1. Eaa ta Iesu i akakite ki tana au pipi no te tuatau openga, e eaa tana akamatakite anga kia ratou?

 I NGA ra i mua ake i to Iesu mate, kua ui tana au pipi e a kiaia: “E akakite mai . . te akairo o . . te openga o teianei ao”? (Mata. 24:3) Te akamanako ra te au pipi akapeea ratou e kite ei te openga o te akatereanga ngati Iuda. I roto i tana pauanga, kua tuatua a Iesu no te openga o te akatereanga ngati Iuda e “te openga o teianei ao” ta tatou e noo nei. No te tuatau openga, karanga a Iesu: “Kareka te reira rā e te reira ora, kare rava tetai e kite, kare oki te au angela o te rangi, kare katoa oki te Tamaiti, ko te Metua anake ra.” E oti kua akamatakite aia i tana au pipi “e ara” e “e matakite oki.”​—Mare. 13:32-37.

2. Eaa i puapinga ai no te aronga i raro ake i te akatereanga ngati Iuda kia matakite?

² Kua anoanoia te au Kerititiano ngati Iuda o te anere mataiti mua kia vai matakite; e ora ai. Akakite a Iesu ki tana au pipi kia matakite i te openga o te akatereanga ngati Iuda. Karanga aia: “Kia akara ra kotou ia Ierusalema i te takako angaia e te au nuku, kua vaitata rava tona pou i reira, kia kite mai kotou.” I te reira atianga, kua anoanoia ratou kia akarongo ki ta Iesu akamatakiteanga e kia ‘oro ki te maunga.’ (Luka 21:20, 21) Te aronga tei akarongo ki teia akamatakiteanga, kua ora ratou te takore anga to Roma ia Ierusalema.

3. Eaa ta tatou ka uriuri i teia atikara?

 ³ I teia rā te noo nei tatou i te tuatau openga o teia akatereanga kino. Kia vai matakite ua tatou. I teia atikara, ka uriuri tatou akapeea e rauka ai te tu tau me akara matakite tatou i te au tupuanga i teianei ao, akapeea tatou me vai matakite, e akapeea me taangaanga meitaki i to tatou taime e toe nei.

4. Eaa tatou ka inangaro ei i te kite akapeea te au tupuanga o teianei ao te akatupu anga i te totou Pipiria?

⁴ E tumu meitaki i reira, kia kite tatou i te au mea e tupu nei i teianei ao te akatupu anga i te totou Pipiria. Kua oronga mai a Iesu i tetai akapapaanga kia kite tatou i te openga o ta Satani akatereanga e vaitata maira. (Mata. 24:3-14) Akamaroiroi mai te apotetoro ko Paulo kia matakite tatou i te au mea te akatupu ra i te totou. (2 Pete. 1:19-21) Akamata te puka openga o te Pipiria ki teia tuatua: “Te eeuanga a Iesu Mesia, ta te Atua i tuku mai iaia ra, kia akakite atu aia i tona au tavini i te au mea e vaitata i te tupu ra.” (Apo. 1:1) Inangaro tatou te kite i te au tupuanga o teianei ao e akapeea te reira te akatupu anga i te totou Pipiria. E ka inangaro tatou te uriuri i teia au tupuanga ki tetai.

5. Eaa ta tatou ka kopae, e eaa ta tatou ka rave? (Akara katoa i te tutu.)

⁵ Me uriuri tatou i te totou Pipiria, auraka e tamanako ua i te reira. Eaa te tumu? No te mea kare tatou e inangaro i te tuatua i tetai apinga te ka akatupu i te ke i roto i te putuputuanga. Ei akaraanga, penei ka rongo tatou i te au arataki o teianei ao te tuatua anga e ka akakore ratou i tetai tamaki ei akatupu i te au e te tinamou. Kare tatou e tamanako ua e te akatupu ra te reira i te totou ia 1 Tesalonia 5:3, ka anoanoia tatou kia kite i te au akamārama anga ou. Me akanoo tatou i te au uriurianga ki runga i te apii tei orongaia mai e ta Iehova akaaerenga, ka vai taokotai te putuputuanga i “te manako okotai.”​—1 Kori. 1:10; 4:6.

6. Eaa te au apiianga i roto ia 2 Petero 3:11-13?

⁶ E tatau ia 2 Petero 3:11-13. Te tauturu ra te apotetoro ko Petero ia tatou kia rauka te tu tau me akamanako i te totou Pipiria. Te raurau maira aia ia tatou kia “rapurapu anga atu, kia tae mai taua rā o te Atua ra.” Eaa te tumu? Kare no te mea te inangaro ra tatou i te kite i te “rā e te reira ora” me apai mai a Iehova ia Aramagido, inara inangaro tatou te taangaanga i to tatou taime e toe nei kia rave i “te tuatua tapu e te akono i te Atua.” (Mata. 24:36; Luka 12:40) Mei tera te tu, ka akono tatou i te tu tika e te tavini ia Iehova ma te akaperepere iaia. E rauka ai te reira, kia vai matakite tatou.

7. Akapeea tatou me akaari e te matakite ra tatou? (Luka 21:34)

⁷ Akakite a Iesu ki tana au pipi kia matakite i te au tupuanga o teianei ao e kia matakite ia ratou uaorai. Kua akatakaia te reira i roto i te akamatakiteanga ia Luka 21:34. (E tatau.) Akara i ta Iesu tuatua: “E matakite ra ia kotou.” Te tangata tei vai matakite ka kite aia i te mea te ka takino i tona pirianga kia Iehova,  e ka kopae i te reira. E ka vai ua aia ki roto i to te Atua aroa.​—Mase. 22:3; Iuda 20, 21.

8. Eaa te akamaroiroianga ta te apotetoro ko Paulo i oronga ki te au Kerititiano?

⁸ Kua akamaroiroi te apotetoro ko Paulo i te au Kerititiano kia matakite ia ratou uaorai. Ei akaraanga, akakite aia ki te au Kerititiano i Ephesia: “Kia matakite i to kotou aerenga, eiaa mei ta te kite kore, mei ta te aronga pakari ra.” (Ephe. 5:15, 16) Ka tauta ua rai a Satani te takino i to tatou turanga pae vaerua, e te ako maira te Pipiria ‘kia kite ra tatou i to Iehova ra anoano’ ei paruru ia tatou uaorai.​—Ephe. 5:17.

9. Akapeea tatou e kite meitaki ei i to Iehova anoano?

⁹ Kare te Pipiria e akakite mai i te au kino pouroa te ka takino i to tatou pirianga oa kia Iehova. Ka rave tatou i te au iki anga kare i akakiteia i roto i te au Tuatua Tapu. Kia rave i te au iki anga pakari, ka anoanoia tatou kia kite meitaki, me kore kia kimi, ‘i to Iehova ra anoano.’ Na te apii putuputu anga i te Tuatua a te Atua e te akamanako oonu i te reira. Te maata atu to tatou mārama i to Iehova anoano e kia rauka “te ngakau o te Mesia,” ka aaere i reira tatou ei “aronga pakari ra,” noatu me kare e au ture tikai ei arataki i to tatou aerenga. (1 Kori. 2:14-16) E māmā tetai au kino i te kite atu; tetai pae e akavare anga.

10. Eaa te au kino ka kopae tatou?

¹⁰ Tetai au kino ka kopae tatou ko te akameamea, te kai kava, te kai tuauau, te urutoe, pera te akara i te au tamataora anga ta ua, te peu ainga viivii e te vai atura. (Sala. 101:3) Te kimi nei to tatou enemi, te Tiaporo kia takino i to tatou pirianga oa kia Iehova. (1 Pete. 5:8) Me kare tatou e matakite, ka tuku a Satani ki roto i te manako e te ngakau te au ua o te vareae, te tika kore, te noinoi, te makitakita, te akatietie, e te akamoupuku. (Gala. 5:19-21) Te akamata anga, penei kare teia au anoano e kino roa. Inara me kare tatou e kiriti tumu i te reira, ka tupu te reira mei tetai rakau poitini.​—Iako. 1:14, 15.

11. Eaa tetai akavareanga kino ka kopae tatou, e no teaa ra?

¹¹ Ko tetai akavareanga kino ko te kapitianga kino. Akamanako i teia. Te angaanga ra koe ki tetai kare e aiteite ana te irinakianga Kerititiano. Inangaro koe i toou oa angaanga kia manako meitaki i te Au Kite o Iehova, e tu meitaki toou kiaia ma te tauturu atu. Penei ka aru koe iaia ma te kaikai kapiti i tetai au taime. Kare i roa, kua tupu putuputu te reira. Tetai au taime, kua tupu te pukapuka anga tau kore, penei ka kopae koe i te akamata anga. Kare i roa, kua matau koe i te reira e kare e riri atu i te reira. I tetai rā, kua pati mai toou oa angaanga kia inuinu korua i muri ake i te angaanga, e kua āriki koe. Kare i roa, kua aite toou manako mei tona rai. Kare e roa atu ana ka akamata koe te aru i toou oa? E tika, e tu meitaki e te akangateitei to tatou i te katoatoa, inara e akamaara ka akakeuia tatou e te aronga te pou ra to tatou taime kia ratou. (1 Kori. 15:33) Me matakite tatou ia tatou uaorai, mei ta Iesu i raurau mai, ka kopae tatou i te piri anga ki te aronga kare e aru ana i ta Iehova au turanga. (2 Kori. 6:15) Ka kite tatou i te kino e te kopae i te reira.

12. Eaa ta te au pipi a Iesu ka rave ia ratou e tiaki ra i te openga o teianei ao?

¹² Kare te au pipi a Iesu i noonoo ua ia ratou e tiaki ra i te openga o teianei ao. Kua oronga a Iesu i tetai angaanga na ratou. Kua akaue aia kia tutu aere ratou i te nuti meitaki “i Ierusalema nei, e Iudea katoa oki e pini ua ake, e Samaria katoa oki, e tae ua atu ki te openga o te enua ra.” (Anga. 1:6-8) Mei teaa atura i te angaanga ranuinui na te au pipi a Iesu! Na te akapou anga i to ratou taime te rave i te reira, kua taangaanga meitaki ratou i to ratou taime.

13. Eaa tatou ka anoanoia ai kia taangaanga meitaki i te taime? (Kolosa 4:5)

¹³ E tatau ia Kolosa 4:5. Kia matakite ia tatou uaorai, ka anoanoia tatou kia taangaanga meitaki i to tatou taime. “E tupu anga kite koreia ka tupu” ki tetai ua atu ia tatou. (Kohe. 9:11, NW) Ka poto viviki ua to tatou oraanga.

14-15. Akapeea tatou me taangaanga meitaki i to tatou taime? (Ebera 6:11, 12) (Akara katoa i te tutu.)

¹⁴ Ka taangaanga meitaki tatou i te taime na te rave anga i to Iehova anoano e te akamatutu anga i to tatou pirianga kiaia. (Ioa. 14:21) Ka anoanoia tatou “kia maroiroi, auraka e ngaueue,  kia maata nei te rave anga i te angaanga a te Atu.” (1 Kori. 15:58) Me tae mai te openga o te oraanga me kore te openga o teia akatereanga​—kare rava tatou e tataraapa.​—Mata. 24:13; Roma 14:8.

¹⁵ I teia rā, te arataki nei a Iesu i tana au pipi me tutu aere ratou i te Patireia o te Atua i te enua nei. Kua akatupu aia i tana taputou. Na roto i ta Iehova akaaerenga, te tereni nei a Iesu ia tatou ma te au tauturu no te tutu aere i te nuti meitaki. (Mata. 28:18-20) Ka rave maroiroi tatou i ta tatou angaanga tutu aere e te apii e kia vai matakite me tiaki ia Iehova kia apai mai i te openga o teia akatereanga. Na te taangaanga anga i te ako ia Ebera 6:11, 12, ka mou piri tatou i te manakonakoanga “e tae ua atu ki te openga.”​—E tatau.

16. Eaa ta tatou e anoano ra i te rave?

¹⁶ Kua akatinamou a Iehova i te rā e te ora no te takore i ta Satani akatereanga. Me tae mai te reira rā, ka akatupu a Iehova i te au totou tana i tata ki roto i tana Tuatua. I teianei, penei ka akara anga kua taroaroaia te openga o teia akatereanga. Inara, “kare [to Iehova rā] e tavarevare”! (Haba. 2:3) No reira e ‘akara tatou ia Iehova,’ na te ‘tapapa anga i te Atua o to tatou nei ora.’​—Mika 7:7.