TE AAERE ra tetai nga vaine mapu i ko i te ngai pitiniti i Baguio City, Philippines. I reira kua kite raua i te pereoo puka, inara kare raua i aere atu i te atoro. I ko i te pereoo puka, te tu ra tetai tuaine ko Helen ma te mata katakata. E ko ta te nga vaine mapu i akamaara, ko te mata katakata e te oaoa o Helen.

Te oki anga te nga vaine mapu ki to raua ngutuare na runga i te bus, kua kite atu raua i tetai akairo jw.org i ko i tetai Are Uipaanga Patireia. Kua maara mai ia raua e ko tera rai te akairo ta raua i kite ana i ko i te pereoo puka. Te eke anga mai raua mei runga i te bus, aere atu raua ki ko i tera Are Uipaanga Patireia i te akara i te akanoonooanga o te au uipaanga no te au putuputuanga tukeke.

E oti, kua aere atu raua ki tetai uipaanga. E koai ta raua i kite mai to raua tomo anga ki roto i te Are Uipaanga Patireia? Ko Helen! Maara roa mai ia raua e ko teia tera vaine mata katakata e te oaoa. Karanga a Helen: “Kua manga manamanata rai au no te mea kare au i kite eaa raua i aere mai ki ko iaku, penei kua rave au i tetai mea kino.” Inara kua akakite te nga vaine mapu kia Helen eaa tei tupu i ko i te pereoo puka.

Mataora tikai raua i ko i te uipaanga e i rotopu i te au taeake e te au tuaine. Te kite anga raua i te au tangata e tamā ra i te Are Uipaanga Patireia i muri ake i te uipaanga, kua pati raua kia tauturu ia ratou. Kua akaruke tetai o te nga vaine i te Philippines, inara ko tetai vaine mai, te aere ra aia ki te au uipaanga e kua akamata i te apii i te Pipiria—no te mata katakata ua nei!