona tu e kua “riri rava akerā Kaina, e akatumatuma atura tona mata.” Eaa ta Iehova i rave? Kua tuatua aia kia Kaina. (E tatau ia Genese 4:​3-7.) Kua akakite a Iehova kia Kaina, e ka akameitakiia aia me rave i te tika. Kua akamatakite katoa aia e ka tupu te kino me riri ua atu aia. Noatu ra, kare a Kaina i akarongo. Kare aia i ariu ana ki ta Iehova tauturu kia tataraara. Kua akamutu ainei a Iehova i te tauturu i te aronga ara kia tataraara? Kare rava!

9. Akapeea a Iehova te tauturu anga ia Davida kia tataraara?

⁹ Akaperepere a Iehova i te Ariki ko Davida. Kua kapiki aia ia Davida “e tangata e tau i toku ngakau.” (Anga. 13:22) Inara, kua rave a Davida i te au ara kino, mei te akaturi e te tā tangata. I raro ake i te Ture a Mose, kua tau rai a Davida kia tamateia. (Levi. 20:10; Nume. 35:31) Inara, kua tauturu a Iehova ia Davida kia tataraara. b Kua tono  aia i tona peroveta ko Natana kia aravei i te ariki, noatu kare a Davida i tataraara ake. Na roto i tetai akatutuanga, kua tauturuia a Davida kia kite e kua rave aia i te ara kino. Kua pakia to Davida ngakau e kua tataraara aia. (2 Samu. 12:​1-14) Kua tata aia i tetai salamo tei akaari mai i tona turanga taitaia no tana ara i rave. (Sala. 51, tataanga i runga) E maata te aronga ara tei tatau i te reira salamo e kua tataraara. E mea pumaana e kua tauturu a Iehova ia Davida kia tataraara.

10. Eaa toou manako i te kite anga e e tu akakoromaki to Iehova e te akakore i ta tatou ara?

¹⁰ E makitakita ana a Iehova i te au ara kino, kare aia e āriki i te reira. (Sala. 5:​4, 5) Inara, kua akaperepere a Iehova ia tatou. Me ara tatou ka tauturu aia ia tatou kia tataraara. Te inangaro ra aia i te aronga ara kino kia tataraara e kia akavaitata atu kiaia. E mea pumaana i te kite e kua inangaro a Iehova i te akakore i ta tatou ara! Me akamanako tatou i to Iehova tu akakoromaki e te akakore ara, ka akakeuia tatou kia vai tiratiratu kiaia e kia tataraara. I teianei, ka kite tatou akapeea a Iesu i te apii anga i tana au pipi kia tataraara.

TA TE AU PIPI A IESU I KITE NO TE TATARAARA

11-12. Eaa ta Iesu akatutuanga i apii no to Iehova inangaro e te akakore i te ara? (Akara katoa i te tutu mua.)

¹¹ I te anere mataiti mua, kua tae mai te Mesia. I te atikara i mua ake, kua taangaanga a Iehova ia Ioane Bapetizo e Iesu Mesia kia apii i te tangata i te puapinga kia tataraara.—Mata. 3:​1, 2; 4:17.

¹² Ia Iesu i te enua nei, kua apii aia i te tangata i to Iehova tu no te akakore i te ara. Na roto i te parapore o te tamaiti ngaro. Kua akaruke te mapu tane i tona kainga e kua rave i te au mea kino. No tetai tuatau roa, kua “rako tangata maira aia” e kua oki atu ki te kainga. Eaa ta tona metua i rave? Karanga a Iesu: “E tei te ngai mamao rai [te tamaiti], kua akara maira tona metua iaia, aroa maira, oro maira, takave maira i runga i tona kaki, kua ongi maira iaia.” Kare te  tamaiti i manako ana e ka akakore tona metua i tana ara. Kua inangaro aia kia tavini i tona metua, inara kua mareka tona metua e kua akakore atu i tana ara. Kua kapiki iaia e “ko taku tamaiti” tei oki mai ki te kainga. Karanga te metua: “I ngaro ana [aia], e kua kitea mai.” (Luka 15:​11-32) Ia Iesu i runga i te rangi, kua kite ana aia i tona Metua i te aroa anga e te akakore anga i te ara a te aronga tei tataraara. E mea pumaana i te kite i te apiianga o te parapore ta Iesu i akakite no runga i to tatou Metua aroa ko Iehova!

13-14. Eaa ta te apotetoro ko Petero i kite mai no te tataraara, e akapeea aia te apii anga i te reira? (Akara katoa i te tutu.)

¹³ Kua kite te apotetoro ko Petero i tetai apiianga puapinga mei ia Iesu no runga i to Iehova tu akakore ara. Kua rave a Petero i te au tarevake e manganui e kua akakore a Iesu i tana ara. Ei akaraanga, te pikikaa anga a Petero e kare aia i kite i tona Atu e toru taime, kua taitaia aia i tana i rave. (Mata. 26:​34, 35, 69-75) I muri ake i tona tuakaouanga, kua mama atu a Iesu kia Petero i te tuatua kiaia. (Luka 24:​33, 34; 1 Kori. 15:​3-5) I te reira atianga, kua akapumaana a Iesu ia Petero e kua akakore aia i ta Petero ara.

¹⁴ Te kite anga a Petero i te puapinga kia tataraara e kua akakoreia tana ara, kua rauka iaia i teianei i te apii atu i tetai ke kia rave katoa i te reira. I muri mai te oroa i te rā Penetekote, kua oronga a Petero i tetai akoanga ki te pupu ngati Iuda ma te akakite e kua tamate ratou i te Mesia. Noatu ra, kua akamaroiroi aia ia ratou: “E teianei, e tataraara kotou, e e ariu mai, kia taparaia ta kotou ara; kia kitea mai te tuatau rekareka no mua mai i te aroaro o te Atua.” (Anga. 3:​14, 15,  17, 19) Kua apii a Petero e ka tataraara tetai tangata ara na te ariu anga mai. Tera te aiteanga, ka taui aia i tona manako tarevake, ka akamutu i te rave i te kino e ka tauta i te akamareka ia Iehova. Kua akakite katoa te apotetoro e ka taparaia ta ratou au ara e ka ngaro takiri. I te au mataiti i muri mai, kua akapumaana a Petero i te au Kerititiano: “E akakoromaki maata ra [to Iehova] ia tatou, kare rava i anoano e kia mate atu tetai, kia rauka katoatoa ra te tataraara.” (2 Pete. 3:9) E mea pumaana no te au Kerititiano i te kite e ka akakore a Iehova i ta ratou au ara, noatu te kino i te reira!

15-16. (a) Akapeea te apotetoro ko Paulo te kite anga akapeea me akakore i te ara? (1 Timoteo 1:​12-15) (e) Eaa ta tatou ka uriuri i te atikara ka aru mai?

¹⁵ Kua rave ana a Saula i te au ara kino. Kua tamate aia i te au pipi a Iesu. Penei kua manako te maata anga o te au Kerititiano e kare rava aia e taui. Inara, kua kite a Iesu e ka rauka ia Saula i te taui i tona oraanga e kia tataraara. Kua kite a Iesu e tona Metua i te au tu meitaki o Saula. Karanga a Iesu: E “āriki ikiia oki aia naku.” (Anga. 9:15) Na roto i tetai semeio, kua tauturu a Iesu ia Saula kia tataraara. (Anga. 7:58–8:3; 9:​1-9, 17-20) Ko Saula me kore ko Paulo, kua tataraara aia e kua riro mai aia ei Kerititiano. Kua oronga a Iesu i tetai angaanga nana ei apotetoro. Kua mareka a Paulo e kua aroaia aia e Iehova e Iesu. (E tatau ia 1 Timoteo 1:​12-15.) Karanga a Paulo: “Kare rai i kite e, ei akatupu taua meitaki a te Atua ra i toou tataraara?”—Roma 2:4.

¹⁶ Te akarongo anga a Paulo e kua āriki te putuputuanga i Korinetia i tetai tangata akaturi, eaa ta Paulo i akakite kia ratou kia rave? Mei tana i tuatua, ka kite tatou akapeea a Iehova me ako i te aronga ara e te aroa i te aronga tei tataraara. Ka kite katoa tatou akapeea tatou me aru i tona akaraanga. I te atikara ka aru mai, ka uriuri tatou eaa tei tupu i roto i te putuputuanga i Korinetia.