1. Akapeea te Au Kite o Iehova e toru te akamārama anga i to ratou tu tiratiratu no Iehova?

AKAMANAKO ana i tetai akatutuanga e toru te ō maira te Au Kite o Iehova. (1) Tei te apii tetai tamaine mapu, kua ui te puapii ki te au tamariki apii katoatoa kia piri ki roto i tetai akaepaepa anga orote. Kua kite mai teia tamaine e kare te Atua e mareka mai ana i teia, no reira kare aia i piri atu ki te reira. (2) Te tutu aere ra tetai tamaiti mapu akama mei tera are ki tera are. Kua kite aia e e noo ana tetai tamaiti mei tana apii ki reira—e tamaiti apii e te aviri i te Au Kite o Iehova i mua ana. Inara kua aere rai teia mapu ki tera are e kua topapa i te pa. (3) Te angaanga pakari ra tetai tangata i te akono i tona ngutuare tangata, e i tetai rā kua pati mai tona pu kia rave aia i tetai angaanga pikikaa. Me akamanako aia, ka ngere aia i tana ngai angaanga, kua akamārama aia ki tona pu e ka tiratiratu aia i te aru ki te ture, no te mea te umuumu maira te Atua i tona au tavini kia pera.—Roma 13:1-4; Ebe. 13:18.

2. Eaa te au uianga ta tatou ka akamanako, e no teaa ra?

² Eaa te tu taau i kite mai no teia aronga e toru? Penei ka kite koe i to ratou tu ngakau toa, e te tu tuatua-tika. Inara okotai rai tu tei tuke koia oki—te tu tuatua-tika. Kua akaari mai teia tokotoru i te tu tiratiratu kia Iehova. Kare teia aronga i tuku ua atu ana kia aati i te au kaveinga a te Atua. Kua riro te tu tuatua-tika o teia aronga ei akakeu ia ratou kia pera. Papu e ka ngakau parau tikai a Iehova ia ratou tataki tai no te akaari i teia tu. Ka inangaro katoa tatou i te akamareka i to tatou Metua i te rangi. No reira ka uriuri tatou i teia au uianga: Eaa ra te tu tuatua-tika? Eaa ra tatou ka anoano ei i te tu tuatua-tika? E akapeea e rauka ai ia tatou i te akamaroiroi i ta tatou tauta anga kia akono i te tu tuatua-tika i teia tuatau ngata?

3. (a) Eaa te aiteanga o te tu tuatua-tika kia tatou? (e) Eaa te au akaraanga te akaari maira kia tatou no te katoaanga, te tu tau tikai, e kia meitaki tikai?

³ Me taangaangaia kia tatou ei au tavini no te Atua, te aiteanga o te tu tuatua-tika, kia inangaro ma te ngakau katoa e te akamori mutu kore ia Iehova, e ko tona anoano te mea mua i roto i ta tatou au ikianga ravarai. Akamanako ana i tetai au akaaiteanga. Tetai aiteanga o te tuatua Pipiria no te “tuatua-tika” koia oki: ko te katoaanga, tei tau tikai, me kore tei meitaki tikai. Ei akaraanga, kua oronga te ngati Iseraela i tetai au manu ei atinga kia Iehova, e te karanga ra te Ture e ko te au manu e mea tau tikai te reira. * (Levi. 22:21, 22) Kare te iti tangata o te Atua e akatikaia kia oronga i te manu kare e vaevae, e taringa, me kore e mata; e kare katoa e oronga i tetai manu kua makiia. E mea puapinga kia Iehova te au manu katoa, tau tikai, me kore tei meitaki tikai. (Mala. 1:6-9) Ka kite mai tatou eaa ra a Iehova i akono ei i te au manu tau tikai me kore te katoaanga. Me oko mai tatou i tetai apinga, mei te kai ua rakau, te puka, e te apinga apii, kare tatou e inangaro i te mea e puta tetai me kore kua ngaro tetai ngai. Ka inangaro tatou i te katoaanga o te reira, kia tau tikai, e kia meitaki tikai. Ka aite rai to Iehova manako ki to tatou me e inangaro to tatou iaia, e e tu tiratiratu to tatou. Kia tau tikai, kia meitaki tikai e te ki katoa te reira.

4. (a) No teaa ra ka rauka ai i tetai tangata apa ua te akaari i te tu tuatua-tika? (e) Kia tau kia Salamo 103:12-14, eaa ta Iehova e tapapa maira ia tatou kia rave?

⁴ Ka manako ainei tatou e kia apa kore tatou kia rauka mai te tu tuatua-tika? Mei tera te tu, penei ka manako tatou e e tu apa ua to tatou. Akamanako ana e rua tumu kare tatou e anoanoia kia mataku. Te mea mua, kare a Iehova e akamanako mai i to tatou tu apa ua. Te akakite maira tana Tuatua kia tatou e: “Naringa koe, e Iehova, e akairo ana i te au ara nei, e te Atu, koai te ka mou?” (Sala. 130:3) Kua kite aia e e aronga apa ua tatou, e e aronga ara, e ka akakore ua mai aia i ta tatou ara. (Sala. 86:5) Te rua, kua kite a Iehova i to tatou au kotinga, e kare aia e marō maata mai ia tatou. (E tatau ia Salamo 103:12-14.) Akapeea e rauka ai ia tatou te tu katoaanga, tei tau tikai, e tei meitaki tikai i roto i tona mata?

5. Ei au tavini no Iehova, akapeea te aroa me riro ei mea puapinga tikai kia rauka te tu tuatua-tika?

⁵ Ei au tavini no Iehova, ko te taviri ki te tu tuatua-tika koia oki ko te aroa. To tatou aroa no te Atua, e to tatou aroa tiratiratu kiaia ei Metua i te rangi, kia vai tamou te reira, ma te tau tikai e te meitaki tikai. Me tinamou to tatou aroa mei tera rai, noatu me timataia tatou, ka rauka ia tatou te tu tuatua-tika. (1 Para. 28:9; Mata. 22:37) Akamanako akaou i te Au Kite e toru tei akatakaia i mua ake. Eaa ratou i rave ei i ta ratou i inangaro? Te riri ra ainei te tamaine mapu i te au angaanga e raveia ra i te apii, me kore te akama ra ainei te tamaiti mapu i te ngutupa, me kore te inangaro ra ainei te tangata ngutuare kia ngere aia i tana ngai angaanga? Kare. Kua kite ratou e e au turanga tika to Iehova, e te akamou ra to ratou manako ki runga i te akamareka anga i to ratou Metua i te rangi. Kua akakeu to ratou aroa nona kia tuku ua rai iaia ki mua i ta ratou au ikianga ka rave. Kua taangaanga ratou i to ratou tu tuatua-tika.

6. (a) Eaa ra koe ka anoano ei i te tu tuatua-tika? (e) Akapeea a Adamu e Eva i ngere ei i te akaari i te tu tuatua-tika?

⁶ Eaa te tu tuatua-tika i puapinga tikai ei e kia anoanoia te reira e tatou? Ka anoano  tatou i te tu tuatua-tika no te mea kua akaao a Satani ia Iehova, e kua akaao rai aia ia tatou. Ko tera angera meameaau tei akariro iaia e ko Satani, me kore “Tei Patoi,” i te aua i Edene ra. Kua akakino aia i te ingoa meitaki o Iehova na te karanga anga e e Atua kino aia, e karapii, e e Tutara pikikaa. Te mea maromaroa, kua aru a Adamu e Eva ia Satani, te meameaau anga ia Iehova. (Gene. 3:1-6) Kua oronga mai te oraanga i Edene i tetai atianga maata kia akaketaketa i to raua aroa no Iehova. Inara i te tuatau o to Satani akaaoanga, kare to raua tu aroa i tau tikai, e i ki katoa e te meitaki tikai. Tetai akaou uianga: Ka rauka ainei i tetai tangata kia vai tiratiratu ki te Atua ko Iehova no tona aroa iaia? I tetai tu, ka rauka ainei i tetai tangata i te akaari i te tu tuatua-tika? Kua uiia teia uianga kia Iobu.

7. I roto ia Iobu 1:8-11, eaa to Iehova e Satani manako no runga i te tu tuatua-tika o Iobu?

⁷ Te ora ra a Iobu i te tuatau o te ngati Iseraela i Aiphiti. Kare atu e tangata tiratiratu mei iaia rai. Mei ia tatou rai, e tangata apa ua aia. E rave ana aia i te tarevake. Inara e inangaro to Iehova ia Iobu no tona tu tuatua-tika. I te akara anga, kua akatietie takere a Satani ia Iehova no runga i te tu tuatua-tika o te tangata. No reira kua taiku a Iehova ia Iobu kia Satani. Kua akaari mai te oraanga o Iobu e e pikikaa tikai a Satani! Kua marō a Satani e kia timataia te tu tuatua-tika o Iobu. Kua irinaki a Iehova i tona oa ko Iobu, e kua akatika te Atua ia Satani kia timata iaia.—E tatau ia Iobu 1:8-11.

8. Akapeea a Satani te takinokino anga ia Iobu?

⁸ E kino tikai a Satani e te tā ua. Kua tamamae aia e kua keia i ta Iobu au apinganui,  tona au tavini, e kua akakino i tona tu i te reira ngai. Kua tamate aia i to Iobu ngutuare tangata, i tana tai ngauru tamariki. E kua tamamae aia i te kopapa o Iobu, na roto i te maki eʼe mei tona katu ki tona nga vaevae. Kua riro teia ei mamae anga ki te vaine a Iobu; e kua tuatua aia kia Iobu kia tuku i te au, kia akakino i te Atua e ka mate atu ei. Kua inangaro rai a Iobu i te mate, inara kua akono rai aia i tona tu tuatua-tika. Kua tamata akaou a Satani i tetai mai ereere ke i te tamamae ia Iobu. Kua taangaanga aia e toru au oa o Iobu. Kua aravei teia au tangata ia Iobu i te rā ravarai, inara kare ratou i oronga ana i tetai akapumaana anga kiaia. Mari ra, kua akakino ratou iaia e kua aviri akavaavaa atu iaia. Karanga ratou e ko te Atua teia e akatupu nei i teia au kino e kare aia e manako mai ana i to Iobu tu tuatua-tika. Kua manako ratou e e tangata kino a Iobu e kia tau rai kia tupu te kino kiaia!—Iobu 1:13-22; 2:7-11; 15:4, 5; 22:3-6; 25:4-6.

9. Akapeea aia te aro atu anga i tona au timata anga, e eaa ta Iobu i patoi atu?

⁹ Eaa ta Iobu i rave te tupu anga teia takinokino anga? Kare aia i te tangata apa kore. Kua riri aia i tona au aronga akakino, e kua tuatua aia i tetai mea puapinga kore. Kua paruru aia i tona uaorai tu tika kare i to te Atua. (Iobu 6:3; 13:4, 5; 32:2; 34:5) Inara, noatu i roto i tona turanga kino, kare a Iobu i ariu ke ana mei te Atua ko Iehova. Kare aia i irinaki ana i te au pikikaa a tona au oa pikikaa. Karanga aia: “Kare takiri ra au e akatika ia kotou: e mate ua atu au, kare rai au e pa i te tuatua-tika naku ra.” (Iobu 27:5) E tuatua puapinga tikai teia. Kare a Iobu i tuku ana i te au; ka pera rai tatou.

10. Akapeea koe te ō anga ki roto i te manamanata ta Satani i rave kia Iobu?

¹⁰ Kua rave rai a Satani i teia au akaapaanga kia tatou tataki tai. Akapeea koe e ō atu ei? Karanga aia e, kare koe e inangaro tikai ana i te Atua ko Iehova, e ka akamutu koe i te tavini iaia kia ora koe, e ko toou tu tuatua-tika e pikikaa te reira! (Iobu 2:4, 5; Apo. 12:10) Eaa ra ta te reira ka rave kia koe? Ka mamae koe, kare ainei? Inara e akamanako ana i teia: Ka irinaki a Iehova ia koe e ka oronga atu i tetai atianga umere noou. Te akatika ra a Iehova ia Satani kia timata i toou tu tuatua-tika. Papu ia Iehova e ka akono koe i toou tu tuatua-tika e ka rauka ia koe i te akapapu e e pikikaa a Satani. Kua taputou mai Aia i te tauturu ia koe. (Ebe. 13:6) E mea umere tikai kia irinakiia e te Atu o teia ao e pini ua ake! Te kite ra ainei koe eaa ra te tu tuatua-tika i puapinga ai? Ka rauka ia tatou i te patoi i ta Satani au pikikaa e te turuturu i te ingoa meitaki o to tatou Metua ma te turu i tana tutara anga. Akapeea tatou me akaketaketa i to tatou tu tuatua-tika?

11. Eaa ta tatou ka apii mai mei ia Iobu?

¹¹ Kua akamaata atu a Satani i tana au tamaki anga kino i teia “tuatau openga.” (2 Timo. 3:1) I teia tuatau poiri, akapeea tatou me akaketaketa ia tatou uaorai kia akono tamou i to tatou tu tuatua-tika? Ka apii akaou tatou i teia mei ia Iobu. I mua ake ka tupu ei tona au timata anga, kua akaketaketa takere a Iobu i tona tu tuatua-tika. Akamanako ana e toru tumu ta tatou ka apii mai no te akaketaketa anga i to tatou uaorai tu tuatua- tika.

12. (a) Tei taikuia i roto ia Iobu 26:7, 8, akapeea a Iobu te akangateitei anga ia Iehova? (e) Eaa te ka tauturu ia tatou kia rauka te ngakau tuatua-tika no te Atua?

¹² Kua akaketaketa a Iobu i tona aroa no te Atua na te akangateitei anga ia Iehova. Kua akapou a Iobu i tona tuatau i te akamanako anga i te au mea umere ta Iehova i anga. (E tatau ia Iobu 26:7, 8, 14.) Kua umere  aia te akamanako anga i te enua, te rangi, te tiao rangi, e te mangungu, inara e iti ua tana i kite no te au mea tei angaia. Kua akangateitei katoa aia i ta Iehova au tuatua. E “inangaro maata toku i te tuatua a tona vaa,” i tuatua ai a Iobu no te tuatua a te Atua. (Iobu 23:12) Kua umere tikai a Iobu i to Iehova tu ngateitei e te mekameka. Kua inangaro aia i tona Metua e kua inangaro i te akamareka iaia. Kua akamou tikai aia i tona tu tuatua-tika kia ketaketa. Ka rave tatou i te reira mei ia Iobu rai. E maata atu ta tatou i kite no runga i te au mea umere tei angaia, i to te tangata i to Iobu tuatau. E tei ia tatou te katoa anga o te Pipiria tei akauruia ei tauturu ia tatou kia kite tikai ia Iehova. Pouroa ta tatou ka apii mai, ka tauturu te reira ia tatou kia rauka te ngakau tuatua-tika. E oti, ka riro to tatou tu akangateitei ia Iehova, ei akakeu ia tatou kia inangaro e te akarongo kiaia e te akaketaketa i to tatou anoano oonu no te akono i to tatou tu tuatua-tika.—Iobu 28:28.

13-14. (a) I roto ia Iobu 31:1, akapeea a Iobu me akapapu i tona akarongo? (e) E akapeea tatou me aru i tona akaraanga?

¹³ Kua akaketaketa a Iobu iaia uaorai na te akono anga i tona tu tuatua-tika na roto i te akarongo. Kua kite a Iobu e te anoanoia ra te tu akarongo kia rauka te tu tuatua-tika. E tika, ka akaketaketa te tu akarongo kia akono tatou i to tatou tu tuatua-tika. I roto i tona oraanga, kua angaanga pakari a Iobu no te akarongo ki te Atua. Ei akaraanga, kua matakite aia i tona tu ki te au vaine. (E tatau ia Iobu 31:1.) Ei tangata akaipoipo, kua kite meitaki aia e e mea tarevake i te akameamea ki tetai vaine kare i te vaine nana. I teia tuatau, te noo nei tatou i roto i tetai ao te ka timata putuputu mai ia tatou ki te au ainga tau kore. Mei ia Iobu rai, kare tatou e akara tau kore i tetai ke kare tatou i akaipoipo atu? Ka patoi katoa tatou i te akara i te au tutu ainga viivii noatu eaa te tu? (Mata. 5:28) Me taangaanga tatou i te tu akono meitaki i te au rā ravarai,  ka akaketaketa te reira i to tatou uaorai tu tuatua-tika.

¹⁴ Kua akarongo katoa a Iobu kia Iehova no runga i te au apinga materia. Kua kite a Iobu e me tuku aia i tona irinaki ki roto i te au apinga materia, ka rave aia i te ara te ka akautungaia aia. (Iobu 31:24, 25, 28) I teia tuatau, te noo nei tatou i roto i tetai ao ki i te au apinga materia. Me akono tatou i te manako tau no te moni e te au apinga, mei ta te Pipiria e akamaroiroi maira ia tatou kia rave, ka ketaketa atu to tatou tu tuatua-tika.—Mase. 30:8, 9; Mata. 6:19-21.

15. (a) Eaa te manakonakoanga tei tauturu ia Iobu kia akono i tona tu tuatua-tika? (e) No teaa ra teia ka tauturu ei ia tatou kia akamaara i te manakonakoanga ta Iehova e oronga maira?

¹⁵ Kua akono a Iobu i tona tu tuatua- tika na te akamou anga ki runga i te manakonakoanga ta te Atua ka oronga mai kiaia. Irinaki aia e te akono ra te Atua i tona tu tuatua-tika. (Iobu 31:6) Noatu tona au timataanga, kua papu tikai ia Iobu e ka tutaki mai a Iehova iaia. Kua riro tona tu papu ei tauturu iaia kia mou piri ki runga i tona tu tuatua-tika. Kua mareka tikai a Iehova i to Iobu tu tuatua-tika e kua tutaki maata iaia noatu tona tu apa ua! (Iobu 42:12-17; Iako. 5:11) E tutaki maata atu to mua ia Iobu. E manakonakoanga ketaketa ainei toou e ka tutaki a Iehova i toou tu tuatua- tika? Kare to tatou Atua i taui. (Mala. 3:6) Me akamaara tatou e te akaperepere ra aia i to tatou tu tuatua-tika, ka rauka ia tatou i te akono i to tatou manakonakoanga manea kia vai ua i roto i to tatou ngakau.—1 Tesa. 5:8, 9.

16. Eaa ta tatou ka akapapu kia rave?

¹⁶ Kia papu tikai, i te akono tamou i toou tu tuatua-tika. I tetai taime, ka maromaroa koe i toou aerenga, inara kare ko koe ua. Ko koe tetai o te mirioni ua atu aronga tu tuatua-tika takapini i te ao. Ka piri katoa atu koe ki te au tane e te au vaine akarongo tei akono i to ratou tu tuatua-tika i te tuatau i topa, noatu te tu mataku o te mate. (Ebe. 11:36-38; 12:1) Ka tauta pouroa tatou kia tau ki te tuatua a Iobu: “Kare rai au e pa i te tuatua-tika naku ra!” E kia riro to tatou tu tuatua-tika ei akakaka ia Iehova e tuatau ua atu!