1. Eaa te ka tupu me akaateaia tetai tei akaperepereia mei te putuputuanga?

KUA akaateaia ainei tetai o toou akaperepere mei te putuputuanga? Ka mamae te ngakau me tupu te reira! Karanga te tuaine ko Hilda, “Te mate anga taku tane i muri ake e 41 mataiti o to maua akaipoipoanga, kua manako tikai au e ko te mea kino teia i tupu kiaku. * Inara, te akarukeanga taku tamaiti i te putuputuanga, i tana vaine e te tamariki, ko te mea kino rava atu te reira.”

2-3. Ia Salamo 78:40, 41, eaa te ka tupu kia Iehova me akaruke tona au tavini iaia?

² Akamanako ana i te tu mamae ngakau o Iehova te akaruke anga tana uaorai au tamariki vaerua iaia! (Iuda 6) Akamanako katoa ana i tona mamae te kite anga i tona iti tangata akaperepereia, te ngati Iseraela, te putuputu o ta ratou meameaau anga atu iaia. (E tatau ia Salamo 78:40, 41.) Mea papu e ka mamae katoa to tatou Metua i te rangi me akaruke tetai o toou akaperepere iaia. Kua mārama aia i toou tu mamae e ka oronga aroa mai aia i te akamaroiroi e te tauturu taau ka anoano.

³ I roto i teia atikara, ka uriuri tatou akapeea e rauka ai ta Iehova tauturu me tupu teia kia tatou. Ka uriuri katoa tatou akapeea me tauturu i tetai ke i roto i te putuputuanga te na roto ra i teia manamanata. Inara mea mua, ka akara tatou i tetai manako tarevake kia kopae tatou.

4. Eaa te ka tupu ki te au metua me akaruke ta ratou tamariki ia Iehova?

⁴ Me akaruke tetai tamaiti me kore tamaine ia Iehova, e mea matau kia manako te au metua e, eaa atu ta ratou  ka rauka i te rave kia tavini ua rai te tamariki ia Iehova. Karanga te taeake ko Luke, “Te akaateaia anga taku tamaiti mei te putuputuanga, kua akaapa au iaku uaorai. E moemoea kino ana au no te reira. Tetai taime, ka aue au no te mamae o te ngakau.” Kua tupu katoa teia ki te tuaine ko Elizabeth, tei karanga, “Eaa taku tarevake i rave? Penei kare au i apii meitaki ana i taku tamaiti.”

5. Naai te apa me akaruke tetai ia Iehova?

⁵ E akamaara, kua oronga mai a Iehova kia tatou tatakitai i te tikaanga kia iki. Te aiteanga, na tatou rai e iki me ka tavini tatou iaia, e me kare. Tetai au tamariki kare e meitaki ana to ratou utuutuia anga mai, kua iki ratou i te tavini ia Iehova e kua puapingaia ta ratou tavinianga. Tetai pae, kua tauta to ratou au metua i te utuutu ia ratou kia aru i te au kaveinga Pipiria, kua iki ra ratou i te akaruke ia Iehova. Te taka ua ra, na tatou tatakitai anake e iki me ka tavini tatou ia Iehova. (Iosu. 24:15) No reira, ki te au metua e mamae nei, auraka e manako e noou te tarevake i tupu ei te reira!

6. Eaa te ka tupu ki tetai mapu me akaruke tona metua ia Iehova?

⁶ Tetai taime, ka akaruke tetai metua i te tuatua mou e pera tona ngutuare tangata. (Sala. 27:10) Ka riro teia ei mea taitaia tikai ki te tamariki tei akangateitei i teia metua. Karanga a Esther, kua akaateaia tona metua tane, “Kua aue putuputu au no te mea kua kite au e kare aia i aere marie atu ki vao, mari ra kua iki aia i te akaruke takiri ia Iehova. Inangaro au i toku metua tane, no reira te akaateaia anga aia, kua manata mai au iaia. Tetai taime ka tupu te manako taitaia maata kiaku.”

7. Eaa to Iehova manako no te au mapu kua akaateaia to ratou metua?

⁷ E te au mapu, me kua akaateaia tetai o to kotou nga metua, te tangi nei matou ia kotou! Kia papu katoa ia kotou e te kite maira a Iehova i to kotou mamae. Te inangaro e te akaperepere maira aia ia kotou no to kotou tu tiratiratu, e matou katoa​—to kotou au taeake e te tuaine. E akamaara, kare na kotou i rave i te ikianga a to kotou metua. Mei tei taikuia i mua ana, kua oronga a Iehova i te tikaanga ki te katoatoa kia iki. E ka anoanoia te aronga tei akatapu e tei papetitoia kia amo i ta ratou uaorai “apainga.”​—Gala. 6:5.

8. Eaa ta te ngutuare tangata ka rave ia ratou e tiaki ra i to ratou akaperepere kia oki mai kia Iehova? (Akara i te pia “ Oki Mai Kia Iehova.”)

⁸ Me akaruke tetai o toou akaperepere ia Iehova, e mea natura ua kia manako e a tetai rā ka oki mai aia kia Iehova. Eaa taau ka rauka i te rave i teianei? Ka rauka ia koe i te akamatutu i toou uaorai turanga pae vaerua. Me pera koe, te akanoo ra koe i tetai akaraanga meitaki no toou ngutuare, e penei no te tangata tei akaateaia. Ka rauka katoa ia koe te maroiroi kia akakoromaki i te mamae. Akara tatou i tetai au ravenga ka rauka ia tatou i te rave i te reira.

9. Akapeea koe me kimi i te tauturu a Iehova? (Akara i te pia “ Irava Akapumaana me Akaruke Toou Akaperepere ia Iehova.”)

⁹ Akanoo meitaki i tetai tuatau no te au mea pae vaerua. E mea puapinga kia akamatutu koe i toou akarongo e te akarongo o toou ngutuare tangata. Akapeea koe me rave i te reira? E kimi i te tauturu a Iehova na te tatau putuputu anga i te Pipiria, akamanako oonu i te reira, e kia aere putuputu ki te au uipaanga. Karanga a Joanna, kua akaruke tona metua tane e tona tuakana i te tuatua mou, “Ka maru toku ngakau me tatau au no runga i te au tangata i roto i te Pipiria mei ia Abigaila, Esetera, Iobu, Iosepha e Iesu. Riro to ratou akaraanga i te akamaroiroi iaku kia akakoromaki i toku mamae. Kua akamaroiroi katoa te au imene ou iaku.”

10. Ia Salamo 32:6-8, eaa ta tatou ka rave me tupu tetai manako taitaia?

¹⁰ E akakite i toou au manamanata kia Iehova. Me tupu tetai manako taitaia, auraka e akamutu i te pure kiaia. E pati akatenga ki te Atua kia tauturu ia koe kia kite i teia turanga mei tana e kite ra, e kia ‘apii atu ia koe, e akakite atu kia koe i taau arataa kia aere.’ (E tatau ia Salamo 32:6-8.) E tika, e mea ngata i te akakite kia Iehova i toou manako taitaia. Inara kua mārama meitaki a Iehova i toou mamae ngakau. Te inangaro maira Aia ia koe e te pati maira kia riringi i toou ngakau kiaia.​—Exo. 34:6; Sala. 62:7, 8.

11. Ia Ebera 12:11, eaa tatou ka irinaki ei ki ta Iehova akoanga? (Akara i te pia “ Akaateaanga i Tetai Mei te Putuputuanga​—Ta Iehova Akoanga Aroa.”)

¹¹ E turu i te ikianga a te aronga pakari. Ko te akaateaanga, e akanoonooanga te  reira na Iehova. Ka riro teia ei meitaki no te katoatoa i roto i te putuputuanga, e pera te tangata tei rave i te ara. (E tatau ia Ebera 12:11.) Penei ka akaapa tetai pae, te aronga tei uuna i tetai ua atu akakiteanga te ka akakino i te tangata rave ara, i te ikianga a te aronga pakari. Kare tatou i kite tikai i te au mea tei tupu. E mea meitaki i reira, kia irinaki tatou e kua aru te aronga pakari i te au kaveinga Pipiria ei akava “na Iehova.”​—2 Para. 19:6.

12. Eaa te meitaki tei tupu ki tetai pae no tei turu i ta Iehova akanoonooanga?

¹² Me turu koe i te ikianga a te aronga pakari kia akaateaia toou akaperepere, te tauturu ra koe iaia kia oki mai kia Iehova. Karanga a Elizabeth, tei taikuia i mua ana, “E mea ngata tikai i te tipu i toku pirianga ki taku tamaiti. Inara te oki anga mai aia kia Iehova, karanga aia e, kua tau rai kia akaateaia aia mei te putuputuanga. E maata tana i mārama no te reira e kua āriki aia i te akoanga a Iehova.” Karanga tana tane ko Mark, “I muri mai, kua akakite mai ta maua tamaiti e kua inangaro aia i te oki mai no te mea kua vai tiratiratu tona nga metua. Kua mataora tikai au e kua tauturu a Iehova ia maua kia vai tiratiratu.”

13. Eaa te ka tauturu ia koe kia akakoromaki i te mamae?

¹³ E tuatua ki te au taeake tei mārama i toou turanga. E piri ki te au Kerititiano tukatau te ka akamaroiroi ia koe. (Mase. 12:25; 17:17) Karanga a Joanna, tei taiku i mua ana, “Kua maromaroa tikai au. Inara na te pukapukaanga ki te au taeake irinakiia, kua akamaroiroiia au.” Akapeea i reira me ka tuatua tetai pae i roto i te putuputuanga i tetai apinga te ka tamamae ia koe?

14. Eaa ra tatou ka tauta ei i te “tauturu atu tetai ki tetai, e akakore tetai i ta tetai ara”?

¹⁴ E akaari i te tu akakoromaki ki te au taeake e te au tuaine. Te tika, e tuatua ana rai tetai pae i te au tuatua tarevake. (Iako. 3:2) E tu apa ua to tatou pouroa, no reira auraka e poitirere me kare te tangata e kite eaa tana ka tuatua me kore penei ka tuatua ratou i tetai apinga te ka tamamae ia koe. E akamaara i te tuatua a te apotetoro ko Paulo: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra.” (Kolo. 3:13) Karanga tetai tuaine kua akaateaia tetai o tona kopu tangata: “Kua tauturu a Iehova iaku kia akakore i te ara a te au taeake te rave ra i te mea tika.” Eaa ta te putuputuanga ka rauka i te rave no te tauturu te au ngutuare tangata tiratiratu?

15. Eaa te ka tauturu i te au taeake kua akaateaia to ratou akaperepere mei te putuputuanga?

¹⁵ E akaari i te tu oaoa ki te au taeake tei vai tiratiratu. Akakite te tuaine ko Miriam, e kua ngata iaia te aere ki te au  uipaanga te akaateaia anga tona tungane. “Kua mataku au i ta te au taeake ka tuatua mai. Inara, e maata te au oa meitaki tei akaari mai i to ratou tu mamae, e kare i akakino i toku tungane. No ta ratou tauturu, kare au i maromaroa.” Karanga tetai tuaine: “Te akaateaia anga ta maua tamaiti mei te putuputuanga, kua tae mai te au taeake i te akapumaana ia maua. Karanga tetai pae e kare ratou i kite eaa ta ratou ka tuatua. Inara kua aue ratou e kua tata ua mai i tetai reta kiaku. Kua riro ta ratou i rave i te akamaroiroi maata iaku!”

16. Akapeea te putuputuanga me oronga ua atu rai i te tauturu?

¹⁶ E tauturu ua atu rai i te ngutuare tangata tiratiratu. Ka anoano maata ratou i to kotou aroa e te akamaroiroi i teia taime tikai. (Ebe. 10:24, 25) I tetai au taime, ka manako te ngutuare tangata tei akaateaia to ratou akaperepere, e kua kopaeia ratou e te putuputuanga. Auraka e rave i te reira! Ka anoano te au mapu kua akaateaia to ratou metua i tetai akameitakianga e te akamaroiroi. Karanga a Maria, kua akaateaia tana tane e kua akaruke i te ngutuare tangata: “Kua aere mai te au taeake ki to matou kainga e kua tunu i te kai e te rave i ta matou akamorianga ngutuare. Kua mamae katoa ratou e kua aue kapiti matou. Ka paruru ratou iaku me tuatua akakinoia mai au. Kua akamaroiroi tikai ratou iaku!”​—Roma 12:13, 15.

17. Akapeea te aronga pakari me oronga i te tauturu?

¹⁷ E te aronga pakari, e tauta i te akamatutu i te akarongo o te au ngutuare tangata tiratiratu. E apainga puapinga ta kotou kia akapumaana i te au taeake kua akaateaia to ratou au akaperepere. (1 Tesa. 5:14) E akamaroiroi ia ratou i mua ake, e i muri ake i te au uipaanga. E atoro ia ratou e te pure kapiti kia ratou. E angaanga kapiti kia ratou i roto i te angaanga tutu aere, me kore e pati ia ratou ki taau akamorianga ngutuare. Ka anoanoia te au tiaki pae vaerua kia akaari i to Iehova aroa, tona tu tangi e te tauturu ka anoano tana au mamoe e mii ra.​—1 Tesa. 2:7, 8.

18. Ia 2 Petero 3:9, eaa ta te Atua i anoano no te aronga tei rave i te ara?

¹⁸ Kare a Iehova i anoano “kia mate atu tetai, kia rauka katoatoa ra e tataraara.” (E tatau ia 2 Petero 3:9.) Noatu ka rave tetai tangata i te ara kino, te akaperepere ra te Atua i tona oraanga. Akamanako ana i te oko maata ta Iehova i tutaki​—te atinga oko o tana Tamaiti akaperepere​—no te oraanga o te tangata ara. Kua oronga mai a Iehova i te tauturu e te inangaro ra ia ratou kia oki mai, mei ta tatou i kite i roto i te akatutuanga a Iesu no te tamaiti kaimoumou apinga. (Luka 15:11-32) Maata te aronga tei akaruke e kua oki mai ratou ki to ratou Metua aroa. E kua āriki akaou te putuputuanga ia ratou. Mataora a Elizabeth, tei taikuia i mua ana, te oki anga mai tana tamaiti kia Iehova. Karanga aia, “Rekareka tikai au i te akamaroiroi a te au taeake kia kore e tuku i te au.”

19. Eaa tatou ka irinaki ua rai ei kia Iehova?

¹⁹ Ka rauka ia tatou i te irinaki kia Iehova. Kare rava aia e rave i tetai apinga te ka tamamae ia tatou. E Metua oronga ua aia e te takinga meitaki, e te inangaro maata ra i te aronga te akamori ra iaia. E mea papu e kare rava a Iehova e akaruke ia koe me tupu te taitaia. (Ebe. 13:5, 6) Karanga a Mark, tei taikuia i mua ana, “Kare rava a Iehova i akaruke ana ia matou. Kua noo vaitata ua mai rai aia i to matou tuatau taitaia.” Ka oronga mai a Iehova i te “mana maata meitaki” kia koe. (2 Kori. 4:7) Ae, ka rauka ia koe i te vai tiratiratu noatu me akaruke tetai tei akaperepereia ia Iehova.