1. Akapeea te tangata Samaria ta Iesu i akaora te akaari anga i te tu akameitaki?

TEI roto e tai ngauru tangata i te turanga kino. E maki repera to ratou, e kare o ratou manakonakoanga no te tuatau ki mua. Inara i tetai rā, kua kite ratou ia Iesu, te Puapii Maata, mei te ngai mamao. Kua akarongo ratou e kua akaora a Iesu i te au tu maki tukeke, e kua papu ia ratou e ka rauka katoa ia Iesu i te akaora ia ratou. No reira kua kapiki atu ratou: “E te Orometua, e Iesu e, e aroa mai koe ia matou.” Kua ora takiri te maki o te tino ngauru tangata. Kare e ekoko kua akameitaki ratou i to Iesu tu takinga meitaki. Inara, ko tetai ia ratou, e maata atu tana i rave i te akameitaki ua—kua akakite aia i tona tu akameitaki tikai kia Iesu. * Tera tangata tei akaoraia, e Samaria, kua akakeuia aia kia akakaka i te Atua “ma te kapiki ua [i] te reo” maata.—Luka 17:12-19.

2-3. (a) No teaa ra tatou i ngere ei i te akaari i te tu akameitaki? (e) Eaa ta tatou ka uriuri i roto i teia atikara?

² Mei te tangata Samaria rai, ka inangaro tatou i te akaari i te tu akameitaki ki te aronga takinga meitaki. Inara i tetai taime, ka ngaropoina ia tatou i te akaari i te tu akameitaki na roto i te au tuatua me kore te au angaanga.

³ I roto i teia atikara, ka uriuri tatou i te tumu i puapinga ai kia akaari i te tu akameitakianga na roto i ta tatou ka tuatua e ka rave. Ka apii tatou mei tetai au akaraanga Pipiria o te aronga tei akameitaki e te aronga kare i pera. I reira ka uriuri tatou i te au mataara tikai ka rauka ia tatou i te akaari i to tatou tu akameitaki.

4-5. No teaa ra tatou ka akaari ei i te tu akameitaki?

⁴ Te akanoo ra a Iehova i te akaraanga no tatou kia akaari i te tu akameitaki. Tetai mataara, na te tutaki anga i te aronga e akamareka ra iaia. (2 Samu. 22:21; Sala. 13:6; Mata. 10:40, 41) Te akamaroiroi maira te Pipiria ia tatou “ei aru kotou i te Atua, mei te tamariki akaperepere ra.” (Ephe. 5:1) No reira, te tumu maata ka akaari tatou i te tu akameitaki, koia oki ka inangaro tatou i te aru i to Iehova akaraanga.

⁵ Akamanako akaou ana i tetai tumu ka inangaro tatou i te akaari i te tu akameitaki ki tetai ke. Ka aite te tu akameitaki ki tetai kai meitaki—ka reka atu te reira me tuʼaia. Me akameitakiia mai tatou, ka mataora tatou. Me akaari tatou i te tu akameitaki, ka akarekareka tatou i tetai ke. Kua kite te tangata tei akameitakiia e kua riro tana tauta anga i te tauturu ia tatou, e kia oronga mai i te apinga tei anoanoia, ei tauturu tikai ia tatou. Tei tupu mai, kua akaketaketaia te pirianga taeake i rotopu ia tatou e te reira tangata.

6. Eaa te au akaaiteanga aiteite i roto i te au tuatua akameitaki e te au apara auro?

⁶ E mea puapinga kia akameitaki ua rai tatou. Te akakite ra te Pipiria: “Mei te lemoni auro i roto i te vairanga ario ra, ko te tuatua ïa me tuatuaia i te tuatau tikai ra.” (Mase. 25:11) E akamanako ana i tetai apara auro manea i roto i te vairanga ario! E akamanako ana i tona puapinga! Eaa toou manako me orongaia mai tetai apinga aroa naau mei teia? Ka riro katoa taau au tuatua akameitaki ei mea puapinga ki tetai ke. E akamanako i teia tika: Ka vai ua tetai apara auro no tetai tuatau roa. Pera katoa, ka maaraia taau au tuatua akameitaki e ka akaperepereia e te tangata tei āriki i te reira no te roa anga o tona oraanga.

7. I roto ia Salamo 27:4, akapeea a Davida e te aronga tata o salamo te akaari anga i to ratou tu akameitaki?

⁷ E manganui te au tavini o te Atua i taito tei akaari i te tu akameitaki. Tetai ia ratou ko Davida. (E tatau ia Salamo 27:4.) Kua āriki oonu aia i te akamorianga mā e kua akaari aia i teia na roto i tana i rave. Kua oronga aia i te au mea puapinga no te akatu i te iero. Kua akaari te uanga a Asapha i te tu akameitaki na te tataanga i te au salamo, e te au imene akapaapaa. I roto i tetai imene, kua oronga ratou i te akameitakianga ki te Atua e kua akakite i to ratou mareka no te “au angaanga taka ke” a Iehova. (Sala. 75:1) Taka meitaki, kua inangaro a Davida e te uanga a Asapha i te akaari kia Iehova i to ratou tu akameitaki maata i te au akameitakianga ta ratou i rauka mai mei ko iaia. Te kite ra ainei koe i te au mataara ka rauka ia koe i te aru i te akaraanga o teia au tata salamo?

8-9. Akapeea te apotetoro te akaarianga i te tu akameitaki ki tona au taeake e te au tuaine, e eaa te tupu anga?

⁸ Kua āriki te apotetoro ko Paulo i tona au taeake e te au tuaine e kua akaari i te reira na roto i tana i tuatua no ratou. Kua akameitaki ua rai aia i te Atua, i roto i tana au pure no ratou. Kua akaari katoa aia i tona tu akameitaki i tona tataanga kia ratou. Kua taiku a Paulo e 27 ingoa o te au taeake Kerititiano i roto i te 15 irava mua o Roma pene 16. Kua maara tikai ia Paulo no runga ia Peresila raua ko Akuila “ko tei tuku katoa i to raua kaki ki raro” nona, e kua akataka aia ia Phebe “i tauturu na oki aia i te tangata e manganui,” kapiti mai ia Paulo. Kua akameitaki aia i taua au taeake e te au tuaine akaperepere e te angaanga pakari.—Roma 16:1-15.

⁹ Kua kite a Paulo e e tu apa ua to te au taeake e te au tuaine, inara i te akaoti anga i tana reta ki to Roma, kua akamou ua aia ki runga i to ratou tu meitaki. Akamanako ana e kua akamaroiroiia te au taeake e te au tuaine te rongo anga i ta Paulo au tuatua akameitaki ki te putuputuanga! Tei tupu, kare e ekoko kua ketaketa atu to ratou pirianga taeake kia Paulo. E akaari putuputu ana ainei koe i te tu akameitaki no te au mea meitaki ta te au taeake i roto i taau putuputuanga ka tuatua e ka rave?

10. Eaa ta tatou ka apii mai mei te akaraanga ta Iesu i akaari no te tu akameitaki no tana au pipi?

¹⁰ I roto i tana karere ki te au putuputuanga i Asia Minora, kua akaari a Iesu i te tu akameitaki no te angaanga tei raveia e tana au pipi. Ei akaraanga, kua akamata aia i tana karere ki te putuputuanga i Tuatira na te tuatua anga: “Kua kite au i taau angaanga, e toou aroa, e toou takinga-meitaki, e te akarongo, e toou akakoromaki, e taau au angaanga; ko tei maata ïa i tei muatangana ra.” (Apo. 2:19) Kare a Iesu i taiku ua i ta ratou angaanga maata, mari katoa ra kua akameitaki aia ia ratou no te au tu tei akakeu i ta ratou angaanga meitaki. Noatu e kua anoanoia a Iesu kia ako i tetai pae i Tuatira, kua akamata aia e kua akamutu i tana karere ma te akamaroiroianga. (Apo. 2:25-28) Akamanako ana i te mana taoonga o Iesu ei upoko no te au putuputuanga katoatoa. Kare aia e anoanoia kia akameitaki ia tatou no te angaanga ta tatou e rave nei nona. Noatu ra, ka akaari rai aia i te tu akameitaki. E akaraanga meitaki tikai tana i akanoo no te aronga pakari!

11. Tei akaariia ia Ebera 12:16, eaa to Esau tu no te au mea tapu?

¹¹ Ma te maromaroa, kare tetai au tangata i roto i te Pipiria i akaari ana i te tu akameitaki. Ei akaraanga, noatu e kua utuutuia a Esau e te nga metua tei inangaro e tei akangateitei ia Iehova, kare aia i akaari ana i te tu akameitaki no te au mea tapu. (E tatau ia  Ebera 12:16.) Akapeea tona tu akameitaki kore te kitea anga? Kua oko rapurapu ua a Esau i tona tika anga mataiapo ki tona teina, ko Iakoba, no tetai kai muramura. (Gene. 25:30-34) I muri mai, kua tataraara tikai a Esau i tana ikianga. Inara kare aia i inangaro ana i tona tika anga mataiapo, no reira kare aia e tau kia kopekope i te ngere anga aia i te reira.

12-13. Akapeea te au Iseraela te akaari anga i te tu akameitaki kore, e eaa tei tupu?

¹² E maata te au tumu no te au Iseraela kia akaari i te tu akameitaki. Kua akaoraia mai ratou mei te tuikaa i muri ake i te apai anga mai a Iehova i te Mate Tino Ngauru ki runga ia Aiphiti. E oti kua akaora mai te Atua ia ratou na te takoreanga i te nuku vaeau o Aiphiti i roto i te Tai Muramura. Kua mareka tikai te au ngati Iseraela e kua akameitaki iaia na roto i te au imene upokotu kia Iehova. Inara kua vai mareka ua ainei ratou?

¹³ Te na roto anga te au Iseraela i te au akaaoanga ou, kare i roa kua ngaropoina ia ratou te au mea meitaki ta Iehova i rave no ratou. Kua akaari i reira ratou i to ratou tu akameitaki kore. (Sala. 106:7) Akapeea ra? “Kua urutoe iora taua uipaanga katoa o te tamariki a Iseraela ra ia Mose raua ko Aarona”—te tika, kua koumuumu ratou ia Iehova. (Exo. 16:2, 8) Kua poitirere aia i te tu akameitaki kore o tona iti tangata. Kua totou aia i muri mai e ka mate teia uki katoa o Iseraela ki roto i te metepara, ka ora ra a Iosua e Kaleba. (Nume. 14:22-24; 26:65) Ka akara tatou akapeea me kopae i teia au akaraanga kino e e aru i te au akaraanga meitaki.

14-15. (a) Akapeea te au tokorua akaipoipo te akaari anga e te akameitaki ra ratou i tetai e tetai? (e) Akapeea te au metua me apii i ta ratou tamariki kia akaari i te tu akameitaki?

¹⁴ I roto i te ngutuare tangata. Ka puapingaia te ngutuare tangata me akaari te katoatoa i te tu akameitaki. Ko te maata atu ta te au tokorua akaipoipo tu akameitaki i tetai e tetai, ka vaitata atu to ratou pirianga. Ka māmā katoa ia ratou i te akakore atu i te tarevake o tetai ke. Ko te tane tei āriki tikai i tana vaine, kare aia e kite ua i te au mea meitaki ta tana vaine e tuatua ra, e e rave ra mari katoa ra “e [tu] tana tane katoa, ma te akapaapaa iaia.” (Mase. 31:10, 28) E ka akameitaki te vaine mako i te au mea tana e reka ra no runga i tana tane.

¹⁵ E te au metua, akapeea koe me apii i taau tamariki kia akaari i te tu akameitaki? E akamaara e ka aru taau tamariki i taau ka tuatua  e ka rave. No reira e akanoo i tetai akaraanga meitaki na te tuatua anga, e meitaki, me rave taau tamariki i tetai au angaanga naau. Pera katoa, e apii i taau tamariki kia tuatua, e meitaki, me rave tetai ke i te au mea meitaki. E tauturu i taau tamariki kia mārama e no roto mai te tu akameitaki i to ratou ngakau e ka akatupu ta ratou tuatua i te meitaki maata. Ei akaraanga, karanga tetai mapu vaine ko Clary e: “E 32 mataiti toku mama, te akarukeia anga mai aia e toru tamariki kia utuutu koia anake ua. I toku 32 mataiti, kua manako au e mei teaa atura i te ngata te reira tuatau. No reira kua akameitaki au iaia no tana i rave, te utuutu anga iaku e toku nga tungane. I ou ake nei, kua akakite mai aia kiaku e kua akaperepere tikai aia i taku au tuatua kiaia, e e maaraara ua ana aia i te reira, e kua riro ei akapumaana iaia.”

16. Oronga mai i tetai akaraanga akapeea me akaari i te tu akameitaki te ka akamaroiroi i tetai ke.

¹⁶ I roto i te putuputuanga. Me akaari tatou i te tu akameitaki ki to tatou au taeake e te au tuaine, te akamaroiroi ra tatou ia ratou. Ei akaraanga, kua rokoia a Jorge, e tangata pakari e 28 mataiti, i te maki kino. Kare e rauka iaia i te aere ki te au uipaanga no tetai marama. Noatu i muri ake i tona oki anga ki te au uipaanga, kare rai i rauka iaia i te rave i tetai au tuanga o te porokaramu. Karanga a Jorge e: “Manako puapinga kore tikai au no te mea kare e rauka iaku i te rave i tetai au apainga i roto i te putuputuanga. Inara i muri ake i tetai uipaanga, kua akakite mai tetai taeake kiaku: ‘Ka inangaro au i te akameitaki ia koe no te akaraanga meitaki taau i akanoo no toku ngutuare tangata. Kua reka tikai matou i taau au ako anga i teia au mataiti i topa ake nei. Kua tauturu teia ia matou i te pae vaerua.’ Kua pakia toku ngakau e kua pururu ua toku roimata. Ko te tuatua tikai teia taku i anoano kia akarongo.”

17. Tei tau kia Kolosa 3:15, akapeea tatou me akaari i te tu akameitaki kia Iehova no tona tu oronga ua?

¹⁷ Ki to tatou Atua oronga ua. Kua oronga mai a Iehova i te au kai maata i te pae vaerua na tatou. Ei akaraanga, ka rauka ia tatou te au apiianga na roto i ta tatou au uipaanga, te au makatini, e te au website. Kua rongo ainei koe i tetai akoanga, tatau i tetai atikara, e te akara i te broadcasting e kua manako, ‘Ko taku tikai teia e anoano nei’? Akapeea tatou me akaari i te tu akameitaki kia Iehova? (E tatau ia Kolosa 3:15.) Tetai mataara, na te akameitaki putuputu anga iaia na roto i ta tatou pure no teia au apinga aroa.—Iako. 1:17.

18. Eaa te au ravenga ka akaari tatou i te tu akameitaki no to tatou Are Uipaanga Patireia?

 ¹⁸ Ka akameitaki katoa tatou ia Iehova me akono i to tatou ngai akamorianga kia mā e te mako. Ka piri putuputu tatou ki roto i te tamaanga e te akonoanga i to tatou Are Uipaanga Patireia, e kia akono meitaki te au taeake i te au apinga akatangi uira a te putuputuanga. Me akono meitakiia to tatou Are Uipaanga Patireia, ka roa atu te vai ua anga e e meangiti ua te au ngai ka ripeaia. I reira e vai maata atu ei te moni ei akatu e te akaou i tetai au Are Uipaanga Patireia ke takapini i teianei ao.

19. Eaa taau i apii mai mei te tupuanga o tetai akaaere kotinga e tana vaine?

¹⁹ Ki te aronga tei angaanga pakari no tatou. Me akaari tatou i te tu akameitaki, penei ka taui ta tatou au tuatua i te tu o tetai tangata te na roto ra i te au akaaoanga. Akamanako ana i te tupuanga o tetai akaaere kotinga e tana vaine. I muri ake i tetai rā anu i te ngai tutu aere, kua oki raua ki to raua ngai noo anga ma te roiroi. No te anu kua moe ua tana vaine ki roto i tona pereue maanaana. I te popongi, kua akakite aia ki tana tane e kare e rauka akaou iaia i te aere ua atu ki roto i te angaanga tutaka aere. I tera mai popongi, kua tae mai tetai reta nana no ko mai i te opati Betela. Kua akapumaana te reta iaia no tana angaanga tutu aere ma te akakoromaki. Kua āriki te reira e mei teaa te ngata i te aere anga mei tetai ngai nooanga ki tetai, i te au epetoma ravarai. Karanga tana tane: “Kua pakia te ngakau o tana vaine no te reira akameitaki anga e kare rava aia i tuatua akaou ana kia akaruke i te angaanga tutaka aere. E tika, e maata tona taime te akamaroiroi anga iaku kia aere ua atu noatu toku manako e ka akamutu.” Kua rave ua atu te nga tokorua i te angaanga tutaka aere no tetai 40 mataiti.

20. Eaa ta tatou ka tauta i te rave i te au rā ravarai, e no teaa ra?

²⁰ Kia tauta ua rai tatou i te au rā ravarai kia akaari i te tu akameitaki na roto i ta tatou ka tuatua e ka rave. Penei ko ta tatou au tuatua e te au angaanga ngakau tae ta tetai tangata ka anoano e rauka ai i te noo ki roto i tetai ao akameitaki kore. E ka akatupu te au tuatua akameitaki i te au pirianga taeake te ka ope e tuatau ua atu. Tei puapinga rava atu, ka aru tatou i te tu oronga ua, te tu akameitaki o to tatou Metua, ko Iehova.