1. Eaa te akaari maira e puapinga te au Tuatua Tapu kia Iesu?

 AKAMANAKO ana mei teaa te tu te akarongo kia Iesu e apii ra. Kua taiku putuputu aia i te au Tuatua Tapu ma te tamou ngakau i te reira! I roto i tana au tuatua mua i muri ake i tona papetito anga e te au tuatua openga i mua ake i tona mate, kua taiku a Iesu i te au Tuatua Tapu. b (Deu. 8:3; Sala. 31:5; Luka 4:4; 23:46) I te tuatau o te toru e te apa mataiti i rotopu i teia nga tupuanga e rua, kua tatau e kua taiku putuputu a Iesu i te au Tuatua Tapu e kua akamārama i te reira.​—Mata. 5:17, 18, 21, 22, 27, 28; Luka 4:16-20.

2. Ia Iesu e maata maira, eaa tei tauturu iaia kia kite meitaki i te au Tuatua Tapu? (Akara i te tutu i te kapi mua.)

² No tetai tuatau roa i mua ake i tana angaanga tutu aere, kua tatau e kua rongo putuputu a Iesu i te Tuatua a te Atua. I te kainga, kua rongo aia ia Maria e Iosepha te taiku anga i te au Tuatua Tapu i te tuatau pukapuka anga ngutuare i te au rā. c (Deu. 6:6, 7) Papu ia tatou i te au Sabati e kua aru a Iesu i tona ngutuare tangata ki te sunago. (Luka 4:16) Iaia i reira, kua akarongo meitaki aia i te au Tuatua Tapu e tatauia ra. Kare i roa, kua kite a Iesu i te tatau i te au Tuatua Tapu koia anake. E kua kite meitaki a Iesu i te au Tuatua Tapu e kua akaperepere ma te aru i te reira. Ei akaraanga, akamanako ana i tei tupu i te iero i to Iesu 12 mataiti. Kua ‘umereia to Iesu kite e te tuatua’  e te au puapii tei kite karape i te Ture a Mose.​—Luka 2:46, 47, 52.

3. Eaa ta tatou ka uriuri i teia atikara?

³ Ka kite katoa tatou e te akaperepere i te Tuatua a te Atua me tatau putuputu i te reira. Akapeea, i reira, e puapinga atu ei te reira? Ka kite tatou i ta Iesu i tuatua ki te aronga tei kite i te Ture, te aronga tata, te au Pharisea, e te au Sadukea. Kua tatau putuputu te au arataki akonoanga i te au Tuatua Tapu, inara kua puapinga kore te reira. E toru a Iesu mataara i taiku kare ratou i puapinga ana mei te au Tuatua Tapu. Ka riro tana au tuatua kia ratou ei tauturu ia tatou kia karape (1) te mārama i ta tatou e tatau ra, (2) kia kitea te au poe pae vaerua, e te (3) tuku i te Tuatua a te Atua kia akakeu ia tatou.

4. Eaa ta Luka 10:25-29 e apii maira no te tatau i te Tuatua a te Atua?

⁴ Ka inangaro tatou kia mārama i te aiteanga o ta tatou e tatau ra i roto i te Tuatua a te Atua. Te openga kare tatou e puapingaia mei te reira. Ei akaraanga, akamanako ana i ta Iesu pukapuka anga ki te tangata “apii ture.” (E tatau ia Luka 10:25-29.) Te ui anga te tangata eaa tei anoanoia kia rauka te ora mutu kore, kua taki a Iesu iaia ki te Tuatua a te Atua te uianga: “Eaa tei tataia ki roto i te ture ra? te peea ra koe i te tatau anga?” Kua oronga te tangata i te pauanga na te taiku anga i te au irava kia inangaro i te Atua e kia inangaro i te tangata tupu. (Levi. 19:18; Deu. 6:5) Inara akara i tana i tuatua: “Koai oki toku tangata tupu?” Kua akaari mai te reira tangata kare aia i mārama i te aiteanga o tana e tatau ra. No reira kare aia i kite akapeea me taangaanga meitaki i teia au irava i roto i tona oraanga.

5. Akapeea te pure e te tatau marie me akameitaki atu i to tatou mārama?

⁵ Ka akamaata atu tatou i to tatou mārama i te Tuatua a te Atua na te tatau putuputu anga i te reira. Teia te au tauturu. Pure i mua ake ka tatau ei. Ka anoano tatou i ta Iehova tauturu kia mārama i te au Tuatua Tapu, e pati tatou i tona vaerua tapu kia tamou i te apii. E oti tatau marie. Ka tauturu te reira ia koe kia mārama i te reira. Penei ka puapingaia koe me tatau ma te reo maata me kore kia aru i te tatauanga Pipiria tei rekotiia. Ka aru meitaki i reira koe i te reira, te ka akakeu oonu i toou manako e te ngakau no te Tuatua a te Atua. (Iosu. 1:8) Me oti koe i te tatau, pure akaou kia akameitaki ia Iehova no te apinga aroa o tana Tuatua e kia tauturu ia koe te taangaanga i taau i tatau.

6. Akapeea te uianga e te tata anga i te au manako poto ki raro me tauturu ia koe e tatau ra? (Akara katoa i te tutu.)

⁶ Teia tetai nga tauturu e rua ei akameitaki atu i toou mārama i te Pipiria. E ui i te au uianga kia koe uaorai no taau e tatau ra. Ia koe e akamanako ra i tetai irava, e ui: ‘Koai ma to roto? Koai te tuatua ra? Koai tana e tuatua atura, e no teaa ra? Iea e inaea te reira i tupu ei?’ Ka tauturu teia au uianga ia koe e kia aru i te au manako i roto i te irava. E tata i te au tuatua poto ia koe e tatau ra. Me tata  koe, ka akakeu te reira ia koe kia tata i toou au manako ki raro, te ka akataka i taau e manako ra. Na te tatau anga ka tauturu te reira ia koe kia mārama. Penei ka tata koe i te au uianga, te au kimikimi anga, tapoto i te au manako puapinga, tata akapeea me taangaanga i taau i tatau, me kore tata i toou au manako ngakau ki raro. Penei na te tata anga i te reira ka tauturu ia koe kia akamanako i te Tuatua a te Atua ei karere nana kia koe.

7. Eaa te tu ta tatou e anoano me tatau, e no teaa ra? (Mataio 24:15)

⁷ Kua akakite mai a Iesu i tetai tu puapinga ka anoanoia kia mārama i ta tatou e tatau ra i roto i te Tuatua a te Atua​—te kite karape. (E tatau ia Mataio 24:15.) Eaa te kite karape? Kia mārama akapeea tetai manako te piri anga ki tetai, e te tuke o te reira ki tetai, e kia kite i te mea kare i papu meitaki. E mei ta Iesu i akakite, ka anoano tatou i te kite karape kia akataka i te au tupuanga te akatupu ra i te totou Pipiria. Ka anoano tatou i teia tu kia puapinga te tatau Pipiria.

8. Akapeea tatou me tatau ma te kite karape?

⁸ Ka oronga a Iehova i te kite karape ki tona au tavini. No reira e aere kiaia na roto i te pure, e pati tauturu kia rauka teia tu. (Mase. 2:6) Akapeea koe me angaanga kia rotai ki taau pure? E akara matatio i taau e tatau ra, eaa te pirianga ki taau i kite takere. Ei tauturu, e taangaanga i te au puka apii Pipiria, mei te Research Guide for Jehovah’s Witnesses. Ka tauturu teia ia koe kia kite karape i te aiteanga o tetai irava Pipiria e kia taangaanga i toou oraanga. (Ebe. 5:14) Ia koe e tatau ra ma te kite karape, ka tupu toou mārama i te au Tuatua Tapu.

9. Eaa te Tuatua Tapu mou ta te au Sadukea i kopae?

⁹ Kua kite meitaki te au Sadukea i te rima puka mua o te au Tuatua Tapu Epera, inara kua kopae ratou i te au tuatua mou puapinga i roto i te reira au puka akauruia. Ei akaraanga, akamanako akapeea a Iesu te ariu anga ki te ui anga a te au Sadukea no te tuakaouanga. Ui aia kia ratou: “Kare aina kotou i tatau i roto i te buka a Mose ra, e i tuatua mai te Atua kiaia i roto i te pu ngangaere ra, na ko maira, ‘Ko au te Atua no Aberahama, e te Atua no Isaaka, e te Atua no Iakoba’?” (Mare. 12:18, 26) Noatu kua tatau putuputu te au Sadukea i te reira irava, te akaari maira ta Iesu uianga e kua kopae ratou i tetai Tuatua Tapu mou puapinga​—te apiianga o te tuakaouanga.​—Mare. 12:27; Luka 20:38. d

10. Eaa ta tatou ka matakite ia tatou e tatau ra?

¹⁰ Eaa te apiianga no tatou? Me tatau tatou, kia matakite i tetai irava me kore tua Pipiria ei apiianga. Ka inangaro tatou kia kite i te au apiianga māmā e te au tuatua mou pakari pera te au kaveinga puapinga tei uunaia.

11. Kia tau kia 2 Timoteo 3:16, 17, akapeea e kitea ai e koe te au poe i roto i te Pipiria?

¹¹ Akapeea e kitea ai e koe te au poe pae vaerua me tatau i te Pipiria? Akamanako i ta 2 Timoteo 3:16, 17 e akakite ra. (E tatau.) “Te au tuatua tapu katoa . . . e mea meitaki” ei (1) apiianga, (2) akoanga, (3) akakiteanga apa, e te (4) akakite i te ako. Ka rauka teia au puapinga e a mei te au puka Pipiria kare koe e tatau putuputu ana. Akara matatio i te tatauanga eaa ta te reira e apii maira ia koe no Iehova, tona akakoroanga, e te au kaveinga Pipiria. Akara akapeea te reira me ako mai. E rave i teia na te tata anga akapeea teia au irava te tauturu anga ia koe kia akataka e te kopae i te au manako e te au tu tarevake e kia aru i te arataa tiratiratu. Akara matatio akapeea te irava me akakite mai i te apa, e te akatikatika, i tetai manako tarevake, penei ta tetai i taiku mai i roto i te angaanga tutu aere. E akara i tetai akakiteanga ako i roto i te au irava kia aru koe i to Iehova manako. Me akono koe i teia au manako e a, ka kitea e koe te au poe pae vaerua te ka akapuapinga atu i taau tatau Pipiria.

12. Eaa a Iesu i ui ei ki te au Pharisea “Kare aina kotou i tatau?”

¹² Kua ui katoa a Iesu i te uianga “Kare aina kotou i tatau?” kia akaari  i te manako tarevake o te au Pharisea. (Mata. 12:1-7) e I te reira atianga, karanga te au Pharisea e kua aati ta Iesu au pipi i te Tapati. Ei pauanga, kua taiku a Iesu e rua akaraanga Tuatua Tapu e kua tatau i tetai irava na Hosea ei akaari e kua mārama kore ratou i te ture Tapati e kare ratou i akaari ana i te tu tangi aroa. Eaa ra teia aronga i kore ei i akakeuia? No te mea kua tatau ratou i te reira ma te vaerua akaapa e te akatietie. No reira kare ratou i mārama i ta ratou i tatau.​—Mata. 23:23; Ioa. 5:39, 40.

13. Eaa te tu me tatau tatou i te Pipiria, e no teaa ra?

¹³ Apii mai tatou mei ta Iesu tuatua e ka anoanoia tatou kia tatau i te Pipiria ma te tu tau. Kare mei te au Pharisea, ka anoanoia te tu ngakau tae e te akaaka. Ka “āriki marie ei [tatou] ma te maru i te tuatua tanumia mai ki roto ra.” (Iako. 1:21) Me maru tatou, ka tuku tatou i te Tuatua a te Atua kia tupu i roto i te ngakau. Me kopae tatou i te vaerua akaapa e te akatietie, ka akakeuia tatou e te au apiianga Pipiria mei te akaaroa, te tangi aroa, e te aroa.

14. Akapeea tatou e kite ei me te tuku ra tatou i te Pipiria kia akakeu ia tatou? (Akara katoa i te tutu.)

¹⁴ Na te akono anga i tetai ke e akaari mai me te tuku ra tatou i te Tuatua a te Atua kia akakeu ia tatou. Kare te au Pharisea i tuku ana i te Tuatua a te Atua kia akakeu i to ratou ngakau, e kua “akaapa [atura] i te aronga ara kore.” (Mata. 12:7) Pera rai, ta tatou akono anga atu i tetai me kua akakeuia e te Tuatua a te Atua. Ei akaraanga, te akakite ra ainei tatou i te meitaki ta tatou e kite ra i roto  i tetai, me te viviki ra tatou i te kite i to ratou tarevake? Te akaaroa ra ainei tatou e te viviki i te akakore i te ara a tetai, me te akaapa ua ra tatou e te akamoupuku? Ka akaari mai te reira akara matatio anga me te tuku ra tatou i ta tatou i tatau kia akakeu i to tatou manako, ngakau, e te rave ra.​—1 Timo. 4:12, 15; Ebe. 4:12.

15. Eaa to Iesu manako no te au Tuatua Tapu?

¹⁵ Akaperepere a Iesu i te au Tuatua Tapu, e kua totouia tona au manako ngakau ia Salamo 40:8: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.” E kua mataora aia i te tavini ia Iehova. Ka mataora katoa tatou me tuku i te Tuatua a te Atua kia akakeu i to tatou ngakau.​—Sala. 1:1-3.

16. Na teea au mataara te tapapa atura koe kia puapinga atu taau tatau i te Tuatua a te Atua? (Akara i te pia “ Ka Tauturu ta Iesu au Tuatua Kia Mārama Koe i Taau e Tatau Ra.”)

¹⁶ Kia rotai ki ta Iesu au tuatua e te akaraanga, e akapuapinga atu tatou i ta tatou tatau Pipiria. Ka mārama atu tatou i te au irava Pipiria na te pureanga, te tatau marie anga, te uiui uianga, e te tata i te au manako poto ki raro. Ka taangaanga tatou i te kite karape na te akara matatio anga i ta tatou e tatau ra ma te tauturu o te au puka Pipiria. Ka taangaanga maata atu tatou i te au Tuatua Tapu, pera te au irava kare tatou i kite tikai, na te kimi anga i te au poe pae vaerua i roto i te au irava. E tuku tatou i te Tuatua a te Atua kia akakeu ia tatou me rauka te tu tau. Me taangaanga tatou i te reira, e maata atu ta tatou ka rauka mei te tatauanga Pipiria ma te akavaitata atu kia Iehova.​—Sala. 119:17, 18; Iako. 4:8.