1-2. Akapeea a Koheleta 11:6 te akakite anga no te tutu aere i te nuti meitaki o te Patireia?

I TETAI au enua, ka akarongo meitaki te tangata me rongo ratou i te nuti meitaki. Ta ratou te reira e tiaki ra! I tetai au enua ke, kare te tangata e inangaro i te Atua e te Pipiria. Akapeea i toou ngai e noo ra? Noatu eaa te tu, te tapapa maira a Iehova kia tutu aere e tae ua atu ki te taime e oti ei te reira kia tau kiaia.

² I to Iehova tuatau tau, ka akaoti te angaanga tutu aere e “ko te openga iora ïa i reira ra.” (Mata. 24:14, 36) I mua ake ka tupu ei te reira, akapeea tatou me aru i teia au tuatua “auraka e tāpu ua i to rima”? *​—E tatau ia Koheleta 11:6.

3. Eaa ta tatou ka uriuri i teia atikara?

³ I te atikara i mua akenei kua uriuri tatou e a au ravenga ka anoanoia tatou kia riro mai “ei ravakai tangata” meitaki. (Mata. 4:​19) Ka uriuri teia atikara e toru mataara ka akamaroiroi tatou i te tutu aere, noatu to tatou turanga. Ka apii tatou i te tumu i puapinga ai (1) kia akamou meitaki, (2) kia akakoromaki, e te (3) akamatutu i te akarongo.

4. Eaa te tumu i anoanoia ai tatou kia akamou meitaki ki runga i te angaanga ta Iehova i oronga mai kia tatou kia rave?

⁴ Totou a Iesu i te au tupuanga e te au turanga te ka akairo i te tuatau openga e ka tamanamanata i tana au pipi kia  kore te angaanga tutu aere e akaotiia. Akakite aia ki tana au pipi “kia matakite oki.” (Mata. 24:42) I teia tuatau, te aro atu nei tatou i te au tamanamanata anga tei aite ki te iti tangata i te tuatau o Noa tei kore i akarongo ki te akamatakite anga tei akakiteia e Noa. (Mata. 24:37-​39; 2 Pete. 2:5) No reira, ka inangaro tatou i te akamou meitaki ki runga i te angaanga ta Iehova i oronga mai kia tatou kia rave.

5. Akapeea a Angaanga 1:​6-8 te akakite anga i te maata o te angaanga tutu aere?

⁵ No reira ka anoanoia tatou kia rave meitaki i ta tatou angaanga tutu aere i te Patireia. Totou a Iesu e ka tupu maata teia angaanga i muri ake i tona mate anga. (Ioa. 14:12) I muri ake i to Iesu mate anga, kua oki akaou tetai pae o tana au pipi i te tautai. I muri ake i tona tuakaouanga, kua akatupu a Iesu i tetai kai anga ika na tana au pipi na roto i te semeio. Kua taangaanga aia i te reira atianga no te akapapu e e puapinga maata atu ta ratou angaanga ei ravakai tangata i tetai ua atu angaanga. (Ioa. 21:15-​17) I mua ake ka oki ei a Iesu ki te rangi, akakite aia ki tana au pipi e ko te angaanga tutu aere tana i akamata, ka totoa atu te reira mei ia Iseraela e aere ua atu. (E tatau ia Angaanga 1:​6-8.) I te au mataiti i muri mai, oronga a Iesu i tetai orama ki te apotetoro ko Ioane, ei akaari kiaia eaa te ka tupu “i te rā o te Atu ra.” * Tetai au mea, ta Ioane i kite ko tetai tupuanga umere: I raro ake i te aratakianga a te angera, te tutu aereia ra “te evangelia mutu kore” ki “te pa enua katoa, e te au kopu, e te au reo, e te au iti-tangata.” (Apo. 1:​10; 14:6) Taka meitaki, to Iehova anoano no tatou i teia tuatau kia rave i te  angaanga tutu aere e tae ua atu ki te tuatau e akamutu ei te reira.

6. Akapeea tatou me akamou meitaki ki runga i te angaanga tutu aere?

⁶ Ka akamou meitaki tatou ki runga i te angaanga tutu aere me akamanako tatou i te maata o ta Iehova i rave no te tauturu ia tatou. Ei akaraanga, te oronga maira aia i te au kai pae vaerua na roto i te au puka tei neneiia e te au puka digital, te au apinga akatangi e te au vitio, e te au broadcast Initaneti. Akamanako ana: I runga i ta tatou website, te vaira e tere atu i te 1,000 reo! (Mata. 24:45-​47) I teianei ao tei pueurikiriki te turanga o te poritiki, te akonoanga, e te kimi puapinga, e tere atu i te varu mirioni au tavini o te Atua tei taokotaiia i te ao katoa. Ei akaraanga, i te Varaire, Aperira 19, 2019, kua taokotai te Au Kite o Iehova i teianei ao no te uriuri i te tia no te rā. I te reira aiai, kua akaputu mai tetai urupu tangata e 20,919,041 no te akono i te Akamaaraanga o te mate anga o Iesu. Te akakeuia nei tatou kia akamou meitaki ki runga i te angaanga Patireia, me akamanako tatou e e tuanga tatou no teia tupuanga umere i teia tuatau.

7. Akapeea to Iesu akaraanga me tauturu ia tatou kia akamou meitaki ki runga i te tutu aere?

⁷ Tetai mataara ka akamou meitaki tatou ki runga i te tutu aere na te aru anga i to Iesu akaraanga. Kare aia i akatika ana i tetai apinga kia tamanamanata i tana angaanga tutu aere. (Ioa. 18:37) Kare aia i akavareia ana i te oronga anga a Satani i “te au basileia katoa o te ao nei, e to ratou kakā”; kiaia e kare katoa aia i timataia te inangaro anga tetai pae i te akariro iaia ei ariki. (Mata. 4:8, 9; Ioa. 6:​15) Kare aia i akanauruia e te anoano no te apinganui; e kare katoa aia i mataku ana i te patoianga pakari. (Luka 9:​58; Ioa. 8:​59) Me timataia to tatou akarongo, ka akamou meitaki tatou me akamaara tatou i te ako a te apotetoro ko Paulo. Akamaroiroi aia i te au Kerititiano kia aru i to Iesu akaraanga “kia kore oki e taitaia to [ratou] ngakau”!​—Ebe. 12:3.

8. Eaa te akakoromaki, e eaa ra ka anoanoia ai i teianei?

⁸ Me akakoromaki tatou ka tiaki marie tatou no tetai turanga kia taui. Me te tapapa atura tatou ki te openga o tetai turanga tau kore e kia akatupuia tetai anoano, ka akakoromaki tatou. Kua tiaki marie atu te peroveta ko Habakuka kia ope te au turanga takinokino i Iuda. (Haba. 1:2) Kua tapapa atu te au pipi a Iesu e ka “kitea mai” te Patireia e ka akaoraia ratou mei te takinokinoanga a Roma. (Luka 19:11) Te tiaki atu nei tatou i te rā me takore te Patireia o te Atua i te kino e ka apai mai i tetai ao ou ma te tuatua tika. (2 Pete. 3:​13) Inara, ka anoanoia tatou kia akakoromaki e kia tiaki marie i to Iehova tuatau tau. Akamanako ana i tetai au mataara, te apii maira a Iehova ia tatou kia akakoromaki.

9. Eaa te au akaraanga te akatutu ra i to Iehova akakoromaki?

⁹ Te akanoo ra a Iehova i te akaraanga meitaki no te akakoromaki. Kua oronga aia i tetai tuatau no Noa kia patu i te araka e kia tavini ei “tangata i ako i te tuatua-tika ra.” (2 Pete. 2:5; 1 Pete. 3:​20) Kua akarongo a Iehova kia Aberahama i tona ui putuputu anga kiaia no Tana ikianga kia takore i te iti tangata o te nga oire kino ko Sodoma e Gomora. (Gene. 18:20-​33) E anere ua atu mataiti, to Iehova akakoromaki anga i te iti tangata akarongo kore ko Iseraela. (Nehe. 9:​30, 31) Te kite  nei tatou i to Iehova akakoromaki i teia tuatau, iaia e oronga ra i tetai tuatau “kia rauka katoatoa ra te tataraara.” (2 Pete. 3:9; Ioa. 6:​44; 1 Timo. 2:3, 4) Te riro nei to Iehova akaraanga ei tumu meitaki kia akakoromaki, ia tatou e tutu aere nei e te apii nei i te tangata. Apii katoa aia ia tatou kia akakoromaki na roto i tetai akatutuanga i roto i tana Tuatua.

10. Ia Iakobo 5:7, 8, eaa te apiianga puapinga no te akaraanga o te tangata tanutanu?

¹⁰ E tatau ia Iakobo 5:7, 8. Te akaraanga o te tangata tanutanu, te apii maira ia tatou kia akakoromaki. E tika, ka tupu viviki tetai au kai. Inara tetai pae ua rakau, ka roa te tupuanga e te pakari anga. E ono marama te tuatau tupuanga kai i Iseraela. Ka tanu aia i tana au ua i muri ake i te topa anga ua mua i te tuatau pururu anga rakau, e kua kokoti i te ua kai i muri ake i te tuatau ua openga i te tuatau tupuanga rau. (Mare. 4:​28) Kia aru meitaki tatou i te tu akakoromaki o te tangata tanutanu. Inara, penei kare teia i te mea māmā.

11. Akapeea te akakoromaki me tauturu ia tatou i te tutu aere?

¹¹ E inangaro ana te tangata i te tupuanga viviki mei ta ratou angaanga e tauta ra i te rave. Inara, me inangaro tatou i ta tatou aua kai kia uua, e akono meitaki tatou i te reira​—te keri anga, te tanu anga, te vaere anga, e te pipi anga. Te anoano katoaia ra tatou kia maroiroi i te angaanga apii i te pipi. Ka pou te tuatau no te vaere i te au ngangaere o te tu papakitai e te tu iriiri tangata i te aronga ta tatou e apii ra. Na te akakoromaki e tauturu ia tatou kia kore e taitaia me tupu te manamanata. Me inangaro te tangata i te akarongo e te apii, ka akakoromaki rai tatou. Kare tatou e māro i te tangata apii Pipiria kia tupu viviki tona akarongo. I tetai au taime, kua marie rai te mārama o te au  pipi a Iesu no tana i apii kia ratou. (Ioa. 14:9) E akamaara tatou e na tatou e tanu e te pipi, na te Atua ra e akatupu.​—1 Kori. 3:6.

12. Akapeea tatou me akakoromaki me tutu aere ki te au kopu tangata kare e irinaki ana?

¹² Tetai ngai e ngata ana ia tatou i te akakoromaki me tutu aere ki te au kopu tangata kare e irinaki ana. Ka riro te kaveinga ia Koheleta 3:1, 7 ei tauturu ia tatou. Akakite ra: “E tuatau to te muteki ua, e e tuatau to te tuatua.” Ka riro to tatou tu meitaki ei tutu aere, ka aruaru ra tatou i te tutu aere i te tuatua mou. (1 Pete. 3:1, 2) Ka akakoromaki tatou i te au tu tangata​—kapiti mai te ngutuare tangata​—ia tatou e tutu aere ra e te apii ma te maroiroi.

13-14. Eaa tetai au akaraanga o te tu akakoromaki ta tatou ka aru?

¹³ Ka apii tatou i te tu akakoromaki o te au akaraanga tiratiratu i roto i te Pipiria pera katoa i teia tuatau. Kua tiaki marie a Habakuka kia ope te tuatau kino, e kua akapapu aia: “E tu au ki runga i toku are tiaki anga.” (Haba. 2:1) Akakite te apotetoro ko Paulo i tona anoano no te “akaoti” i tana angaanga tutu aere. Inara, kua akakoromaki ua aia “kia akakite ua atu [aia] i te evangelia.”​—Anga. 20:24.

¹⁴ Akamanako ana i te akaraanga o tetai tokorua akaipoipo no roto mai i te apii Gileada e kua tukuia ki tetai enua e meangiti ua te Au Kite e e maata te akonoanga kare i te Kerititiano. Kare e tangata e inangaro i te apii i te Pipiria. Inara, kua tuku mai te au oa apii Gileada i ta ratou au ripoti meitaki no te reira au enua i ta ratou apii Pipiria meitaki e rave ra. Noatu e marie ta raua angaanga e rave ra, kua akakoromaki ua te tokorua i te rave i ta raua angaanga tutu aere. I muri ake i te tutu aere anga e varu mataiti e e meangiti ua tei akarongo mai, kua kite raua i te rekareka i te papetitoia anga tetai o ta raua aronga apii Pipiria. Eaa ta teia au akaraanga taito e to teia tuatau e apii maira? Kare teia aronga tiratiratu i akaparuparu ana e i tāpu ana i to raua rima e kua tutaki a Iehova i to raua tu akakoromaki. “Ei aru ra [tatou] i te aronga i rauka tei tuatuaia maira i te akarongo e te akakoromaki.”​—Ebe. 6:​10-​12.

15. Eaa tetai mataara ka akamaroiroi te akarongo ia tatou kia tutu aere?

¹⁵ Irinaki tatou i te karere ta tatou e tutu aere ra, ma te aruaru i te tutu aere i te reira ki te tangata. Irinaki tatou i te au taputou i roto i te Tuatua a te Atua. (Sala. 119:42; Isa. 40:8) Kua kite ana tatou i te au totou Pipiria tei akatupuia i to tatou tuatau. Kua kite ana tatou i te tangata me taui i to ratou oraanga me taangaanga ratou i te ako a te Pipiria. Ka akamaroiroi teia ia tatou e e karere teia nuti meitaki o te Patireia na te katoatoa.

16. Ia Salamo 46:​1-3, akapeea te irinaki ia Iehova e Iesu te akamaroiroi anga ia tatou kia tutu aere?

¹⁶ Irinaki tatou ia Iehova e koia te Tumu o te karere ta tatou e tutu aere nei, e koia tei akaterono ia Iesu ei Ariki no te Patireia. (Ioa. 14:1) Noatu eaa te ka tupu, ka riro ua rai a Iehova ei akapuanga e te akamaroiroi ia tatou. (E tatau ia Salamo 46:​1-3.) Pera katoa, papu ia tatou e te arataki nei a Iesu i te angaanga tutu aere mei te rangi mai, te taangaanga anga i tona mana taoonga ta Iehova i oronga kiaia.​—Mata. 28:18-​20.

17. Oronga mai i te akaraanga kia tutu aere ua atu.

¹⁷ Ka akamatutu to tatou akarongo ia  tatou e ka akameitaki a Iehova ia tatou. (Kohe. 11:6) Ei akaraanga, e aaere ua ana e tauatini ua atu tangata na te pae i ta tatou pereoo puka. E meitaki ainei teia ravenga tutu aere? Ae! Kua ripoti Ta Tatou Angaanga Patireia o Noema 2014 i tetai tamaine apii teitei tei inangaro i te tata i tetai tua no runga i te Au Kite o Iehova. Kare i kitea e ïa tetai Are Uipaanga Patireia, inara kua kite aia i ta tatou pereoo puka, e kua kitea katoa te au puka no tana tua. I te openga, kua riro mai aia ei Kite papetitoia, te painia tamou nei aia. Ka akakeu teia au tupuanga ia tatou kia tutu aere no te mea te vaira rai te tangata kia kite e kia akarongo i te karere o te Patireia.

18. Eaa tatou i papu ei ka akaotiia te angaanga tutu aere i te Patireia i ta Iehova i anoano ra?

¹⁸ Papu ia tatou e ka akaotiia te angaanga tutu aere i te Patireia kare e tavarevare. Akamanako ana i tei tupu i te au tuatau o Noa. Kua akapapu mai a Iehova e Koia te Tiaki meitaki o te ora. E 120 mataiti i mua atu, kua akatano a Iehova i te tuatau no te Vaipuke kia akamata. E ngauru ua atu mataiti i muri mai, kua akaue a Iehova ia Noa kia patu i te araka. Penei e 40 me kore e 50 mataiti i mua ake ka akamata ai te Vaipuke, kua rave ua a Noa i te angaanga. Noatu kare te tangata i akarongo mai ana kiaia, kua tutu aere ua aia i te karere akamatakite anga e tae ua atu ki te taime i karanga ai a Iehova e e apai i te manu ki roto i te araka. I reira i te ora tau, “na Iehova i popani” i te ngutupa.​—Gene. 6:3; 7:​1, 2, 16.

19. Eaa ta tatou ka tapapa atu kia kore e tāpu i to tatou rima?

¹⁹ Kare e roa ka akaoti a Iehova i te angaanga tutu aere i te Patireia; e ka “popani” aia i te ngutupa o te akatereanga a Satani e ka apai mai i te ao tuatua tika. Ka aru tatou i te akaraanga o Noa, Habakuka, e tetai pae tei kore i tāpu i to ratou rima e tae ua atu ki te reira taime. E akamou meitaki tatou, e akakoromaki, e akamatutu i te akarongo ki roto ia Iehova e tana au taputou.