1. Eaa te ō maira me ka tuatua koe ki te ariki o Peresia?

AKAMANAKO ana e kua noo ana koe no tetai 2,500 mataiti i Peresia. Ka inangaro koe i te tuatua ki te ariki o te reira ngai no runga i tetai manamanata, no reira kua aere atu koe ki te oire ko Susana. Kare koe e tae ki te ariki, kia patiia mai koe. Me inangaro koe te tuatua ki te ariki, ka na mua koe i te pati i tetai tikaanga kiaia!—Esete. 4:11.

2. Akapeea tatou me akavaitata atu kia Iehova?

² Mei teaa atura to tatou mareka anga e kare a Iehova mei te ariki rai o Peresia! E tutara teitei a Iehova i tetai ua atu tutara tangata, e ka āriki mai aia ia tatou. Inangaro maira aia ia tatou kia tuatua kiaia. Ei akaraanga, noatu e tukeke to Iehova au taoonga, mei Tei Anga, te Mana Katoatoa, e te Atu, te pati maira aia ia tatou kia kapiki iaia ei “Metua.” (Mata. 6:9) Mataora tatou i te kite e te inangaro maira a Iehova ia tatou kia akavaitata kiaia!

3. Eaa te tumu ka kapiki tatou ia Iehova e “Metua,” e eaa ta teia atikara ka uriuri?

³ E mea tau kia kapiki tatou ia Iehova e “Metua” no te mea koia te Tumu o te ora. (Sala. 36:9) No te mea koia to tatou Metua, e apainga ta tatou kia akarongo kiaia. Me rave tatou i tana e pati maira, ka mataora tatou i te au akameitakianga. (Ebe. 12:9) Kapiti mai te ora mutu kore, i runga i te rangi me kore i te enua nei. Ka puapinga katoaia tatou i teianei. Ka uriuri teia atikara i te au akaraanga no Iehova ei Metua aroa i teianei e te akapapu maira e kare aia e akaruke ia tatou a te tuatau ki mua. Te mea mua, ka  akamanako tatou i te tumu i akaperepere ei to tatou Metua i te rangi ia tatou.

4. Eaa i ngata ai no tetai pae i te akamanako ia Iehova ei Metua no ratou?

⁴ E ngata ainei ia koe i te akamanako i te Atua ei Metua noou? Ka manako tetai pae e e meangiti ua ratou e e teitei maata a Iehova. Kua ekoko ratou e te manako maira te Atua Mana Katoatoa ia ratou. Inara kare to tatou Metua aroa e inangaro ia tatou kia pera. Kua oronga mai aia i te ora kia tatou e te inangaro maira ia tatou kia akapiri vaitata kiaia. No teia tumu kua akamārama te apotetoro ko Paulo ki te aronga tei akarongo kiaia i Atene e kare a Iehova i “atea ke atu ia [r]atou.” (Anga. 17:24-29) Inangaro te Atua ia tatou tataki tai kia tuatua kiaia mei tetai tamaiti rai ka tuatua ki tona metua akaperepere.

5. Eaa taau i apii mai mei te akaraanga o tetai tuaine Kerititiano?

⁵ E ngata no tetai pae i te akamanako ia Iehova ei Metua, no te mea kare to ratou metua tane i akaari ana i te aroa kia ratou. Akamanako ana i te tuatua a tetai tuaine Kerititiano. “E tangata kino toku metua tane,” i karanga ai aia. “I te akamata anga au i te apii Pipiria, e ngata iaku i te akavaitata ki te Metua i te rangi. I muri maira kua kite mai au ia Iehova, e kua taui te reira.” Kua aite ainei toou turanga ki toku? Me koia ïa, e akapapu e ka rauka ia koe i te kite ia Iehova ei Metua meitaki tikai noou.

6. Ia Mataio 11:27, eaa tetai mataara e tauturu ana a Iehova ia tatou kia akara iaia ei Metua aroa?

⁶ Tetai mataara e tauturu ana a Iehova ia tatou kia akara iaia ei Metua aroa, na te tataanga i ta Iesu i tuatua e i rave i roto i te Pipiria. (E tatau ia Mataio 11:27.) Kua aru meitaki a Iesu i te tu o tona Metua na te karanga anga: “Ko te akara mai iaku nei, kua akara ïa i te Metua.” (Ioa. 14:9) E tuatua putuputu ana a Iesu i ta Iehova i rave ei Metua. I roto i te Evangeria e a, kua taangaanga a Iesu i te tuatua “Metua” tei taikuia e 165 taime kia Iehova. Eaa ra a Iesu i tuatua maata ai no Iehova? Tetai tumu kia irinaki te tangata e e Metua aroa ua a Iehova.—Ioa. 17:25, 26.

7. Eaa ta tatou ka apii mai mei ta Iehova akono anga i tana Tamaiti?

⁷ Akamanako ana eaa ta tatou ka apii mai mei ta Iehova akono anga i tana Tamaiti, ko Iesu. E akarongo putuputu ana a Iehova i ta Iesu au pure. Kua akarongo aia i ta Iesu pure, e kua pau mai i te reira. (Ioa. 11:41, 42) Noatu te au timataanga ta Iesu i na roto, kua kite ua aia i te tauturu a tona Metua.—Luka 22:42, 43.

8. Na roto i teea au mataara ta Iehova akono anga ia Iesu?

⁸ Kua akakite a Iesu no tona Metua e koia te Tumu e Tei Akono i tona oraanga mei tana i tuatua: “Te ora nei oki au i te Metua ra.” (Ioa. 6:57) Kua irinaki tikai a Iesu i tona Metua, e kua tauturu katoa a Iehova iaia i te pae kopapa. Te mea puapinga, kua akono a Iehova i to Iesu turanga pae vaerua.—Mata. 4:4.

9. Akapeea a Iehova te akapapu anga e e Metua aroa aia e te akono ia Iesu?

⁹ Ei Metua aroa, kua akapapu a Iehova e kua kite a Iesu i tana tauturu. (Mata. 26:53; Ioa. 8:16) Noatu kare a Iehova i paruru iaia mei te au mea kino, kua tauturu Aia ia Iesu kia akakoromaki i te au timataanga. Kua kite papu a Iesu e ko te au kino te ka tupu kiaia, e au mea poto ua te reira. (Ebe. 12:2) Kua akaari mai a Iehova e te akaperepere ra aia ia Iesu na te akarongo  anga kiaia, na te akono anga, te tereni anga e te tauturu iaia. (Ioa. 5:20; 8:28) Ka akara tatou akapeea to tatou Metua i te rangi me akono ia tatou.

10. Ia Salamo 66:19, 20, akapeea a Iehova te akaari anga e te akaperepere ra aia ia tatou?

¹⁰ Akarongo a Iehova i ta tatou pure. (E tatau ia Salamo 66:19, 20.) Kare aia i akakotinga i ta tatou pure; kua akaue mai aia kia pure putuputu tatou. (1 Tesa. 5:17) Ka rauka ia tatou i te akangateitei i to tatou Atua i tetai ua atu taime, noatu teiea tatou. Ka akarongo mai aia i ta tatou pure. Me kite tatou e te akarongo maira a Iehova i ta tatou pure, ka akavaitata tatou kiaia. Karanga te tata taramo: “E inangaro toku ia Iehova, koia i akarongo mai i toku reo.”—Sala. 116:1.

11. Akapeea a Iehova me pau mai i ta tatou pure?

¹¹ Kare ua to tatou Metua e ka akarongo mai i ta tatou pure, mari ra ka pau mai aia i te reira. Akapapu mai te apotetoro ko Ioane: “Kia pati ua atu tatou i te au mea ravarai i tau [i te Atua] ra, te akarongo maira aia ia tatou.” (1 Ioa. 5:14, 15) E tika, kare a Iehova e pau mai i ta tatou pure na te mataara ta tatou i manako ana. Kua kite aia eaa te mea meitaki no tatou, i tetai taime kare aia e pau vave mai e ka tiaki tatou.—2 Kori. 12:7-9.

12-13. Akapeea to tatou Metua i te rangi me akono ia tatou?

¹² Akono maira a Iehova ia tatou i te pae kopapa. Ka rave aia i tei akaueia ki te au Metua tane kia rave. (1 Timo. 5:8) Kua oronga mai aia i te au apinga ka anoanoia e tana au tamariki. Kare aia e inangaro ia tatou kia apiapi no te kai, te kakau me kore te kainga. (Mata. 6:32, 33; 7:11) Mei tetai metua aroa, kua akanoo a Iehova i tetai turanga meitaki no tatou a te tuatau ki mua.

¹³ Te mea puapinga, kua oronga mai a Iehova i te au mea pae vaerua no tatou. Na roto i tana Tuatua, kua akakite mai aia i te tika no runga iaia, tona akakoroanga, te tumu i anga aia ia tatou e te ka tupu a te tuatau ki mua. Aroa mai aia ia tatou i te apii anga tatou i te tuatua mou, na roto i to tatou au metua, me kore tetai tangata ke. E kua tauturu mai te aronga pakari aroa ua e te au taeake e te au tuaine tukatau i roto i te putuputuanga. Kua apii mai a Iehova ia tatou e te au taeake na roto i te au uipaanga putuputuanga. Na roto i teia au mataara, kua akaari mai a Iehova i tona inangaro ia tatou katoatoa.—Sala. 32:8.

14. Eaa ra a Iehova ka ako ei ia tatou, e ka akapeea aia me rave i teia?

¹⁴ Ako mai a Iehova ia tatou. Tuke kia Iesu, e aronga apa ua tatou. Ei tereni ia tatou, ka ako mai to tatou Metua ia tatou me anoanoia. Akamaara mai tana Tuatua: “Ta te Atu e akaperepere ra, ko tana ïa e ako mai.” (Ebe. 12:6, 7) Ka ako mai a Iehova ia tatou na roto i te au ravenga ke ke. Ei akaraanga, tetai taime ka tatau tatou i tana Tuatua me kore ka akarongo i tona manako i ko i te uipaanga te ka tauturu ia tatou kia akatikatika i to tatou tu. Me kore ka tauturu mai aia na roto i te aronga pakari. Noatu te tu, ka ako a Iehova ia tatou na roto i te aroa akaperepere.—Iere. 30:11.

15. Na teea mataara te paruru maira a Iehova ia tatou?

¹⁵ Tauturu a Iehova ia tatou me na roto i te au timataanga. Mei tetai metua tane aroa e tauturu ra i tana tamariki i te au tuatau ngata, ka pera katoa rai to tatou  Metua i te rangi. Kua taangaanga aia i tona vaerua tapu kia paruru ia tatou i te pae vaerua. (Luka 11:13) Ka paruru katoa a Iehova ia tatou i te pae ngakau. Ei akaraanga, kua oronga mai aia i tetai manakonakoanga manea no tatou. Kua riro te reira ei tauturu ia tatou kia akakoromaki i te au timataanga ngata. Akamanako ana i teia: Noatu eaa te au mea kino ka tupu kia tatou, ka akakore to tatou Metua akaperepere i te reira. No reira e mea poto ua to tatou timataanga, kareka ra ta Iehova akameitakianga e mea mutu kore ia.—2 Kori. 4:16-18.

16. I te akarongo kore anga a Adamu i tona Metua aroa, eaa tei tupu?

¹⁶ Ka kite tatou i to Iehova aroa no tatou i te akakore anga aia i te au manamanata tei tupu ki tona ngutuare tangata i te enua nei. I te akarongo kore anga a Adamu ki tona Metua i te rangi, kua ngere aia i tona ngai i roto i ta Iehova akanoonooanga, nona e tona uanga katoa. (Roma 5:12; 7:14) Inara kua rave a Iehova i tetai angaanga ei tauturu i te uanga a Adamu.

17. I muri ake i to Adamu akarongo kore anga, eaa ta Iehova i rave?

¹⁷ Kua akautunga a Iehova ia Adamu, inara kua inangaro aia i te tauturu i ta Adamu uanga. Kua taputou aia no te kapiti akaou mai i te au tangata tiratiratu ki tona ngutuare. (Gene. 3:15; Roma 8:20, 21) Kua akatupu a Iehova i teia na roto i te atinga oko o tana Tamaiti akaperepere, ko Iesu. Na te oronga anga mai i tana Tamaiti no tatou, akaari mai a Iehova i tona aroa akaperepere ia tatou.—Ioa. 3:16.

18. No teaa tatou i papu ei e te inangaro maira a Iehova ia tatou, noatu kua aere ke tatou mei iaia?

¹⁸ Noatu to tatou tu apa, te inangaro  maira a Iehova ia tatou i roto i tona ngutuare e te tauturu maira ia tatou. Penei ka akamaromaroa tatou iaia e ka akaruke iaia, kare roa a Iehova e akaruke ia tatou. Akatutu mai a Iesu i to Iehova inangaro maata ia tatou, na roto i te tua o tetai tamaiti kaimoumou apinga. (Luka 15:11-32) Te metua tane i roto i teia akatutuanga kua tapapa aia e ka oki mai tana tamaiti. I tona oki mai anga ki te kainga, kua āriki maoraora tona metua tane iaia. Me kua aere ke tatou mei ia Iehova e kua tataraara, papu ia tatou e te tapapa maira to tatou Metua aroa ia tatou.

19. Akapeea a Iehova me takore i te kino ta Adamu i rave?

¹⁹ Ka takore to tatou Metua i te au kino ta Adamu i rave. Muri ake i te akarongo kore anga a Adamu, kua iki a Iehova e 144,000 tangata mei te enua nei, te ka tutara ei ariki e ei kau taunga i te pae ia Iesu i runga i te rangi. Ka tauturu a Iesu e te aronga tutara kapiti kiaia i te au tangata ravarai kia riro ei aronga apa kore i roto i te ao ou. Muri ake me timata akaouia to ratou akarongo, ka oronga te Atua i te oraanga mutu kore kia ratou. Ka mataora to tatou Metua i te akara mai e kua ki te enua i tana au tamariki tamaroa e te tamariki tamaine apa kore. Mei teaa atura te tuatau rekareka!

20. Na roto i teea au matara ta Iehova akaari anga i tona aroa akaperepere ia tatou, eaa ta tatou ka uriuri i roto i te atikara ka aru mai?

²⁰ Akaari maira a Iehova e te akaperepere ra aia ia tatou. E Metua meitaki tikai aia. Te akarongo maira aia i ta tatou pure e te oronga maira i ta tatou e anoano ra, i te pae kopapa e te pae vaerua. Apii aia ia tatou e te tauturu maira. Ka rave katoa aia i te au mea manea no tatou a te tuatau ki mua. Mataora tatou i te kite e te aroa maira to tatou Metua ia tatou! Ta tatou atikara ka aru mai ka uriuri i te au mataara ka akaari tatou e te mareka ra tatou i tona aroa.