I TE TUATAU Pipiria, ka orongaia te tutaki ki te ngutuare o te vaine ka akaipoipo me āriki te kopu tangata. Ko te tutaki, penei e au apinga oko maata, te manu me kore te moni. Tetai au taime, ka tutakiia te reira na te rave anga i te angaanga, mei ta Iakoba i rave tona angaanga anga e itu mataiti no te metua tane o Rahela, kia akaipoipo aia ia Rahela. (Gene. 29:17, 18, 20) Eaa te akakoroanga o teia?

Karanga a Carol Meyers, tetai vaine apii Pipiria e: “Ka riro te tutaki no te vaine ka akaipoipo i te tauturu i te ngutuare o te vaine no te au angaanga tana ka akaruke, i roto tikai i te au ngutuare tanutanu.” Ka tauturu katoa teia tutaki i te akaketaketa i te pirianga o te nga kopu tangata o te tokorua ka akaipoipo. Ka rauka i reira ia ratou te tauturu i tetai e tetai i te au tuatau ngatā. Pera katoa, ka akapapu te reira e kua tapaoia tera vaine kia akaipoipo e ka akaruke aia i tona nga metua e ka riro na tana tane e akono e te paruru iaia.

Me orongaia te tutaki no te vaine ka akaipoipo, kare te aiteanga e e apinga aia kia oko akaouia atu ki vao. Karanga te puka Ancient Israel—Its Life and Institutions e: “Me orongaia te tutaki ki te ngutuare o te vaine ka akaipoipo, ko te akaraanga e kua okoia te vaine. Inara ko te tika, kua riro te tutaki no te vaine ka akaipoipo ei tauturu i tona ngutuare tangata.”

I tetai au enua i teia tuatau, te aru nei rai tetai aronga i teia peu. Me pati te au metua Kerititiano i tetai tutaki no te vaine ka akaipoipo, ka akaari ratou i te tu “maru i te tangata katoa” na te kore e pati i tetai tutaki maata tikai. (Phili. 4:5; 1 Kori. 10:32, 33) Na teia tu, te akapapu ra te reira e kare ratou i te aronga “noinoi.” (2 Timo. 3:2) Pera katoa, me kare te nga metua Kerititiano e pati i tetai tutaki maata, kare te tane e māroia kia angaanga pakari kia peke iaia i te tutaki i te reira, i mua ake ka akaipoipo ei. Me kore, kare te tane e anoanoia kia akamutu i te painia no te angaanga moni kia rauka iaia i te oronga i te tutaki maata no te vaine ka akaipoipo aia.

I tetai au enua, kua akamanaia tetai ture no te tutaki i te vaine ka akaipoipo. E ka anoanoia te au metua Kerititiano kia aru i te reira. Eaa te tumu? Karanga te Tuatua a te Atua e “kia kauraro marie te tangata katoatoa i te aronga mana taoonga” e kia akono i te au ture kare e patoi ana i te ture a te Atua.—Roma 13:1; Anga. 5:29.