1. Eaa koe i āriki rekareka ai i te Pipiria?

 MEI teaa atura to tatou āriki rekareka i te Atua ko Iehova no te Pipiria! Na roto i te au kapi o te Pipiria, te oronga maira aia i te au akoanga pakari te ka tauturu ia tatou kia akakoromaki i te au manamanata i teia rā. Te oronga katoa maira aia i te manakonakoanga manea no te tuatau ki mua. Tei puapinga rava atu, kua taangaanga a Iehova i te Pipiria ei akaari mai i tona au tu. Ia tatou e akamanako ra i tona au tu manea, kua pakia to tatou ngakau e kua akakeuia kia akavaitata atu ki to tatou Atua ei oa nona.​—Sala. 25:14.

2. Eaa te au ravenga tukeke ta Iehova akaari anga mai iaia uaorai ki te tangata?

² Te inangaro maira a Iehova kia kite te tangata iaia. I mua ana, kua akaari mai aia iaia uaorai na roto i te au moemoea, te au orama, e te au angera. (Nume. 12:6; Anga. 10:3, 4) Inara akapeea teia au moemoea, orama, me kore karere no ko mai i te au angera e kitea ai naringa kare i tataia ki raro? E tumu meitaki i reira, ta Iehova te akakeu i te tangata kia ‘tata i tona manako ki roto i te buka’ kia kite tatou iaia. (Iere. 30:2) No te mea ‘kua tika rava to te Atua aerenga,’ kua papu ia tatou ko teia te ravenga meitaki rava atu e te puapinga kia karangaranga mai aia kia tatou.​—Sala. 18:30.

3. Akapeea a Iehova i akapapu ei e kia vai te Pipiria i teia tuatau? (Isaia 40:8)

³ E tatau ia Isaia 40:8. Kua oronga mai te Tuatua a te Atua i te arataki anga tau ki te au tane e te au vaine tiratiratu no tetai au tauatini mataiti. Akapeea te reira i rauka ai? Mei te mea, kua tataia te au Tuatua Tapu ki runga i te au apinga pe ua, kare te reira au tataanga mua i vai ana e tae mai ki teia rā. Inara kua akapapu a Iehova kia tataia te  au kopi no teia tataanga tapu. Noatu e tu apa ua to te aronga kopi, kua tata tiratiratu ratou i te reira. Ei akaraanga no te au Tuatua Tapu Epera, kua tata tetai tangata tata: “E mea tau kia karangaia e kare atu e tataanga taito tei tataia ma te tika mei teia te tu.” No reira noatu te au tuatau i topa, te au apinga pe ua tei taangaangaia, e te tu apa ua o te aronga kopi, kua papu ia tatou e te akakite maira te Pipiria o teia rā i te au manako o tona Tata, ko Iehova.

4. Eaa ta tatou ka uriuri i roto i teia atikara?

⁴ Ko Iehova te Tumu o “te au mea memeitaki i o maiia ra, e te au mea tika ravarai.” (Iako. 1:17) Ko te Pipiria tetai o te au mea memeitaki rava atu ta Iehova i oronga mai kia tatou. Te akaari maira tei oronga mai i te mea memeitaki ra​—e kua kite tikai aia ia tatou e ta tatou e anoano ra. E tika katoa te reira no Tei Oronga mai i te Pipiria. Me akara matatio tatou i tana mea memeitaki, e maata atu ta tatou ka apii mai no runga ia Iehova. Kua kite meitaki aia ia tatou e tei anoanoia. I roto i teia atikara, ka uriuri tatou akapeea te Pipiria te akakite anga mai e toru o Iehova au tu: tona tu pakari, tona tu tika, e tona tu aroa. Ka akara tatou na mua i to te Atua tu pakari.

5. Eaa tetai mataara te akaari maira te Pipiria i te tu pakari o te Atua?

⁵ Kua kite a Iehova e te anoano ra tatou i tana akoanga pakari. E tei roto i teia mea memeitaki, te Pipiria, tona tu pakari. E akakeu anga meitaki ta te akoanga Pipiria ki runga i te tangata. Ka taui te Pipiria i te oraanga o te tangata. Te tata angaia te au puka mua o te Pipiria, kua akakite a Mose ki te iti tangata o te Atua, te ngati Iseraela: “Kare oki teia i te mea puapinga kore kia kotou; ko to kotou ïa ora.” (Deu. 32:47) Te aronga tei akarongo i te au Tuatua Tapu kua puapinga e kua mataora to ratou oraanga. (Sala. 1:2, 3) Noatu kua taito te Tuatua a te Atua e mana ririnui to te reira kia akameitaki atu i te oraanga o te tangata. Ei akaraanga, i runga i te jw.org, i te tuanga “Taui te Pipiria i te Oraanga,” ka kite koe e 50 tuma akaraanga akapeea te Pipiria te “angaanga maroiroi [anga] i roto i te [aronga] tei akarongo” i teia rā.​—1 Tesa. 2:13.

6. Eaa tatou ka tuatua ai e kare te Pipiria i aite mei tetai ua atu puka?

⁶ Kare atu e puka mei te Tuatua a te Atua. Eaa ra? No te mea te Tata o teia puka, ko te Atua ko Iehova, te mana katoatoa, mutu kore, e te pakari. E maata te au puka kua mate vave tona tata, e kua puapinga kore te maata anga o te au manako i roto. I tetai tua, ka vai mutu kore ua te au kaveinga pakari o te Pipiria; kua tauturu te reira i te tangata o tetai ua atu tuatau. Ia tatou e tatau ra i teia puka tapu e te akamanako i ta tatou e apii ra, ka taangaanga te Tata i tona vaerua tapu kia taangaanga tatou i te ako anga Pipiria i te oraanga. (Sala. 119:27; Mala. 3:16; Ebe. 4:12) Ae, te anoano ra te Tata ora o te Pipiria i te tauturu ia koe. Mei teaa atura kia inangaro tatou i te tatau putuputu i te Pipiria!

7. Akapeea te Pipiria te taokotai anga i te iti tangata o te Atua i mua ana?

⁷ Tetai mataara puapinga te akaari maira te Pipiria i te tu pakari o te Atua na roto i te taokotai anga i te iti tangata o te Atua. Te tomo anga te au Iseraela ki roto i te Enua Taputouia, kua noo ratou i te au  ngai ke. Kua riro mai tetai pae ei ravakai, akono puakatoro, e te tanutanu. Penei e māmā ua i te au Iseraela te akangaropoina atu i te au taeake Iseraela e noo ra i tetai atu ngai. Inara kua akapapa a Iehova i te au Iseraela kia uipa kapiti i tetai au atianga no te akarongo ki tana Tuatua me tatauia e te akamāramaia. (Deu. 31:10-13; Nehe. 8:2, 8, 18) Akamanako ana i tetai Iseraela tiratiratu te tae anga ki Ierusalema e kua kite i te au taeake e mirioni ua atu mei te au enua ke! Na Iehova i tauturu i tona iti tangata kia vai taokotai. I muri mai, te akanooia anga te putuputuanga Kerititiano, e maata te au tane e te au vaine ma te reo ke, te au turanga puapinga e te akaaka, te apinganui e te putaua. Inara no to ratou inangaro i te au Tuatua Tapu, kua taokotaiia ratou te akamori i te Atua mou. Kua mārama te aronga irinaki i te Tuatua a te Atua ma te tauturu o te au taeake irinaki e na te uipa kapiti anga kia ratou.​—Anga. 2:42; 8:30, 31.

8. Akapeea te Pipiria te taokotai anga i te iti tangata o Iehova i teia tuatau?

⁸ Te apii nei e te taokotai nei rai te Atua i tona iti tangata na roto i te Pipiria. Ko te tumu ïa o te au kai pae vaerua ta tatou e mataora nei. Te uipa kapiti putuputu nei tatou ki te au uipaanga, akaputuputuanga, e te au uruoaanga no te akarongo i te au Tuatua Tapu e tatauia ra, akamāramaia, e te uriuriia. E tuanga puapinga  ta te Pipiria i roto i to Iehova akakoroanga kia ‘tavini iaia ma te manako okotai.’​—Zepha. 3:9.

9. Eaa te tu puapinga tei anoanoia kia mārama i te karere o te Pipiria? (Luka 10:21)

⁹ Akamanako ana i tetai akaou akapapu anga i to Iehova tu pakari. E maata te au ngai o te au Tuatua Tapu tei tataia e ko te aronga akaaka anake te ka mārama i te tatau i te reira. (E tatau ia Luka 10:21.) Te tatau ra te tangata i te Pipiria i te au ngai ravarai. Mei ta tetai tangata tata i akakite, “e puka tatau putuputuia [te Pipiria] i te au ngai ravarai, e tei tatau meitakiia, o te au puka ravarai.” Inara ko te aronga akaaka ua te ka mārama tikai e te taangaanga i te reira.​—2 Kori. 3:15, 16.

10. Eaa tetai atu mataara te akaari maira te Pipiria i to Iehova tu pakari?

¹⁰ Ka kite katoa tatou i to Iehova tu pakari i roto i te Pipiria na tetai atu mataara ke. Te taangaanga ra a Iehova i te au Tuatua Tapu kare anake no te apii ia tatou ei pupu mari katoa ra kia apii e te akapumaana tataki tai ia tatou. Te kite ra tatou i to Iehova inangaro ia tatou me tatau i tana Tuatua. (Isa. 30:21) Me tupu te manamanata, kua aere koe ki te au Tuatua Tapu e kua tatau i te irava tei tau noou? Kua tataia te Pipiria kia māramaia e te au mirioni ua atu tangata. Akapeea te reira i ki ei i te au akakiteanga tei tau no toou uaorai anoano? Ka rauka ua teia no te mea e angaanga teia Pipiria na te Tata tu pakari.​—2 Timo. 3:16, 17.

11. Akapeea te Atua te akaari anga i te tu papaki tai kore te tataia anga te Pipiria?

¹¹ Ko te tu tika tetai o to Iehova tu. (Deu. 32:4) Te piri atura te tu tika ki te tu papaki tai kore, e e tu papaki tai kore to Iehova. (Anga. 10:34, 35; Roma 2:11) Te akaariia ra tona tu papaki tai kore i roto i te au reo tei taangaangaia no te tata i te Pipiria. Kua tataia te 39 puka Pipiria mua i te reo Epera, tei mārama ngoie uaia e te iti tangata o te Atua i te reira tuatau. Inara, te tae anga ki te anere mataiti mua T.N., kua taangaanga maataia te reo Ereni, e kua tataia te 27 puka openga o te Pipiria i te reira reo. Kare a Iehova i akono ua i tana Tuatua ki roto i te okotai reo. I teia rā, mei te varu pirioni tangata i te enua nei te tuatua ra i te au reo keke. Akapeea te tangata e manganui te apii anga no runga ia Iehova?

12. Eaa atu tetai mataara kua akatupuia a Daniela 12:4 i teia au rā openga?

¹² Na roto i te peroveta ko Daniela, kua taputou a Iehova e i te tuatau openga, ko “te kite” mou o te Pipiria te ka tupu “maata.” Ka mārama te manganui i te reira. (E tatau ia Daniela 12:4.) Tetai mataara i tupu maata ei teia kite na roto i te urianga, te neneianga, e te tuʼa anga i te au Pipiria e te au puka Pipiria. Kua riro mai te Pipiria ko te puka tei uriia e tei tuʼa maataia i teianei ao. Te au urianga Pipiria tei neneiia e te aronga kimi puapinga e ākā moni te reira. Kua uri to Iehova iti tangata i teianei te Tuatua a te Atua, te katoa anga me kore tetai tuanga, e 240 reo, e ka rauka ua te reira kare e tutaki. Te ariu nei te au pa enua ki “te evangelia o te basileia nei” i mua ake ka tae mai ei te openga. (Mata. 24:14) Ka inangaro to tatou Atua tu tika kia kite te katoatoa iaia na te tatau anga i tana Tuatua. No te mea te akaperepere tikai ra aia ia tatou katoatoa.

13. Eaa tatou ka karanga ai e te akaari maira te Pipiria i to Iehova tu aroa? (Ioane 21:25)

¹³ Te akakite maira te Pipiria i te tu puapinga maata tikai o tona Tata​—ko te tu aroa. (1 Ioa. 4:8) Akamanako ana i ta Iehova i tata ki roto i te Pipiria e tana kare i tata. Kua oronga ua mai aia i ta tatou i anoano kia rauka tetai pirianga kiaia, te oraanga mataora, e te ora mutu kore. Inara, no te mea te akaperepere ra a Iehova ia tatou, kare aia i oronga pu ua mai i te au akakite anga kia tatou.​—E tatau ia Ioane 21:25.

14. Eaa atu to roto i te Pipiria te akaari maira i to te Atua tu aroa?

¹⁴ Kua akaari katoa mai a Iehova i te tu aroa na te karangaranga anga mai kia tatou na roto i te tu ngateitei. I roto i te Pipiria, kare aia i oronga ua mai i te au ture, te akaueue ua ia tatou. Mari ra, te akakeu ra aia ia tatou na roto i te au tua oraanga, te au totou umere, e te au akoanga tau. Na roto i teia au ravenga, te akakeu ra te Atua ia tatou kia akaperepere e kia akarongo kiaia ma te ngakau tae.

15. (a) Akapeea a Iehova te akaari anga i tona inangaro i te aronga tei tatau i tana Tuatua? (e) I roto i te tutu, koai te aronga i roto i te Pipiria ta te tamaine meangiti, te mapu tane, e te tuaine pakarikari e akamanako ra? (Gene. 39:1, 10-12; 2 Ari. 5:1-3; Luka 2:25-38)

¹⁵ Te akaari maira te Pipiria e te manako maira te Atua ia tatou. Akapeea ra? Tei roto i tana Tuatua te au tua tei akaari i te au manako ngakau o te tangata. Ka mārama tatou i te tangata i roto i te Pipiria no te mea kua aite ratou “mei ia tatou  katoa te tu.” (Iako. 5:17) Tei puapinga rava atu, na te akara anga i tana i rave ki te tangata mei ia tatou, ka mārama atu tatou “e kua ki [a Iehova] i te aroa e te takinga-meitaki maata.”​—Iako. 5:11.

16. Eaa ta tatou i apii mai me tatau tatou i te aronga i roto i te Pipiria tei rave i te tarevake? (Isaia 55:7)

¹⁶ Te akaari maira te Pipiria i to Iehova aroa na roto i tetai atu mataara. Te akapapu maira te au Tuatua Tapu e kare to tatou Atua e akaruke ia tatou me rave tatou i te tarevake. Kua ara putuputu te ngati Iseraela ia Iehova; inara, te tataraara anga ratou, kua akakore te Atua i ta ratou ara. (E tatau ia Isaia 55:7.) Kua kite katoa te au Kerititiano o te anere mataiti mua i to te Atua aroa. I te akauru angaia, kua raurau te apotetoro ko Paulo i tona au taeake kia ‘akakore i te ara, e kia akapumaana atu’ i tetai tangata tei rave putuputu i te ara kino e kua tataraara. (2 Kori. 2:6, 7; 1 Kori. 5:1-5) Mei teaa atura to Iehova tu aroa kare aia i kopae i te aronga tei tarevake! Mari ra, kua aroa ia ratou, kua ako ia ratou, e kua pati ia ratou kia oki mai. Kua taputou aia kia pera ki te aronga ara tei tataraara i teia tuatau.​—Iako. 4:8-10.

17. Eaa te Pipiria i riro ei ei mea memeitaki?

¹⁷ Kua oronga mai a Iehova i tetai mea memeitaki. Eaa tana Tuatua i meitaki ei? Mei ta tatou i apii mai, te akaari maira te Pipiria i to te Atua tu pakari, tu tika, e te tu aroa. Te akapapu maira teia puka e te inangaro maira a Iehova kia kite tatou iaia. Te inangaro maira aia kia riro tatou ei oa nona.

18. Akapeea tatou me akaari e te āriki rekareka ra tatou i ta Iehova “mea memeitaki” ko te Pipiria?

¹⁸ Kare tatou e kopae i te “mea memeitaki” te Tuatua a te Atua. (Iako. 1:17) E āriki rekareka tatou i te reira. Na te tatau anga e te akamanako anga i te reira. Me pera tatou, kua papu e ka akameitaki tona Tata ia tatou “e e rauka ia [tatou] te kite i te Atua.”​—Mase. 2:5.