1. Eaa te tuatau penei ka ngata i te tavini ia Iehova?

EAA toou manako te tuatau ka ngata i te tavini ia Iehova—te tuatau maata te manamanata me kore i te tuatau ‘au te oraanga? Me tupu te manamanata ka viviki tatou i te irinaki ia Iehova. Inara, eaa ta tatou ka rave me ‘au ua to tatou oraanga? Penei ka tamanataia tatou i te tavini i te Atua? Kua akamatakite a Iehova i to Iseraela e ka tupu teia turanga.​—Deu. 6:​10-⁠12.

2. Eaa te akaraanga meitaki ta te Ariki ko Asa i akanoo?

² E akaraanga meitaki te Ariki ko Asa tei angaanga pakari na te irinaki anga kia Iehova. Kua tavini aia ia Iehova i te tuatau manamanata e te tuatau ‘au. Mei mua mai, “kua tika rava ra to Asa ra ngakau ia Iehova e ope rava akera ona au rā.” (1 Ari. 15:14) Tetai mataara, kua takore a Asa i te akamorianga pikikaa i Iuda. Karanga te Pipiria e “kua apai ke atura aia i te au atarau no te au atua ke ra, e te au ngai teitei, e kua vavaʼi i te au tiki, e kua tipu i te au Asetoreta.” (2 Para. 14:3, 5) Kua akaatea aia i tona tupuna vaine ko Maaka mei tona taoonga patireia. No teaa ra? Kua akakeu aia i te tangata kia akamori i te au itoro.​—1 Ari. 15:11-​13.

3. Eaa ta tatou ka akamanako i roto i teia atikara?

³ E maata ta Asa i rave i te takore ua i te akamorianga pikikaa. Kua akanoo aia i te akamorianga mā, kua akamaroiroi i to Iuda kia akamori ia Iehova. Akameitaki iora a  Iehova ia Asa e to Iseraela e ‘au oki te enua ra. * I te tuatau tutaraanga o Asa e ngauru mataiti, “e au oki to taua enua ra.” (2 Para. 14:​1, 4, 6) I teia atikara ka uriuri tatou akapeea a Asa i te akapou meitaki i tona tuatau ‘au. E oti, ka uriuri tatou i te akaraanga o te au Kerititiano i te anere mataiti mua, mei ia Asa, kua akapou meitaki i to ratou tuatau ‘au. E oti akera, ka pau tatou i teia uianga: Me te noo ra koe i tetai enua ‘au te akamorianga, akapeea koe me akapou meitaki i toou tuatau ‘au?

4. Ia 2 Paraleipomeno 14:​2, 6, 7, akapeea a Asa i te akapou meitaki i tona tuatau ‘au?

⁴ E tatau ia 2 Paraleipomeno 14:​2, 6, 7. Akakite a Asa ki te tangata “i oronga mai ei [a Iehova] i te au no tatou e pini ua ake.” Kare a Asa i manako ana i teia tuatau ‘au e e tuatau akaangaroi. Mari ra, kua maroiroi aia i te patu i te au oire, paruru, punanga, e te au ngutupa. Karanga aia ki to Iuda: “Koi vai ake te enua i mua ia tatou nei.” Eaa te aiteanga o ta Asa tuatua? Ka rauka i te tangata i te rave i ta ratou angaanga i te enua, ta te Atua i oronga no ratou e kare e manamanata. Kua akamaroiroi aia i te iti tangata kia akapou meitaki i to ratou tuatau ‘au.

5. Eaa ra a Asa i akamaata ei e te akamatutu i tona vaeau?

⁵ Kua akapou meitaki a Asa i tona tuatau ‘au na te akamaata e te akamatutu i tona vaeau. (2 Para. 14:8) Ko te aiteanga ainei teia e kare aia e irinaki ana ia Iehova? Kare. Kua kite a Asa i tana apainga  ei ariki kia akapapa i te iti tangata no te tuatau manamanata a te tuatau ki mua. Kua kite a Asa e ka ope te tuatau ‘au o Iuda, kua tupu rai teia.

6. Akapeea te au Kerititiano o te anere mataiti mua i te akapou meitaki i to ratou tuatau ‘au?

⁶ Noatu kua takinokinoia te au Kerititiano i te anere mataiti mua, kua tupu katoa te tuatau ‘au kia ratou. Eaa ta ratou i rave i te reira tuatau? Kua tutu maroiroi te au tane e te au vaine tiratiratu i te nuti meitaki. Karanga te irava ia Angaanga “mataku atura oki [ratou] i te Atu i to ratou aerenga.” Kua tutu ua ratou i te nuti meitaki, e tei tupu, kua “maata atura ratou.” Kua akameitaki a Iehova i ta ratou angaanga tutu aere i te tuatau ‘au.​—Anga. 9:​26-31.

7-8. Eaa ta Paulo e tetai pae i rave? Akamārama mai.

⁷ Kua tutu aere te au pipi i te anere mataiti mua i te nuti meitaki. Ei akaraanga, i te kite anga te apotetoro ko Paulo i tetai ngutupa maata i Ephesia, kua aere atura aia kua tutu aere e kua akariro i te tangata ei pipi i te reira oire.​—1 Kori. 16:8, 9.

⁸ Kua rauka katoa ia Paulo e tetai au Kerititiano i te tutu aere i muri ua ake i te tukuia anga te tika no te peritome i te 49 T.N. (Anga. 15:23-​29) Te akakiteia anga teia ki te putuputuanga, kua rave maroiroi te au pipi “i te ako anga e te apii anga i te tuatua a te Atu” ko Iehova. (Anga. 15:30-​35) Eaa tei tupu mai? Karanga te Pipiria e “tinamou atura te au ekalesia i te akarongo anga i te tuatua, tupu atura i te maata anga, kare e rā i tivata.”​—Anga. 16:4, 5.

9. Eaa te turanga ka rauka ia tatou i teia tuatau, eaa ta tatou ka ui kia tatou?

⁹ I te au enua e manganui i teia tuatau, ka tutu aere tatou ma te kore e manamanata. Te noo ra ainei koe i roto i teia au enua? Me koia ïa, e ui kia koe, ‘Akapeea au me akapou meitaki i teia tuatau?’ I teia tuatau openga kua arataki ta Iehova akaaerenga i tona iti tangata kia rave maroiroi i te angaanga tutu aere e te apii i te tangata i teianei ao. (Mare. 13:10) E maata te angaanga ka rauka i te iti tangata o Iehova i te rave.

10. Eaa ta 2 Timoteo 4:2 e akamaroiroi ra ia tatou kia rave?

¹⁰ Akapeea tatou me akapou meitaki i te tuatau ‘au? (E tatau ia 2 Timoteo 4:2.) Penei e akara me ka rauka ia koe e tetai o toou ngutuare i te akamaata i tana angaanga tutu evangeria, penei ei painia? Kare teia i te tuatau no te akaputu apinganui​—e au apinga kare tatou e ora, me tupu te mate maata.​—Mase. 11:4; Mata. 6:​31-​33; 1 Ioa. 2:​15-​17.

11. Eaa ta tetai pae i rave no te tutu aere i te nuti meitaki ki te katoatoa?

¹¹ Maata te au papuritia te apii nei i te au reo ou ei tauturu ia ratou i te angaanga tutu aere e te apii anga. Oronga mai te akaaerenga a Iehova i te au puka akatumuia ki runga i te Pipiria i roto i te au reo ke. Ei akaraanga, i te 2010 ka rauka ta tatou au puka i roto i te 500 tuma reo. I teia tuatau, kua maata mai te numero e 1,000 tuma reo!

12. Eaa te puapinga me akarongo te tangata i te karere Patireia i to ratou reo? Oronga mai i tetai akaraanga.

¹² Eaa te ka tupu me akarongo te tangata i te karere mou o te Tuatua a te  Atua i roto i to ratou reo? Akamanako ana i te akaraanga o tetai tuaine tei puapingaia mei tetai uruoaanga i Memphis, Tennessee, i Marike. Kua raveia te uruoaanga i roto i te reo Kinyarwanda, e reo matauia i Rwanda, Congo (Kinshasa), e Uganda. Akamutu anga te uruoaanga, karanga te tuaine reo Kinyarwanda e: “Ka tai nei au ka mārama meitaki i te tuatua mou pae vaerua, mei toku neke anga ki Marike e 17 mataiti i topa akenei.” Kua pakia te ngakau o teia tuaine i tona akarongo anga i te ako i roto i tona reo. Me ka rauka ia koe, ka apii ainei koe i tetai reo ke ei tauturu i te tangata i toou ngai? Ka tau ainei te reira no te mea te vaira te aronga i toou ngai, ka mareka me tuatua koe i to ratou reo? Ka puapingaia koe.

13. Akapeea to tatou au taeake i Rutia i te akapou meitaki i te tuatau ‘au?

¹³ Kare e rauka i te au taeake ravarai i te tutu aere i te evangeria. Kua arai te kavamani i ta tatou angaanga tutu aere. Akamanako ana i te akaraanga o te au taeake i Rutia. No tetai tuatau roa te takinokino anga, ia Mati 1991 kua akatikaia te au taeake kia tutu aere i te evangeria. I tera tuatau e 16,000 papuritia o te Patireia i Rutia. E rua ngauru mataiti i muri mai, kua maata te numero e 160,000 tuma papuritia! Taka meitaki kua akapou meitaki to tatou au taeake i te tuatau ‘au i te tutu aere. Kua tamanataia ra te tuatau ‘au. Noatu kua taui to ratou turanga kua rave maroiroi ratou i te akamorianga mā. Kua rave ratou i te ka rauka ia ratou i te tavini ia Iehova.

14-15. Akapeea a Iehova i te akaari mai i tona mana no te tauturu ia Asa?

¹⁴ I to Asa tuatau kua tupu te manamanata e kua kore te ‘au. Aere maira tetai  nuku maata e te ketaketa e maata atu i te tai mirioni no Etiopia mai. Papu i to ratou rangatira vaeau ko Zera e ka autu ratou i te vaeau o Iuda. Inara, kua irinaki te Ariki ko Asa i tona Atua ko Iehova. Pure atura a Asa: “E tauturu mai ia matou, e to matou Atua, e Iehova e; te irinaki nei oki matou ki runga ia koe, e no toou ingoa e aere atu ei matou e tamaki i teianei aronga maata.”​—2 Para. 14:11.

¹⁵ Noatu te maata o te nuku vaeau o Etiopia, kua kite a Asa e e Atua ririnui a Iehova e ka tauturu mai aia i Tona iti tangata. Kua tauturu a Iehova iaia; kua pou te nuku vaeau o Etiopia i te mate.​—2 Para. 14:​8-13.

16. Akapeea tatou e kite ei e ka tupu te kino i te tuatau ‘au?

¹⁶ Noatu kare tatou i kite e eaa te ka tupu kia tatou tataki tai, kua kite tatou e ka tupu te manamanata i te tuatau ‘au. Totou a Iesu no tana au pipi, i te tuatau openga, ka “makitakitaia mai kotou e te pa enua ravarai.” (Mata. 24:9) Akakite te apotetoro ko Paulo e “te aronga katoa e maara tikai e akono i te Atua, i roto rai i te Mesia ra ia Iesu, e takinga-kino katoaia ïa.” (2 Timo. 3:​12) E “riri maata” to Satani, e kare e rauka ia tatou i te kopae i tana takinokino anga ia tatou.​—Apo. 12:12.

17. Na teea au tu penei ka timataia to tatou akarongo?

¹⁷ A te tuatau ki mua, ka timataia to tatou tu tiratiratu. Kare e roa atu, ka kite teianei ao i te “mate maata tei te reira tuatau, kare ïa mei muatangana mai i teianei ao.” (Mata. 24:21) A te reira tuatau, ka takinokinoia tatou e te kopu tangata e ka araiia ta tatou angaanga. (Mata. 10:35, 36) Mei ia Asa te tu, ka irinaki ainei tatou tataki tai kia Iehova no te tauturu e te paruru anga?

18. Ia Ebera 10:38, 39, eaa te ka tauturu ia tatou kia akapapa me ope te tuatau ‘au?

¹⁸ Te akapapa ra a Iehova ia tatou i teianei kia matutu te akarongo. Arataki aia i “te tavini akono meitaki e te pakari” kia tuʼa i te “kai na [t]atou i te ora mou” ei tauturu ia tatou kia vai ngaueue  kore. (Mata. 24:45) Ka rave ra tatou i ta tatou tuanga kia matutu to tatou akarongo ia Iehova.​—E tatau ia Ebera 10:38, 39.

19-20. Ia 1 Paraleipomeno 28:9, eaa te au uianga ka ui tatou, e eaa te tumu ka ui ei i te reira?

¹⁹ Mei te Ariki ko Asa, ka anoanoia tatou kia ‘kimi i te Atua ia Iehova.’ (2 Para. 14:4; 15:1, 2) Ka kimi tatou na te apii anga no runga ia Iehova e kia papetito. Ka tauta tatou i te akamatutu i to tatou inangaro ia Iehova. Ei timata ia tatou, ka ui tatou kia tatou uaorai, ‘Te aere putuputu ainei au ki te uipaanga?’ Me aere tatou ki te au uipaanga tei akanooia e ta Iehova akaaerenga, ka akamatutuia tatou e ka akamaroiroiia kia tavini ua atu ia Iehova. (Mata. 11:28) Ka ui tatou, ‘Te apii putuputu ra ainei au i te Pipiria?’ Me e noo ana koe ki toou ngutuare, e akanoo ana ainei koe i te tuatau no te akamorianga a te ngutuare? Me ko koe anake ua, te akanoo ra ainei koe i te tuatau akamorianga? Te rave katoa ra ainei koe i te angaanga tutu aere e te akariro anga i te tangata ei pipi?

²⁰ Eaa ra tatou ka ui ei i teia au uianga? Akakite maira te Pipiria e te akara ra a Iehova i to tatou au manako e te kimi ra e eaa to roto i to tatou ngakau, kia pera katoa rai tatou. (E tatau ia 1 Paraleipomeno 28:9.) Me kite tatou e ka anoanoia te akatanotano anga i to tatou akakoroanga, te tu e to tatou manako, e pati tauturu tatou kia Iehova kia taui. Teia te tuatau no te akapapa ia tatou uaorai no te au timata anga a te tuatau ki mua. Eiaa e tuku i tetai apinga kia arai ia tatou no te akapou meitaki i to tatou tuatau ‘au!