1-2. Ia Mataio 5:11, eaa to tatou manako no te au timataanga?

TAPUTOU a Iesu ki tana au pipi e ka rauka ia ratou te mataora. Kua akamatakite katoa aia i te aronga tei inangaro i te aru iaia e ka timataia ratou. (Mata. 10:22, 23; Luka 6:20-23) Ei pipi na Karaiti, e rekareka ana tatou. Inara eaa to tatou manako me patoi mai to tatou kopu tangata, me takinokinoia e te kavamani, e me māro te au oa angaanga e te au oa apii ia tatou kia rave i te kino? Mea papu, ka akatupu teia i te tu taitaia.

² Manako tetai pae aronga e kare e tupu te rekareka me takinokinoia tatou. Inara, te akakite maira te Tuatua a te Atua e ka rekareka tatou. Ei akaraanga, tata a Iakobo e auraka e manako maata i te au timataanga, mari ra kia rekareka tatou me tupu te reira. (Iako. 1:2, 12) Akakite katoa a Iesu e kia mataora tatou me takinokinoia. (E tatau ia Mataio 5:11.) Akapeea tatou e vai rekareka ai me tupu te timataanga? E maata ta tatou ka kite mai mei ta Iakobo i tata ki te au Kerititiano mua. Akamanako tatou i te au timataanga tei tupu ki teia au Kerititiano.

3. Eaa tei tupu i muri poto ua ake te riro anga mai a Iakobo ei pipi na Iesu?

³ I muri poto ua ake te riro anga mai a Iakobo, te teina o Iesu ei pipi, kua tupu te takinokinoanga ki te au Kerititiano i Ierusalema. (Anga. 1:14; 5:17, 18) Te tamateia anga te pipi ko Setephano, kua oro te au Kerititiano mei te oire e kua “pueurikiriki ke atura ratou katoa, e pini rava akera Iudea e Samaria,” e tae atu ki Kupero e Anetioka. (Anga. 7:58–8:1; 11:19) Kare tatou i kite i te maata o te manamanata  tei tupu ki te au pipi. Noatu rai, kua tutu aere ratou i te nuti meitaki i te au ngai ta ratou i aere, e e maata te putuputuanga tei tupu mai i te Enua i Roma. (1 Pete. 1:1) I muri mai, maata atu te au manamanata tei tupu ki te au Kerititiano mua.

4. Eaa te au timataanga ta te au Kerititiano mua i akakoromaki?

⁴ Kua akakoromaki te au Kerititiano mua i te au timataanga e manganui. Ei akaraanga, i te mataiti 50 T.N., kua akaue te Tutara o Roma ko Kalaudio i te ngati Iuda kia akaruke ia Roma. No reira kua māroia ratou kia akaruke i to ratou ngutuare e kia noo i tetai ngai ke. (Anga. 18:1-3) I te 61 T.N., tata te apotetoro ko Paulo e kua takinokinoia tona au taeake Kerititiano i te ngai tangata, kua tiriaia ki roto i te are auri, e kua keiaia ta ratou apinga. (Ebe. 10:32-34) Kua akakoromaki katoa ratou i te oraanga putaua e te maki.—Roma 15:26; Phili. 2:25-27.

5. Eaa te au uianga ka pau tatou?

⁵ Te tata anga a Iakobo i tana reta i mua ua ake i te mataiti 62 T.N., kua kite meitaki aia i te au timataanga tei tupu ki te au taeake e te tuaine. Kua akauru a Iehova ia Iakobo kia tata i te au akoanga meitaki ki te au Kerititiano ei tauturu ia ratou kia vai rekareka ua noatu te au timataanga. Akara oonu tatou i te reta a Iakobo e te pau i teia au uianga: Eaa te tu rekareka ta Iakobo i tata? Eaa te ka akariro i te au Kerititiano kia ngere i teia rekareka? E akapeea te pakari, te akarongo, e te mataku kore me tauturu ia tatou kia rekareka ua noatu te au timataanga?

6. Ia Luka 6:22, 23, eaa te au Kerititiano ka rekareka ai me tupu te au timataanga?

⁶ Penei ka manako te tangata e ka rauka te mataora me meitaki te oraanga, maata te moni, e me mataora te ngutuare. Inara ko te tu rekareka ta Iakobo i tata, ko tetai ua teia o te vaerua tapu o te Atua e kare i akatumuia ki runga i te turanga o te tangata. (Gala. 5:22) Ka rauka i tetai Kerititiano te rekareka me kite aia e te mareka maira a Iehova e te aru ra aia i to Iesu akaraanga. (E tatau ia Luka 6:22, 23; Kolo. 1:10, 11) Mei te aʼi e kā ra i roto i te lamepa, te kā katoa ra teia tu rekareka i roto i te ngakau o te Kerititiano. Kare te reira e matemate me tupu te turanga maki e me kare e rava te moni. Kare e mate takiri me tupu te takinokino e te patoianga a te ngutuare tangata e tetai ke. Mari ra, ka mārama atu te aʼi me tauta te aronga patoi i te tamate i te reira. Te au timataanga ka tupu no to tatou akarongo, te akapapu ra te reira e e pipi mou tatou na Karaiti. (Mata. 10:22; 24:9; Ioa. 15:20) Te tumu teia i tata ei a Iakobo: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa.”—Iako. 1:2.

7-8. Akapeea to tatou akarongo me akaketaketaia?

⁷ Akakite a Iakobo i tetai akaou tumu i tupu ei te timataanga ki te au Kerititiano. Karanga aia: “Na taua timata anga i to kotou akarongo ra e akatupu i te akakoromaki.” (Iako. 1:3) Kua aite te timataanga ki te aʼi tei taangaangaia no te maani i te koke auri. Me akaveraia e me akaanuia te auri, ka ketaketa atu te koke. Mei te reira rai, me akakoromaki tatou i te au timataanga, ka ketaketa atu to tatou akarongo. Tata a Iakobo: “E tuku atu i ta te akakoromaki ra angaanga kia tika rava, kia meitaki rava kotou, ma te apa kore.” (Iako. 1:4) Me mārama tatou e na te au timataanga e akaketaketa i to tatou akarongo, ka rauka te akakoromaki ma te rekareka.

⁸ I roto i tana reta, akakite a Iakobo i te au apinga te ka akangere i te rekareka. Eaa teia au timataanga, e akapeea tatou me akakoromaki i te reira?

9. Eaa ra tatou ka anoano ei i te pakari?

⁹ Ka ngere te rekareka: Me kare koe e kite eaa te ka rave. Me tupu tetai timataanga, ka inangaro tatou i te pati i ta Iehova tauturu i te rave i te au ikianga te ka akamareka iaia, kia puapingaia to tatou au taeake e te au tuaine, e kia vai tiratiratu. (Iere. 10:23) Ka anoanoia te pakari  kia kite eaa ta tatou ka rave e te ka tuatua ki te aronga patoi. Me kare tatou e kite eaa te ka rave, penei ka akaparuparuia tatou e ka ngere viviki to tatou rekareka.

10. Kia rauka te pakari, eaa ta Iakobo 1:5 e akakite maira kia rave tatou?

¹⁰ Rave i teia: Pati kia Iehova no te pakari. Kia akakoromaki i te au timataanga ma te rekareka, e pati kia Iehova no te pakari kia rave i te au ikianga meitaki. (E tatau ia Iakobo 1:5.) Eaa ta tatou ka rave me kare a Iehova e pau viviki i ta tatou pure? Karanga a Iakobo, e “pati” ua rai tatou ki te Atua. Kare a Iehova e riri me kore e patoi mai me pati ua rai tatou no te pakari. Ka “oronga ua mai” to tatou Metua i te rangi i te reira kia rauka te akakoromaki i te au timataanga. (Sala. 25:12, 13) Te kite maira aia i to tatou timataanga, te tangi aroa maira, e te inangaro ra aia i te tauturu ia tatou. E tumu meitaki teia kia rekareka tatou! Akapeea a Iehova me oronga mai i te pakari?

11. Eaa atu ta tatou ka rave kia rauka te pakari?

¹¹ Te oronga maira a Iehova i te pakari na roto i tana Tuatua. (Mase. 2:6) E rauka ai te reira, ka anoanoia tatou kia apii i te Tuatua a te Atua e te au puka Pipiria. Inara e maata atu ta tatou ka anoanoia kia rave. Ka taangaanga tatou i to te Atua pakari i roto i to tatou oraanga. Tata a Iakobo: “Ei aronga rave oki kotou i te tuatua nei, auraka ei aronga akarongo ua.” (Iako. 1:22) Me taangaangaia te reira, ka rauka te ‘au, te maru, e te takinga meitaki. (Iako. 3:17) Ka tauturu teia au tu ia tatou kia akakoromaki i tetai ua atu timataanga ma te rekareka.

12. Eaa ra i puapinga ai kia kite meitaki tatou i te Pipiria?

¹² Kua aite te Tuatua a te Atua ki tetai iʼo, te ka tauturu ia tatou kia kite e kia  akatanotano i te au ngai ka anoanoia. (Iako. 1:23-25) Ei akaraanga, ia tatou e apii ra i tana Tuatua, penei ka anoanoia kia akatere i to tatou tu riri. Ma te tauturu a Iehova, ka akaari tatou i te tu maru me akaririia mai tatou. E ka mama i reira te akakoromaki i te au timataanga. Ka rauka katoa ia tatou te akamanako meitaki e te rave i te au ikianga meitaki. (Iako. 3:13) E mea puapinga kia kite meitaki tatou i te Pipiria!

13. Eaa tatou ka apii ei i te au akaraanga i roto i te Pipiria?

¹³ Tetai taime, ka kite mai tatou i te tarevake i muri ake me rave tatou i te reira. Kare teia i te mea meitaki. Tetai ravenga kia rauka te pakari, na te apii anga i te akaraanga o te aronga tei rave i te meitaki e tei rave i te kino. No reira a Iakobo i akamaroiroi mai ei ia tatou kia akamanako i te au akaraanga i roto i te Pipiria mei ia Aberahama, Rahaba, Iobu e Elia. (Iako. 2:21-26; 5:10, 11, 17, 18) Kua akakoromaki teia au tavini tiratiratu o Iehova i te au timataanga te ka akangere i to ratou rekareka. E ma ta Iehova tauturu, ka rauka katoa ia tatou i te akakoromaki.

14-15. Eaa ra tatou ka akatikatika ai i te manako papu kore?

¹⁴ Ka ngere te rekareka: Te manako papu kore. I tetai taime, penei ka ngata ia tatou te mārama i ta te Pipiria e akakite maira. Me kore, kare a Iehova e pau mai i ta tatou pure na roto i te tu e manako ra tatou. Ka akatupu teia i te manako papu kore. Me kare e akatikatikaia te manako papu kore, ka akaparuparuia to tatou akarongo e to tatou pirianga kia Iehova. (Iako. 1:7, 8) Ka akaparuparu katoaia to tatou manakonakoanga no te tuatau ki mua.

¹⁵ Akaaite te apotetoro ko Paulo i te manakonakoanga ki tetai tutau. (Ebe. 6:19) Ka akatinamou te tutau i te paī i roto i te uriia kia kore e apainaia ki runga i te au toka. Inara kare te tutau e puapinga me motu te vivi. Mei te tutae auri rai te ka akaparuparu i te vivi, ka akaparuparu katoa te manako papu kore i to tatou akarongo. Me tupu te timataanga, kare te tangata manako papu kore e irinaki e ka akatupu a Iehova i tana i taputou. Me kare o tatou irinakianga, kare o tatou manakonakoanga. Akakite a Iakobo e ko te tangata manako papu kore, “e tau ïa i te ngaru tai e puia e te matangi, e tikitiki akera.” (Iako. 1:6) Kare teia tu tangata e kite i te rekareka!

16. Eaa ta tatou ka rave me tupu te manako papu kore?

¹⁶ Rave i teia: Takore i te manako papu kore; akaketaketa i te akarongo. Auraka koe kia riro ei tangata ngakau rua. I te tuatau o te peroveta ko Elia, kua tupu te tu ngakau rua ki te iti tangata o Iehova. Akakite a Elia kia ratou: “Mei te aa te roa o tenana ekoko rua anga? ko Iehova te Atua ra, e aru iaia: ko Baala ra, e aru iaia.” (1 Ari. 18:21) Te tupu nei rai teia i teia tuatau. Ka rave tatou i tetai kimikimianga kia papu ia tatou e ko Iehova te Atua, ko te Pipiria tana Tuatua, e ko te Au Kite o Iehova tona iti tangata. (1 Tesa. 5:21) Ka takore teia i te manako papu kore e ka akaketaketa i te akarongo. Me te vai ra te manako papu kore, e pati tauturu ki te aronga pakari. E rave viviki i teia kia rekareka ua tatou i te tavini anga ia Iehova!

17. Eaa te ka tupu me mataku tatou?

¹⁷ Ka ngere te rekareka: Me tupu te mataku. Akakite te Tuatua a te Atua: “Kia potopoto to aʼo i te rā i eke ei ra, kua iti roa toou maroiroi.” (Mase. 24:10) Te tuatua  Ebera tei uriia “kia potopoto to aʼo” ka aite katoa te reira ki te mataku. Me mataku koe, ka ngere viviki koe i te rekareka.

18. Eaa te aiteanga kia akakoromaki?

¹⁸ Rave i teia: Irinaki ia Iehova kia akakoromaki ma te mataku kore. Ka anoanoia te tu mataku kore no te akakoromaki i te au timataanga. (Iako. 5:11) Te tuatua “akakoromaki,” te akaaite nei a Iakobo i te reira ki tetai tangata e tu ngaueue kore tona. Penei ka akamanako tatou i tetai vaeau te tu mataku kore ra e kare e oro ke mei te enemi.

19. Eaa ta tatou ka apii mai mei te akaraanga o te apotetoro ko Paulo?

¹⁹ Ko te apotetoro ko Paulo tetai akaraanga meitaki no te tu mataku kore e te akakoromaki. I tetai au taime, kua paruparu ana aia. Inara kua rauka iaia te akakoromaki no tona irinaki ia Iehova no te maroiroi. (2 Kori. 12:8-10; Phili. 4:13) Ka rauka rai ia tatou tera tu maroiroi e te mataku kore me pati tatou ma te tu akaaka i ta Iehova tauturu.—Iako. 4:10.

20-21. Eaa tei papu ia tatou?

²⁰ Kua papu ia tatou e kare te timataanga i te utunga no ko mai ia Iehova. Akapapu mai a Iakobo: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” (Iako. 1:13) Me papu ia tatou i teia, ka piri vaitata atu tatou ki to tatou Metua aroa i te rangi.—Iako. 4:8.

²¹ Kare rava a Iehova e taui, “kare oki e tu ke anga.” (Iako. 1:17) Kua tauturu aia i te au Kerititiano i te anere mataiti mua i to ratou au timataanga, e ka tauturu rai aia ia tatou i teia tuatau. E pati kia Iehova no te pakari, te akarongo, e te tu mataku kore. Ka pau mai aia i taau pure. E ka tauturu aia ia koe kia rekareka ua noatu te au timataanga!