1. Eaa te pirianga ka rauka i te au tangata tiratiratu i te akatupu kia Iehova?

I ROTO i to Iehova ngutuare, te kapiti maira a Iesu, koia “te Tama mua” o te au mea i angaia e te urupu angera. (Kolo. 1:15; Sala. 103:20) Ia Iesu i te enua nei, kua apii aia e ka rauka i te au tangata tiratiratu i te kapiki ia Iehova ei Metua no ratou. Te tuatua anga aia ki tana au pipi, kua kapiki a Iesu ia Iehova e ko “toku Metua ra e to kotou Metua.” (Ioa. 20:17) Me akatapu tatou i to tatou oraanga kia Iehova e kia papetito, ka kapiti atu tatou ki te au taeake e te au tuaine aroa.​—Mare. 10:29, 30.

2. Eaa ta tatou ka uriuri i roto i teia atikara?

² E ngata ana i tetai pae i te kapiki ia Iehova ei Metua aroa. Kare tetai pae e kite akapeea me akaari i te aroa ki te au taeake e te au tuaine. I teia atikara, ka uriuri tatou akapeea a Iesu te tauturu anga ia tatou kia kite ia Iehova ei Metua aroa e te akavaitata atu kiaia. Ka akara katoa tatou akapeea me aru i to Iehova akaraanga no te akono i te au taeake e te au tuaine.

3. Akapeea te pure a te Atu i te akavaitata anga ia tatou kia Iehova?

³ E Metua aroa a Iehova. Inangaro a Iesu ia tatou kia kite ia Iehova mei tana e kite ra​—ei metua aroa e te maru, e kare ei metua akaueue e te kino. Kua akaari mai a Iesu i te reira na roto i tana pure i apii ki tana au pipi. Akamata aia na te tuatua anga: “E to matou Metua.” (Mata. 6:9) Ka rauka ua ia Iesu i te karanga e kia kapiki tatou ia Iehova e  ko te “Mana Katoatoa,” ko “Tei Anga,” e te “Ariki au mutu kore”​—tona au taoonga i roto i te Pipiria. (Gene. 49:25; Isa. 40:28; 1 Timo. 1:17) Inara, kua taangaanga a Iesu i te tuatua “Metua.”

4. Akapeea tatou e kite ei e te inangaro ra a Iehova ia tatou kia akavaitata atu kiaia?

⁴ E ngata ana ainei ia koe i te akara ia Iehova ei Metua aroa? Te pera ra tetai pae. Ka ngata i tetai pae i te āriki e metua aroa tetai no te tu kino i utuutuia mai ei ratou. Mea pumaana i te kite e kua mārama a Iehova i to tatou turanga! Inangaro aia i te akavaitata mai kia tatou. Karanga te Pipiria: “E akavaitata atu ki te Atua, e nana e akavaitata mai kia kotou na.” (Iako. 4:8) Te inangaro maira a Iehova ia tatou, e pera katoa koia te Metua meitaki rava atu no tatou.

5. Ia Luka 10:22, akapeea a Iesu te tauturu anga ia tatou kia akavaitata atu kia Iehova?

⁵ Ka tauturu a Iesu ia tatou kia akavaitata atu kia Iehova. Kua kite meitaki a Iesu ia Iehova e kua akaata mai aia i Tona au tu, i karanga ai aia: “Ko te akara mai iaku nei, kua akara ïa i te Metua.” (Ioa. 14:9) Mei tetai tuakana rai, ka apii a Iesu ia tatou akapeea me akangateitei e te akarongo ki to tatou Metua, me kopae i te akamareka kore Iaia, e kia rekareka Aia ia tatou. Kua akaari mai to Iesu oraanga i te enua nei e e tu takinga meitaki e te aroa to Iehova. (E tatau ia Luka 10:22.) Teia tetai au akaraanga.

6. Oronga mai i tetai akaraanga akapeea a Iehova te akarongo anga kia Iesu.

⁶ E akarongo ana a Iehova ki tana tamariki. Akamanako i te tu te akarongo anga a Iehova ki tana Tama mua. Ia Iesu i te enua nei, e maata te taime i pure ei aia kia Iehova. (Luka 5:16) Kua akarongo a Iehova kia Iesu te pure anga no te au ikianga puapinga, te iki anga i tana apotetoro e 12. (Luka 6:12, 13) Te pure anga a Iesu i tona tuatau taitaia. I mua ake ka pikikaaia ai aia, kua pure a Iesu ki tona Metua no te au timataanga ka tupu kiaia. Kare a Iehova i  akarongo ua ki ta Iesu pure, kua tono katoa aia i tetai angera kia akamaroiroi i Tana Tamaiti.​—Luka 22:41-44.

7. Mei teaa toou tu te kite anga e te akarongo maira a Iehova ki ta tatou pure?

⁷ I teia tuatau, te akarongo nei rai a Iehova ki te pure a tona au tavini, e ka pau aia i te reira i te tuatau tau tikai. (Sala. 116:1, 2) Kua tupu ana teia ki tetai tuaine i Initia. Kua rokoia aia e te maki taitaia kino o te ngakau, e kua pure akatenga aia kia Iehova no runga i te reira. Tata aia: “Kua tano meitaki te au manako i roto i te JW Broadcasting^® o Me 2019 kiaku, koia oki ta tatou ka rave me tupu mai te au manako taitaia. Ko te pauanga teia ki taku pure.”

8. Akapeea a Iehova i te akaarianga i tona inangaro no Iesu?

⁸ Ka akaari a Iehova i tona inangaro no tatou, mei te tu i akaari ei aia i te reira kia Iesu i tona tuatau taitaia i te enua nei. (Ioa. 5:20) Kua tauturu aia ia Iesu i te pae vaerua, te pae ngakau, e te pae kopapa. E kua akaari ua rai a Iehova i tona inangaro e tona tu mareka no tana Tamaiti. (Mata. 3:16, 17) Kua kite a Iesu e te vaitata ua maira tona Metua kiaia, kare rava aia i maromaroa ana.​—Ioa. 8:16.

9. Eaa te au akapapuanga e te aroa maira a Iehova ia tatou?

⁹ Mei ia Iesu rai, kua kite ana tatou pouroa i to Iehova aroa maata no tatou. Akamanako ana: Kua akavaitata mai a Iehova ia tatou kiaia, kua oronga mai i tetai ngutuare pae vaerua aroa e te meitaki kia mataora tatou e kia akamaroiroi ia tatou. (Ioa. 6:44) Oronga katoa mai a Iehova i te au kai pae vaerua. E kua tauturu katoa mai ia tatou i te pae kopapa. (Mata. 6:31, 32) Me akamaara tatou i to Iehova aroa no tatou, ka maata atu to tatou inangaro iaia.

10. Eaa ta tatou ka apii mai mei ta Iehova akono anga i te au taeake e te au tuaine?

¹⁰ Te inangaro ra a Iehova i te au taeake e te au tuaine. Inara, penei i tetai taime, ka ngata ia tatou i te akaari i te aroa kia ratou. No te mea e tukeke ta tatou au peu e to tatou au turanga. E rave ana tatou i te au tarevake te ka akamareka kore i tetai ke. Noatu te reira, ka rauka rai ia tatou i te aroa atu i to tatou au taeake pae vaerua. Akapeea? Na te aru anga i to tatou Metua, te akaari anga i te aroa ki te au taeake e te au tuaine. (Ephe. 5:1, 2; 1 Ioa. 4:19) Akara tatou eaa ta tatou ka apii mai mei te akaraanga o Iehova.

11. Akapeea a Iesu te akaari anga i to Iehova tu “ngakau aroa”?

¹¹ E akaari ana a Iehova i te “ngakau aroa.” (Luka 1:78) Ka mamae tetai tangata ngakau aroa me kite aia i tetai ke e takinokinoia ra; e ka kimi aia i tetai ravenga no te tauturu e te akapumaana ia ratou. Kua akaari a Iesu i to Iehova tu, na roto i te tu i akono ei aia i te tangata. (Ioa. 5:19) Te kite anga a Iesu i tetai urupu tangata, kua “aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mata. 9:36) E maata atu ta Iesu i rave. Kua akaora aia i te aronga maki, e kua akamaroiroi i te aronga ‘i roiroi e te teiaa te apainga.’​—Mata. 11:28-30; 14:14.

12. Oronga mai i tetai akaraanga akapeea me akaari i te tu ngakau aroa.

¹² I mua ake ka akaari ei tatou i te tu ngakau aroa ki te au taeake e te au tuaine, ka kimi tatou eaa to ratou au manamanata. Ei akaraanga, penei e maki kino to  tetai tuaine. Kare aia e kopekope ana i te reira, inara penei ka inangaro aia i tetai tauturu. Akapeea aia te akono anga i tona ngutuare tangata i te pae kopapa? Ka anoano ainei aia i tetai tauturu no te tunu kai e te tāmā i te are? Penei kua ngere tetai taeake i tana ngai angaanga moni. Ka tauturu ainei tetai manga moni iaia, ma te oake ngaro ua, kia kitea roa mai tetai ngai angaanga ou nana?

13-14. Akapeea tatou me akaari i te tu oronga ua mei ia Iehova rai?

¹³ E tu oronga ua to Iehova. (Mata. 5:45) Kare tatou e tiaki kia pati roa mai te au taeake e te au tuaine i tetai tauturu. Mei ia Iehova rai, ka tauturu tatou ia ratou i mua ake ka pati mai ei ratou i tetai tauturu. Kua maani aia i te rā kia iti mai noatu kare tatou i pati ana i te reira! E ka puapingaia te katoatoa mei te rā, kare ko te aronga meitaki ua. Ka āriki ainei koe e na te rave anga i teia, te akaari maira a Iehova i tona aroa no tatou? Ka inangaro tatou ia Iehova no tona tu takinga meitaki e te oronga ua!

¹⁴ Me aru tatou i to tatou Metua i te rangi, ka akaari tatou i te tu oronga ua ki to tatou au taeake e te au tuaine. Ei akaraanga, i te 2013, kua akatupu te Uriia Maata ko Haiyan i te kino ki te enua ko te Philippines. Kua ngere te au taeake e te au tuaine i to ratou are e ta ratou au apinga. Inara kua aere mai to ratou au taeake pae vaerua takapini i te ao i te tauturu ia ratou. Maata tei oronga i te moni tauturu e tei piri ki te angaanga patu are. Kua akameitaki me kore kua patu akaou ratou mei tetai 750 are i roto i te mataiti okotai! Te tuatau o te maki COVID-19, kua tauturu te Au Kite i to ratou au taeake e te au tuaine. Me viviki tatou i te tauturu i to tatou au taeake pae vaerua, te akaari ra tatou i te inangaro no ratou.

15-16. Ia Luka 6:36, eaa ta tatou ka rave kia aru i te akaraanga o Iehova?

¹⁵ E tu aroa to Iehova e te akakore i te ara. (E tatau ia Luka 6:36.) E kite ana tatou i to Iehova aroa i te au rā ravarai. (Sala. 103:10-14) E tu apa ua to te au pipi a Iesu; inara kua aroa aia ia ratou e kua  akakore i ta ratou ara. Kua akaatinga aia i tona oraanga kia rauka ta tatou ara i te akakoreia. (1 Ioa. 2:1, 2) Kare ainei koe e inangaro i te akavaitata atu kia Iehova e Iesu no to raua tu aroa e te akakore i te ara?

¹⁶ Ka matutu atu to tatou aroa no te au taeake pae vaerua me “akakore” tatou i ta ratou ara. (Ephe. 4:32) Te tika, ka ngata i tetai au taime i te akakore i te ara a tetai ke, no reira ka tauta tatou. Karanga tetai tuaine e kua tauturu te atikara “Akakore i te Ara a Tetai e Tetai” iaia kia rave i te reira. * Tata aia: “Kua apii mai teia atikara iaku kia manako meitaki no runga i teia turanga. Akamārama mai te reira e ko te akakore i te ara a tetai ke, kare te aiteanga e kia āriki ua koe i te tu tarevake me kore kia akaiti i te kino tei raveia. Ko tona aiteanga, kare koe e riri ua atu no ta ratou tarevake e kia vai ua te ngakau ‘au.” Me akakore tatou i te ara a te au taeake e te au tuaine, te akaari ra tatou i te inangaro no ratou e te aru ra tatou i te akaraanga o Iehova.

17. Ia Mataio 5:16, akapeea tatou me akangateitei i to tatou Metua i te rangi?

¹⁷ E tikaanga ngateitei no tatou kia piri ki tetai ngutuare tangata aroa takapini i te ao. Ka inangaro tatou i te katoatoa kia piri mai ki te akamorianga i to tatou Atua. No reira, kare rava tatou e inangaro i te rave i tetai apinga te ka akakino i te ingoa o to tatou Metua i te rangi e tona iti tangata. Ka akaari tatou i te tu meitaki, kia inangaro te tangata i te apii no runga ia Iehova.​—E tatau ia Mataio 5:16.

18. Eaa te ka tauturu ia tatou kia tutu aere ma te ngakau toa?

¹⁸ Tetai taime, ka aviriia me kore ka takinokinoia tatou no to tatou tu tiratiratu kia Iehova. Akapeea me ka mataku tatou i te tuatua ki tetai ke no runga i te tuatua mou? Ka irinaki tatou e ka tauturu mai a Iehova e Iesu ia tatou. Akakite a Iesu ki  tana au pipi e auraka ratou e apiapi i ta ratou ka tuatua. Eaa te tumu? Karanga a Iesu, “E akakiteia mai kotou i te tuatua i reira ra. Kare oki ko kotou tei karanga atu, ko te vaerua ra o to kotou Metua tei tuatua i roto ia kotou na.”​—Mata. 10:19, 20.

19. Oronga mai i tetai akaraanga no tetai tangata tei tutu aere ma te ngakau toa.

¹⁹ Akamanako i te akaraanga o Robert. Koi akamata ua ake aia i te apii i te Pipiria e kare i maata tona kite, e kua tu atu aia ki mua i te akavaanga a te vaeau i Aperika Apatonga. Kua akamārama aia ki te akavaanga e kua inangaro aia kia vai takake ua no tona inangaro i tona au taeake Kerititiano. Kua akaperepere aia i tona ngai i roto i te ngutuare o Iehova! Kua ui te akava nui kiaia, “Koai ma toou au taeake?” Kua poitirere a Robert i teia uianga, inara kua maara iaia te tia no tera popongi. Tei roto ia Mataio 12:50: “Te akono i te inangaro o taku Metua i te ao ra, ko toku ïa taeake, taku tuaine, e taku metua vaine.” Noatu koi akamata ua ake a Robert i te apii i te Pipiria, kua tauturu te vaerua o Iehova iaia kia pau i tera uianga e tetai atu au uianga ke. Mea papu e kua mataora a Iehova ia Robert! Ka mataora katoa a Iehova ia tatou me irinaki tatou kiaia, e me tutu aere tatou ma te ngakau toa noatu te turanga ngata.

20. Eaa ta tatou ka tauta i te rave? (Ioane 17:11, 15)

²⁰ Kia akaperepere ua atu rai tatou i teia tikaanga manea kia piri ki roto i tetai ngutuare aroa. E Metua meitaki tikai to tatou e te au taeake e te tuaine tei inangaro maata ia tatou. Auraka tatou e akangaropoina i te reira. Te tauta nei a Satani e tona aronga kino i te akaekoko ia tatou no runga i to Iehova aroa, e te takino i to tatou pirianga taokotai. Inara, kua pure a Iesu e kua pati ki to tatou Metua kia tiaki ia tatou, e kia vai taokotai ua to tatou ngutuare. (E tatau ia Ioane 17:11, 15.) Te pau mai nei a Iehova i tera pure. Mei ia Iesu rai, auraka tatou e ekoko i te aroa e te tauturu a to tatou Metua i te rangi. Kia maroiroi ua atu rai tatou i te akavaitata atu ki to tatou ngutuare tangata pae vaerua.