ATIKARA APII 7
IMENE 51 Kua Akatapuia Matou Kia Iehova!
Apiianga ta Tatou ka Kite Mai Mei te au Nazira
“Te au rā katoa i akatakaia’i aia ra, te tapu ra ïa aia no Iehova.”—NUME. 6:8.
AKAKOROANGA
Akapeea te akaraanga o te au Nazira me tauturu ia tatou kia tavini ia Iehova ma te tu akaatinga e te ngakau toa.
1. Eaa te meitaki ta te aronga akamori ia Iehova i rave i te tuatau taito?
TE AKAPEREPERE ra ainei koe i toou pirianga kia Iehova? E mea papu te reira! E kare ko koe anake ua. Mei te tuatau taito, maata te tangata tei manako akapera ana. (Sala. 104:33, 34) Kua akaatingaia ratou kia akamori ia Iehova. Ko ta te au Nazira i Iseraela tera i rave. Koai ratou, e eaa ta tatou ka apii mai mei to ratou akaraanga?
2. (a) Koai ma te au Nazira? (Numero 6:1, 2) (e) Eaa tetai tangata Iseraela i iki ei kia riro mai ei Nazira?
2 Te tuatua “Nazira,” no roto mai i te reo Epera, tona aiteanga “Kia Akatapuia no te Angaanga Tapu.” Te akataka maira te au Nazira i te au tavini maroiroi i Iseraela tei akaatinga i to ratou oraanga kia tavini ia Iehova. Kua āriki te Ture a Mose i te tane e te vaine kia tia i to ratou oraanga kia Iehova na te iki anga kia noo ei Nazira no tetai tuatau. a (E tatau ia Numero 6:1, 2.) Ko te tia me kore te taputou, te ō maira te au aratakianga kare te katoaanga o te ngati Iseraela e anoanoia kia akono. No reira, eaa tetai tangata Iseraela i riro mai ei ei Nazira? No tona inangaro maata ia Iehova e tona āriki rekareka i Tana au akameitakianga.—Deu. 6:5; 16:17.
3. Akapeea te iti tangata o te Atua i teia rā i aite ei ki te au Nazira?
3 Kua monoia te Ture a Mose ki “te ture a te Mesia.” (Gala. 6:2; Roma 10:4) No reira, kare te iti tangata o Iehova i teia tuatau e anoanoia kia riro ei au Nazira. Inara mei te au Nazira, ka akaari te iti tangata o Iehova i to ratou inangaro maata i te tavini iaia ma to ratou ngakau, vaerua, manako e te ririnui katoa. (Mare. 12:30) Kua tia tatou kia Iehova na te akatapuanga ia tatou Kiaia. E me akatupuia tera tia, ka anoanoia tatou kia rave i to Iehova anoano e kia akaatinga i to tatou oraanga i te tavini iaia. Ia tatou e akamanako ra akapeea te au Nazira te rave anga i ta ratou tia, ka kite mai tatou i te au apiianga puapinga akapeea te iti tangata o te Atua i teia rā i aite ei ki te au Nazira no te akaatinga ia ratou uaorai. b (Mata. 16:24) Ka uriuri tatou i tetai au akaraanga.
KIA AKAATINGA IA KOE UAORAI
4. Kia tau kia Numero 6:3, 4, akapeea te au Nazira te akaari anga i te tu akaatinga?
4 E tatau ia Numero 6:3, 4. Kare te au Nazira i akatikaia i te inu kava e te kai i te vine. E reka ana te tangata i te kai i te au vine no te mea kare te reira i te mea kino. Akamārama te Pipiria e ko “te wina, e rekareka’i te ngakau o te tangata nei,” e apinga aroa no ko mai i te Atua. (Sala. 104:14, 15) Noatu ra, kua akaatinga te au Nazira ia ratou kia kore e kai i te reira. c
5. Eaa ta Madián e Marcela i akaatinga, e no teaa ra?
5 Mei te au Nazira rai, ka akaatinga tatou i to tatou oraanga kia tavini maata atu ia Iehova. Akamanako i te akaraanga o Madián e Marcela. d E oraanga mataora to raua. E angaanga meitaki ta Madián e te noo ra raua i roto i tetai are manea. Inara, kua inangaro raua i te tavini maata atu ia Iehova. E rauka ai te reira akakoroanga, kua rave raua i tetai au tauianga. Karanga raua: “Kua akameangiti maua i ta maua akapou anga moni, kua neke ki tetai ngai noo anga meangiti e kua oko i to maua motoka.” Kare a Madián e Marcela i anoanoia kia rave i teia, noatu ra kua inangaro raua i te tavini maata atu ia Iehova e kua mareka raua i ta raua ikianga.
6. Eaa ra te au Kerititiano i anoanoia ai kia akaatinga ia ratou uaorai? (Akara katoa i te tutu.)
6 Mataora te iti tangata o Iehova i te akaatinga ia ratou uaorai no te tavini maata atu iaia. (1 Kori. 9:3-6) Kare a Iehova e anoano ia tatou kia rave i teia; noatu kare teia i te au mea tarevake. Ei akaraanga, kua akaruke tetai pae i tetai ngai angaanga meitaki, te kainga manea e pera ta ratou au manu. E maata tei iki kia kore e akaipoipo e te anau tamariki. Tetai pae, kua iki i te tavini i tetai ngai tei anoanoia te tauturu e te neke ki tetai ngai mamao mei to ratou au akaperepere. Kua akaatinga ratou i to ratou oraanga kia tavini maata atu ia Iehova. Te akaperepere maira a Iehova i taau ka oronga kiaia noatu te maata me kore te meangiti i te reira.—Ebe. 6:10.
E TUKE TATOU MEI TE KATOATOA
7. Eaa i ngatā ei i te au Nazira kia akono i ta ratou i tia? (Numero 6:5) (Akara katoa i te tutu.)
7 E tatau ia Numero 6:5. Kua tia te au Nazira kia kore e pakotiia to ratou rauru. Akaari ra te reira i to ratou akarongo ia Iehova. Me kua roa tetai tangata Iseraela ei Nazira, ka roaroa tona rauru e ka kitea uaia e te tangata. Me akangateiteiia aia e me akamaroiroiia no tana i tia, ka māmā ua iaia i te apai i tana apainga. Mea akaaroa ra, i te tuatau o te ngati Iseraela i taito, kare te au Nazira i akangateiteiia e kare i turuturuia. I te tuatau o te peroveta ko Amosa, kua oronga te aronga Iseraela tei akaruke ia Iehova i te wina ki te au Nazira kia inu kia kore ratou e akono i ta ratou i tia, auraka e inu i te wina. (Amo. 2:12) I te reira taime, kua anoanoia te au Nazira kia ngakau toa kia akono i ta ratou taputou e kia tuke mei te katoatoa.
8. Akapeea to Benjamin akaraanga te akamaroiroi anga ia koe?
8 Ma te tauturu a Iehova, ka rauka katoa ia tatou te tu ngakau toa kia tuke mei te katoatoa, noatu ka tupu te akamā e te rū. Akamanako i te akaraanga o Benjamin, e tai ngauru ona mataiti, e Kite aia no Norway mai. No te tamaki i Ukraine, kua turuturu tana apii i te iti tangata o Ukraine. Kua patiia te tamariki kia imene i te imene patireia o Ukraine e kia aao i te kakau o tera enua. Kia kore a Benjamin e piri ki roto i teia akaepaepa enua, kua tamamao aia iaia mei reira. Inara, kua kite te puapii iaia e kua ava mai: “Aere mai ki konei i teia taime. Te tiaki nei matou ia koe!” Kua pau a Benjamin ki te puapii ma te tu ngakau toa: “Ka vai takake ua au e kare au e piri ki te angaanga poritiki. E maata te Au Kite o Iehova tei tapekaia no tei patoi i te aere ki te tamaki.” Kua āriki te puapii kia kore a Benjamin e piri ki te reira. Inara kua ui akaou tona au oa apii eaa te tumu. Kua rū a Benjamin e mei aue rai aia; noatu ra, kua akakite aia ki te pupu apii ma te ngakau toa i taua pauanga. I muri mai kua tuatua aia ki tona nga metua i ta Iehova tauturu.
9. Eaa ta tatou ka rave kia akarekareka ia Iehova?
9 I te mea kua iki tatou i te kauraro ia Iehova, ka kite mai rai te tangata e tuke rai tatou. Ka anoanoia tatou kia ngakau toa me akakitekite ki tetai ke i te ngai angaanga e i te apii e e Kite tatou no Iehova. E no te tu kino o teianei ao e ta ratou au peu, ka ngatā atu ia tatou i te aru i te au kaveinga Pipiria e te akakite i te nuti meitaki ki tetai ke. (2 Timo. 1:8; 3:13) E akamaara, ka akarekareka tatou ia Iehova me ngakau toa e me tuke tatou mei te aronga kare e tavini ana iaia.—Mase. 27:11; Mala. 3:18.
TUKU IA IEHOVA NA MUA I ROTO I TOOU ORAANGA
10. Akapeea te akaueanga i roto ia Numero 6:6, 7 te timata anga i te au Nazira?
10 E tatau ia Numero 6:6, 7. Kare te au Nazira i akatikaia kia akavaitata ki tetai tangata mate. I te akaraanga, kare teia i te mea ngatā. Inara, kua kite mai te au Nazira e ka riro teia akaueanga ei mea ngatā me mate tetai o to ratou kopu tangata. E peu mātauia kia noo tetai tangata i te pae i te kopapa mate. (Ioa. 19:39, 40; Anga. 9:36-40) Inara kare te au Nazira i akatikaia kia rave i teia au peu. Noatu ka tumatetenga te kopu tangata, ka akaari ua rai te au Nazira i to ratou akarongo kia akono i ta ratou i tia. Ka akamaroiroi a Iehova i tona au tavini tiratiratu kia akakoromaki i teia au tumatetenga.
11. Eaa te au ikianga ta te Kerititiano ka rave i roto i te kopu tangata? (Akara katoa i te tutu.)
11 Ei Kerititiano, e puapinga tikai ta tatou akatapuanga kia Iehova. Te ō maira ta tatou ikianga e ta tatou ka rave i roto i te ngutuare. Ka angaanga pakari tatou i te akono i te anoano o to tatou ngutuare, inara kare tatou e tuku i te anoano o to tatou pamiri i mua ake i to Iehova. (Mata. 10:35-37; 1 Timo. 5:8) Tetai taime, penei ka rave tatou i te au ikianga kare te kopu tangata e mareka, inara te mareka ra a Iehova.
12. No te akono i te au turanga ngatā o te ngutuare, eaa ta Alexandru i rave e eaa tana kare i rave?
12 Akamanako ana i te akaraanga o Alexandru e tana vaine ko Dorina. I muri ake te apii anga te nga tokorua i te Pipiria no tetai mataiti, kua akamutu a Dorina, e kua inangaro aia ia Alexandru kia akamutu katoa. Inara, kua tuatua maru a Alexandru kiaia e ka inangaro rai aia i tana apii. Kare a Dorina i mareka ana e kua māro atu i tana tane kia akamutu i tana apii Pipiria. Kua tauta a Alexandru kia kite i te tumu i pera ai tana vaine inara kare i te mea māmā. I tetai au taime, kua akakino e kua tuatua riri atu a Dorina kiaia, e kua inangaro a Alexandru i te tuku i te ’au. Noatu ra, kua tuku ua rai a Alexandru ia Iehova na mua. E i taua taime rai, kua akaperepere e kua akangateitei aia i tana vaine. No tona akaraanga meitaki, kua iki a Dorina i te apii akaou i te Pipiria e kua papetitoia aia.—Akara i te vitio i runga i te jw.org Alexandru e Dorina Văcar: ‘Te Aroa, e Akakoromaki e te Takinga Meitaki’ i roto i te tuanga “Taui te Tuatua Mou i te Oraanga.”
13. Akapeea tatou me akaari i te aroa no Iehova e te ngutuare tangata?
13 Kua anga a Iehova i te ngutuare tangata e ka inangaro aia kia mataora ratou. (Ephe. 3:14, 15) E mataora ai, ka anoanoia tatou kia rave i to Iehova anoano. No reira, e mea papu te akaperepere maira a Iehova i taau akaatinga anga no te akamori iaia e te akono i toou ngutuare ma te aroa e te ngateitei.—Roma 12:10.
AKAMAROIROI I TETAI KE KIA AITE MEI TE AU NAZIRA
14. Koai ma ta tatou ka akamaroiroi na roto i ta tatou au tuatua?
14 Te aronga tei iki i te akamori ia Iehova i teia rā, ka anoanoia ratou kia akaatinga ia ratou no to ratou inangaro Iaia. E i tetai taime, kare i te mea māmā. Akapeea tatou me akamaroiroi i tetai ke kia akaari i teia tu? Na roto i te au tuatua akamaroiroianga. (Iobu 16:5) E aronga ainei tetai i roto i taau putuputuanga te akamāmā nei i to ratou oraanga kia tavini maata atu ia Iehova? Kua kite ainei koe i tetai au tamariki tei tuke mei tetai pae i te apii, noatu e ngatā ia ratou i te rave i te reira? E aronga apii Pipiria e te au taeake ainei tetai, te tauta nei kia vai tiratiratu noatu te au patoianga a te kopu tangata? Kia akamaroiroi e kia akaperepere ua rai tatou i teia aronga no to ratou tu ngakau toa e ta ratou e rave nei no Iehova.—Phile. 4, 5, 7.
15. Akapeea tetai pae me tauturu i te aronga e tavini tamou nei?
15 Tetai taime, penei ka rauka ia tatou i te oronga i te tauturu ki te au taeake te tavini tamou nei. (Mase. 19:17; Ebe. 13:16) Kua rave tetai tuaine pakarikari i teia i Sri Lanka. Kua kake tana moni pakarikari ki runga e kua inangaro aia i te tauturu i tetai nga tuaine mapu e painia ra kia rave ua rai i ta raua angaanga tutu aere noatu te turanga ngatā i te pae moni. No reira kua oronga aia i tetai tuanga moni i te au marama no te tutaki i ta raua pira tereponi. E tu manea tikai to teia tuaine!
16. Eaa ta tatou ka apii mai mei te oraanga o te au Nazira i taito?
16 E mea papu e maata te apiianga mei te akaraanga meitaki o te au Nazira! Te apii katoa maira to ratou oraanga ia tatou no to tatou Metua ko Iehova. Kua kite aia i to tatou inangaro i te akamareka iaia e te akaatinga ia tatou uaorai kia rave i ta tatou i tia. Akangateitei aia ia tatou na te oronga anga mai i te tikaanga kia akakite i to tatou inangaro iaia. (Mase. 23:15, 16; Mare. 10:28-30; 1 Ioa. 4:19) Te akaari maira te oraanga o te au Nazira te kite e te akaperepere maira a Iehova i ta tatou e rave nei. No reira, kia tavini maroiroi ua atu rai tatou ia Iehova e te oronga i to tatou meitaki Kiaia.
AKAPEEA KOE ME PAU?
-
Akapeea te au Nazira te akaari anga i te tu akaatinga e te ngakau toa?
-
Akapeea tatou me akamaroiroi i tetai e tetai kia akaari i te tu o te au Nazira i teia tuatau?
-
Eaa ta te au Nazira e akaari maira no to Iehova irinaki i tona aronga akamori?
IMENE 124 Ei tu Aroa Ua
a Noatu kua iki a Iehova i tetai pae ei Nazira, kua inangaro tetai pae Iseraela i te aru i teia oraanga.—Akara i te pia “ Au Nazira Tei Ikiia e Iehova.”
b I tetai taime, kua akaaiteia te au Nazira ki te aronga rave tamou i te angaanga a Iehova i roto i ta tatou puka. I roto ra i teia atikara, ka uriuri tatou akapeea te au tavini katoatoa o Iehova me aru i te tu o te au Nazira.
c Kare ra te aiteanga e e angaanga ke atu ta te au Nazira ka anoanoia kia rave ei akono i ta ratou i tia.
d Akara i te atikara i runga i te jw.org “Kua Akamāmā Maua i to Maua Oraanga” o te au tua “Itae Anga i te au Akakoroanga Pae Vaerua.”
e AKATAKA ANGA TUTU: Mei tona are, kua kite atu te tangata Nazira i tona ngutuare e apai ra i te kopapa mate o tetai akaperepere. Kare aia e piri atu ki te reira no tana i tia.