1-2. (a) Eaa ra ka ngatā ei i tetai pae kia irinaki i te aronga mana akaaere? (e) Eaa ta tatou ka uriuri i roto i teia atikara?

I TEIA tuatau e ngatā i tetai pae i te irinaki i te aronga mana akaaere. Te kite ra ratou e te paruru ra te kavamani e te ture i te aronga moni e te ririnui, e kare e tauturu ana i te aronga putaua. Akakite te Pipiria: “Te tutara ra tetai tangata ki rungao i tetai, ei mate nona uaorai.” (Kohe. 8:9) Pera katoa, te rave ra tetai au akaaere akonoanga i te au angaanga kino. Ko te tumu teia kare tetai pae aronga e irinaki ana i te Atua. No reira, me ka apii tatou i te Pipiria ki tetai tangata, ka tauturu tatou iaia kia irinaki ia Iehova e te aronga tana i iki no te arataki i tana akaaerenga i te enua nei.

² Te tika, kare ko te aronga apii Pipiria ua te ka anoanoia kia irinaki ia Iehova e tana akaaerenga. Ka anoano katoaia tatou, tei tavini ia Iehova no tetai tuatau roa, kia irinaki e ka rave ua rai a Iehova i te mea tau. Inara i tetai taime, ka tupu tetai apinga te ka timata i to tatou irinaki ki roto ia Iehova. I teia atikara, ka uriuri tatou e toru apinga te ka timata i to tatou akarongo: (1) me tatau tatou i tetai tua Pipiria, (2) me orongaia mai tetai aratakianga mei te akaaerenga a Iehova, e te (3) me tupu tetai manamanata a te tuatau ki mua.

3. Akapeea tetai au tua Pipiria me timata i to tatou irinaki ia Iehova?

 ³ Me tatau tatou i te Tuatua a te Atua, penei ka manako tatou eaa te tumu i rave ei a Iehova i tana i rave e te tu i akono ei aia i tetai pae aronga. Ei akaraanga, i roto i  te puka o Numero, ka kite tatou e kua tamate a Iehova i tetai tangata Iseraela no te koʼi rakau i te rā Sabati. I roto i te rua o te puka a Samuela, e au anere mataiti i muri mai, kua akakore a Iehova i te ara a te Ariki ko Davida no te akaturi e te tā tangata. (Nume. 15:32, 35; 2 Samu. 12:9, 13) Penei ka ui tatou, ‘Eaa ra a Iehova i akakore ei i te ara a Davida no te tā tangata e te akaturi, inara kua tamate i tetai tangata no tetai ara iti ake?’ Kia pau i teia uianga, ka uriuri tatou e toru apinga kia akamaara me tatau i te Pipiria.

4. Akapeea a Genese 18:20, 21 e Deuteronomi 10:17 te akaketaketa anga i to tatou irinaki i ta Iehova au ikianga?

⁴Kare te Pipiria e oronga mai i te au akakiteanga katoatoa no tetai tua. Ei akaraanga, kua kite tatou e kua tataraara tikai a Davida no tana i rave. (Sala. 51:2-4) Inara eaa te tu o te tangata tei aati i te ture no te Sabati? Kua tataraara ainei aia no tana i rave? Kua aati ainei aia i te ture a Iehova i mua ana? Kua kopae ainei aia i te au akamatakiteanga? Kare te Pipiria i akakite mai ana. Inara, kua papu ia tatou: E Atua “kino kore” a Iehova. (Deu. 32:4) E akatumu ana aia i tana au ikianga ki runga i te au mea tika—kare ki runga i te tuatua a tetai ke, te tu papakitai, me kore te manako tarevake o te tangata. (E tatau ia Genese 18:20, 21; Deuteronomi 10:17.) Te maata atu i ta tatou ka apii mai no runga ia Iehova e tona au turanga, ko te maata atu ïa i to tatou irinaki i tana au ikianga. Noatu ka maata ta tatou au uianga kare e rauka i te pau i teia taime, kua kite meitaki tatou e “e tuatua-tika ta Iehova i tona katoa ra au aerenga.”—Sala. 145:17.

5. Akapeea to tatou tu apa ua me akakeu i ta tatou au ikianga? (Akara i te pia “ No te tu Apa, Kare Tatou e Mārama i te au Mea Ravarai.”)

⁵No te tu apa ua, ka tarevake ta tatou au ikianga. Kua angaia tatou ki to te Atua uaorai tu, no reira tatou i inangaro ei kia akono meitakiia te tangata. (Gene. 1:26) Inara no te tu apa ua, ka tarevake tatou noatu me ka manako tatou e ko te tika te reira. Ei akaraanga, kua mareka kore a Iona i ta Iehova ikianga kia  kore e tamate i te iti tangata o Nineve. (Iona 3:10–4:1) Eaa tei tupu? Kua tataraara e 120,000 tuma tangata i Nineve e kua akaoraia mai ratou! Te kite nei tatou e ko Iona tei anoanoia kia akatano i tona manako, kare ko Iehova.

6. Eaa a Iehova kare e anoanoia kia akamārama i tana ikianga kia tatou?

⁶Kare a Iehova e anoanoia kia akamārama i tana au ikianga ki te tangata. Kua akatika ana a Iehova i tona au tavini i taito kia akakite mai i to ratou manako no tana i rave me kore tana ka rave. (Gene. 18:25; Iona 4:2, 3) Tetai au taime, ka akamārama aia i te reira. (Iona 4:10, 11) Inara, kare a Iehova e anoanoia kia akamārama i te tumu no tana au ikianga. Koia Tei Anga ia tatou e kare aia e anoano i ta tatou tukuanga tika no tana angaanga ka rave.—Isa. 40:13, 14; 55:9.

7. Eaa tetai apinga ngatā ka tupu kia tatou, e no teaa ra?

⁷ Kare ekoko ka āriki tatou e ka rave a Iehova i te au mea tika. Inara, ko to tatou manamanata, ko te irinaki anga i te au taeake tana i iki kia arataki ia tatou. Penei ka manako tatou me te aru ra teia au taeake i te aratakianga a Iehova, me te rave ra ratou i to ratou uaorai anoano. Kua akapera ana rai tetai pae i te tuatau Pipiria. Akamanako ana i te akaraanga tei taikuia i roto i te  parakarapa 3. Penei kua karanga ana tetai kopu tangata o te tangata tei aati i te ture o te Sabati, e kare a Mose i ui i to Iehova manako i mua ake ka akautungaia ai aia kia mate. Penei ka karanga tetai oa o Uria ngati Heta, te tane a te vaine tei akaturi kia Davida, e kua taangaanga a Davida i tona taoonga ariki kia kopae i te utunga tei tau kiaia. Ko te tika, kare e rauka ia tatou i te karanga e te irinaki ra tatou ia Iehova, me kare tatou e irinaki i te au taeake tana i iki kia arataki ia tatou.

8. Eaa te mea tei aiteite i roto ia Angaanga 16:4, 5 e te akaaere anga i te putuputuanga Kerititiano i teia tuatau?

⁸ I teia tuatau, kua iki a Iehova i te “tavini akono meitaki e te pakari” no te arataki i tana akaaerenga i te enua nei. (Mata. 24:45) Mei te pupu akaaere o te anere mataiti mua, ka akono teia tavini i te iti tangata o te Atua i te ao nei, e ka oronga i te au aratakianga ki te aronga pakari i roto i te putuputuanga. (E tatau ia Angaanga 16:4, 5.) Ka akamaroiroi te aronga pakari i te putuputuanga kia aru i te reira. Ka akaari tatou i to tatou irinaki ia Iehova na te akarongo anga ki te au aratakianga a te akaaerenga e te aronga pakari.

9. Eaa tetai atianga ka ngatā ia tatou i te akarongo ki te au ikianga a te aronga pakari, e no teaa ra?

⁹ I tetai au taime, penei ka ngatā ia tatou i te turu i te au ikianga a te aronga pakari. Ei akaraanga, i te au mataiti i topa ake nei, e maata te au tauianga i roto i tetai au putuputuanga e te au kotinga. Kua pati te aronga pakari i tetai au papuritia kia neke ki roto i tetai putuputuanga ke kia akaki i te Are Uipaanga Patireia. Me ka patiia tatou kia neke ki tetai putuputuanga ou, penei ka ngatā ia tatou i te akaruke i to tatou au oa e te kopu tangata. Ka akakite ainei te Atua ki te aronga pakari e ka tuku ratou i te au papuritia kiea? Kare. Te tumu teia ka ngatā ia tatou i te aru i te au aratakianga ka orongaia mai. Inara te irinaki ra a Iehova  i te aronga pakari kia rave i teia au ikianga, e ka anoanoia tatou kia irinaki ia ratou. *

10. Ia Ebera 13:17, eaa te tumu ka akarongo ei tatou ki te aronga pakari?

¹⁰ Eaa ra tatou ka turu ei i te ikianga a te aronga pakari noatu e kare tatou e reka ana i te reira? No te mea ka tauturu teia i te iti tangata o te Atua kia vai taokotai ua. (Ephe. 4:2, 3) Ka meitaki atu te putuputuanga me kauraro te katoatoa ma te tu akaaka ki te au ikianga a te pupu aronga pakari. (E tatau ia Ebera 13:17.) Tei puapinga atu, ka akaari tatou e te irinaki ra tatou ia Iehova na te akarongo anga ki te aronga tana i iki kia akono ia tatou.—Anga. 20:28.

11. Eaa te ka akamatutu i to tatou irinaki ki roto i te aratakianga a te aronga pakari?

¹¹ Ka ketaketa atu to tatou irinaki ki roto i te aratakianga a te aronga pakari me akamaara tatou e kua pure ratou no te vaerua tapu me uriuri ratou no runga i te putuputuanga. Kua akara matatio katoa ratou i te au kaveinga Pipiria e te au aratakianga a te akaaerenga a Iehova. Kua inangaro tikai ratou i te akamareka ia Iehova e te akono meitaki i tona iti tangata. Kua kite teia au taeake tiratiratu e te akara maira te Atua i ta ratou e rave ra. (1 Pete. 5:2, 3) E akamanako ana: I roto i teia ao kua tupu te ke i rotopu i te tangata no to ratou reo, te akonoanga e te poritiki, te taokotaiia nei ra te iti tangata o Iehova na roto i te akamorianga i te Atua mou. Kua tupu teia ma ta Iehova akameitakianga i tana akaaerenga!

12. Eaa ta te aronga pakari ka uriuri kia kite me kua tataraara te tangata rave kino?

¹² Kua oronga a Iehova i te apainga puapinga ki te aronga pakari kia akono i te putuputuanga e kia vai mā ua te reira. Me rave tetai Kerititiano i tetai ara kino, ka anoano a Iehova i te aronga pakari kia kimikimi me ka tau aia kia noo ki roto i te putuputuanga. Ka anoano katoaia ratou kia kimi me kua tataraara tikai aia no tana i rave. Penei ka karanga aia e kua tataraara aia, inara te rikarika ra ainei aia i tana i rave? Te tauta ra ainei aia kia kore e rave akaou i te reira? Me na tona au oa i akakeu iaia kia rave i te ara, te inangaro ra ainei aia i te akatakake mai mei ia ratou? Ka pure te aronga pakari no ta Iehova aratakianga i roto i te Pipiria, e ka akara katoa i te tu o te tangata no tana i rave. I reira ratou e iki ei me ka tau tera tangata kia noo ki roto i te putuputuanga. Me kare ra, ka akaateaia aia ki vao.—1 Kori. 5:11-13.

13. Eaa te ka tupu me akaateaia tetai oa me kore kopu tangata ki vao mei te putuputuanga?

¹³ Akapeea to tatou tu irinaki ki roto i te aronga pakari me timataia? Me kare te tangata rave kino tei akaateaia i te oa piri mou me kore e kopu tangata no tatou, penei ka āriki ua tatou i te ikianga a te aronga pakari. Inara, ka tuke to tatou manako me e oa piri mou aia no tatou. Penei ka manata tatou e kare te aronga pakari i akara ana i te au tika katoatoa, me kore kare ta ratou ikianga i aite ki ta Iehova. Eaa te ka tauturu ia tatou kia āriki i ta ratou ikianga?

14. Eaa te ka tauturu ia tatou me iki te aronga pakari i te akaatea i tetai tangata rave kino ki vao?

¹⁴ Kia akamaara tatou e ko te akaateaanga i tetai ki vao, e akanoonooanga te  reira na Iehova, e ka puapingaia te putuputuanga e pera te tangata rave kino. Me ka akatikaia te tangata rave kino kia noo ki roto i te putuputuanga, ka akakeu aia i tetai ke kia rave katoa i te ara. (Gala. 5:9) Pera katoa, penei kare aia e kite i te kino tikai o tana ara, e kare aia e akatikatika i tona aerenga manako e tana ka rave kia mareka a Iehova. (Kohe. 8:11) Ka papu ia tatou e kua rave meitaki te aronga pakari i ta ratou angaanga i mua ake ka iki ei me ka akaateaia te tangata mei te putuputuanga. Mei te au akava i Iseraela i taito, kua kite ratou e “kare na te tangata ta [ratou] e akava na, na Iehova ra.”—2 Para. 19:6, 7.

15. Eaa tatou ka anoanoia ai kia irinaki maata i ta Iehova aratakianga i teia taime?

¹⁵ I te openga o teia akatereanga e vaitata maira, ka anoanoia tatou kia irinaki maata atu ia Iehova. Eaa te tumu? I te tuatau o te mate maata, penei ka orongaia mai tetai akakiteanga te ka ngatā ia tatou i te mārama me kore i te āriki. E mea papu kare a Iehova e tuatua tika mai kia tatou. Inara ka oronga aia i te au aratakianga na roto i te au taeake tana i iki. Kare tera i te taime kia ui tatou me kua tano teia aratakianga me kore kia manako e, ‘Na Iehova tikai ainei teia aratakianga? Me ko te manako ua teia no te au taeake e arataki nei ia tatou?’ Ka irinaki ainei koe ia Iehova e tana akaaerenga? Ka kiteaia te reira i roto i te tu e āriki ana koe i te au aratakianga i teia taime. Me irinaki e me akarongo koe ki te au aratakianga ka orongaia mai i teia tuatau, ka pera rai koe a te tuatau o te mate maata.—Luka 16:10.

16. Akapeea to tatou tu irinaki i ta Iehova akavaanga me timataia a te tuatau ki mua?

¹⁶ E mea puapinga katoa kia akamanako meitaki tatou i ta Iehova akavaanga i te openga o teia akatereanga kino. Ka inangaro tatou i to tatou kopu tangata e tetai ua atu kia tavini ia Iehova i mua ake ka tae mai ei te openga. Ia Aramagido, na Iehova e Iesu e rave i te ikianga openga. (Mata. 25:31-33; 2 Tesa. 1:7-9) Kare na tatou e iki koai ta Iehova ka akaora mai. (Mata. 25:34, 41, 46) Ka rauka ainei ia tatou i te irinaki i ta Iehova akavaanga, me ka riro ainei te reira ei turorianga no tatou? Taka meitaki, ka anoanoia tatou kia akaketaketa i to tatou irinaki ki roto ia Iehova i teia taime, kia rauka ia tatou i te irinaki maata iaia a te tuatau ki mua.

17. Akapeea tatou e puapingaia ai mei ta Iehova akavaanga i te openga o teia akatereanga?

 ¹⁷ Akamanako ana i ta tatou ka kite mai i roto i te ao ou no ta Iehova i rave. Kare e akonoanga pikikaa akaou, e pera te au pitiniti noinoi moni e te au angaanga poritiki tei tamamae e te takinokino i te tangata e manganui. Kare tatou e kite akaou i te au tu maki, te ruaine, e te mate i roto i to tatou oraanga. Ka tapekaia a Satani e tana au temoni no tetai tauatini mataiti. Kare e tupu akaou te au kino ta ratou i rave. (Apo. 20:2, 3) Ka rekareka maata tatou e kua irinaki tatou i ta Iehova au ikianga!

18. Ia Numero 11:4-6 e te 21:5, eaa ta tatou ka apii mai mei te akaraanga o te ngati Iseraela?

¹⁸ Ka timataia ainei to tatou tu irinaki ki roto i ta Iehova au ikianga i roto i te ao ou? Ei akaraanga, akamanako ana eaa tei tupu i muri poto ua ake te tukuia anga mai te ngati Iseraela mei te tuikaa i Aiphiti. Kua akamata tetai pae i te kopekope no te mea kua inangaro ratou i te au kai ta ratou i akaruke, e kua mareka kore ratou i ta Iehova i oronga. (E tatau ia Numero 11:4-6; 21:5.) Ka aite ainei to tatou manako ki te reira i muri ake i te mate maata? Kare tatou e kite eaa te maata o te angaanga no te tāmā i te enua e te akariroanga i te reira ei parataito. Kare e kore, e maata te angaanga ka raveia e penei ka ngatā te reira i te akamataanga. Ka kopekope ainei tatou i te au mea ta Iehova ka oronga mai a tera tuatau? E mea papu: Me āriki rekareka tatou i ta Iehova ka oronga mai i teia taime, ka pera katoa rai tatou a te reira tuatau.

19. Eaa te apiianga maata i roto i teia atikara?

¹⁹ E tika ua ana rai ta Iehova au angaanga e rave ana. Kia papu meitaki ia tatou te reira. Ka anoano katoaia tatou kia irinaki i te aronga ta Iehova i iki kia arataki i tona iti tangata. Auraka e ngaropoina i ta Iehova i tuatua na roto i te peroveta ko Isaia: “Tei te akatupua ua e te irinaki e maroiroi ei kotou.”—Isa. 30:15.