1. Eaa ta Iesu patianga ki te au ravakai tokoa, e eaa ta ratou i rave?

E ARONGA tautai te au pipi ko Petero, Anederea, Iakobo, e Ioane. Akamanako ana i to ratou poitirere i te rongo anga i ta Iesu patianga: “Ka aru mai iaku, e akariro au ia [kotou] ei ravakai tangata.” * Eaa ta ratou i rave? Karanga te Pipiria: “Akaruke iora [ratou] i ta [ratou] puke kupenga i reira, e kua aru maira iaia.” (Mata. 4:​18-​22) Riro ta ratou ikianga ei taui i to ratou oraanga. Kare i te tautai ika, mari ra “e tangata ta [ratou] e rauka.” (Luka 5:​10) I teia tuatau, te pati nei rai a Iesu i te aronga ngakau tae tei inangaro i te tuatua mou. (Mata. 28:19, 20) Kua āriki ainei koe i ta Iesu patianga kia riro ei tangata ravakai?

2. Eaa te tumu kia akamanako meitaki tatou i te ikianga kia riro mai ei ravakai tangata, e eaa te ka tauturu ia tatou kia rave i teia iki anga?

² Penei te tere nei taau apii Pipiria ki mua e te manako nei koe kia riro mai ei papuritia no te nuti meitaki. Penei te emiemi ra koe i te āriki i ta Iesu patianga, eiaa e taitaia. Penei te emiemi ra koe no te mea e ikianga puapinga teia kia koe. E tika, karanga te Pipiria e kua akaruke “iora” a Petero e tona au taeake i ta ratou kupenga. Inara, kare a Petero e tona teina i rave viviki ana i teia ikianga. Kua āriki takere raua ia Iesu ei Mesia e ono marama i mua ake ana. (Ioa. 1:​35-​42) Aiteite rai, penei kua apii takere koe  no runga ia Iehova e Iesu, e te inangaro nei koe kia tere ki mua i te pae vaerua. Inara, eiaa koe e rave viviki i teia ikianga. Eaa tei tauturu ia Petero, Anederea, e tetai pae kia rave i ta ratou ikianga?

3. Eaa te au tu ka akamaroiroi ia koe kia āriki i ta Iesu patianga?

³ E aronga akakeuia, kite, ngakau toa, e te ako ia ratou uaorai, ta Iesu au pipi mua. Kua tauturu teia au tu ia ratou kia riro ei au ravakai tangata meitaki. Ka uriuri teia atikara akapeea me akatupu i teia au tu kia riro koe ei pipi meitaki na Karaiti.

4. Eaa tei akakeu ia Petero kia riro ei ravakai tangata?

⁴ Kua tautai ika a Petero no te angai i tona ngutuare. E angaanga reka na Petero te tautai. (Ioa. 21:​3, 9-​15) Kua apii katoa aia i te ravakai tangata. Ma te tauturu a Iehova, kite meitaki a Petero i teia angaanga.​—Anga. 2:​14, 41.

5. Ia Luka 5:​8-​11, eaa a Petero i mataku ei, e eaa te ka tauturu ia tatou kia akakore i teia au manako?

⁵ Kua tutu aere tatou no to tatou aroa ia Iehova; ko te anoano puapinga te reira i te rave i teia angaanga. Na to tatou aroa ia Iehova e akakore i tetai ua atu manako tau kore. Te patianga a Iesu ia Petero kia riro mai ei ravakai tangata, akakite aia: “Eiaa e mataku.” (E tatau ia Luka 5:​8-​11.) Kare a Petero i mataku ana e eaa te ka tupu kiaia me riro mai aia ei pipi. Mari ra, kua poitirere aia i te kai anga ika semeio ta Iesu i akatupu na ratou, e kua manako a Petero e kare aia i tau kia angaanga kia Iesu. Penei ka taitaia koe me  kite koe eaa te ka ō mai kia riro ei pipi na Karaiti. Me koia ia, e akamatutu i toou aroa no Iehova, e Iesu, e toou tangata tupu, e ka akakeuia koe kia āriki i ta Iesu patianga kia riro ei ravakai tangata.​—Mata. 22:37, 39; Ioa. 14:15.

6. Eaa atu te ka akakeu ia tatou kia tutu aere?

⁶ Akamanako ana i tetai au tumu i akakeuia ai tatou kia tutu aere. Ka akarongo tatou i te akaueanga a Iesu: “Ka aere kotou, e akariro . . . ei pipi.” (Mata. 28:19, 20) Ka tutu aere katoa tatou no te mea “kua mate [te tangata] i te roiroi e kua pueurikiriki keia” e te anoano ra i te apii i te tuatua mou no te Patireia. (Mata. 9:​36) Ka inangaro a Iehova i te au tu tangata kia apii i te tuatua mou e kia ora.​—1 Timo. 2:4.

7. Akapeea a Roma 10:13-​15 te akaari anga e e angaanga puapinga te tutu aere?

⁷ Ka akakeuia tatou kia rave i teia angaanga akaora me akamanako tatou i te meitaki ta te angaanga tutu aere ka akatupu. Ka oko e ka kai te tangata tautai i tana ika, ko tatou ra, ka “rauka” ia tatou te tangata e ka akaora ia ratou.​—E tatau ia Roma 10:13-​15; 1 Timo. 4:​16.

8-9. Eaa ta te tangata tautai ka anoanoia kia kite, e no teaa ra?

⁸ I to Iesu tuatau, kua anoanoia te tangata tautai Iseraela kia kite i te tu ika tana ka rauka. (Levi. 11:​9-​12) Ka anoano katoaia aia kia kite eaa te ngai ka tautai. Kua matauia e e noo ana te ika i te ngai e maata te kai. E mea puapinga te tuatau ka rave te tangata tautai i tana angaanga? Eaa te taime tau no te tautai, teia ta tetai Kite i te enua Patipika i karanga i tona patianga i tetai mitinari kia aere raua ka tautai. Karanga te mitinari e, “Ka aravei au ia koe i te ora iva apopo i te popongi.” Pau mai te taeake, “Kare. Ka aere taua me kai te ika, kare i to taua tuatau.”

⁹ Pera katoa, kua aere te au ravakai tangata o te anere mataiti mua ki te ngai te reira te “ika” i te tuatau tau. Ei akaraanga, kua tutu aere te au pipi a Iesu i ko i te iero, te sunago, mei tera are ki tera are, e te ngai okooko anga. (Anga. 5:​42; 17:17; 18:4) Ka anoanoia tatou kia kite i te au tu o te tangata e noo ra i ta tatou ngai ka tutu aere. Ka anoanoia tatou kia tutu aere ua ki te tangata.​—1 Kori. 9:​19-​23.

10. Eaa te au apinga tauturu ta te akaaerenga a Iehova i oronga mai?

¹⁰ Ka inangaro te tangata tautai i te apinga tautai meitaki e kia kite akapeea me taangaanga i te reira. Kia papa meitaki katoa tatou no ta tatou angaanga. Ka anoanoia tatou kia kite akapeea me taangaanga i teia au apinga tautai. Kua oronga a Iesu i te ikuikuanga taka meitaki ki tana au pipi e akapeea me ravakai tangata. Akakite aia e eaa te ka apai, ka tutu aere kiea, e eaa te ka tuatua. (Mata. 10:​5-7; Luka 10:​1-​11) I teia tuatau, kua oronga mai te akaaerenga a Iehova i te au Apinga Apii kia riro tatou ei aronga apii meitaki. * Apiiia tatou kia kite i te taangaanga i teia au apinga apii. Ka tauturu te reira ia tatou kia karape i ta tatou angaanga tutu aere.​—2 Timo. 2:​15.

11. Eaa te tumu kia ngakau toa te au ravakai tangata?

¹¹ Inangaroia te aronga tautai kia  ngakau toa. Tetai taime ka tupu te reva kino i te moana. E angaanga putuputu ana ratou i te po e i te au ngai ka tupu viviki te reva kino. Ka anoanoia te ravakai tangata kia ngakau toa. Me tutu aere tatou e te akakite e e Au Kite tatou no Iehova, penei ka kite tatou i te “reva kino” mei te patoi anga a te kopu tangata, te akakino anga a te au taeake, e ka patoi ratou i ta tatou karere. Kare tatou e poitirere. Akamatakite mai a Iesu e ka tono aia i tana au pipi ki roto i te au ngai uriia.​—Mata. 10:16.

12. Ia Iosua 1:​7-9, eaa te ka tauturu ia tatou kia akamatutu i te tu ngakau toa?

¹² Akapeea koe me akamatutu i toou tu ngakau toa? Te mea mua, e irinaki e te arataki nei rai a Iesu i teia angaanga mei te rangi. (Ioa. 16:33; Apo. 14:14-​16) Te rua, e akaketaketa i toou akarongo ki roto i te taputou a Iehova e ka akono aia ia koe. (Mata. 6:​32-​34) Ko te ketaketa atu i toou akarongo, ka ngakau toa rai koe. Akaari a Petero e tona au taeake i te akarongo mou te akaruke anga ratou i ta ratou angaanga no te aru ia Iesu. Kua akaari katoa koe i te akarongo mou i toou akakite anga ki te au taeake e te ngutuare tangata e kua akamata koe i te apii i te Pipiria ki te Au Kite o Iehova e te aere ki ta ratou uipaanga! Kare e ekoko anga, kua rave koe i tetai au taui anga maata i toou oraanga, e rauka ai ia koe i te aru i ta Iehova turanga  tau. Kua anoano katoaia te akarongo e te ngakau toa. Ia koe e akamatutu ra i toou tu ngakau toa, ka papu ia koe “tei vaitata katoao oki to Atua ko Iehova ia koe i to au aerenga katoa ra.”​—E tatau ia Iosua 1:​7-9.

13. Akapeea te akamanako anga e te pure me tauturu ia koe kia ngakau toa?

¹³ Eaa atu tetai ravenga kia akamatutu i toou tu ngakau toa? E pure no te ngakau toa e te mataku kore. (Anga. 4:​29, 31) Ka pau mai a Iehova i taau pure e kare rava aia e akaruke ia koe. Papa ua aia i te tauturu ia koe. E akamanako katoa akapeea a Iehova i te akaora anga i tetai pae i te tuatau i topa. E akamanako rai, akapeea aia i te tauturu anga ia koe kia akakore i te au manamanata e kua akamaroiroi ia koe kia rave i te au tauianga i toou oraanga. Papu ko Tei arataki i tona iti tangata na roto i te Tai Muramura e ka tauturu aia ia koe kia riro ei pipi na Karaiti. (Exo. 14:13) Kia papu mei te tata salamo tei karanga: “Tei iaku a Iehova, kare au e mataku; eaa ta te tangata kia rave mai iaku?”​—Sala. 118:6.

14. Eaa taau i apii mai mei te tupuanga o Masae e Tomoyo?

¹⁴ Tetai ravenga ke kia ngakau toa na te apiianga akapeea a Iehova i te tauturu anga i te aronga akama kia ngakau toa. Akamanako ana i te tupuanga o tetai tuaine ko Masae. E akama tona i te tutu aere ki te tangata. Te manako anga i te tuatua ki te aronga ke kua aite te reira mei te patu toka teitei kare e rauka iaia i te piki. No reira kua tauta aia i te akamaata i tona aroa no te Atua e no tona tangata tupu. Kua akamanako aia i te au tuatau rapurapu ta tatou e noo nei e kua pure no te tauturu kia tutu aere. Kua kore tona mataku e kua tavini ei painia tamou. Ka tauturu katoa a Iehova i te au papuritia ou “kia matutu.” Teia te tupuanga o te tuaine ko Tomoyo. I tona tutu aere anga mei tera are ki tera are, te tuatua mua ta tetai vaine i kapiki mai: “Kare au e inangaro i te kite atu i te Au Kite o Iehova!” e kua reru mai i te ngutupa. Akakite a Tomoyo ki tona taeake ma te ngakau toa e: “Te akarongo ra koe? Kare rava aku tuatua, e kua kite mai teia vaine e e Kite au no Iehova. Mataora tikai au!” Te tavini nei a Tomoyo ei painia tamou.

15. Eaa te aiteanga kia ako ia koe uaorai, e eaa i puapinga ai no te au Kerititiano?

¹⁵ Pouroa te aronga tautai meitaki e aronga ako ia ratou uaorai. Me ako ia koe uaorai, “ka akakeu koe ia koe uaorai kia rave i te angaanga tei tau kia raveia.” Ka ako te aronga tautai ia ratou uaorai kia tu vave ki runga, kia tautai e oti ua atu te angaanga, e kia tautai noatu te reva kino. Ka ako katoa tatou ia tatou uaorai kia akakoromaki e kia oti ta tatou angaanga.​—Mata. 10:22.

16. Akapeea e rauka ai ia tatou i te ako ia tatou uaorai?

¹⁶ Kare tatou i anauia mai ma te kite i te ako ia tatou uaorai. Mari ra, ka rave tatou i te tuanga māmā o te reira angaanga. No reira, ka anoanoia te tu akatere ia koe uaorai kia rauka i te ako ia koe uaorai. No reira, ka anoano tatou i te tauturu kia tereni ia tatou uaorai kia rave i te au mea tei ngata ia tatou i te rave. Te oronga maira a Iehova i te tauturu na roto i tona vaerua tapu.​—Gala. 5:​22, 23.

17. Ia 1 Korinetia 9:​25-​27, akapeea te apotetoro ko Paulo i te ako anga iaia uaorai?

 ¹⁷ Kua kite te apotetoro ko Paulo i te ako iaia uaorai. Inara kua anoanoia aia kia “moto” i tona kopapa e rauka ai iaia i te rave i tei tau. (E tatau ia 1 Korinetia 9:​25-​27.) Kua akamaroiroi aia i te katoatoa kia ako ia ratou uaorai e kia rave i te au mea ravarai “ma te tika e te manea.” (1 Kori. 14:40) Kia ako tatou ia tatou uaorai kia rauka tetai oraanga meitaki i te pae vaerua tei kapiti mai te angaanga putuputu i roto i te angaanga ravakai tangata.​—Anga. 2:​46.

18. Akapeea a Iehova me akara mai e kua autu tatou?

¹⁸ Ka puapinga te aronga tautai me maata ta ratou ika ka mou mai. Inara, kare tatou e akara ki te numero o te aronga ta tatou ka apai mai ki roto i te akaaerenga a te Atua. (Luka 8:​11-​15) Tera ua kia akakoromaki tatou i te tutu aere i te nuti meitaki e te apii i te katoatoa, ka akara mai a Iehova e kua autu tatou. Eaa te tumu? No te mea te akarongo nei tatou kiaia e tana Tamaiti.​—Mare. 13:10; Anga. 5:​28, 29.

19-20. Eaa atu tetai tumu ka tutu aere tatou i teianei?

¹⁹ I tetai au enua, ka akatika uaia te tautai i tetai au marama. I te reira au enua, ka akarapurapu te tangata tautai no te mea te vaitata maira te openga o te tuatau tautai. Ei au ravakai tangata, ka rapurapu tatou i teianei: No te mea te vaitata maira te tuatau openga! Te poto nei te tuatau no teia angaanga akaora. Eiaa e tavarevare e eiaa e tiaki no te tuatau tau kia piri ki roto i teia angaanga puapinga.​—Kohe. 11:4.

²⁰ E rapurapu i te akakeu ia koe uaorai, kia akamaata i toou kite i te Pipiria, kia ngakau toa, e kia ako ia koe uaorai. E piri ki te varu mirioni tuma aronga ravakai, e ka kite koe i te rekareka o Iehova. (Nehe. 8:​10) E aruaru kia piri koe ki roto i teia angaanga e e akaoti i te reira. Ka uriuri te atikara ka aru mai e toru ravenga kia akamaroiroi i te rave ua atu i te angaanga tutu aere i te Patireia ei au ravakai tangata.