NO TETAI au mataiti, akaapa te aronga Pipiria e ko te Ariki ko Belesazara, kare i taikuia i roto i te puka o Daniela. (Dani. 5:1) Kua akamou ratou i to ratou manako no te mea kare te aronga keri apinga i papu me kua ora ana aia i tera tuatau. Inara, kua taui te reira i te 1854. No teaa ra?

I tera mataiti, ko te tangata Peritane ko J. G. Taylor tei kimikimi i te oire taito o Ura, e i teianei ko Iraq apatonga. Te reira te ngai o te punanga mamaata, tei kiteaia tetai au karakaraea. Ko te cylinder, mei te a ini te roaroa (10 cm), kua tataia te reira ki runga i te papa toka. Ko te tataanga i runga i teia cylinder, kapiti mai tetai pure no te oraanga o te Ariki ko Nabonaida o Babulonia e tana tama mua, ko Belesazara. Kua āriki katoa te aronga akaapa: Te akapapu maira e i ora ana a Belesazara.

Inara akakite te Pipiria e i ora ana a Belesazara e ariki katoa aia. Kua ekoko akaou te aronga akaapa. Ei akaraanga, i te 19 anere mataiti kua tata te taieni ko William Talbot e kua tauetono tetai pae e ko “Belesazara te tutara i taua taime ra, raua ko tona metua tane ko Nabonaida. Inara kare e akapapu anga no teia.”

Kua āriki ratou i tei uriuriia, inara te au tata anga i runga i te karakaraea te akaari maira i to Belesazara papa ko te Ariki ko Nabonaida, kua aere aia mei te oire maata no tetai tuatau. Eaa i reira tei tupu kiaia? Karanga te Encyclopaedia Britannica e, “kua akatuikaaia a Nabonaida, no reira kua orongaia tona taoonga kia Belesazara e tona pupu vaeau.” Kua tavini i reira a Belesazara i Babulonia ei tutara i te reira tuatau. No reira, karanga te tangata keri apinga taito e te apii reo ko Alan Millard e ko “te Puka o Daniela tei kapiki ia a Belesazara e ‘ariki.’”

E tika, ei au tavini no te Atua, te akapapu ra te au kaveinga o te puka o Daniela, e mea irinakiia e te akauruia e te Atua i roto i te Pipiria.—2 Timo. 3:16.