1. Ia Mataio 11:28-30, eaa ta Iesu i taputou mai?

KUA akakite a Iesu i teia taputou manea ki te aronga e akarongo maira kiaia. “E aere mai kotou kiaku nei,” i nana ai, e “naku e akaanga i to kotou roi.” (E tatau ia Mataio 11:28-30.) E au tuatua pumaana teia. Akamanako ana i tana i rave no tetai vaine tei mamae i tona au maki kikino.

2. Eaa ta Iesu i rave no te vaine maki?

² Kua anoano maata teia vaine i te tauturu. Kua aere ana aia ki te au taote, kia akaoraia aia mei tona maki. E tai ngauru ma rua ona mataiti i te taitaia anga i teia maki, kare rai aia i meitaki mai ana. I raro i te Ture, kua viivii rai aia. (Levi. 15:25) E oti, kua akarongo aia e ka rauka ia Iesu i te akaora i te aronga e mamae ra, no reira kua aere atura i te kimi iaia. Tona kite anga iaia, kua amiri atura i to Iesu tapa kakau, kua meitaki iora tona maki! Inara e maata atu ta Iesu i rave i te rapakau ua i tona kopapa, kua akaari aia i te tu akangateitei ki teia vaine. Ei akaraanga, i tona tuatua anga ki teia vaine, kua taiku aia i te tuatua pumaana e te maru “e maine.” Kua akapumaanaia e kua akamaroiroiia teia vaine!—Luka 8:43-48.

3. Eaa te au uianga ka pau tatou?

³ Akara ana kua aere teia vaine kia Iesu. Kua aere aia i te kimi ravenga. Aiteite katoa i teia tuatau, ka anoanoia tatou kia aruaru i te “aere mai” kia Iesu. I to tatou tuatau, kare a Iesu e akaora temeio ana i te au tu maki o te tangata tei “aere mai” kiaia. Inara te pati nei rai aia e: “E aere mai kotou kiaku nei, . . . naku  e akaanga i to kotou roi.” I roto i teia atikara, ka pau tatou e rima uianga: Akapeea tatou me “aere mai” kia Iesu? Eaa te aiteanga i ta Iesu tuatua: “Kia rave i tana amo ki rungao ia kotou”? Eaa ta tatou ka apii mei ia Iesu? Eaa i riro ei tana angaanga i oronga mai, ei akaoraora ia tatou? Akapeea tatou me akaoraoraia i te rave anga i ta Iesu amo?

4-5. Eaa tetai au mataara ka “aere mai” tatou kia Iesu?

⁴ Tetai mataara ka “aere mai” kia Iesu, na te apiianga no runga i tana i tuatua e i rave. (Luka 1:1-4) Kare e rauka i tetai ke i te rave i teia no tatou, ka apii atu rai tatou i teia no tatou rai. Ka “aere [katoa] mai” tatou kia Iesu na te ikianga kia papetitoia e kia riro mai ei pipi na te Mesia.

⁵ Tetai mataara ka “aere mai” kia Iesu na te patianga i te tauturu ki te aronga pakari i roto i te putuputuanga. Na roto i teia au “tangata nei” te akono ra ratou, i ta Iesu mamoe. (Ephe. 4:7, 8, 11; Ioa. 21:16; 1 Pete. 5:1-3) Ka anoanoia tatou kia pati i ta ratou tauturu. Kare te aronga pakari e kite eaa ta tatou e manako ra e ta tatou e anoano ra. Akamanako ana i ta teia taeake ko Julian i tuatua: “Kua akaruke au i taku angaanga i te Betela no te makimaki, e kua akamaroiroi mai toku au oa kia pati au i te aronga pakari kia atoro mai e kia akamaroiroi mai iaku. Kua manako au kare au e anoano i te reira. I muri maira kua pati au i te tauturu, e kua riro te reira atoro anga i te akamaroiroi iaku.” Te aronga pakari tiratiratu, mei te nga taeake e rua tei atoro ia Julian, ka tauturu ratou ia tatou kia kite i “te ngakau o te Mesia,” koia oki, kia mārama e kia aru i tona aerenga manako e tona tu. (1 Kori. 2:16; 1 Pete. 2:21) Ko teia tetai mataara meitaki tikai ka tauturu ratou ia tatou.

6. Eaa te aiteanga i ta Iesu i tuatua: “Ka rave mai i taku amo ki rungao ia kotou”?

⁶ I te tuatua anga a Iesu: “Ka rave mai i taku amo ki rungao ia kotou,” penei te akakite ra aia e aere mai ki “Raro i taku mana akaaere.” Tetai aiteanga “E aere mai ki raro i taku nei amo, e ka angaanga kapiti taua na Iehova.” Noatu eaa te tu, te ō maira te angaanga me rave i tana amo.

7. Ia Mataio 28:18-20, eaa ta tatou angaanga, e eaa ta tatou i papu?

⁷ Kua āriki tatou i ta Iesu patianga na te akatapuanga i to tatou oraanga kia Iehova e kia papetitoia. Kua orongaia teia patianga ki te katoatoa, kare rava a Iesu i patoi ana i tetai, tei inangaro ma te ngakau tae i te tavini i te Atua. (Ioa. 6:37, 38) Kua orongaia te akameitakianga ki ta Iesu au pipi, kia rave katoa i te angaanga ta Iehova i oronga kia Iesu. Papu ia tatou ka tauturu mai a Iesu, ia tatou e rave ra i teia angaanga.—E tatau ia Mataio 28:18-20.

8-9. Eaa te tumu i akavaitata ei te au tangata akaaka kia Iesu, e eaa te au uianga ka ui kia tatou uaorai?

⁸ Kua aere mai te aronga akaaka kia Iesu. (Mata. 19:13, 14; Luka 7:37, 38) No teaa ra? Akamanako ana i te tuke i rotopu ia Iesu e te au Pharisea. Kua akaari te arataki akonoanga i te ngakau aroa kore e te ngakau akatietie. (Mata. 12:9-14) Kua akaari a Iesu i tu aroa e te tu akaaka. Kua ngakau parau te au Pharisea ia ratou uaorai e to ratou taoonga teitei. Kare a Iesu i aruaru ana i te reira tu, kua apii aia i tana au pipi kia manako ia ratou uaorai ei au tavini akaaka. (Mata. 23:2, 6-11) Kua tutara te au Pharisea na roto i te tu tamataku e te māro i te tangata kia akatupu i to ratou  anoano. (Ioa. 9:13, 22) Kua akaoraora a Iesu i te tangata na roto i tana au angaanga takinga meitaki e te au tuatua maru.

⁹ Eaa taau i apii mai mei ia Iesu? E ui kia koe uaorai: ‘Te akaari ra ainei au i te tu maru e te akaaka? Te rave ra ainei au i tetai ua atu angaanga no tetai ke? Te akaari ra ainei au i te tu takinga meitaki ki tetai ke?’

12-14. Eaa te tumu i riro ei ta Iesu angaanga ei mea akaoraora kia tatou?

¹² Eaa ra i riro ei ei mea akaoraora kia tatou i te rave i ta Iesu angaanga? E maata te tumu, inara ka uriuri tatou i tetai ua o teia.

¹³ E nga akaaere meitaki tikai to tatou. Kare a Iehova, to tatou Akaaere Teitei, i te pu kino e te māro ia tatou. E mareka ana aia i ta tatou e rave ra. (Ebe. 6:10) E kua oronga mai aia i te maroiroi kia rauka ia tatou i te rave i ta tatou angaanga. (2 Kori. 4:7; Gala. 6:5) Ko Iesu, to tatou Ariki, te arataki ra aia na roto i te akaraanga. (Ioa. 13:15) Te aronga pakari e tiaki ra ia tatou, ka aru ratou i to Iesu akaraanga, “te tiaki mamoe maata.” (Ebe. 13:20; 1 Pete. 5:2) Ka aruaru ratou i te akaari ua rai i te tu takinga meitaki, te akamaroiroi e te ngakau toa, ia ratou e akono ra e te paruru ra ia tatou.

¹⁴ E au oa mou tikai to tatou. Kare atu e aronga ke e oa mou to ratou e e angaanga puapinga ta ratou mei ta tatou rai te tu. Akamanako ana: E akameitaki anga to tatou kia angaanga kapiti ki te aronga e akono ra i te au kaveinga meitaki e kare e akaari ana i te tu akatietie. E aronga karape i te angaanga ma te tu akaaka, te manako ra ratou e e meitaki atu tetai, ia ratou. Te manako ra ratou ia tatou ei au oa angaanga e ei au oa mou. E no te vaitata i to ratou pirianga oa, ka mate ua ratou no tatou!

15. Eaa to tatou manako no ta tatou angaanga i teianei?

¹⁵ E angaanga meitaki tikai ta tatou. Apii tatou i te tuatua mou no runga ia Iehova ki te tangata e te akakite ra tatou e e pikikaa te Tiaporo. (Ioa. 8:44) Kua akateiaa a Satani i te tangata ma te au pikikaa tei akariro ia ratou ei aronga puapinga kore. Ei akaraanga, kua inangaro aia ia tatou kia irinaki e kare rava a Iehova e akakore i ta tatou ara e kare aia e inangaro ana ia tatou. E pikikaa tikai teia, tei akaparuparu i te tangata ravarai! Me “aere mai” tatou kia Iesu, ka akakoreia ta tatou ara. Ko te tika, te akaperepere ra a Iehova ia tatou katoatoa. (Roma 8:32, 38, 39) E mea pumaana i te tauturu i te tangata kia irinaki ia  Iehova e kia kite i tana tauturu i roto i to ratou oraanga!

16. Eaa te tuke i ta Iesu apainga, ki tetai atu apainga e rave ana tatou?

¹⁶ Ta tatou apainga i pati mai a Iesu kia amo tatou, e tuke te reira ki tetai ua atu apainga, ka akakoromaki tatou. Ei akaraanga, me oti te ngai angaanga i te pae kopapa, ka roiroi te tangata e kare e mataora ana i te reira. I tetai tua, me pou ia tatou tetai tuatau te tavini anga ia Iehova e Iesu, ka mataora tikai tatou. Ka roiroi tatou me oti te ngai angaanga e ka aruaru kia tae ki te uipaanga a te putuputuanga i te reira po. Inara i te maata anga o te taime, me oki tatou ki te kainga kua oraora akaou tatou e kua akamaroiroiia. Aiteite katoa me tauta pakari tatou i te tutu aere e te rave i ta tatou apii Pipiria na tatou uaorai. Ka maata atu te meitaki e te maroiroi ka rauka mai!

17. Eaa ta tatou ka mārama no to tatou turanga e eaa ta tatou ka matakite?

¹⁷ Kia mārama katoa tatou e kare e aiteite ana to tatou maroiroi. No reira ka matakite tatou i ta tatou ka rauka i te rave. Ei akaraanga, penei ka kaimoumou tatou i to tatou maroiroi no te akaputu i te au apinga o te pae kopapa. Akara ana i ta Iesu i tuatua ki te mapu tane apinganui tei ui kiaia: “E akapeea au nei e raukaʼi iaku te ora mutu kore?” Te rave ra te mapu tane i ta te Ture. Penei e tu meitaki to teia tangata no te mea kua akakite te Evangeria a Mareko e kua “aroa atura [Iesu] iaia.” Kua pati a Iesu ki te tutara mapu. “Ka aere, ka oko i taau apinga,” i karanga ai a Iesu, “e aere mai oki, . . . ka aru mai ei iaku.” Kare te mapu tane i kite eaa tana ka rave, i te akaraanga “e apinga maata oki” tana. (Mare. 10:17-22) Tana i rave, kua patoi aia i ta Iesu amo e kua riro ei tavini ia “Mamona.” (Mata. 6:24) Eaa ra taau ka iki?

18. Eaa ta tatou ka rave mei tera taime ki tera taime, e no teaa ra?

¹⁸ Mei tera taime ki tera taime, e mea meitaki i te akarakara, e eaa te mea mua i roto i to tatou oraanga. No teaa ra? Kia akapapu e te akapou meitaki ra tatou i to tatou maroiroi, no tetai apinga meitaki. Ka akamanako ana tatou i ta te mapu tane ko Mark e tuatua maira: “No te au mataiti, kua manako au e te akono ra au i tetai oraanga māmā ua. Te painia ra au, inara kua pou ua toku manako ki runga i te moni e te akameitaki atu i toku oraanga. Kua akamanako au e eaa tei akariro kia ngata toku oraanga. Kua kite mai au e te aruaru maata ra au i toku anoano pae kopapa e manga ua taku i oronga no Iehova.” Kua akatanotano a Mark i tona oraanga e tona manako e kua akapou maata i tona maroiroi i te rave i to Iehova anoano. “Tetai taime e apiapi ana au kare e rava ana te moni,” i karanga ai a Mark, “inara kua tauturu mai a Iehova e Iesu iaku kia akakoromaki i toku manamanata.”

19. Eaa ra i puapinga ai i te akaari i te manako tau?

¹⁹ Ka rauka ua rai ia tatou te tu akaoraora i raro ake i ta Iesu amo me rave tatou e toru apinga. Mea mua, e akaari i te manako tau. Te rave nei tatou i ta Iehova angaanga, e no te reira e rave kia tau kia Iehova. E aronga angaanga tatou, ko Iehova te Pu. (Luka 17:10) Me tauta tatou i te rave i tana angaanga mei ta tatou i manako, ka taitaia tatou. Mei tetai puakatoro ka takino e ka akaroiroi iaia, me māro te reira i te rave i tona anoano e kare e aru i te arataki anga a te pu. I tetai tua, ka maata te ka rauka ia tatou i te rave e te akakoromaki me kauraro ua rai tatou ki ta Iehova  aratakianga. E akamaara kare e rauka i tetai i te tāpu i tona akakoroanga!—Roma 8:31; 1 Ioa. 4:4.

20. Eaa to tatou akakoroanga i te rave anga i ta Iesu amo?

²⁰ Te rua, e angaanga ma te akakoroanga tau. Ko to tatou akakoroanga, ko te akakakā i to tatou Metua aroa ko Iehova. Tetai pae o te anere mataiti mua, kua akakeuia ratou e te tu noinoi e te manako ia ratou uaorai, kare i mataora ana e kua akaruke i ta Iesu amo. (Ioa. 6:25-27, 51, 60, 66; Phili. 3:18, 19) Kareka ra te aronga tei akakeuia e te aroa i te Atua e to ratou tangata tupu, kua mataora ratou i te rave i te reira amo e mate ua atu ratou, e to ratou manakonakoanga kia angaanga kapiti kia Iesu i te rangi. Mei ia ratou rai, ka mataora ua tatou i te rave i ta Iesu amo ma te akakoroanga tau.

21. Ia Mataio 6:31-33, eaa ta tatou ka tapapa atu ia Iehova kia rave?

²¹ Te toru, kia tau te tapapa anga. Kua iki tatou i te oraanga akaatinga uaorai e te angaanga pakari. Kua akamatakite mai a Iesu e ka takinokinoia tatou. Inara ka rauka katoa ia tatou i te tapapa atu e ka oronga mai a Iehova i te maroiroi kia akakoromaki i te reira. Te maata atu ia tatou i te akakoromaki i to tatou turanga, ka maata atu te maroiroi. (Iako. 1:2-4) Ka tapapa katoa atu tatou e ka oronga mai a Iehova i tei anoanoia e tatou, ka tiaki a Iesu ia tatou, e ka akamaroiroi to tatou au taeake e te au tuaine ia tatou. (E tatau ia Mataio 6:31-33; Ioa. 10:14; 1 Tesa. 5:11) Eaa atu ta tatou ka anoano?

22. Eaa tatou ka rekareka ai?

²² Te vaine ta Iesu i rapakau, kua akaoraoraia aia i te reira rā. Inara ka rauka iaia te turanga pumaana e tuatau ua atu me riro mai aia ei pipi tiratiratu na te Mesia. Eaa toou manako tana i rave? Me kua iki aia i te rave i ta Iesu amo, akamanako ana i tana tutaki, te tavini kapiti anga kia Iesu i te rangi! Tetai ua atu atinga tana i rave no te aru ia Iesu kua akameitakiia rai aia. Noatu eaa to tatou manakonakoanga, te ora anga e tuatau ua atu i te rangi me kore i te enua, ka rekareka tatou e kua āriki tatou i ta Iesu patianga: “E aere mai!”