Te na ko ra teia irava: “Kia akara koe i te ao i te takinga-kino angaia ra, e te ruri ke anga i te tuatua-tau e te tuatua-tika i te enua nei, auraka koe e poitirere roa i taua mea ra; ko tei teitei ra oki tei akara i taua tangata teitei ra; e ko tei tu ke rava i te teitei ra tei akara ia raua katoa.”—Kohe. 5:8.

Mei ta te tangata akara anga, te akakite ra teia irava no te au tangata tutara o te kavamani. Inara me akamanako meitaki tatou, te akakite katoa ra te reira i te tika no runga ia Iehova, te ka riro ei akapumaana e te akamaroiroi ia tatou.

Te akakite ra a Koheleta 5:8 no runga i tetai tutara tei takinokino i te putaua e tei akono tau kore ia ratou. Kia akamaara teia tutara e te akaraia maira aia e tetai tei teitei atu iaia e e maata atu tona mana i roto i te kavamani. E te vai atura tetai pae e taoonga teitei atu to ratou. Ma te maromaroa, e aronga pikikaa teia au tutara o te kavamani, e kua riro ei akakoromaki anga na te tangata.

Noatu eaa te tu, pumaana tatou i te kite e ‘ko tei teitei ra oki [ko Iehova] tei akara i taua aronga teitei ra’ i roto i te au kavamani a te tangata. E pati tatou ki te Atua e ka tuku tatou i ta tatou apainga kiaia. (Sala. 55:22; Phili. 4:6, 7) Kite tatou e “te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.”—2 Para. 16:9.

No reira, te akamaara maira a Koheleta 5:8 i te turanga o te tangata i roto i te kavamani; e te vaira tetai tei teitei atu ia ratou. Tei puapinga rava atu, te akakite katoa ra e ko Iehova tei teitei rava, e koia, te Mana Ngateitei. Te tutara nei aia na roto i tana Tamaiti, ko Iesu Karaiti, te Ariki o te Patireia. Te akara ua maira te Mana Katoatoa, e tu tau tona e te maru, pera katoa tana Tamaiti.